Ammonata ren ewe Niwinsefanito an ewe Samon

Non ru wik, sipwe apwapwai Paska. Ewe Manausefan a apochokunata pinin Jises Kraist me ennetin Kot ewe Sam. Sia ekieki usun ewe Chon Amanau, me sia ekieki usun “manawan ese wor aukuk ren an manaman ren pochokun ren an watten asoren achasefan.”¹ Ua apinukunuk pwe sipwe pwan ekieki usun An niwinsefan nupwen “I epwe nemenem usun emon Kingen King me ... Samolun Samol.”²

Ekis fanson me nom non Buenos Aires, Argentina, ua fiti eu michenap ren souemwen seni chommong sokopaten namanam. Ir mi ennetin tongei aramas. Ra ennetin mochen awesano an aramas riafou me anisi aramas ar repwe poracho ngeni ar kewe osukosuk me apwangapwang. Ua ekieki usun ekkewe angangen anisi aramas minne ei Mwichefen a fori, pwan mwo ekkewe angang ren aramas ir chon pwan ekkoch namanam minne ra fiti ewe mwichenap. Ua ennetin kinisou ren kirekirochun chon Ewe Mwichefenin Jises Kraist ren Aramas mi Pin non Fansoun Soponon minne a esenipato angang non napanapen Kraist.

Non ena fansoun, ewe Ngun mi Fel a pwar ngeni ei ru mettoch. Aewin, ewe angangen iamwir ren osupwangen inis mi aucheanap me mi namwot epwe soposopweno. Oruan mi amairu, nge mi pwan pochokun me fatoch. Pwe: nap seni ach fangefangoch ren angang, mi ennetin auchea ach sipwe ammonata fonufan ren ewe Oruan Niwinsefanito an ewe Samon Jises Kraist.

Nupwen a feito, osukosuk me kirikiringau esap chok kukununo; repwe kouno:

“Ewe wonif epwe pwan nom ren ewe appanen siip, iwe ewe leopard epwe konetiw ren ewe kukkunun sike, iwe ewe appanen kou me ewe kukkun naion me kitinupun man repwe nomefengen; iwe emon kukkun semirit epwe emmwenir. …

“Resap efeiengawa ika atano emon me non chukui kewe meinisin mi fel, pun ewe fonufan epwe ureno ren miritin ewe Samon, usun ekkewe konik ra ponueno ewe sat.“³

Osupwang me riaffou esap chok kukununo; repwe wesino:

“Resap chuwen echik, are kaka; Ewe akkar are och sokkun mi pwichikar, esap kenir,

“Pun ewe Appanen Siip, ewe mi nom nukanapen ewe neenien mottun king, epwe nour chon maas epwe emwen ngenir ekkewe konikin manau mi puwacheta: iwe God epwe tonano chonun meser meinisin.“⁴

Metekin me netipengauen mano epwe wesino:

“Non ena ran esap wor emon monukon epwe mano tori ra chinnap; me repwe manauetam usun effoch ira;

“Me nupwen ra mano resap annut, wewen fan ewe pun, nge repwe siwin non kesipin efou mas, me repwe fefeita, me ar asoso epwe ningoch.⁵

Iwe ewer, sipwe fori met sia tongeni iei ach sipwe awesano riaffou me netipengau, me sipwe ennetin pwon ach sipwe fori met mi namwot ach sipwe ammonata ngeni ewe ran nupwen metek me mettoch mi ngau repwe wesino, nupwen “Kraist [epwe] pwisin nemenem won ewe fonufan; me … ewe fonufan epwe sofo sefan me angei an ningen paratais.”⁶ Epwe eu ranin achesefan me kopung. Ewe Anglican Pisop seni Durham, Dr. N. T. Write, a aporausa auchean an Kraist Achesefan, Manausefan, me Kopung non an pworacho ngeni mettoch mi mwan me apungano mettoch meinisin.

A apasa: “Kot a finata eu ran minne fonufan epwe kopung fiti pung ren emon mwan minne a finata—me a fen pwarata ennetin ekkei ren an amanaua ei mwan seni mano. Ekkewe poraus usun Jises seni Naxareth, me pwan usun an manausefan seni mano, ir ewe nongonongen pwarata pwe mi wor popunin ewe foufan. Ese chok osukosuk; pwe nupwen sia fori met mi pung non ei fansoun sise chok osonapano ach fansoun, ren ach achocho apochokua eu imw minne epwap tano, are mina efoch taraku minne oupwe chok oturuno. Nupwen Kot a amanaua Jises seni mano, ena eu mettoch mi kukkun minne a tupuni ewe angangen kopung mi watte, usun [efou] foun iran apinukunu mi nap. Kot a pwarata, non ei napanap mi manaman, pwe Jises seni Nazareth ennet I ewe Messaia. … Non eu mettoch mi amairu non unusen fansoun, [Jises] a kuna kopung mi mwan me kirikiringau, a feito ngeni ewe neni mi esina me ochufengeni mettoch meinisin mi kirikiringau me mwan non unusen fansoun, an epwe pwisin mwarei osukosuk, kiroch, kirikiringau, kopung mi mwan meinisin, an epwe ataieno an pochokun.”⁷

Nupwen ua fiti ewe mwichenap non Buenos Aires minne ua kapas usun akkom, ewe Ngun mi Fel a afata ngeniei pwe Ewe Mwichefenin Jises Kraist ren Aramas mi Pin non Fansoun Soponon a wor an pochokun me wis an epwe ammonata fan iten an ewe Samon Oruan Niwinsefan; ennet, iei popun ewe mwichefen a nwinsefanito. Oua tongeni kuna pwan eu mwichen aramas minne ra etiwa pwe ei fansoun mi ewe “fansoun mi fich ngeni” minne Kot a kokkot an epwe “ochufengeni forian kewe meinisin non nang me founufan fan nemenien Kraist?”⁸ Ika ouse tongeni kuna eu mwichen aramas mi mochen fori met mi namwot epwe fis fan iten ekkewe mi manau me ekkewe mi mano ar repwe ammonata fan iten ena ran; ika ouse tongeni kuna eu mwichen aramas mi mochen fangeno fansoun me moni ar repwe ochufengeni me ammonata eu mwichen aramas mi pin mi monneta ar repwe etiwa ewe Samon, osap mo kuna ekkis meinisin.

Non an kapas ngeni ewe Mwichefen non 1831, ewe Samon a apasa:

“Ekkewe kiien ewe muun Kot mi ngeni aramas won fonufan, me seni ei ewe kapas allim epwe choufetan won founufan. …

“Sipwe kokori ewe Samon, pwe An muu epwe choufetan won fonufan, pwe ekkewe aramas repwe etiwa, me repwe monnata ren ekkewe ran repwe feito, nupwen ewe Noun Aramas epwe feitiw me nang, o ufouf non saram me an ning, ne churi ewe muun Kot mi nom won ewe fonufan.”⁹

Met sia tongeni fori ach sipwe ammonata ren ewe ran iei? Kich sia tongeni ammonata; sia tongeni ochufengeni Noun ewe Samon aramas pwon; me sia tongeni aponueta ekkewe pwonen amanau “mi for ngeni semach kewe,” ach kewe newo.¹⁰ Mi namwot ekkei mettoch meinisin repwe weswesen fis me mwen ewe Samon a niwinsefan.

Aiwen, me mi auchea pwe epwe wor aramas mi monneta ar repwe etiwa I non An niwinsefan mi namwot ngeni An ewe Samon niwinsefan. A apasa pwe ekkewe ir repwe nom won ewe foufan non ena ran “seni ekkewe mi kukkun [ngeni] ekkewe mi nap, … repwe ur ren an ewe Samon we mirit, me repwe kuna efou mas ngeni efou mas, me repwe pupuchor, me ren mongungur repwe konu ei kon mi fo, a apasa: Ewe Samon a eniwinsefanieto Saion. … Ewe Samon a ochufengeni mettoch meinisin non eu. Ewe Samon a aniwinatiw Saion seni nang. Ewe Samon a aniwinata Saion seni fan.”¹¹

Non fansoun nom, Kot a pwisin angei ewe nenien Saion.¹² Nge mi sokono, pwe non ewe fansoun soponon Saion epwe etiwa ewe Samon non An niwinsefan.¹³ Saion an ekkewe mi unusoch non netiper, eu aramas mi chufengen netiper me ar ekiek, ra nimenimoch me ese wor mi osupwang me neir.¹⁴ Ewe Soufos Joseph Smith a apasa, “Ach foruta Saion ena met epwe aucheanap ngenikich.”¹⁵ Sipwe forata Saion non imwach, ach wart, pranch, me steik ren angang fengen, napanapen Kot me tong ennet.¹⁶

Sipwe weweiti pwe ewe forutan Saion a fis non fansoun osukosuk—eu fansoun song, eu fansoun ekei, eu fansoun tatakis, ren kechiw, ren netipengau me ren riafou; usun chok eu watte monumon epwe feito won unusen fonufan, ewe Samon a apasa.¹⁷ Iwe, ewe ochufengen non steik a fis pwe epwe eu nenien tumun me kinamwe seni ewe monumun, me seni song nupwen epwe ninatiw won unusen fonufan.¹⁸

Usun chok me nom, sia “mwich fengen fan chommong, pwe repwe echikipin me iotek, me pwe repwe kapas fengen nefiner usun tufichin [ngunuch]. Iwe … mwongo seni ewe pinewa me [konik], non achechemenien ewe Samon Jises.”¹⁹ Usun Preseten Russell M. Nelson a awewei non ewe mwichenap non ewe October, “Ewe pwopwun mei nomw ren ewe Mwichefen non nakatamen fansoun an epwe anisi ekewe chon Mwichefen ar repwe awateno ar nuku non ach Samon Jises Kraist me An Achasefan, epwe anisir non ar fori me amwochu ar kewe pwon me ren Kot, me ar repwe apochokuna me riri fengeni ar kewe famini.”²⁰ Iwe, a pwan afata auchean pwon mi pin non ewe tempel, pinini Raninfel, me ach kamatip won ewe kapas allim non imwach iteiten ran, iwe sipwe kuna aninis seni met sia keao non fan. Sia mochen sinei usun ewe Samon, me sia mochen sinei ewe Samon.²¹

Nongonongen ach angang ach sipwe forata Saion ena ach ochufengeni Noun ewe Samon aramasen pwon mi pin.²² “Sia nuku non ewe ennetin chusefanin Israel me non niwin sefanin ekkewe Engon Einang.”²³ Meinisin repwe aier, nuku non Kraist, me papatais ir Noun aramasen pwon mi pin.²⁴ Ewe Samon Pwisin a pwarata pwe me mwen epwe niwin, ewe kapas allim epwe afanafan won unusen fonufan²⁵ an epwe angeisefani Noun aramas, ir chon ewe imwen Israel,²⁶ “iwe ewe soponon epwe ne wareto.”²⁷ An Jeremiah pwarata a ponueta:

“Ewe Samol a apasa, ‘Epwe tori ewe fansoun nupwen ekkewe aramas resap chuwen akkoponu itei ussun ewe Kot mi manau, ewe a uweireto ekkewe aramasen srael seni ewe fonu Egypt.

“Nge, esap fen ina pwe repwe ne akkopunu ei ussun ewe Kot mi manau, ewe a uweireto ekkewe aramasen Israel seni ew fonuen ennefen o seni ekkewe ekkoch fonu ikewe ua aparasa fetaner ie. Upwe eniwinsefanireto ngeni pwisin fonuer, ngeni ewe fonu ua fen ngeni ar kewe newo.”²⁸

Fan chommong Preseten Nelson a afata pwe ewe “ochufengenin Israel mi auchea nap seni mettoch meinisin mi fis won fonufan ikenai. Ese pwan wor met mi nonno watten, ese pwan wor met mi nonno auchean, ese pwan wor met mi nonno ningan. Ika oua finata … oua tongeni aninis ren ei angang.”²⁹ Aramas mi Pin non Fansoun Soponon ir ra sou fori angangen misineri. Nap seni fite puku ngorun aramas ra fen ponueni ar kokon misin seni nepoputan ewe Niwinsefaniton ewe Mwichefen; nap seni fite engon ngoroun misineri mi angang iei. And, as Elder Quentin L. Cook has just taught, all of us can participate in simple and natural ways, in love, inviting others to join us at church, visit in our homes, become part of our circle. Forun ewe Puken Mormon ena eu esinesin pwe ewe ochufengen a poputa.³⁰ Ewe Puken Mormon mi eu pisekin angang ne ochufengeni aramas me ekisiwini netiper.

Ach angangen amanau fan iten ach kewe neuo ena pwan eu mettoch mi ennetin auchea ngeni ach ammonata ngeni ewe Oruan Niwinsefan. Ewe Samon a pwon an epwe tinato Elijah ewe soufos me mwen ewe Oruan Niwinsefan, “an ewe Samol ran mi napanap me eniweniw,”³¹ an epwe pwarata ewe Pristut me foti ekkewe pwon ngeni ekkewe sam non netipen ekkewe semirit.³² Elijah a fen feito usun met a pwon. A fis won April 3, 1836; non ewe Kirtland Tempel. Non ena neni me non ena fansoun, a efeiochur ren ewe pristut mi pwon, ekkewe kiien ewe amanauan ekkewe me mano me ririfengenin chon pupunu, me famini ren tapin aramas meinisin me ren fansoun ese much.³³ Ika esap ina, popun forutan fonufan epwe osukosuk, me ren ena, fonufan epwe “ataieno.”³⁴

Non ewe mwichen serafo me mwen ewe mwichen epinepin an ewe Rome Italy Tempel, fite puku anuon me fopun ra pwarata ngeni Preseten Nelson ekkewe taropwe ra fen ammonata ren iten ar kewe neuo. Ra moneta ar repwe tonong non ewe tempel ar repwe fori ewe angangen papatais faniten ar kewe neuo nupwen a suk. Mi fokkun apwapwa, nge mi pwan eu awewe usun ewe amokutun ewe angang ne forata Saion fan iten ekkewe tapin aramas ra fen mano.

Nupwen sia achocho ach sipwe tiniken non ach forata Saion, pwan fiti ach ochufengeni Noun ewe Samon mi kefin me ach amanaua ekkewe mi mano, sipwe kouno me chechemeni epwe iei An ewe Samon angang me I a fori. I ewe Samonun ewe atake, me kich noun kewe chon angang. A tingoreikich ach sipwe angang non ewe atake ren ach pochokun ei “amuchunon fansoun” me A angang rech.³⁵ Epwe fen pung ika sipwe era pwe A mut ngeni kich ach sipwe fiti I ne angang. Usun Paul a apasa, “Ngang ua fokuki ekkewe ira, Apollos a atutu ekkewe ira, nge Kot ewe a fori ekkewe ira pwe repwe mammarita.”³⁶ I ewe a amokutu An angang non an fansoun.³⁷ An aea ach angang ese unusoch—ach “kukkun mettoch”—ewe Samon a esenipato mettoch mi napanap.³⁸

Ei ewe fansoun soponon mi nap a mwitir tori nesoponon—Saion won fonufan a chufengen ren Saion seni nang ren an ewe Chon Amanau niwinsefan non an ning. Ewe Mwichefenin Jises Kraist ren Aramas mi Pin non Fansoun Soponon mi wisen ammonata—me a ammonata iei—ewe fonufan fan iten ena ran. Iwe, non ei fansoun Easter, sipwe ennetin apwapwaiti an Jises Kraist Amanausefanita me niwinin: An niwinsefanito ne nemeni ukukun eu ngerou ierin kinamwe, kopwung mi pungupungoch me unusoch fan iten aramas meinisin, ewe manau ese much fan iten meinisin mi fen manau won ei fonufan, me ewe pwonen manau ese much. An Kraist we Manausefanita mi ennetin pwarata pwe mettoch meinisin epwe punguno. Sipwe forata Saion ach sipwe amokutu ena ran. Non iten Jises Kraist, amen.