Ewe Achasefanin Jises Kraist

Non ei kinikinin ier sia fokkun pwapwa me ekiek won an ewe Chon Amanau we Achasefan. Ennetin ina ewe nongonong mi kon pin, watte eitian me watten emefian ei fonufan epwe sinei. Ina met a awora apinukunuk me popun ngeni manauach.

Iwe met ewe Achasefan an Jises Kraist? Non ew napanap, a ew tettenin mettoch mi pin a fis non ewe Ataken Gethsemane, mi sopweno ngeni ewe irapenges, me muchuno ren an ewe Chon Amanau Manausefan seni ewe nenien peias. A pesepes me ren ew tong sise tongeni ukukkun weweiti fan itach meinisin. Mi namot pwe emon ese mo tipis; ewe mi wor an manaman ese much won mettochun fonufan—pwan mano; ewe mi nap an tufich ne riaffouni pungun ach tipis me samaw; me ewe mi ennetin feitiw fan mettoch meinisin.¹ Iei ewe misin an Jises Kraist—iei An Achasefan.

Iwe met ewe popun? Pwe epwe atufichi ngeni kich sipwe niwin ngeni me mwen mesen Kot, winiti usun I, me angei unusen pwapwa. Ei a fis ren an akkufu ruanu eppet:

1. Manon inis

2. Manon ngun pokiten Atam me ach tipis.

3. Ach riaffou me samau

4. Ach apwangapwang me nipakingaw

Nge ifa usun ewe Chon Amanau a tongeni apwonuetaawesi ei me nukun an atai ewe annukun pung?

Aneanei ita emon mwan mi ekiekipwichi ew apwapwan changetiw a atapwan an finata me mweteu seni efoch kukkkun sepenin. Mwirin an fori, a mwitir apareni umwesin an foffor. A mochen epwe sotiw och, nge mi wor ew eppet—ewe annukun gravity. A amwokutu poun mi mwitir amwararan, a anean epwe chang, nge ese tufich. A eititi inisin an epwe pias ika maan an epwe amanga an sotiw, nge ewe annukun gravity ese mut ngeni me ese umoumoch. A sotuni an epwe apungupung ngeni annukun fonufan: “Ua muan. Usap tongeni fori sefan.” Nge ese wor emon a rong an sio. Ewe annukun gravity ese sinei kirekiroch; ese wor ketiwan. Nge a seroch, ewe mwan a mwitir mefi och mettoch nukunupan. Chienan we won ewe sepenin, mi apareni an umwes, a wata ew rakasang won me mwen chok an mweteu. A kuna ewe senin me weiti. A ngas, a asiochutiw ngeni ewe puun. Eni sipwe eis, “Ewe annukun gravity a tano, ika ena rakasang mi mwokut me non ena annuk an epwe awora an sotiw och?”

Nupwen sia tipis, sia usun ewe mwan mi umwes ewe a mweteu seni ewe sepenin. Ese nifinifin met sia tongeni pwisin fori, puretiw chok epwe awiti kich. Sia nom fan nemenien annukun pung, minne, usun chok annukun gravity, mi pung me ese fangafangoch. Sia tongeni chok ngas pokiten ewe Chon Amanau, ren An Achasefan, a umoumoch ne awora ngeni kich ew rakasang non pekin ngun. Ika a wor ach nuku non Jises Kraist me aier (wewen sia fori wisach me weiti ewe san), iwe ekkewe manamanen tumun an ewe Chon Amanau ra sukuno fan itach me sia tongeni so non pekin ngun sise feiengaw.

Ei a chok tufich, nge, pokiten ewe Chon Amanau a akkufu ekkewe ruanu eppet ra akounoi ach fefeita non pekin ngun.

1. Mano. A akkufu mano me ren An Manausefan mi ning. Ewe Aposel Paul a aitikich, “Pun usun aramas meinisin repwe mano ren ar chiechi ngeni Adam, iwe pwan ina chok meinisin repwe manau sefan ren ar chufengen me Kraist.”²

2. Tipis. Ewe Chon Amanau a akkufu tipis me niemam fan iten ekkewe ir mi aier. A men anonnon me wamwong manamanen An nimenim iwe Isaiah a pwonei, “Ka anueparapar ren tipis, nge upwe ne nimetuk pwe kopwe nimenimoch usun chok pwechepwechen snow.”³

Fan ekkoch, ua churi ekkoch Souneng mi weires ar repwe pwisin omusereno, ekkewe rese mirit ar amwani akukun manamanen an ewe Chon Amanau angasano. Rese apareni ar siwini ew Achasefan esemuch ngeni ew mi aukuk ese uku ngeni ar tipis ika nipwakingaw. Nge mi ew Achasefan esemuch pokiten a aunusa me auku tipis me nipwakingaw meinisin, pwan feiengaw ika metek mi fis me ren ekkoch.

Truman Madsen a efisata ei ekinamwein weweoch:

“Ika mi wor ekkoch neimi a fen tupuno pwe a nuno om tipis, … pwe ewe poisonun tipis ese chiwen atufichi sefan om kopwe nimoch—iwe ausening ngeniei.

“Ua pwarata pwe kose tongeni kokotiw nap seni ewe saram me rasemwongun tipachemen Jises Kraist mi tongeni tikeri. Ua pwarata pwe ika mi wor ew merekukun mochenin aier me aunang, I mi nom ikewe. I ese chok feitiw ngeni nonnomum; I a feitiw nuno seni, pwe I epwe nom non mettoch meinisin, ewe saramen ennet. [Nengeni Doctrine and Covenants 88:63.]”⁴

Ew popun mi auchea ach sipwe weweiti an ewe Chon Amanau Achasefan me aean esemuch pwe ren napenon weweoch a fis napenon mochenin omsano kich me ekkoch.

Ika mwo sipwe nuku non an Kraist manamanen nimenim, mi kan wor ew kapaseis: “Ifa usun upwe sinei ika a musuno ai tipis?” Ika sia mefi ewe Ngun, iwe ina ach pwarata pwe sia musuno, are ewe angangen enimenim a fis. Preseten Henry B. Eyring a aitikich, “Ika ka fen mefi mwokutukutun ewe Ngun mi Fel … , kopwe sinei pwe ina pungun pwe ewe Achasefan a angang non manauom.”⁵

Ekkoch ra eis, “Nge ika ua musono, pwata ngang mi chok mefi niemam?” Menin non an Kot chen ewe achemen niemam a ew aurour, ew “esisinen kouno” non pekin ngun, non och fansoun, a puchuru nupwen sossot a churikich: “Kosap feitiw won na aan. En mi sinei ewe metek epwe awora.” Non ei napanap, a fis pwe ew tumun, esap ew niwinin tipis.

Iwe, mi tufich ach sipwe chemeni ach tipis me ngaseno seni niemam?

Alma a chemeni an tipis, pwan mwo ier mwirin an aier. Nge nupwen a kechiw ngeni Jises fan iten chen, a apasa, “Use tongeni chiwen chechemeni ai kewe metek; ewer, use chiwen riaffou ren chechemenien ai kewe tipis.”⁶

Ifa usun a tongeni chemeni an tipis nge ese wor metek me niemam? Pokiten nupwen sia aier, sia “uputiw me ren Kot.”⁷ Sia winiti, usun ewe pukefel a apasa, “aramas minafo”⁸ non Kraist. Ren unusen wenechar sia tongeni apasa, “Esap chiwen ngang ewe mwan ika fefin a fen fori ekkewe tipis akkom. Ngang emon aramas minafo me ua siwin.”

3. Riaffou me Samau. Alma a osini pwe Kraist “ epwe feino, epwe engino ngeni metek me riaffou me sokopaten sossot meinisin.” Pwata? “Pwe nenukan epwe tongeni ureno ren umoumoch, … pwe I epwe tongeni sinei anongonong won pekin aion ifa usun an epwe anisi noun kewe aramas anongonong won ar apwangapwang.”⁹

Ifa usun a apwonueta ei? Fan ekkoch a angeiano ewe riaffou, fan ekkoch a apochokuna kich ne engino, me fan ekkoch a ngenikich ach sipwe kuna ne weweochuti mwochomwochen nonnomur. Mwirin an Joseph Smith apwangapwangeno me non Liberty Jail ren ukukun ru maram, nesoponon a siou, O Kot, Ifa en?¹⁰ Me nukun an awora mwitirin ngaseno, Kot a ponuweni, Nei at, kinamwe epwe nom won ngunum; om weires me riaffou repwe chok mwochomoch; iwe mwirin, ika kopwe engino ngeni, Kot epwe etekioketa.¹¹

Iei Joseph a weweiti pwe ei fansoun riaffou a chok ekis foun tik me won efoch senin feinfeino. Ren an kuna mi napeno, a mak ngeni ekkewe Souneng seni ena nenien kanapus, “Pwi achengicheng, sipwe pwapwa ne fori mettoch meinisin mi nom non ach pochokun; iwe sipwe nukuchar ne uta, ren ach nuku, pwe sipwe kuna amanauen Kot.”¹² Pokiten an ewe Chon Amanau Achasefan, a tongeni wor ach weweochun feinfeino mi awora popun ach sossot me apinukunukun ngaseno.

4. Apwangapwang me Nikpwakingaw Pokiten An Achasefan, ewe Chon Amanau a wor an manaman, fan ekkoch a iteni chen,¹³ ewe mi tongeni anisi kich ne akkufu ach apwangapwang me nipwakingaw me a anisi kich ach kutta ne winiti usun I.

Moronai a aitikich: “Ewer, feito ren Kraist, me oupwe unusochuno non I, … pwe me ren an chen oupwe tongeni unusochuno non Kraist.”¹⁴ Usun mi wor ru popun ika wewen ach atufichi kich ngeni ekkena manaman mi tongeni nimeti—pwan aunusochu—kich.

Aewin, ekkewe angangepin mi amanaua kich. Ekkewe pukefel a urenikich, Non ekkewe angangepin, ewe manamanen Kot a pwano.¹⁵ Fan ekkoch, sipwe ekieki pwe angangepin ir chok mettoch sipwe fori—mi auchea ngeni manau fefeita; nge ennetin ra wau ew manamanen Kot a anisikich sipwe winiti usun Kraist. Ren awewe:

• Nupwen sia papatais me angei ewe niffangen ewe Ngun mi Fel, sia nimenimochuno—iwe sia winiti mi pin usun Kot.

• Pwan, ren ewe Ngun mi Fel, ach ekiek epwe sarameno me netipach repwe pwetete pwe sipwe tongeni ekiek me memef usun I.

• Me nupwen sia ririfengen me punuwach, sia angei ewe pung ngeni ekkewe mottun king, muu, nemenem, me pochokun pwe niffang seni Kot.¹⁶

Ew oruwen popun ekkei manaman ina ekkewe niffangen ewe Ngun. Pokiten an Kraist Achasefan, sia tufich ne angei ewe niffangen ewe Ngun mi Fel me ekkewe niffangen ngun mi fiti. Ekkei niffang ir napanapen Kot; ina minne, iteiten fansoun sia angei ew niffangen ewe Ngun, sia winiti usun Kot. Ese wor tipemwaramwar pwata ekkewe pukefel ra pesei kich fan chommong ne kutta ekkei niffang.¹⁷

Preseten George Q. Cannon a aitikich: “Ese wor emon mwan epwe apasa, ‘O, ese tufich ai usap tongeni fori ei; ina nonnomui.’ I ese apungupung non ei, ren ewe popun pwe Kot a pwonei pwe epwe awora niffang repwe awesano [ach apwangapwang]. … Ika ekkoch neich sise unusoch, ina wisach ne iotek fan iten ewe niffang epwe fori ach sipwe unusoch.”¹⁸

Non amwochun, an ewe Chon Amanau Achasefann a ngeni kich manau ren mano, ning ren mworen puun,¹⁹ echikar ren metek, unusoch ren apwangapwang. Ina an nang safeien ngeni ekkewe eppet me osukosuken ei fonufan.

Non ewe amuchunon wik an ewe Chon Amanau manau won fonufan, a apasa, “Fonufan epwe eriaffou kemi. Nge oupwe chok epinukunuk! Ua fen okkufatiw fonufan.”²⁰ Pokiten ewe Chon Amanau a fori An Achasefan, ese wor pochokunen nukun ika mettoch ika aramas—ese wor tipis ika keimufesen—a tongeni eppeti kich sani ach sipwe angei manau fefeita, nge sipwe anneasochisi an Kot annuk. Ren ena mirit, sia tongeni nikitu ren pwapwa me ennetin sinei pwe Kot mi nom rech non ai kutta nang.

Ua pwarata pwe an ewe Chon Amanau Achasefan ese chok napanap nge emon me emon mi tikeri—pwe mi tongeni niwin ngeni me mwen mesan Kot me atufichi kich sipwe winiti usun I—ewe amuchunon an Kraist Achasefan. Ren ekkei ua pwarata ai kinisou me seniochur non iten Jises Kraist, amen.