Wan Spesel Hae Koling

Mi talem tangkyu blong save talem ol toktok blong mi tedei long ol rol blong ol woman we i stap gohed long Restoresen. Hem i klia se truaot long histri, ol woman oli gat wan impoten ples insaed long plan blong Papa blong yumi long Heven. Presiden Nelson i tijim, “Bae i no posibol blong skelem paoa we … ol woman oli gat, i no long famli nomo, be tu, long Jos blong Lod, olsem ol waef, ol mama, mo ol bubuwoman; olsem ol sista mo ol anti; olsem ol tija mo ol lida; mo speseli olsem ol eksampol mo strong difenda blong fet.” ¹

Long fas Rilif Sosaeti long Nauvu, 178 yia i pas, Profet Josef Smit i givim kaonsel long ol sista blong “laef we i kasem mak blong ol spesel janis [blong olgeta].” ² Ol eksampol blong olgeta i tijim yumi tedei. Oli yunaet blong folem voes blong profet mo laef wetem wan fet we i no muvmuv long Jisas Kraes, taem oli bin help blong putum fandesen ia we naoia, yumi stanap long hem. Ol sista, hem i taem blong yumi nao. Yumi gat wan tabu wok we i kam long Lod, mo ol fetful mo defdefren kontribusen blong yumi oli impoten.

Presiden Spensa W. Kimbol i bin eksplenem: “Blong stap olsem wan woman we i stret mo i gud, long taem blong ol kruked fasin blong wol ia, bifo taem we Sevya blong yumi i kam bakegen, hem i wan spesel koling we i gud. Paoa mo gudfala fasin blong wan stret mo gud woman tedei bae hem i ten taem moa long wanem i save hapen long ol taem we i kwaet”.” ³

Semmak olsem Presiden Nelson i talem: “Mi askem strong long ol sista blong Jos … blong !stanap i kam long fored! Tekem ples blong yu we i stret mo i nid long hom blong yu, komuniti blong yu, mo long kingdom blong God—moa bitim we yu eva bin mekem bifo.” ⁴

I no long taem i pas, mi gat janis ia, tugeta wetem wan grup blong ol pikinini blong Praemeri, blong mitim Presiden Russell M. Nelson long wan semmak bilding we oli mekem olsem blong famli Smit long Palmaera, Niu Yok. Lisin taem profet blong yumi i tijim ol pikinini wanem oli save mekem blong muv i go fored.

Sista Jones: “Mi wantem save tumas sapos yu gat wan kwestin we bae yu wantem askem Presiden Nelson. Yu stap sidaon long ples ia wetem profet. ?I gat eni samting we oltaem yu bin wantem blong askem long wan profet? Yes, Pearl.”

Pearl: “I had blong stap olsem wan profet? ?Yu yu stap bisi tumas?”

Presiden Nelson: “O yes hem i had. Evri samting we i abaot fasin blong kam moa olsem Sevya i had tumas. Eksampol: Taem God i bin wantem blong givim Ol Ten Komanmen long Moses, ?weaples nao Hem i askem Moses blong go long hem? Antap long top blong wan maonten, antap long top blong Maonten Sinae Mekem se, Moses i mas wokbaot go kasem antap long top blong maonten ia blong karem Ol Ten Komanmen. Naoia, Papa long Heven i save talem: ‘Moses, yu stat long ples, mo bae mi mi stat long ples ia, mo bae mi kasem yu long hafrod.’ No, Lod i lavem hadwok, from hadwok i karem ol praes we i no save kam sapos i no gat hadwok. Eksampol: ?Yu eva tekem ol lesen blong piano?”

Ol pikinini: “Yes.”

Pearl: “Mi lanem vaeolin.”

Presiden Nelson: “Mo yu stap praktis?”

Ol pikinini: “Yes.”

Presiden Nelson: “Mo wanem i hapen sapos yu no praktis?”

Pearl: “Yu fogetem.”

Presiden Nelson: “Yes, yu no progres, ?i tru? So ansa hem i yes, Pearl. Hem i tekem hadwok, fulap hadwok, fulap stadi, mo i neva gat wan en. !Hemia i gud! Hemia i gud, from oltaem yumi stap progres. Iven long nekis laef, bae yumi stap mekem progres.”

Ansa blong Presiden Nelson long ol spesel pikinini ia i kam long wanwan long yumi. Lod i lavem hadwok, mo hadwok i karem ol riwod i kam. Yumi gohed blong stap praktis. Oltaem yumi stap progres sapos yumi stap trae had blong folem Lod. ⁵ Hem i no tingting se bae evri samting i stret gud tedei. Yumi stap gohed blong klaem ol maonten blong Sinae blong yumi wanwan. Olsem long ol taem we i pas, yumi mas mekem efot long rod blong yumi, hadwok, mo stadi, be komitmen blong yumi blong progres bae i karem ol praes we i no save finis. ⁶

?Wanem moa yumi lanem aot long Profet Josef Smit mo Fas Visen abaot efot, hadwok, mo stadi? Fas Visen i givim daereksen long yumi ol defdefren rol blong yumi we i stap gohed. Olsem ol woman blong fet, yumi save tekemaot ol prinsipol blong trutok aot long ol eksperiens blong Profet Josef we i givim ol lukluk mo tingting blong stap kasem revelesen blong yumiwan. Eksampol:

• Yumi stap wok andanit long ol hadtaem.

• Yumi tanem yumi go long ol skripja blong kasem waes blong mekem samting.

• Yumi soem fet mo tras blong yumi long God.

• Yumi yusum paoa blong yumi blong plis wetem God blong helpem yumi blong stopem paoa blong enemi.

• Yumi givim ol tingting blong hat blong yumi i go long God.

• Yumi lukluk nomo long laet blong Hem blong gaedem ol joes blong laef blong yumi mo stap wetem yumi taem yumi tanem yumi go long Hem.

• Yumi luksave se Hem i save wanwan long yumi long nem mo hem i gat wanwan wok blong yumi blong mekem. ⁷

Antap long hemia, Josef Smit i putumbak save ia se yumi gat tabu paoa blong mekem samting mo yumi gat valiu we i no save finis. From rilesensip blong yumi wetem Papa long Heven, mi biliv se Hem i wantem yumi blong kasem revelesen we i kam long Hem.

Lod i givim instraksen long Ema Smit blong “kasem Tabu Spirit,” lanem fulap, “lego ol samting blong wol ia long saed, … lukaotem ol samting we oli moa gud,” mo “hang strong long ol kavenan [blong hem]” wetem God. ⁸ Blong stap lan i impoten blong save progres, speseli taem kompanion blong Tabu Spirit we i stap oltaem i stap tijim yumi wanem i nid blong wanwan long yumi blong putum long saed—we i minim ol samting we i save pulumaot tingting blong yumi o mekem progres blong yumi i slo .

Presiden Russel M. Nelson i talem: “Mi plis long yufala blong kam antap long paoa blong yufala long saed blong spirit blong kasem revelesen.” ⁹ Ol toktok blong profet blong yumi i gogohed blong stap wetem mi taem mi stap tingting strong long paoa blong ol woman blong stanap i kam long fored. Hem i plis long yumi, we i stap talem se hemia i impoten faswan long evri samting. Hem i stap tijim yumi olsem wanem blong laef long saed blong spirit long wan wol we i fulap long ol sik blong sin, taem yumi stap kasem mo mekem folem revelesen. ¹⁰ Taem yumi mekem hemia, blong givim ona mo stap laef folem ol komanmen blong Lod, Hem i promesem yumi, semmak olsem i promesem Ema Smit, “wan hat blong king blong stret mo gud fasin.” ¹¹ Profet Josef i bin tijim from wanem i impoten blong stap save se God i apruvum rod we yumi stap wantem blong folem long laeftaem ia. Sapos save ia i no gat, yumi “bae maen [blong yumi] i kam slak mo bae foldaon.” ¹²

Long konfrens ia bae yumi harem ol trutok we bae i givim insperesen long yumi blong jenis, kam moa gud, mo klinim laef blong yumi. Tru long revelesen blong yumiwan, yumi save stopem wanem sam oli stap singaotem “tumas samting we i kam long jeneral konfrens”—taem yumi go mo gat strong tingting blong mekem evri samting naoia. Ol woman oli werem fulap hat, be i no posibol, mo i no nid, blong wetem evriwan long semmak taem. Spirit i helpem yumi blong save stret wanem wok blong lukluk moa long hem tedei. ¹³

Paoa blong Lod we i fulap long lav tru long Tabu Spirit i helpem yumi blong save praeoriti blong Hem long progres blong yumi. Blong stap luksave revelesen blong yumiwan i lid i go long progres blong yumiwan . ¹⁴ Yumi lisin mo mekem folem. ¹⁵ Lod i talem, “Askem Papa long nem blong mi, wetem fet mo stap bilivim se bambae yutufala i kasem, mo bambae yutufala i gat Tabu Spirit we i stap soemaot evri samting we i nid long ol pikinini blong man.” ¹⁶ Rol blong yumi we i stap gogohed i blong kasem revelesen we i stap gogohed.

Taem yumi kasem wan hae level blong save mekem gud hemia, yumi save kasem moa paoa long ol rol blong yumi wanwan blong givhan mo mekem ol wok we i blong sevem man mo kam olsem wan god—blong save “livim ol samting blong wol ia oli stap long saed, mo lukaotem ol samting blong wan wol we i moa gud.” ¹⁷ Afta nao yumi save givim insperesen wetem moa paoa long jeneresen blong yumi we i stap kam antap blong mekem semmak.

Ol brata mo sista, yumi evriwan i lukaotem paoa blong God long laef blong yumi. ¹⁸ I gat wan naesfala yuniti bitwin ol man mo ol woman i dipdipen blong save mekem wok blong God tedei. Yumi aksesem paoa blong prishud tru long ol kavenan we oli mekem faswan long ol wota blong baptaes, mo afta insaed long ol wol blong ol tabu tempol. ¹⁹ Presiden Nelson i tijim yumi se, “Evri woman mo evri man, we oli mekem ol kavenan wetem God mo i stap kipim ol kavenan ia, mo i stap klin inaf blong tekpat long ol prishud odinens ia, oli save go stret blong kasem paoa blong God.” ²⁰

Samting we mi wantem admitim miwan tedei, hem i we, olsem wan woman, mi no bin luksave fastaem long laef blong mi se mi bin save yusum, tru long ol kavenan blong mi, paoa blong prishud. ²¹ Ol sista, mi prea se bae yumi luksave mo tekem valiu long prishud paoa taem yumi “hang strong long ol kavenan [blong yumi],” ²² holemtaet ol trutok blong ol skripja, mo tekem not long ol toktok blong ol profet blong yumi we oli stap laef.

Letem yumi talemaot strong divosen blong yumi long Papa blong yumi long Heven mo Sevya blong yumi, “wetem wan fet long hem we i strong mo i no seksek, mo stap hang fulwan long ol gud wok blong hem, we i gat olgeta paoa blong sevem man.” ²³ Bae yumi gohed wetem glad long rod ia we i stap go from paoa blong yumi we i hae moa long saed blong spirit mo helpem olgeta raon long yumi blong mekem semmak tru long lav, seves, lidasip mo sore.

Elda James E. Talmage i rimaenem yumi wetem lav se, “Bigfala jampion evriwan long wol blong woman mo fasin blong stap olsem wan gudfala woman hem i Jisas Kraes.” ²⁴ Long blong lukluk ia blong ol rol blong ol woman we i stap gogohed insaed long Restoresen, mo blong yumi evriwan, ?wanem rol nao i moa impoten? Mi testifae se hem i blong harem Hem, ²⁵ blong folem Hem, ²⁶ blong trastem Hem, ²⁷ mo blong stap olsem mo soem lav blong Hem. ²⁸ Mi save Hem i stap laef. ²⁹ Long tabu nem blong Jisas Kraes, amen.