Lisin Gud long Hem

Ol dia brata mo Sista. Mi talem tangkyu tumas se, tru long yus blong teknoloji, yumi save mit tugeta blong wosip long Sandei moning ia. !Yumi gat blesing blong save se gospel blong Jisas Kraes i bin kambak long wol ia!

Long ol las wik, plante long yumi i fesem ol samting we i no stret long wanwan laef blong yumi. Graon i muvmuv, faea, bigfala wota i ron, ol bigfala sik, mo risal blong olgeta i mekem se evri dei i nomo semmak mo i mekem se yumi sot long kaekae, krop mo mane.

Long medel blong evri samting ia, mifala i presem mo talem tangkyu long yufala blong save jusum blong harem toktok blong Lod long taem ia we yumi no sua long samting, mo joenem mifala long jeneral konfrens ia. Tudak we i stap kam antap we i kam wetem ol hadtaem, i mekem se laet blong Jisas Kraes i saen we i saen moa oltaem. Jes tingting long gud samting we wanwan long yumi i save mekem long taem ia we wol i no stap gud. Lav mo fet blong yu, long Sevya, i save stap olsem tul blong jenisim laef blong wan, blong hem i faenem Restoresen blong gospel we i fulwan blong Jisas Kraes.

Long ol las tu yia, Sista Nelson mo mi i bin mit wetem taosen blong yufala raon long wol. Mifala i bin kam tugeta wetem yufala long ol open ples, mo long ol ples blong danis long hotel. Long wanwan ples, mi bin filim se mi bin stap wetem olgeta ia we Lod i jusum olgeta, mo mi bin stap luk kam tugeta blong Isrel i stap hapen long fored blong ae blong mi.

Yumi stap laef long wan dei we “ol bubu blong bifo oli bin wet from mo oli bin wantem tumas blong luk.”¹ Yumi stap sidaon long ol jea long fored blong witnes laef, wanem we Profet Nifae i bin luk long visen nomo, se paoa blong Smol Sipsip blong God bae i kam daon “long ol kavenan pipol blong Lod, we i seraot olbaot long ful fes blong wol; mo oli blokem olgeta wetem stret mo gud fasin mo paoa blong God long bigfala glori.”²

Yufala, ol brata mo sista blong mi. Yufala i bin stap long medel blong ol man, woman, mo pikinini ia we Nifae i bin luk. !Tingting long hemia!

I nomata se yu stap wea, o wanem situesen blong yu, Lod Jisas Kraes, Hem i Sevya blong yu, mo profet blong God, Josef Smit, hem i profet blong yu. Lod i bin odenem Hem finis bifo stat blong wol ia blong hem i kam profet blong las dispensesen ia, taem we bae Hem i “no holembak wan samting”³ long Ol Sent. Revelesen i stap gohed blong kam long Lod long taem blong Restoresen ia we i stap gogohed.

?Hem i minim wanem long yu se gospel blong Jisas Kraes i bin kambak long wol ia?

!Hem i minim se yu, mo famli blong yu i save sil tugeta blong oltaem! Hem i minim se, from se wan we i gat atoriti we i kam long Jisas Kraes i bin baptaesem yu, mo i bin konfemem yu wan memba blong Jos blong Hem, yu save stap glad long kampani blong Tabu Spirit oltaem. Bambae Hem i soem rod mo protektem yu. Hem i minim se bae yu neva stap we Hem i no givhan long yu, o yu no save yusum paoa blong God blong stap helpem yu. Hem i minim se prishud paoa i save blesem yu taem yu stap kasem ol stamba odinens mo mekem ol kavenan wetem God, mo kipim olgeta komanmen ia. Ol trutok ia, i tru we oli stap olsem wan angka long sol blong yumi, speseli long ol taem ia we trabol i stap hapen.

Buk blong Momon i talem stori blong hao tufala hae pipol mo kalja oli kam antap mo foldaon. Histri blong olgeta i soem olsem wanem i isi blong plante pipol i fogetem God, sakemaot ol woning blong ol profet blong Lod, mo lukaotem paoa, gat pres, mo ol samting we bodi i wantem.⁴ Ol profet bifo oli ripitim toktok “long saed blong ol bigfala mo gudfala samting long ol pipol, we oli no bilivim, from oli no luk ol samting ia.”⁵

Hemia i no defren long taem blong yumi. Truaot long ol yia, yumi bin harem ol bigfala mo gudfala samting we oli talem long ol pulpit we oli dediketem, raon long wol. Be yet, plante long ol pipol oli no akseptem ol trutok ia—hemia from se oli no save weaples blong lukaotem olgeta,⁶ o from se oli stap lisin long olgeta we oli no gat ful trutok o, from se oli sakemaot trutok ia mo lukaotem ol samting blong wol.

Enemi i kleva gud. Blong plante milian yia hem i mekem se gud i luk nogud, mo nogud i luk gud.⁷ Ol mesej blong Hem oli stap go laod, strong, mo gat flas toktok.

Be, ol mesej we oli kam long Papa long Heven, oli defren evriwan. Hem i toktok long wan wei we i simpol, i kwaet, mo i klia gud evriwan, mekem se i no gat wan i no save andastanem Hem i rong.⁸

Eksampol: long eni taem we Hem i bin presentem Wan Stret Pikinini Ia long ol man long wol, Hem i bin mekem wetem smol toktok nomo. Antap long Hil we Lod i Jenis i Kam Narafala, long Pita, Jemes, mo Jon, God i bin talem: “Hemia Pikinini blong mi we mi lavem hem tumas. Yufala i mas lesin gud long hem.”⁹ Ol toktok blong Hem long Ol Man blong Nifae long Baontiful blong bifo, oli: “Luk, Hem i Pikinini blong mi we mi Lavem Tumas, we long hem mi mi glad tumas, we long hem mi bin leftemap nem blong mi—yufala i lisin gud long hem.”¹⁰ Mo long Josef Smit, long bigfala ofisol toktok we i statem dispensesen ia, God i talem simpol nomo: “Hem ia, Hem i Pikinini blong Mi we Mi Lavem Tumas. !Lisin gud long Hem!”¹¹

Naoia, ol dia brata mo sista blong mi. Tingting long wanem i hapen long ol trifala taem ia we mi jes tokbaot, jes bifo Papa i presentem Pikinini blong Hem, ol pipol we oli bin stap long tetaem ia, oli bin stap fraet, mo kasem wan mak we hop i lus.

Ol Aposol oli bin fraet taem oli bin luk Jisas Kraes we wan klaod i raonem Hem long Hil ia we Hem i Jenis i Kam Narafala.

Ol Man blong Nifae oli bin fraet from se oli jes gotru long prapa nogud taem we evri ting i go lus, mo tudak blong sam dei nao.

Josef Smit i bin fas long ol han blong wan paoa blong tudak jes bifo ol heven oli bin open.

Papa blong yumi long Heven i save se, taem tingting we i no sua long samting mo fraet i raonem yumi, wanem we bae i helpem yumi aot long evri samting, hem i blong harem Pikinini blong Hem.

From se taem yumi wantem blong harem—harem tru—nao Pikinini blong Hem bae i soem rod blong yumi save wanem blong mekem long eni situesen.

Fas toktok we i stap long Doktrin mo Ol Kavenan, hem i, lisin gud.¹² Hem i minim: “blong lisin wetem tingting blong stap obei.”¹³ Blong lisin gud i minim blong “harem Hem”—blong harem wanem Sevya i stap talem, mo afta blong mekem folem kaonsel blong Hem. Long ol toktok ia: “Lisin gud long Hem” God i stap givim yumi paten blong gat sakses, hapines, mo glad long laef ia. !Yumi mas harem ol toktok blong Lod, lisin gud ol toktok ia, mo mekem folem wanem Hem i talem long yumi!

Olsem ol disaepol blong Jisas Kraes, ol hadwok blong yumi blong stap lisin gud long Hem i mas kam wetem moa tingting. Hem i minim se yumi hadwok wetem tingting, oltaem, blong fulumap evri dei laef blong yumi wetem ol toktok blong Hem, ol tijing blong Hem, mo ol trutok blong Hem.

Yumi no save jes dipen long infomesen we yumi fas long hem long sosol media. Wetem ol bilian toktok onlaen, mo long wan wol we i wantem salem samting mo i fulap long noes, rabis wok blong enemi, bae ?weaples nao yumi save go lisin o harem Hem?

Yumi save go long ol skripja. Oli stap tijim yumi abaot Jisas Kraes, mo gospel blong Hem, hamas Atonmen blong Hem i bigwan mo strong, mo bigfala plan blong hapines mo pemaot man we i kam long Papa. Blong draon evri dei long toktok blong God, i impoten blong yumi laef long saed blong spirit, speseli long ol taem ia we wol i gotru long bigfala jenis. Taem yumi stap lafet long ol toktok blong Kraes evri dei, ol toktok blong Kraes bae oli talem long yumi hao blong fesem ol taem ia we oli had we yumi neva ting se bae yumi fesem.

Yumi save Lisin gud long Hem tu insaed long tempol. Haos blong Lod i wan haos blong lanem samting. Long ples ia, Lod i stap tijim yumi long wei blong Hem. Long ples ia, wanwan odinens i stap tijim yumi abaot Sevya. Long ples ia, yumi stap lan olsem wanem blong openem vel mo toktok klia moa wetem heven. Long ples ia, yumi stap lanem hao blong ronemaot enemi mo yusum prishud paoa blong Lod blong mekem yumi, mo olgeta we yumi lavem, oli kam strong moa. Wanwan long yumi i mas wantem tumas blong lukaot blong haed long ples ia.

Taem we ol sot taem rul blong KOVID-19 bae oli nomo gat, plis, putum wan dei mo taem blong go wosip evri taem mo givim seves insaed long tempol. Evri minit blong taem ia, bae i blesem yu mo famli blong yu long ol wei we i i no gat nara samting i save mekem. Tekem taem blong tingting hevi long wanem yu harem mo filim taem yu stap insaed. Askem Lod blong tijim yu olsem wanem blong openem ol heven blong blesem laef blong yu, mo laef blong olgeta we yu lavem mo wok blong olgeta.

Naoia i stap, i no posibol blong stap go wosip long tempol, be mi invaetem yufala blong tekpat moa long wok blong famli histri, mo lukaotem famli histri mo mekem indeksing. Mi promes se, taem yufala i putum moa taem long wok blong tempol mo famli histri, bae yu kasem moa paoa mo kam antap long fasin blong save harem mo lisin gud long Hem.

Yumi save Lisin Gud long Hem moa klia tu, taem yumi kam antap long paoa ia blong yumi blong luksave ol kwaet toktok blong Tabu Spirit. Hem i kam wan mas, naoia, blong save olsem wanem Spirit i stap toktok long yu, naoia. Long Godhed, Tabu Spirit i mesenja. Bambae Hem i givim ol tingting i kam long maen blong yu, ol tingting we Papa mo Pikinini i wantem yu kasem. Hem Hem i Spirit blong Givhan. Bambae Hem i tekem wan filing blong pis long hat blong yu. Hem i stap testifae abaot trutok mo bae i konfemem wanem i tru taem yu stap harem mo ridim toktok blong Lod.

Mi askem yufala bakegen blong mekem wanem i nid blong mekem blong gat moa paoa long saed blong spirit blong kasem revelesen we i blong yuwan.

Blong mekem olsem, bae i helpem yu blong save hao blong muv fored long laef blong yu, wanem blong mekem long ol taem blong trabol, mo hao blong luksave mo stap longwe long ol temtesen blong ol giaman blong enemi.

Mo laswan, yumi stap harem o lisin long Hem taem yumi stap mekem folem ol toktok blong ol profet, ol sia, mo ol reveleta. Ol Aposol blong Jisas Kraes we oli odenem olgeta, oltaem oli testifae abaot Hem. Oli poenem wei taem yumi tekem rod blong yumi tru long ol defren rod blong laef blong yumi long wol ia.

?Wanem bae i hapen taem bae, wetem moa tingting mo hat, yu stap harem, lisin gud mo mekem folem wanem Sevya i bin talem, mo wanem Hem i stap talem long yu naoia tru long ol profet blong Hem? Mi promesem yufala se bae yufala i gat blesing blong kasem moa paoa blong fesem ol temtesen, ol hadtaem, mo ol wiknes. Mi promesem yufala ol merikel insaed long mared, famli rilesensip, mo evri dei wok. Mo mi promes se paoa blong yu blong filim glad, bae i kam antap moa iven sapos ol trabol oli kam fulap long laef blong yu.

Long Epril 2020 jeneral konfrens ia, i taem blong yumi blong makem wan taem we i bin jenisim wol ia. Olsem we mifala i bin ting long hem, 200 yia aniveseri ia blong Fas Visen blong Josef Smit, Fas Presidensi mo Kworom blong Olgeta Twelef Aposol i bin tingting hevi long wanem bae mifala i save mekem blong makem taem ia we i wan ia nomo, long wan stret wei.

Taem ia i bin statem Restoresen blong gospel blong Jisas Kraes we i fulwan, mo i statem dispensesen blong evri wok blong God i kamtru.

Mifala i bin askem mifalawan sapos bae mifala i leftemap wan ston. Be, taem mifala i stap tingting long spesel histri blong Fas Visen mo hamas i tajem wol, mifala i filim blong leftemap wan ston, be i no wan we oli katem long ston, be wan wetem ol toktok—ol toktok blong wan ofisol mo tabu toktok—we oli raetem, we bae oli no kavem long “ol tebol blong ston” be oli raetem “long ol tebol blong mit” blong hat blong yumi.¹⁴

Stat long taem we oli oganaesem Jos, i gat faevfala ofisol toktok we oli bin putumaot, mo laswan i “Famli: Wan Ofisol Toktok I Go long Wol,” we Presiden Gordon B. Hinckley i bin presentem long 1995.

Naoia, taem yumi stap lukluk i go long impoten taem ia long histri blong wol, mo wok we Lod i givim blong mekem Isrel we i seraot i kambak tugeta blong save rere from Seken Kaming blong Jisas Kraes, mifala, Fas Presidensi mo Kworom blong Olgeta Twelef Aposol i putumaot ofisol toktok ia. Taetol blong hem i: “Restoresen blong Gospel blong Jisas Kraes, we I Fulwan: Tu Handred Yia Ofisol Toktok I Go long Wol.” Fas Presidensi mo Kaonsel blong Olgeta Twelef Aposol blong Jos blong Jisas Kraes blong Ol Lata-dei Sent i raetem. Deit blong hem i Epril 2020 Blong rere from tedei, mi bin rekodem ofisol ia long Tabu Bus, ples ia we, blong fas taem, Josef Smit i bin luk Papa mo Pikinini.

“Mifala i talem tabu toktok ia, se God i lavem ol pikinini blong Hem long evri nesen blong wol. God Papa i bin givim yumi taem ia we Pikinini we Hem I Lavem Tumas, Jisas Kraes, i bon i kam long wol ia, laef blong Hem we i no gat samting blong komperem wetem, mo bigfala sakrifaes blong Hem we i pem praes from sin. Tru long paoa blong Papa, Jisas i bin girap bakegen, mo i bin winim ded. Hem i Sevya blong yumi, Eksampol blong yumi, mo Ridima blong yumi.

“Tu handred yia i pas, long wan naes spring moning long 1820, yangfala Josef Smit i bin wantem save wijwan jos blong joenem, nao i go long bus blong prea kolosap long hom blong hem antap long Niu Yok, YSA. Hem i gat ol kwestin long saed blong fasin blong sevem sol blong hem, mo i bin trastem se bae God i daerektem hem.

“Wetem tingting i stap daon, mifala i stap talemaot se, olsem ansa blong prea blong hem, God Papa mo Pikinini blong Hem, Jisas Kraes, Tufala i kamkamaot long Josef, mo statem wok blong “olgeta samting oli kam niuwan bakegen” (Ol Wok 3:21 olsem we oli talem long Baebol. Long visen ia, hem i bin lanem se afta long ded blong ol fasfala aposol, Niu Testeman Jos blong Kraes i bin lus long wol ia. Josef i wan stret tul blong jos ia i kambak.

“Mifala i talemaot se i tru, se anda long daereksen blong Papa mo Pikinini, ol mesenja blong heven oli bin kam blong givim instraksen long Josef mo stanemap bakegen Jos Ia blong Jisas Kraes. Jon Baptaes we i laef bakegen long ded i bin putumbak atoriti ia blong mekem baptaes andanit long wota blong kam klin aot long ol sin. Tri long ol fasfala twelef Aposol—Pita, Jemes, mo Jon—oli putumbak wok blong ol aposol, mo ol ki blong prishud atoriti. Ol narawan tu oli bin kam, wetem Elaeja, we i bin putumbak atoriti ia blong joenem ol famli oli stap tugeta blong oltaem long ol rilesensip we oli no save finis, we i go bitim ded.

“Mifala i witnes tu se Josef Smit i bin kasem presen mo paoa blong God blong transletem wan histri blong bifo—Buk blong Momon—Wan Narafala Testeman blong Jisas Kraes. Ol pej blong ol tabu toktok ia, insaed long hem i gat wan histri blong seves blong Jisas Kraes we Hem i bin mekem long medel blong ol pipol long Wes Pat blong Wol, stret afta we Hem i bin laef bakegen long ded. Hem i stap tijim abaot ol stamba tingting blong laef, mo i stap eksplenem doktrin blong Kraes, we i stamba blong stamba tingting ia. Olsem wan kampani skripja long Baebol, Buk blong Momon i stap testifae se evri man mo woman, oli ol boe mo ol gel blong wan Papa long Heven we i gat lav, se Hem i gat wan tabu plan from laef blong yumi, mo we Pikinini blong Hem, Jisas Kraes, i stap toktok i kam tedei, semmak olsem long ol taem blong bifo.

“Mifala i stap talem se Jos Ia blong Jisas Kraes blong Ol Lata-dei Sent, we i bin oganaes long 6 Epril 1830, i Niu Testeman Jos blong Kraes, we oli putumbak. Jos ia i angka long stret laef blong jif konaston blong hem, Jisas Kraes, mo long Atonmen blong Hem, we i no gat en, mo long stret Laef Bakegen long Ded blong Hem. Wan moa taem bakegen, Jisas Kraes i bin singaotem Ol Aposol, mo i bin givim olgeta atoriti ia blong prishud. Hem i stap invaetem yumi evriwan blong go long Hem mo long Jos blong Hem, blong kasem Tabu Spirit, ol odinens blong fasin blong sevem man, mo blong kasem glad ia we i stastap.

“Tu handred yia i pas finis stat long Restoresen ia, we God Papa mo Pikinini blong Hem we Hem i Lavem Tumas, Jisas Kraes, Tufala i statem. Ol milian pipol raon long wol oli bin akseptem wan save ia abaot ol taem ia we oli talem olsem profesi.

“Mifala i glad blong talemaot se Restoresen we Hem i promesem, i stap go fored tru long revelesen we i stap gogohed. Wol ia bae i neva semmak bakegen, from se God bae i ‘putum evri samting i kam joen wanples long Kraes.’ (Efesas 1:10).

“Wetem respek mo tangkyu, mifala, olsem Ol Aposol blong Hem, i stap invaetem evriwan blong save—olsem we mifala i save—se ol heven oli open i stap. Mifala i stap talem tru se, God i stap talemaot tingting blong Hem long ol boe mo gel blong Hem. Mifala i testifae se olgeta we oli prea mo stadi long mesej ia blong Restoresen mo tekem aksen wetem fet, bae oli gat blesing ia blong kasem wan witnes blong olgetawan se hem i tabu, mo we stamba tingting blong Hem, i blong mekem wol ia i rere from Seken Kaming blong Lod mo Sevya blong yumi, Jisas Kraes.”¹⁵

Ol brata mo sista we mifala i lavem tumas, hemia i tu handred yia ofisol toktok blong mifala i go long wol long saed blong Restoresen blong gospel blong Jisas Kraes, we i fulwan. Oli bin transletem long 12 lanwis. Ol nara lanwis bae oli kam biaen. Bae i stap stret afta long websaet blong Jos, mo yu save kasem wan kopi long ples ia. Stadi long hem long praevet, mo wetem ol memba blong famli mo ol fren blong yufala. Tingting hevi long ol trutok mo tingting long wei we ol trutok ia bae oli tajem laef blong yu sapos yu stap harem olgeta, lisin gud long olgeta, mo mekem folem olgeta komanmen mo kavenan we oli kam wetem.

Mi save se Josef Smit i profet we God i odenem bifo finis i kam, we Lod i bin jusum blong openem las dispensesen ia. Tru long Hem, Jos blong Lod i bin kambak long wol. Josef i bin silim testemoni blong hem wetem blad blong hem. !O mi lavem Hem mo givim ona long Hem!

!God i stap laef! !Jisas Hem i Kraes! !Jos blong Hem, Hem i putumbak! Hem mo Papa blong Hem, Papa blong yumi long Heven, Tufala i stap lukaot long yumi. Mi testifae olsem long tabu nem blong Jisas Kraes, amen.