Yumi Wan blong Mekem Wok blong God I Kamtru

Ol dia gudfala sista mo brata blong mi. !Hem i gud tumas blong stap wetem yufala! Long weaples yufala i stap lisin long hem, mi haggem ol sista blong mi, mo sekhan wetem hat long ol brata blong mi. Yumi joen wan long wok blong Lod.

Taem yumi stap tingting long Adam mo Iv, plante taem fas tingting blong yumi i gudfala laef blong tufala insaed long Garen blong Iden. Mi ting se weta i stret oltaem—i no hot tumas, mo i no kolkol tumas—mo i gat fulap naes frut mo vejetebol oli gro, mekem se tufala i save kaekae eni taem we tufala i wantem. From se hemia i wan niu wol long tufala, i gat plante samting blong faenemaot, mekem se evri dei i gat samting blong mekem taem tufala i lukluk ol animol mo luk ol naes samting we oli stap raon. Tufala i bin kasem tu ol komanmen blong stap obei mo gat ol defren wei blong mekem ol instraksen ia, we i mekem se tingting i fasfas mo tufala i konfius. ¹ Be taem tufala i stap mekem ol desisen we i bin jenisim laef blong tufala blong oltaem afta, tufala i bin lan blong wok tugeta mo tufala i kam wan blong mekem i hapen ol stamba tingting we God i gat blong tufala, mo blong evriwan long ol pikinini blong Hem.

Nao. Yu traem gat pikja long maen blong semfala kapol ia long laef long wol ia. Tufala i mas wok from kaekae blong tufala, sam animol i tekem se tufala i kaekae blong olgeta, mo i gat ol had jalenj we tufala i save winim sapos nomo tufala i kaonsel mo prea tugeta. Mi tingting long maen se maet i bin gat samfala taem we tufala i gat tu defren tingting long wei blong fesem olgeta jalenj ia. Be, tru long Foldaon, tufala i bin lanem se i nid blong tekem aksen wetem yuniti mo lav. Long ol lesen we tufala i kasem long olgeta blong heven, oli bin kasem lesen abaot plan blong fasin blong sevem man, mo olgeta prinsipol blong gospel blong Jisas Kraes we i mekem se plan ia i wokaot gud. From se tufala i andastanem se stamba tingting long wol ia, mo ples blong go long hem long taem we i no save finis, tufala i semmak, nao tufala i glad mo gat sakses blong lanem blong wok wetem lav mo stret mo gud fasin tugeta.

Taem ol pikinini oli bon i kam, Adam mo Iv i bin tijim famli blong tufala wanem tufala i bin lanem aot long ol mesenja ia blong heven. Tufala i lukluk moa blong stap helpem ol pikinini blong tufala, mo tu, blong andastanem mo akseptem olgeta prinsipol we bae i mekem se tufala i hapi long laef ia, mo tu, bae i mekem tufala i rere blong gobak long papa mo mama blong tufala long heven, afta nomo we tufala i kam antap long wanem tufala i save mekem mo tufala i pruvum se tufala i stap obei long God. Long rod ia i stap go, Adam mo Iv i bin lanem blong stap glad long ol paoa blong tufala we oli defren, mo blong stap sapsapotem wanwan long tufala long impoten wok we i no save finis. ²

Taem ol handred yia, mo afta, ol taosen yia oli kam mo pas i go, klaod blong rong infomesen mo rong andastaning i kam kavremap klia insperesen mo kontribusen blong ol man mo ol woman. Long taem ia bitwin naesfala stat insaed long Garen blong Iden mo naoia, enemi i bin win gud long gol blong hem blong seraotem ol man mo ol woman, taem hem i bin stap traem blong winim sol blong yumi. Lusifa i save se hem i save prapa spolem yuniti blong ol man mo ol woman sapos hem i save mekem yumi konfius abaot hamas yumi impoten mo abaot ol kavenan responsabiliti blong yumi; nao bae hem i win blong prapa spolem ol famli, we oli ol stamba yunit blong taem we i no save finis.

Setan i pusum man blong komperem samting olsem wan tul blong krietem ol filing blong stap rul ova long man, o stap folem rul blong man, mo haedem trutok we i no save finis se ol defren fasin we i stap long man mo ol woman, God nao i givim mo i skelem se oli semmak. Hem i bin traem blong daonem kontribusen blong ol woman, tugeta insaed long famli mo long sivil sosaeti, mo long wei ia, i daonem paoa we oli gat blong mekem gud. Gol blong hem i blong i gat wan faet from paoa, be i no wan selebresen blong ol spesel kontribusen blong ol man mo ol woman we oli komplitim olgeta mo givhan long yuniti.

Mekem se, taem ol yia i stap go, raon long wol ia, wan ful andastaning ia abaot ol kontribusen mo ol responsabiliti blong ol woman mo ol man, we oli dipdipen long olgeta wanwan nomata oli defdefren, i save go lus. Ol woman, long plante sosaeti, oli stap andanit long paoa blong ol man, be i nomo ol saedsaed patna, mo aktiviti blong olgeta i gat limit. Progres blong olgeta long saed blong spirit i slodaon fulap long ol taem ia blong tudak; i tru, smol laet nomo long saed blong spirit i save go insaed long maen mo hat blong olgeta we i fulap long fasin blong kastom.

Mo afta, laet blong gospel we i kambak i bin saen “we i bitim laet blong san” ³ taem we God Papa mo Pikinini blong Hem, Jisas Kraes, tufala i bin kamaot long boe Josef Smit eli long Springtaem blong 1820, long emti bus ia long Niu Yok. Taem ia, i stat blong plante we plante revelesen we oli kam long heven. Wan long ol fas samting blong fas Jos blong Kraes we i bin kambak, i atoriti ia blong prishud blong God. Taem we Restoresen i bin gohed blong hapen, ol man mo ol woman oli stat blong luksave bakegen, hamas i impoten mo wanem bigfala samting i save hapen blong stap wok olsem ol patna long tabu wok ia, we Hem i givim raet long hem mo daerektem.

Long 1842, taem we ol woman blong Jos ia we i niu nomo, i wantem blong statem wan ofisol grup blong helpem wok ia, Presiden Josef Smit i filim insperesen blong oganaesem olgeta “anda long prishud, folem paten blong prishud.” ⁴ Hem i talem: “Naoia mi tanem ki i go long yufala, long nem blong God … —hemia i stat blong ol dei we oli moa gud.” ⁵ Mo stat long tetaem ia we oli tanem ki, ol janis blong edukesen, politik, mo ekonomi blong ol woman i stat sloslo blong go raon long wol. ⁶

Niufala Jos oganaesesen blong ol woman, we nem i Rilif Sosaeti, i no olsem ol nara sosaeti blong ol woman blong taem ia, from se i wan we profet i stanemap, mo hem i tekem aksen wetem prishud atoriti blong givim long ol woman, atoriti, tabu responsabiliti, mo ol ofisol posisen insaed long bodi blong Jos, be i no aotsaed long bodi ia. ⁷

Stat long taem blong Profet Josef Smit i kam kasem tedei, restoresen ia we i stap gogohed long saed blong evri samting, i givim moa laet long nid ia blong atoriti mo paoa blong prishud blong stap helpem ol man mo ol woman blong mekem ol tabu responsabiliti we oli bin kasem. I no longtaem i pas, oli bin tijim yumi se ol woman we oli setem olgeta apat anda long daereksen blong wan we i holem ol prishud ki, i stap wok wetem prishud atoriti long koling blong olgeta. ⁸

Long Oktoba 2019, Presiden Russell M. Nelson i bin tijim se ol woman we oli endao insaed long tempol, oli gat prishud paoa long laef blong olgeta, mo insaed long hom blong olgeta taem oli stap kipim ol tabu kavenan ia we oli bin mekem wetem God. ⁹ Hem i eksplenem se “ol heven oli open nomo i stap long ol woman we oli bin endao wetem paoa ia blong God we i kamkamaot long prishud kavenan blong olgeta, semmak olsem ol heven oli open long ol man we oli holem prishud.” Mo hem i bin leftemap tingting blong evri sista “blong yusum oltaem paoa ia blong Sevya blong helpem famli blong [olgeta] mo ol narawan we [oli] lavem.” ¹⁰

?So hemia i minim wanem long yu mo mi? ?Olsem wanem nao, blong stap andastanem prishud atoriti mo paoa i save jenisim laef blong yumi? Wan long ol ki, hem i blong andastanem se taem ol woman mo ol man oli wok tugeta, yumi mekem plante moa samting i hapen bitim we taem yumi stap wok wanwan. ¹¹ Ol rol blong yumi, oli komplitim wanwan long yumi be oli no kompit. I nomata se oli no odenem ol woman long wan ofis blong prishud, be olsem mi talem fastaem, ol woman oli kasem blesing blong prishud paoa taem oli stap kipim ol kavenan blong olgeta, mo taem oli wok wetem prishud atoriti taem oli setem olgeta apat long wan koling.

Long wan naes dei long Ogis, mi bin gat spesel janis blong sidaon wetem Presiden Russell M. Nelson insaed long hom we oli mekem bakegen, blong Josef mo Ema Smit long Hamoni, Pensilvania, kolosap long ples we oli bin putumbak Aronik Prishud long ol las dei ia. Long storian blong mitufala, Presiden Nelson i bin tokbaot hamas rol we ol woman oli plei long hem long Restoresen i impoten.

Presiden Nelson: Wan long ol impoten pat we Lod i stap mekem mi tingbaot taem mi stap kam long Restoresen ples ia blong Prishud, i hamas rol we ol woman oli bin plei long Restoresen, i impoten.

“Taem we Josef i bin statem wok blong transletem Buk blong Momon, ?hu nao i bin stap raet? Yes, hem i bin raet smol, be i no plante. Ema i kam insaed.

“Mo afta, mi tingting long Josef we i bin go long bus blong prea kolosap long hom blong olgeta long Palmaera, Niu Yok. ?Hem i go wea? Hem i bin go long Tabu Bus. ?From wanem hem i go long ples ia? From se hemia i ples we Mama blong hem i stap go long hem taem hem i wantem prea.

“Hemia i tufala woman ia nomo we oli bin holem ol ki rol long Restoresen blong Prishud, mo insaed long Restoresen blong Jos. Mi no gat tu tingting se, yumi save talem se ol waef blong yumi oli impoten semmak tedei, olsem bifo. Yes i tru. Oli impoten.”

Semmak olsem Ema mo Lusi, mo Josef, yumi wok gud moa taem yumi wantem blong lan aot long wanwan long yumi, mo yumi wan long gol blong yumi blong kam ol disaepol blong Jisas Kraes, mo blong stap helpem ol narawan folem rod ia.

Oli tijim yumi se: “prishud i blesem laef blong ol pikinini blong God long plante plante wei. … Long ol [Jos] koling, ol tempol odinens, ol famli rilesensip, mo long ol kwaet seves blong wanwan, ol Lata-dei Sent woman mo man oli go fored wetem prishud paoa mo atoriti. Fasin ia blong man mo woman i dipdipen long wanwan long olgeta blong mekem wok blong God i kamtru tru long paoa blong Hem, i stap long stamba blong gospel blong Jisas Kraes we i kambak long wol tru long Profet Josef Smit.” ¹²

I mas gat yuniti long tabu wok ia we yumi gat spesel janis mo koling blong mekem, be hemia i no jes hapen nomo olsem. I tekem efot mo taem blong rili kaonsel tugeta—blong lisin long wanwan long yumi, andastanem ol poen blong lukluk blong wanwan, mo serem ol eksperiens—be fasin blong wok ia, risal blong hem i ol desisen we i gat moa insperesen. I nomata se i long hom o long ol Jos responsabiliti blong yumi, fasin blong wok we i wok gud moa blong kasem ful paoa blong yumi, hem i blong wok tugeta, we yumi kasem blesing ia tru long paoa mo atoriti blong prishud blong Hem long ol rol blong yumi we oli defdefren be oli komplitim yumi.

?Patnasip ia i luk olsem wanem insaed long laef blong ol kavenan woman tedei? Bae mi serem wan eksampol.

Alison mo Jon, tufala i gat wan patnasip we i wan kaen ia nomo. Tufala i stap ron long baeskel we i gat tu jea mo padel, long ol resis we oli sotwan mo longwan. Blong tufala i save win long baeskel ia, tufala i mas wok wan. Tufala i mas lei long sem daereksen long raet taem. Wan i no save go fastaem long narawan, be tufala i mas toktok klia, mo wanwan i mas mekem pat blong hem. Kapten, long fored, i kontrolem taem blong brek mo taem blong stanap. Stoka o hem we i givim paoa, long bak, i nid blong savegud wanem i stap gohed mo i rere blong givim moa paoa sapos oli stap slak, o stap slo sapos oli go kolosap tumas long ol nara pipol we oli stap ron long baeskel. Tufala i mas sapsapotem tufala blong save progres mo kasem gol blong tufala.

Alison i eksplenem: “Blong smol taem fastaem, hem we i kapten bae i talem ‘Stanap’ taem i nid blong stanap mo ‘Brek’ taem mitufala i nid blong stop blong pusum padel. Afta sam taem, hem we i stoka i lan blong save wetaem kapten bae i stanap o brek, mo i no nidim toktok blong talem. Mitufala i lanem blong stap long sem laen long wei we wanwan long mitufala i stap mekem samting, mo wan i save talem taem wan i stap gat hadtaem, mo [afta] narawan i traem blong mekemap wok blong narawan. Rili, hem i abaot tras mo fasin blong wok tugeta.” ¹³

Jon mo Alison, i no wan nomo taem tufala i stap ron long baeskel, be tufala i wan tu long mared blong tufala. Wanwan i wantem hapines blong narawan i moa bitim hemia blong hemwan bakegen; wanwan i lukluk long gud fasin blong narawan, mo wok blong winim wanem we i no gudgud tumas long hemwan. Wanwan i gat taem blong lid mo wanwan i gat taem blong givim moa taem wan patna i gat hadtaem. Wanwan i glad long kontribusen blong narawan mo tufala i faenem ol moa gud ansa long ol jalenj blong tufala taem tufala i joenem ol talen mo risos blong tufala. I tru. Tufala i joen long wanwan long tufala tru long lav we i olsem hemia blong Kraes.

I wan nid blong tufala i laen moa wetem tabu paten blong stap wok tugeta long yuniti long taem tedei wetem ol mesej blong “mi-faswan” we oli raonem yumi. Ol woman oli gat ol presen we i blong olgetawan nomo mo oli tabu, ¹⁴ mo oli givim ol responsabiliti we oli no olsem ol narawan, be oli no go moa—o oli kam daon moa bitim ol presen mo ol responsabiliti blong ol man. Yumi evriwan, Papa long Heven i mekem mo i nidim yumi, blong mekem tabu plan blong Hem blong givim bes janis long ol pikinini blong Hem, blong kasem ful tabu paoa we oli save kasem.

Tedei, “yumi nidim ol woman we oli gat strong paoa long tingting mo visen ia olsem Mama blong yumi, Iv,” ¹⁵ blong joen wan wetem ol brata blong tekem ol sol oli kam long Kraes. ¹⁶ Ol man oli nidim blong kam ol tru patna, be i no blong ting nomo se olgeta nomo oli responsibol, o “priten” se oli patna be woman nao i stap mekem evri wok. Ol woman oli nid blong wantem “step i go fored mo tekem ples [blong olgeta] we oli gat raet mo nid long hem” ¹⁷ olsem ol patna, be i no blong ting se olgeta nomo bae oli mekem evri samting olgetawan, o wet se bae oli talem samting blong oli mekem. ¹⁸

Blong luk ol woman olsem ol impoten wan blong tekpat long samting, i no abaot blong stap semmak long saed blong mane, be i abaot blong andastanem trutok blong doktrin. I no nid blong stanemap wan program blong mekem hemia i hapen; yumi save wok strong blong tekem woman i impoten semmak olsem God i mekem: olsem ol stamba patna insaed long wok ia blong fasin blong sevem man mo kam olsem wan god.

?Yumi rere? ?Bae yumi traehad blong winim ol rong saed blong kalja, mo akseptem ol tabu paten mo praktis we oli stanap long fandesen doktrin? Presiden Russell M. Nelson i stap invaetem yumi blong “holem loklokem han blong yumi long tabu wok ia … blong help blong mekem wol ia i rere from Seken Kaming blong Lod.” ¹⁹ Taem yumi mekem olsem, bae yumi lanem blong tekem se kontribusen blong wanwan i impoten, mo bae i mekem ol wok oli wokaot gud moa taem yumi mekem ol tabu rol blong yumi. Bae yumi filim moa glad bitim we yumi bin eksperiensem bifo.

Letem plante long yumi i jusum blong kam wan folem wei we Lod i givim tru long insperesen blong help mekem wok blong Hem i muv fored. Long nem blong Sevya we yumi lavem tumas, Jisas Kraes, amen.