Stap Openem Ol Heven blong Kasem Help
!Bae yumi putum fet blong yumi long Lod Jisas Kraes i kam aksen!
!Hemia i bin wan kaen sesen ia nomo mo i bin gud tumas! Tangkyu dia Laudy mo Enzo. Yutufala i ripresentem gud ol gudfala yang woman mo yang man blong Jos ia.
Ol dia brata mo sista. Yumi bin harem plante tedei abaot Restoresen blong Jos—stret Jos ia we Sevya blong yumi, Jisas Kraes, i bin stanemap long taem blong seves blong Hem long wol ia. Restoresen ia i bin stat 200 yia i pas, long spring ia, taem God Papa mo Pikinini blong Hem, Jisas Kraes, i bin kamkamaot long yangfala Josef Smit.
Ten yia afta long impoten visen ia, Profet Josef Smit mo faef narawan, God i bin singaotem olgeta olsem ol stamba memba blong statem Jos Ia we i kambak, blong Lod.
Aot long smol grup ia we oli kam tugeta long 6 Epril 1830, wan wol oganaesesen i stanap, we i gat moa long 16 milian memba. Gud we Jos ia i stap mekem raon long wol blong helpem safaring blong ol man, mo blong leftemap tingting blong man, oli save gud long hem. Be stamba tingting blong hem, hem i blong helpem ol man, ol woman, mo ol famli blong oli folem Lod Jisas Kraes, obei long ol komanmen blong Hem, mo kwalifae from blesing we i moa hae long evri blesing—we i laef we i no save finis wetem God mo famli blong olgeta.1
Taem yumi stap makem taem ia we oli statem Restoresen long 1820, hem i impoten blong tingbaot se, i nomata se yumi respektem Josef Smit olsem wan profet blong God, hemia i no Jos blong Josef Smit, mo i no Jos blong Momon. Hemia i Jos Ia blong Jisas Kraes. Hem i talem stret hao bae oli singaotem Jos blong Hem: “Bae olsem ia nao oli mas singaotem jos blong mi long ol las dei, we i Jos Ia blong Jisas Kraes blong Ol Lata-dei Sent.”2
Mi bin toktok bifo abaot rod we i nid blong yumi tekem blong stretem wei we yumi talem nem blong Jos.3 Stat long tetaem ia, yumi bin mekem plante blong stretem hemia. Mi mi glad tumas long Presiden M. Russel Ballard mo ful Kworom blong Olgeta Twelef Aposol, we oli bin mekem plante samting blong lidim ol wok ia tu, mo ol narafala wok we i go wetem, we bae mi anaonsem tedei long naet.
Ol lida blong Jos, mo ol dipatmen, mo ol grup we oli joen wetem, mo ol milian memba—mo ol narawan—naoia, oli stap yusum stret nem blong Jos. Ofisol stael gaed blong Jos, oli bin stretem. Stamba websaet blong Jos, naoia hem i ChurchofJesusChrist.org. Ol adres blong imel, ol domen nem, mo sosol media, oli stretem olgeta finis. Kwaea we yumi lavem, naoia i “Tabenakol Kwaea long Tempol Skwea.”
Yumi bin mekem ol bigfala hadwok ia from se, taem yumi stap karemaot nem blong Lod long nem blong Jos blong Hem nao yumi stap karemaot nomo Hem olsem stamba blong wosip blong yumi, mo stamba blong laef blong yumi. Taem yumi tekem nem blong Sevya long yumi long baptaes, yumi komitim yumi blong stap witnes, tru long ol toktok, ol tingting mo ol aksen, se Jisas, Hem i Kraes.4
Mi bin promesem bifo se sapos yumi “mekem bes blong [yumi] blong stretem nem blong Jos blong Lod, bae Hem i “kapsaetem paoa mo blesing blong Hem long hed blong ol Lata-dei Sent, ol kaen blesing ia we yumi neva luk bifo.”5 Mi mekem promes ia bakegen tedei.
Blong helpem yumi tingbaot Hem mo aedentifae Jos Ia blong Jisas Kraes blong Ol Lata-dei Sent olsem Jos ia blong Lod mifala i glad blong presentem wan simbol we bae i soemaot stamba ples blong Josef Smit insaed long Jos blong Hem.
Simbol ia, i tekem nem blong Jos we i stap insaed long wan kona ston. Jisas Kraes i jif konaston.6
Long medel blong simbol ia, oli ripresentem mabol statiu blong Kristus we Thorvaldsen i kavem. Pikja blong hem i Lod ia we i laef bakegen long ded, we i stap laef we i openem han blong Hem blong akseptem evriwan we bae oli go long Hem.
Long wan simbol wei, Jisas Kraes i stap stanap andanit long wan haf raon doa (o ark). Haf raon doa ia i mekem yumi tingbaot Sevya we i laef bakegen long ded we i kamaot long tumb long nambatri dei afta we oli hangem Hem antap long kros.
Simbol ia, plante i filim se oli save gud, from se yumi bin joenem gospel ia we i kambak wetem Kraes ia we i stap laef mo i bin laef bakegen long ded.
Simbol ia, naoia bae oli yusum olsem wan saen we oli save luk, long ol buk, nius blong Jos mo ol samting we Jos i oganaesem.7 Bae i mekem yumi tingbaot se hemia i Jos Ia blong Sevya, mo evri samting we yumi stap mekem, olsem ol memba blong Jos blong Hem, i lukluk nomo long Jisas Kraes mo gospel blong Hem.
Naoia, ol dia brata mo sista, tumoro i Pam Sandei, olsem we Elda Gong i bin talem long naes wei. Afta, yumi statem spesel wik we i go en wetem Ista. Olsem ol man we oli folem Jisas Kraes, we yumi stap laef long wan taem we KOVID-19 wol sik ia i putum wol i muvmuv, bae yumi no jes tokbaot Kraes, o prij abaot Kraes, o yusum wan simbol we i stap ripresentem Kraes.
!Bae yumi putum fet blong yumi long Lod Jisas Kraes i kam aksen!
Olsem we yufala i save, ol memba blong Jos oli stap folem loa blong livim kaekae wan dei long wanwan manis.
Doktrin blong livim kaekae, i stat bifo i kam. Hem i bin wan praktis blong ol hiro blong Baebol long ol fas dei finis. Moses, Deved, Esra, Nehemaea, Esta, Aesea, Daniel, Joel mo plante moa oli bin livim kaekae mo oli bin prij abaot fasin blong livim kaekae.8 Tru long ol raeting blong Aesea, Lod i talem: “[?hemia i no fasin blong livim kaekae we mi bin jusum? Blong kam fri long fasin nogud, blong tekemaot ol hevi samting, blong kam fri long slef fasin?]”9
Aposol Pol i bin askem strong long Ol Sent long Korin blong “[oli mas livim kaekae mo prea].”10 Sevya Hemwan i bin talem se sam samting, “man i mas prea, mo i mas livim kakae” blong ronemaot olgeta.11
Mi bin talem long wan sosol vidio i no longtaem i pas, se “olsem wan dokta mo dokta blong katem man, mi gat bigfala respek long ol medikol profesonol, ol man blong saens, mo ol narawan we oli stap wok non-stop blong stopem KOVID-19 blong go olbaot.”12
Naoia, olsem Presiden blong Jos Ia blong Jisas Kraes blong Ol Lata-dei Sent mo wan Aposol blong Jisas Kraes, mi save se God “i gat evri paoa, evri waes tingting, mo evri haremsave; hem i haremsave evri samting, mo hem i wan Man we i gat sore, i go kasem we hem i sevem olgeta we oli sakem sin mo biliv long nem blong hem.”13
Mekem se, long ol taem blong bigfala harem nogud, olsem taem sik i kasem ful wol, stret samting blong yumi stap mekem, i blong prea long Papa long Heven mo Pikinini blong Hem—we i Masta Man blong Hilim Man—blong i soem bigfala paoa blong Tufala blong blesem ol pipol long wol ia.
Long vidio mesej blong mi, mi bin invaetem evriwan blong joen blong livim kaekae long Sandei 29 Maj 2020. Plante long yufala i bin luk vidio, mo bin joen long taem blong livim kaekae. Sam i no bin luk mo mekem. Naoia, yumi stil nidim help blong Heven.
So tunaet, ol dia brata mo sista, wetem spirit blong ol boe blong Mosaea, we oli bin putum olgeta blong livim kaekae plante mo prea plante,14 mo olsem pat blong Epril 2020 jeneral konfrens, mi stap singaotem yufala blong livim kaekae bakegen, raon long wol. Long olgeta we helt blong olgeta i gud, bae yumi livim kaekae, prea, mo joen wan long fet wan moa taem. Bae yumi prea mo askem help from wol sik ia.
Mi stap invaetem evriwan, wetem olgeta blong nara bilif, blong livim kaekae mo prea long Gud Fraedei, 10 Epril, blong wol sik ia, bae oli save kontrolem, blong olgeta we oli givim kea oli gat proteksen, blong ekonomi i kam strong, mo laef i kambak nomol bakegen.
?Hao nao yumi livim kaekae? Tu taem blong kaekae, o wan 24 aoa taem i wanem yumi stap mekem. Be yufala i mas disaed wanem bae i wan sakrifaes, taem yufala i stap tingbaot bigfala sakrifaes we Sevya i bin mekem blong yu. Bae yumi joen wan blong prea from hiling raon long wol.
!Gud Fraedei bae i stret dei blong Papa long Heven mo Pikinini blong Hem, Tufala i harem yumi!
Ol dia brata mo sista. Mi wantem talem bigfala lav we mi gat long yufala, wetem testemoni blong mi se wok ia we yumi stap long hem, i tabu tumas. Hemia, hem i Jos Ia blong Jisas Kraes blong Ol Lata-dei Sent. Hem i stanap long hed blong Jos ia mo i daerektem evri samting we yumi stap mekem. Mi save se bambae Hem i ansa long ol prea blong ol pipol blong Hem. Mi testifae olsem long tabu nem blong Jisas Kraes, amen.