Chon Maasen Siip Mi Murinno, Namen Kot
Jises Kraist a kokkori noun kewe siip non Mongungun me non Itan. A kutta me ochufengenikich. A aitikich ifa usun sipwe angang non tong.
Achengicheng pwii me fefinei kana, oua mo fen mefi weiresin annut me sotuni ne anea siip? Nupwen siip ra mweteta seni tiit, ka anea: 1, 2, 3, … 245, 246, … 657, 658 …1
Me rei pwisin, anea siip ese anisiei ai upwe annut. Ua noninen ussun ai upwe monuki ika poutano emon, me ua chok nenneno.
Ren ewe at chon maas ewe a winiti emon king, sia apasa:
“Ewe Samon a tumunuei usun chok emon chon maasen siip, iwe esap wor ai osupwang.
“A mut ngeniei upwe asoso non ekkewe manaman mi chommong fetin ie: o a emweniei ngeni ekkewe konik mi fat.
“A apochokuna sefaniei.”2
Non ei fansoun Easter, sia apwapwai ewe Chon Maasen Siip Mi Murinno, i pwan ewe Namin Kot. Ren meinisin itan, ese pwan wor eu mi pwetete are weweoch. Sia kaeo chommong seni ach Chon Amanau porausen pwisin i pwe ewe Chon Maasen Siip Mi Murinno me seni kapasen pwarata pwe I ewe Namin Kot. Ekkei awewe me esisin mi fakkun chufengen—ion epwe fen och ne anisi emon me emon nam nap seni ewe Chon Maasen Siip mi Murrino, me ion epwe fen och an epwe ach Chon Maas mi Murrino nap seni ewe Namin Kot?
“Pun Kot a fakkun tongei chon fonufan, ina minne a fangeno Noun we Anaemon,” me Noun Kot we Anaemon a isettiw manauan non an anneasochisi Seman we.3 Jises a pwarata, “Ngang ewe chom maasen siip mi murinno: ewe chon maasen siip mi murinnoa tongeni fangeno manauan fan asengesin noun kewe siip.”4 Mi wor an Jises manamanen fangeno manauan me ewe manamanen angeisefanni.5 Ir me Seman we, ach Chon Amanau a efeiochu emon me emon kich, non wisan Chon Maasen Siip Mi Murinno me non wisan ewe Namin Kot.
Non wisan Chon Maasen Siip Mi Murinno, Jises Kraist a kokkori noun kewe siip non Mongungun me non Itan. A kutta me ochufengenikich. A aitikich ifa usun sipwe angang non tong. Sipwe ekieki usun ekkei unungat napanap, nepoputa ren kokkorikich non mongungun me non itan.
Akkomwan, ach Chon Maasen Siip Mi Murinno a “kori iten emon me emon. … Pun ra sinei neuwan.6 Me “non pwisin itan we i a korikemi, ina ewe iten Kraist.”7 Nupwen sia achocho ren ennetin netipach ne tapweno mwirin Jises Kraist, pwarata a feito ne fofforoch, ne tongei Kot, me angang ngeni I.8 Nupwen sia kaeo, ekipwich, me iotek; nupwen sia asofosefanni pwonen sakrament me tempel; me nupwen sia tingor ngeni meinisin ar repwe feito ngeni An kapas allim me efeioch, sia ausening ngeni Mongungun.
Non ekkei ran, Preseten Russell M. Nelson a pesei ngenikich pwe sipwe eita ngeni ewe Mwichefen me ren ewe it Jises Kraist a pwarano: Ewe Mwichefenin Jises Kraist ren Aramas mi Pin non Fansoun Soponon.9 Ewe Samon a apasa, “Iei minne, met chok oupwe fori, oupwe fori non itei; iei minne oupwe eita ewe mwichefen non itei; iwe oupwe kokkori ewe Sam non itei pwe i epwe efeiochu ewe mwichefen fan asengesi.”10 Won unusen ewe fonufan, non netipach me imwach kewe, sia kokkor ngeni Sam non iten Jises Kraist. Sia kinisou kinisou ren ekkewe watten feiochun nongonong non imw, fiti aninis seni Mwichefen, kaeon ewe kapas allim me nonnom fengen ren famini mi och.
Oruwan, ach Chon Maasen Siip Mi Murinno a kutta me ochufengenikich non eu mwich. A eisini, “Ika emon me neimi a wor ipuku siip nge emon me neir a monucheno, met epwe fori? Epwe chok nikitano ekkewe tiwe-me-tiwemon siip non ewe maneman, iwe epwe feinno kutta ewe emon a monucheno tori an epwe kuna ewe?”11
Ach Chon Amanau a eitau poun ngeni ewe emon me ngeni ekkewe tiwe-me-tiwemon, fan chommong non chok eu fansoun. Nupwen sia angangen tumunu, sia esinna ekkewe tiwe-me-tiwemon mi pochokun, pwan nupwen sia feino kutta ewe emon a monucheno. Ach Samon a kutta me amanaukich “seni neni meinisin,”12 “seni ekkewe ruanu kinikinin ewe fonufan.”13 A ochufengenikich me ren an pwon mi pin me Chaanan mi achasefanni.14
Ach Chon Amanau a ereni noun kewe chon kuno non ewe Testamen Sofo, “Mi pwan wor ekkoch nei siip, nge rese nom non ei tit.”15 Non Merika, ewe Samon mi manausefanita a pwarata ngeni noun Liai kewe, “ami nei siip.”16 Me Jises a apasa pwe mi pwan wor ekkoch siip repwe rongorong mongungun.17 Mi fakkun efeioch ewe Puken Mormon pwe pwan eu kapasen pwaratan ewe mongungun Jises Kraist!
Jises Kraist a pesei ngeni ewe Mwichefen ne etiwa meinisin ekkewe ir ra rongorong Mongungun18 me anneasochisi An kewe annuk. Papatais seni konik me seni ekkei me ewe Ngun mi Fel mi kinikinin ewe annukun Kraist.19 Nifai a eisini, “Ika ewe Namen Kot, i mi pin, epwe namot an epwe papatais ren konik, pwe epwe apwonueta wenechar meinisin, O ika epwe ina, epwe ifa aukukun auchean kich, sise pin, pwe sipwe papatais, ewer, pwan mwo ren konik!”20
Ikenai ach Chon Amanau a mochen pwe met sia fori me ion sia winiti epwe tingorei ekkoch ne feito, tapweno mwirin I. Feito kutta tong, chikar, chufengen, me pwon non I, fiti an Kot tempel mi pin, minne pwon mi pin mi amanaua a tongeni efeiochu einangen famini meinisin, iwe emwichafengeni Israel non ir me ru pekin ewe eppet.21
Aunungatin, pwe ewe “Chon Maasen Siip an Israel,”22 Jises Kraist a awewe ifa usun choon maasen siip non Israel ra angang ren tong. Nupwen ach Samon a eisini ika sia tongei I, usun a eisini Simon Peter, ach Chon Amanau a pesei: “Kopwe tumunu nei kewe appanen siip. … Kopwe tumunu nei kewe siip.-… Kopwe tumunu nei kewe siip.”23 Ewe Samon a pwon pwe nupwen Noun kewe chon maasen siip ra amongoni noun kewe nam me siip, ekkewe ir non mwichan “resap chuen chechech ren nuokus, iwe usap chuen pwan eriaffour.”24
Ach Chon Maasen Siip Mi Murinno a pesei pwe chon maasen siip non Israel resap annut,25 are nofiti are eriki ekkewe siip,26 are kutta ren pwisin ach feioch.27 Noun Kot kewe chon maasen siip repwene apochokuna, echikara, apacha fengeni met mi kup, eniwinato met mi suno, kutta minne mi poutuno.28
Ewe Samon a pwan pesei usun ekkewe ir, minne “rese mo ekiekin tumunu fichi ekkewe siip,”29 me “soufos mi chofona, ekkewe repwe feito remi non napanapen siip, nge non nenuker ir wonif mi echik.”30
Ach Chon Maasen Siip Mi Murinno a pwapwa nupwen sia aea ach pungun finata fiti nuku me wenewen. Ekkewe non An ewe mwich ra kutta ach Chon Amanau ren kinisou fan iten An asoren achasefan. Sia pwon pwe sipwe tapweno mwirin I, esap pokiten sise weweiti, nge sia mochen ren unusen netipach me ach ekiek ne tongei Kot me chon oruch, aninis fengen ne ekieta ach chou me pwapwaiti non ach pwapwa. Usun Kraist a fangeno netipan ngeni netipen Seman we, sia pwan wata itan woch. Sia kutta ach sipwe fiti an angangen ochufengeni me tumunu meinisin noun Kot kewe.
Pwii me fefinei kana, Jises Kraist i ach Chon Maasen Siip mi unusoch. Pokiten a isettiw manauan fan iten ekkewe siip me iei a manausefan non ning, Jises Kraist a pwan ewe Namen Kot mi unusoch.31
Ewe Namen Kot mi asoreno mi pwarata seni nepopoutan. Ewe chon nang a ereni Adam pwe an asor “mi awewen ewe asoren ewe Anaemon Noun ewe Sam,” minne a tingor ngenikich ne “aier me kokkori Kot non iten ewe Nau feinfeino chok.”32
Semach Abraham, minne a efisata feioch fan iten meinisin ekkewe einangen ewe fonufan, a mefi met wewen an epwe fangeno noun we anamon.
“Me Isaac a apasa ngeni Abraham, Papa: me a ponuweni, Ewer nei, met.” Ua kuna ei moochen ekkei me amuch, nge ifa i ewe appanen siip …?
“Abraham a ponuweni, Kot epwe pwisin awora.”33
Apostel me soufos ra kuna me pwapwaiti an ewe Namen Kot we misin. John non ewe Fonufan seni Noom me Nifai non ewe Fonufan Minefo a pwarata usun “ewe Namen Kot,”34 “ewer, Noun ewe Sam ese Much[,] … ewe Chon Angasenon ewe fonufan.” 35
Abinadi a pwarata usun an Jises Kraist asoren achasefan: “Kich meinisin, usun siip, sia fen monucheno; sia fen kunnuno emon me emon ngeni pwisin aanan; iwe ewe Samon a fen wata won angangangawach meinisin.”36 Alma a iteni ewe asor mi nap me mi saingon asoren ewe Noun Kot ewe “ew mettoch minne mi kon auchea nap seni meinisin” Alma a pesei “epwe tongeni wor ami nuku non ewe Namen Kot;” “feito me ousap nuokus.”37
Emon chienei a poraus won ifa usun a weri an kapasen pwaratan ewe Achasefanin Jises Kraist. Nupwen a marita a nuku pwe tipis a efisata efeingaw watte, minne kich pwisin sia kuna. A tingor ngeni Kot an epwe weweiti ewe tufichin omusano tipis. A iotek an epwe sinei ifa usun Jises Kraist a tongeni omusano tipisin ekkewe ir ra aier, ifa usun chen mi tongeni pungoch.
Eu ran a pwonu an iotek non eu napanapan ekkesiwinin ngunun we. Emon at a saau seni eu sitowa me a uwei ru tukutukun mongo. A saano non eu an, me ewe meinapan ewe sitowa a tapwei, ewe a niapeni me a poputa ne pupuchor me fiu ngeni. Ita ewe at mi nuokus epwe fen angei niwininpwe emon chon sona, chienei we ese fen mo tepereni nge amefi uren ennetin tong ngeni i. Ese wor an nuokus pwe epwe feingau, a fetan wenechar ngnei ekkewe ruemon mwan mi anini. A ereni ekkewe ruemon mwan, “Ngang upwe moni ewe mongo. Kose mochen kopwe epichano. Kose mochen kopwe mut ngeniei ai upwe moni ewe mongo.”
A pwarata me ren ewe Ngun mi Fel me a uren sokkun tong ese mo fen mefi, chienei we a apasa, “Ua chok mochen anisi me tutumunu ewe at.” Chienei we a apasa pwe a poputa ne mefi Jises Kraist me An we Achasefan--ifa usun me pwata ren ennetin tong Jises Kraist epwe mochen asor pwe epwe an Chon Amanau me Chon Ngaseno, me pwata a mochen pwe I epwe ina.38
Ina popun sia konu:
Nengeni, ewe Chon Maasen Siip Mi Murinno a kutta,
Kutta kewe nam mi monucheno.
Emwicha fengenir ren pwapwa,
Amanaua ren niwiniwatte.39
Pwe Namen Kot, ach Chon Amanau a sinei nupwen sia mefi anaemon, kukkun, tipemwaremwar, are niuokus. Non nemasepwi, Nifai a kuna ewe manamanen ewe Namen Kot “a feitiw won ekkewe sounengin ewe mwichefenin ewe Nam, me won ekkewe aramas pwon noun ewe Samon.” Iwe “ra toropas fetan won unusen ewe fonufan; iwe ra fotata wenechar me ren ewe manamanen Kot non ning mi napanap.”40
Ei pwonen epinukunuku me kinamwe mi pwan fich ngeni ach kei ran.
En ewe emon chok chon Mwichefen non om famini, sukun, nenien angang, are neniom? Fan ekkoch a mefi pwe om pranch a kukkun are touau? Ka mokutuno ngeni eu neni minefo, meni ren kapas are oreni mi sokkofesen? Meni nonnomun manauom a siwin, me ekkoch mettoch kese mefi mi tufich mi nom fan mesom? Ach Chon Amanau a erenikich, ese nifinifin nonnomuch, non kapasen Isaiah: “Epwene emwichafengeni noun kewe kukkun siip o epwene uweir non poun, epwene emweni ekkewe inenap mi wor nour kewe kukkun.”41
Pwii me fefinei, ach Chon Maasen Siip Mi Murinno a kokkorikich non mongungun me non Itan. A kutta, ochufengeni, me feito ngeni noun kewe aramas. Seni noun we soufos mi manau me seni emon me emon kich, A tingorei meinisin ne kutta kinamwe, popun, chikar, me pwapwa non unusan an kapas allim mi sofosefan me won ewe anen pwon. Seni an awewe, A aiti ekkewe chon maasen siip non Israel ar repwe angang non An tong.
Pwe Namen Kot, An misin mi kefin me apwapwa seni aposel me soufos. An Achasefan, ese much, mi nom nukunapan ewe kokkoten pwapwa me ewe popunapen foffor. A pwon, ese nifinifin nonnomuch, pwe A uweikich arap ngeni netipan.
Ami pwii me fefinei kana, amo ita sipwe mochen “ chon tapweno mi tipetekison mwirin Kot me ewe Nam,”42 eni fan eu ran itach kewe repwe mak non noun ewe Nam we puken manau,43 sipwe konu ewe konun ewe Nam,44 sipwe kokko ngeni ewe kamatipen ewe Nam.45
Ren emon Chon Maasen Siip me Nam, A kokkori: niwin sefanito “ngeni ewe ennetin mirit, minne ina ewe miritin [om] Chon Angasano, … [om] we chon masen siip mi napanap me mi ennet.”46 A pwon pwe “me ren an chen [sipwe] tongeni unusochuno non Kraist.”47
Non ei fansoun Paska, sia Ingeitii.
“Nimenimoch i ewe Nam!”48
“Hosanna ngeni Kot me ewe Nam!”49
Uwa pwarata usun I, ach Chon Maasen Siip mi Murinno mi unusoch, ewe Namen Kot mi unusoch. A kokkorikich ren itach, non itan-iwe ewe it mi pin iwe Jises Kraist-amen.