Ewe Mwitirin Kirekirochun Kot

Fitu ier ano, atun nei at a nimu ierin a feitto rei me apasa, “Papa, mi wor met uwa keran sinei. Uwa keran sinei pwe ekiseno chok ngonuk a wewen fansoun nakatam ngeni ei.”

Atun ewe Samon ika Noun Chon Angang ra apasa mettoch usun,” Ese chommong ran seni ewe fansoun” ika “Ewe fansoun ese towaweno” a tongeni ennetin wewen unusen manauach ika pwan mwirin.¹ An fansoun, me fan chommong minne fansoun A fori mettoch non, a sokkono seni ach fansoun. Nikitu mi auchea. Tiwenon chok sipwe nikitu, sise tongeni kaeo ika anganga ach nuku non Kot non manauach me manau ese muuch. Nge ai afanafan ikenai pwe, me non atun sia ewitiwiti ewe Samon ren nikitu, mi wor ekkoch feioch minne ra tori kich mwitirin iei chok.

Nupwen Alma me aramasan kewe ra fotek me ren ekkewe chon Leiman, ir mi iotek pwe repwe ngaseno. Rese mwitir ngaseno, nge atun ra witi ren nikitu ngeni ar repwe ngaseno, ewe Samon a pwaratiu An kirekiroch ren ekkoch feioch. Ren awewe, A mwitir ne apwetetei netipen ekkewe chon Laman pwe resap nireno. A pwan apechekuna noun Alma kewe aramas me apanano ar kewe achou minne a nom wor.² Mwirin och fansoun ra ngaseno iwe, Alma me aramasan ra sai ngeni Sarahemla ewe ia ra aporousa ngeni eu mwichen aramas mi ingeno usun met a fis ngenir. Ekkewe chon Sarahemla ir mi mwareiti, me “nupwen ra ekieki usun mwitirin kirekirochun Kot, me an manaman ne angasa Alma me pwin kewe seni ne poun ekkewe chon Leiman me seni fotek, ra anoumwongata neuwer me kinisou ngeni Kot.”³

Ewe mwitirin kirekirochun Kot epwe ngeni meinisin ion ekkewe repwe kokko ngeni I ren ennetin popun me unusen mochenin netip. Ei a pwan tori ekkewe ra siongeni non ar weires, nupwen ngaseno a usun nge ese tufich me ariaffou usun mi chok tameno, are pwan wateno.

Iwe ei usun ren emon kukkun soufos ewe a riaffou tori keukun tufichin non ewe nimengawen kanupus ngeni an poputa sio: “O Kot, ifaien?... Ifa tamen fansoun omw kesap awora aninis … ? Ewer, O Samon, ifa tamen fansoun … ?”⁴ Ren penuwan, ewe Samon ese mwitir ne angasa Joseph, nge a a mwitir ne awora kinamwe.⁵

Kot a pwan awora mwitirin apinukunuk pwe epwe wor fansoun ngaseno.⁶ Ese nifinifin met, ese nifinifin me ia, non Kraist are me ren Kraist mi wor ennetin apinukunukun kinamwe a tufich ngenikich.⁷ Mwitir eto ngeni kich.

Me pwan, A pwon: “Ai kinamwe esap pwan mwokut senuk.”⁸

Akkaewin, an Kot tong mi mwitir eto. Fiti Paul, ngang mi pwarata pwe esor met a tongeni “aimufeseni kich seni ewe tongen Kot, iei ach tong non Kraist Jises.”⁹ Pwan tori ach tipis, ra tongeni aimufeseni kich seni Ngunun ren ekkis fansoun, nge rese tongeni aimufesenikich seni An tong mi tori kich fansoun meinisin me mwitir.

Iwe iei ekkoch napanap me tufich minne “A mwitir ne efeiochu [kich].”¹⁰ Iei, pwe ekkei mettoch epwe awewe ngeni kich pwisin ikenai, upwe aporousa ngeni kemi met a fis ngeni ruemon aramas iwe manauer mi minen pwarata usun ewe mwitirin kirekirochun Kot.

Seni atun a emon fopun, Emilie a osukosuk ren safei mi ngaw. An a sotuni a poputa an fori fan chommong, nge mwirin ekkis fansoun ese tongeni kouno seni iwe a fotek ren non chommong ier, iwe non chok fitu fansoun mi mwoch ese fori. Emilie a tumunoch ne opano an osukosuk, akaewin mwirin a pupunu me emon iinenap.

Nepoputan an we a ngas seni ese mefi usun ennetin ngaseno. Eu minich, Emilie a fori orenien apechekunen inisin, mwirin chok, a fitano efoch sein pioing ngeni pioing. A poputa mefi ruko an a ekieki usun epwe kaimuno seni noun kewe, me punuwan, me imwan.

Na pwinin, an a akanaemon chok non eu rum mi pat, me kiroch, Emilie a kokkonatiw won an we pet me kekechiw. A kuf ngeni mefien niokus, me netipengaw, me ewe rochopwak mi chou non ewe rum me non ngunun, Emilie a ennetin ekieki pwe epwene mano non na pwiinin. Anaemon chok.

Non napanapan na, Emilie ren weires a angei ewe pechekun ne sokopen seni an ewe pet me fotupukutiw. An esor ekiekin pwisin, Emilie a unusen fangeta mochenin ngeni ewe Samon non an tutungor, “Maing Kot, Ngang mi mochen En. Kese kan mochen kopwe anisiei. Use mochen pwe upwe aneamon chok. Kese kan mochen kopwe anisiei pwe upwe engino ngeni ei pwiin.”

Mwitir chok, usun A fen fori ren Peter me nom, Jises a eitau poun ngeni me kamochuno Ngunun we mi kokkono¹¹ Eu memmefin kinamwe, pechekun, awewe, me tong mi amwarar a tori Emilie. Ewe rum ese chiwen pat, a sinei pwe ese anaemon chok, me ina aewin fansoun seni a engon me ruanu ierin, Emilie a sinei mettoch meinisin repwe murino . Atun a “neneno ngeni Kot,”¹² Emilie a annuteno non kinamwe. Ina minne sia kuna “ika oupwe aier me ousap apochokuna non netipemi, ewe kokkotun ngaseno mi auchea epwe mwitir kawor ngenikemi.”¹³

Sasing

Famini ren tempel

An Emilie chikar me ennetin ngaseno a tori non fitu fansoun- fitu maramen aninis, auraur, me apechekunen tufichin, me non ena fansoun a angei tufichin seni me sopweno ren An mwitirin kirekiroch. Me ena kirekiroch a sopospweno ne nom ren tori a tonong non ewe temple fiti punuwan me ruemon noun kewe pwe repwe ririfengen fenfeinno. Iei Emilie a mwareiti usun ewe mwitirin kirekirochun Kot me An manaman non an angaseno seni an fotek.

Iei, seni manuan pwan emon chon nuku mi pechekun. Non December 27, 2013, Alicia Schroeder a pwapwa ne etiwa chienan kewe, Sean me Sharla Chilcote, ekkewe ese sinei pwe repwe tori imwan. Sean, pwan ii noun Alicia pisop , a ngeni noun we phone me apasa ren wenechar, “Alicia, aua men tongek. Mi namwot omw kepwe penuweni ei kokko.”

Punuwan Alicia, Mario, a kokko won ewe phone. A nom non eu neni mi towaw seni aramas fiti nour kewe non eu fansoun ra fen kokkot pwe ra mochen repwe no urumot won snowmobile. Me a torir eu watten osukosuk mi ngaw. Mario a fokkun watte feiengawan, me nour we at engon ierin, Kaleb, a mano. Nupwen Mario a ereni Alicia usun an Kaleb mano, a pworacho ren niokus me netipeta napengeni kich sisap tongeni weweiti. Ese tongeni uta. Seni an weiresin netipeta, Alicia ese tongeni foos are mokut.

Bishop me Sister Chilcote ra mwitir ngeni, me komochuta me kamachueno. Ra kekechiw me mefi netipechoufengen ren ekkis fansoun. Mwirin Bishop Chilcote a tungorei Alicia ika a mochen epwe efeiochu.

Met a fis mwirin sise tongeni ennetin weweiti ika esor ach sinei ekis usun ewe Achasefanin Jises Kraist me ewe mwitirin kirekirochun Kot. Bishop Chilcote a wata poun ren tong won mokuran Alicia me, ren mongungun mi weires ren mefian, a poputa ne foos. Alicia a rongorong ru mettoch usun Kot a pusin apasa. . Aewin, a rongorong itan, Alicia Susan Schroeder. Mwirin a rongorong ewe bishop an a kokkori ewe mwumwuta an Kot mi Napanap. Non na atun – ren an aapasa itan me an Kot manaman – Alicia a ur ren watten kinamwe, tong, aninis, me, ina mo weiresin, pwapwa. Me ekkana memmef ra nom ren tori iei.

Iwe iei, ennetin, Alicia, Mario me ar famini ra sopweno ne netipeta me pwos fan iten Kaleb. Mi weires! Inet chok uwa foos ngeni, Alicia a sur mesan non an ereniei usun an tong me pwositi nour we kukkun at. Me mesan mi chiwen supw ren an ereni ei ifa usun ewe Chon Angaseno mi Nap A akkanisi ren unusen an weires, akkaewin ren An mwitirin kirekiroch non an watten weires akkom me soposopono iei ren ewe pechekunen apinukunuk non eu chufengen sefan mi amwarar “ese chommong ran nusun.”

Ngang mi sinei pwe fan ekkoch non manuach a wor osukosuk me fitikoko a tongeni epwe aweiresi ne angei ika essina ika annomu ewe sokkun kinamwe a tori Emilie me Alicia. Ngang uwa fen nom non ekkei sokkun fansoun. Ua pwarata, non ekkana sokkun fansoun, ach tufichin sopweno chok a eu ennetin me watten pwarata usun ewe mwitirin kirekirochun Kot. Chechemeni, pwe chon Israel me nom ra wesewesen ngaseno “me ren ewe chok Kot a tumununur”¹⁴ seni eu ran ngeni eu ran.

Upwe apasa ai kapasen pwarata pwe Jises Kraist i ewe Chon Angaseno mi Nap, me non Itan, uwa pwon pwe ika oupwe sap ngeni I ren ennetin popun me unusen mochenin netip, I epwe angasakemi seni mettoch meinisin epwe osukosuk ika awesi manauemi ika ami pwapwa. Ena ngaseno epwe fansoun nakatam nap seni met ka mochen—non fansoun manauom ika fansoun nakatam. Iwe, epwe ngonuk kinamwe, aweneta, me awora apinukunuk, anisi, me apechekunakemi ngeni ewe ranin ennetin ngaseno mi unus, Uwa erenikemi usun me pwarata usun ewe mwitirin kirekirochun Kot non iten Jises Kraist, amen.