Olsem Wanem Prishud I Blesem Ol Yut

Ol brata mo sista, mi glad tumas blong toktok long yufala long spesel histri naet ia abaot tabu presen blong prishud mo bigfala paoa we i gat blong blesem ol yut long dispensesen ia. Mi prea se nomata mi no stret gud evriwan, be bae Spirit i helpem mi blong tijim trutok.

Fas Presidensi i rimaenem olgeta we oli holem Aronik Prishud se “yufala i stap laef long wan dei blong ol bigfala janis mo ol jalenj— wan dei we prishud i bin kambak bakegen. Yufala i gat atoriti blong mekem ol odinens blong Aronik Prishud Taem yufala i praktisim atoriti ia wetem plante prea mo fasin blong stap klin inaf, bae yufala i blesem bigwan laef blong olgeta we oli stap raon long yufala.” ¹ Olsem ol yang man blong Jos, oli rimaenem yumi se yumi ol “pikinini [boe] blong God we Hem i lavem tumas, mo Hem i gat wan wok blong [yumi] blong mekem” ² mo yumi help long wok blong Hem “blong mekem man i nomo save ded mo i kasem laef we i no save finis” (Moses 1:39).

Prishud i atoriti ia blong mekem ol odinens mo ol kavenan blong gospel blong Sevya i go long olgeta we oli klin inaf blong kasem. Tru long ol prishud odinens mo ol tabu kavenan ia, ol blesing blong Atonmen blong Sevya oli kam; ol blesing ia oli helpem yumi blong kasem tabu ples blong yumi long Heven.

Josef Smit i bin wan yang man we God i bin singaotem hem blong putumbak gospel blong Jisas Kraes mo, from stamba tingting ia, hem i bin kasem prishud mo yusum blong blesem evri man long wol. Doktrin mo Ol Kavenan 135 i tokbaot plante blesing we Josef i bin givim long ol yut blong dispensesen ia. Yumi rid: “Josef Smit … i bin mekem moa, be i no moa bitim Jisas, from wok ia blong fasin blong sevem man long wol ia bitim eni narafala man we i bin laef long wol ia. … Hem i bin tekem Buk blong Momon i kam … ; hem i bin sendem ful gospel we i no gat en … i go long ol fo pat blong wol ia; hem i bin tekem ol revelesen mo ol komanmen i kam we oli stap insaed long buk ia blong Doktrin mo Ol kavenan … ; hem i bin mekem plante taosen Lata-dei Sent oli kam tugeta, … mo hem i bin livim wan stori mo wan nem i stap we bae oli no save kilimdaon” (Doktrin mo Ol Kavenan 135:3

Blong givim seves wetem paoa olsem Josef i bin mekem, yumi mas klin inaf blong kwalifae blong yusum prishud paoa blong Lod. Taem oli stap transletem Buk blong Momon, Josef mo Oliva Kaodri, tufala i wantem blong baptaes, be oli no gat stret atoriti ia. Long 15 Mei 1829, tufala i bin nildaon long prea mo Jon Baptaes i bin visitim tufala, mo i bin givim long tufala ol ki mo atoriti blong Aronik Prishud, mo talem “Antap long hed blong yutufala, ol wokman we yumi wok tugeta, long nem blong Mesaea, mi givim Prishud blong Eron, we i holem olgeta ki blong ol seves blong ol enjel, mo blong gospel blong fasin blong sakem sin, mo blong baptaes andanit long wota blong kam klin aot long ol sin” (Doktrin mo Ol Kavenan 13:1).

Oli givim long yumi janis blong tij olsem ol enjel, blong prijim gospel long evri bigbigfala kantri long wol mo blong helpem ol sol i kam long Kraes. Seves ia i joenem yumi long wok ia wetem Jon Baptaes, Moronae, Josef Smit, Presiden Russell M. Nelson, mo ol nara wokman blong Lod we oli stap wokhad.

Seves blong yumi insaed mo wetem prishud blong Hem i karem tugeta olgeta we oli stap tru mo fetful blong stap laef mo folem ol tijing blong Lod long stret fasin, we miwan mi save se i had taem yumi stap fesem ol jalenj blong ol yut. Be blong wok wan wetem ol wokman blong Lod blong mekem wok blong Hem i hapen, bae i help blong mekem yumi kam strong moa mo go agensem ol temtesen mo ol giaman blong enemi. Yu save stap olsem wan smol laet long olgeta we oli no trastem olgetawan. Laet we i stap insaed long yu bae i saen klia mekem se evriwan we yu mitim bae oli kasem blesing blong stap raon long yu nomo. I had samtaem blong luksave se ol kampani blong yumi long saed blong spirit i stap, be mi glad blong save se mi wan fetful memba blong prishud kworom, we mi save wok wetem mo gro kolosap long Kraes.

Long saed blong ol fren mo famli blong yumi, Tabu Spirit i wan impoten tru mo gudfala kompanion. Be blong invaetem kampani blong Hem blong stap oltaem, yumi mas stap putum yumi long ol situesen mo ol ples we Hem bae i wantem blong stap. Hemia i save stat long hom blong yumi, taem yumi wok blong mekem olgeta oli kam ol tabu ples taem yumi tekpat long evri dei skripja stadi mo prea olsem wan famli mo, moa impoten, taem yumi stadi ol skripja mo prea yumiwan.

Eli long yia ia, mi bin kasem wan glad, yet wetem tingting we i stap daon wan janis blong helpem smol sista blong mi, Osean i progres long rod blong kavenan blong akseptem invitesen ia blong kasem baptaes mo mekem i hapen ol impoten samting we i nidim blong go insaed long selestial kingdom. Hem i muvum baptaes deit blong hem blong wan manis taem kasem we oli odenem mi olsem wan pris, blong givim long mi spesel janis ia blong mekem odinens ia, taem ol nara sista blong mifala oli gat spesel janis ia tu blong wok anda long prishud asaenmen mo blong stanap olsem ol witnes. Taem mifala i stanap long wanwan saed long ples blong baptaes, mo rere blong go insaed long wota, mi luk finis glad blong hem mo mi filim semmak mo mi filim mitufala i wan. Mi filim yunaet wetem hem, taem mi luk se hem i stap mekem wan raet desisen. Janis ia blong praktisim prishud i mekem se mi nid blong lukaot gud moa blong stap laef folem gospel bitim we blong stap mekem wanwan taem nomo. Blong rere from hemia, mi go long tempol evri dei long wik ia we mama, apu woman mo sista blong mi oli sapotem mi blong mekem baptaes long bihaf blong ol ded man.

Eksperiens ia i bin tijim mi plante abaot prishud mo hao mi save stap klin inaf blong yusum. Mi save se evri man we oli holem prishud oli save filim ol semmak samting we mi bin filim sapos mifala i folem eksampol blong Nifae blong “go mo mekem” (luk long 1 Nifae 3:7). Yumi no save stap sidaon les mo ting se bae Lod bae i yusum yumi long bigfala wok blong Hem. Yumi no mas wet blong olgeta we oli nidim help blong yumi blong kam lukaotem yumi; hem i diuti blong yumi olsem ol man we i holem prishud blong soem eksampol mo stanap olsem ol witnes blong God. Sapos yumi stap mekem ol desisen we i blokem yumi long progres blong yumi blong kasem laef we i no save finis, yumi mas jenis naoia. Setan bae i traehad blong kipim yumi long wan ples blong lukaotem mo laekem ol simpol fasin blong wol blong sot taem nomo. Be mi save se sapos yumi traehad, blong faenem olgeta we bae oli sapotem yumi, mo sakem sin evri dei, ol blesing bae i kam olsem ol risal we i gud tumas mo laef blong yumi bae jenis blong oltaem taem yumi muv fored long kavenan rod.

Mi save se hemia i tru Jos Ia blong Jisas Kraes, we i Sevya blong yumi, mo Hem i bin givim ol ki ia blong prishud long ol Aposol blong Hem, we oli yusum blong lidim yumi, speseli long ol dei ia blong jalenj mo blong mekem rere wol ia from seken kaming blong Hem.

Mi save se Josef Smit i profet blong Restoresen mo we Presiden Nelson i profet blong yumi we i stap laef tedei. Mi invaetem yumi evriwan blong stadi long laef blong ol bigfala man ia we oli holem prishud mo lukaotem blong mekem yumiwan i kam antap evri dei, blong yumi save rere blong mitim Man Ia we i Krietem yumi. Long nem blong Jisas Kraes, amen.