Diyin Bighan Ntsaa’ígíí Néshį́įgo Ts’ídá Shił Yá’át’ééh

Shik’is dóó shiláhkéí, díí ałtsé ntsaago áłah aleeh bee hahoolzhiizhígíí biyi’ nihił honishłǫ́ǫ baa ahééhnisin Hadadoozihígíí, sin adéíléhígíí, dóó sodizin bee Ii’sizį́ Diyinii nihił hólǫ́ǫgo ádeiyiilaa—áádóó ééhózin dóó ha’ólní baa ákoniidzingo.

Éí baa ákóhwiindzinígíí ts’ídá áłtsé Salt Lakedi Diyin Bighan Ntsaa góne’ yahííyáágo shił ádzaayę́ę yééshííłníí’. Íídą́ą́’ ánii naasháago. Íídą́ą́’ shimá dóó shizhé’é t’éiyá bił naadeeh ńt’éé’. Hóne’é, Diyin bighan nitsaa yii’naalnishí t’óó hónízáhíjį́’ nihidááh níyá dóó yá’át’ééh nihidííniid. Shí éí t’áá sáhí, bilą́ąjį’ dahdiiyá.

Adzą́ą́ ałts’íísi’i bitsii’ łigaigo Diyin bighanjí hadiil’éé’ nizhónígo yee hadít’éego yá’át’ééh shidííniid. Shinééł’į́į́’ ch’ídeełdlo’ dóó hazhóó’ígo haadzíí’, “Shilah Eyring, Diyin bighan ntsaa bii’ hóshdę́ę́’ yah’anááh.” Diyin yá naal’a’í hanii át’į́ niizį́į́’ háálá shízhi’ yééhózinígíí biniinaa. Naaltsoos shízhi’ bikáágo shi’éé’ béshjéé’go doo baa’ ákonisin da lá.

Biighah ch’íníyá dóó ninishtłah. Dego déé’į́į́ ńt’éé’ yá dootł’izhgo shich’į’ ąą’ ádzaa dóó ndeezdíín nahalin silį́į́’. T’áá áko, díí saad baa tsídékéés: “Díí kodi adinídínídi hweesh’į́.” Ákondi t’áá áko baa tsídékééz, doo t’áá shí ádishníí da, díí saad: “Dooda, díí yee’ t’ahdoo kwe’é hoołtséé da. T’ahdoo ni’dichíí yę́ę́dą́ą́’ béínílnii’. Díígi’ át’áo diyingo haz’ą́ą́di nanináá ńt’éé’.”

Diyin báhooghan ntsaa’ígíí, díí saad bikáá’ “Diyin Bóhólníihii Bá Hodílzin.” Díí saad t’áá aníínii át’éego shił bééhózin. Diyin báhooghandi hodilzingo haz’ą́ áádí éí diyingo ííshją́ą́ ada’il’ínígíí doo nanitłahgóó hoł dahane’ hájéí aa’ájoosingo dóó biká hasht’e’ájidiilyaago.

T’áá éí bijį́ Ii’sizį́ Diyinii baa ákonáániisdzíí’. Diyin bighandi áda’ool’į́į́ł saadígíí shijéí yidiisnáá’, shidéts’ą́’ígíí t’áá aníí át’éhígíí bee náásgóó yiishááł doo. Shidéts’a’ígíí dizdiin naahaidí bohoolyaa Diyin Bóhólníihii bánaash’a’ doolééłgo shik’ihodiinii’.

Logan Utah Diyin Bighandi bii’ aséhyehgo t’áá ákót’áo baa ákónáániisdzį́į́’. President Spencer W. Kimball éí diyingo ahaanihínínil. Saad t’áá áłts’ísígo yee nihich’į’ haadzíígo kóní: “Hal dóó Kathy, yá’át’ééhgo hiinohná áko nihik’ihodiinii’go, doo nanitł’ahgo bich’į’ dahdidooh’ash.”

Díí saad yee haadzíí’go, shini’ biyi’di yiiłtsą́, ayóó naashch’ą́ą́go, honiináh gódeh ha’aztiingo yiiłts’ą́. Atiin nishtł’ahjígo łigaigo anít’i dóó dahyiskid bilát’ahjį tsin ałkéé adaaz’áago yiiłtsą́. Hooghan łigai lei’ t’įįhdígo tsin binikáá’ góne’ yit’į́į́go yiiłtsą́.

Nínáánááhaigo, éí dahyiisk’id baa ákoniidzíí’ baadaaní-nishłinígíí ákóde nihił tá’dííłbą́ą́z. President Kimball Diyin bighan ntsaadi yee nanihineezt’ą́ą́’ yę́ę́ t’áá át’é yiiłtsą́.

Dahyiskid bilátahdi nihił ílwodgo, baadaaní nishłinígíí kin łigai yę́ę́di ni’í’iilaa. Bí dóó bichooní díí kéyah haz’ą́ąnígi nahiilniih nihidííniid dóó bitsi’ dóó shí éí hooghan biighahdi si’ánígíí biyi’ nihighan doo nihidííniid. Bí éí íiyisíí hooghanígíí bii’ bighan doo. Áko, neeznáá nááhai ákwe’é nihighango, t’áá ákwííjí ádiiní, “Díí íiyisíí baa nihił hózhǫ́ǫ doo, háálá doo nízaadgo kwe’é nihighan da doo.”

Church Commissioner of Educationdę́ę́, Neal A. Maxwell níyáago naanish yee shik’idiilnii’. President Kimball ádííniid yę́ę́ “doo nanitł’ahgo bich’į’ dahdidooh’ash” bohoolyaa. Iiná baa hózhǫ́ nahalingo ásh’ínéé shik’ihodiinii’di dideeshnishígíí doo bééhasingóó níyá. Nihighan haz’ą́ą́dóó hasht’e’áda’diilyaago nihik’ihojídlį́įgo dahdiikai háálá diyin yá yáłti’í, diyin bighan hodilzindi, diyingo ił hane’di, náásgóó áhodoonííł bich’į’ hasht’e’áda’diilyaahígíí yiyiiłtsą́.

Shił bééhózin Diyin Bóhólníihii bighan ntsaa’ígíí diyingo bił ndahaz’ą́. Dííjį’ Diyin bighan ntsaa’ígíí biniyé baa yashti’ígíí éí ní dóó shí hózhǫ́ daniidzin dooleeł díkwíídi da Diyin bighan ntsaa’di bii’ lą’ígo nihá hólǫ́ǫ dooleełígíí biká’ hast’e’áda’dołnééh.

Shí éí, Diyin bighan ntsaa’ígíí biyi’ baa ákódínéísiiłígíí yee nashiiłnánígíí éí Diyin Bóhólníihii hait’áo bighan dilzingo yaa haadzíhígíí:

“Shidine’é Diyin Bóhólníihii bízhi’ binahjį’ hooghan ndeez’ą́ągo, dóó doo yá’át’ééhii yiihdeezláágóó, doo bee yíchǫ’góó, shee ayóó ánisht’éí bii’ hólǫ́ǫ doo;

“Aoo’, dóó áádi honishłǫ́ǫ doo, háálá áádeeshááł, dóó t’áá át’éhígíí bijéí yá’át’ééhígíí yah ahidookah dóó Diyin God deidoołtsééł.

“Áko yíchǫ’go éí doo biyi’ yahadeeshááł da, dóó she’ayóó át’éí doo áadi hólǫ́ǫ da doo; háálá Diyin bighan bii’ hóóchǫ’go doo bii’ honishłǫ́ǫ da doo.”¹

President Russell M. Nelson bik’e’diitįįh nihá áyilaago Yisda’iinííłiii bighan nitsaa’ígíí biyi’ “baa ákodíníidzįįł” áko doo bééhoniilzin da yę́ę nahjį’ nihá kwíídoolííł. President Nelson ání: “Baa ákodaniidzį́į́’. Binaanish dóó Bi’ayóó át’éii bik’ida’diitą́. Be’iina’ doo bináłt’éii hool’áágóó nanihiiłnáa doo.”²

Ni dóó shí doo baa hasht’e’ a’diilyaagóó doo yidiiltsééł da, Iisizį́ Diyinii be’adziil bee, Diyin bighan biyi’ diyingo bina’nitin nihailyáhígíí.

Éí na’nitin bínii’ą́ągo nihailyáago, Diyin bighan ntsaa’ígíí biyi’ biyi’ niilzééłgo sih hasin, ił hózhóonii, dóó iiná yá’átééhii bii’ yiidááł doo. Áko sih hasin, ił hózhóonii, ííná yá’át’ééhii éí Diyin bighan ntsaa’ígíí t’éiyá biyi’ díí áda’ool’įįł ádaal’į́. Diyin bighan ntsaa’ígíí biyi’ hooghan haz’ą́ ayóó o’óní t’áá ahą́ą́ yee da’ahótą́ doo’ígíí nihaa dooleelyééł éí anoonééł bikéédéé’ dóó hool’ool’áágóó hólǫ́ǫ doo

Ndááhai yę́ę́dą́ą́’, bishop nishłínéédą́ą́’, hastiin aniid naagaii Diyin God bighan haz’ą́ yił hool’áágóó hiináa doo yik’ijį’ silį́į́’. Bik’iské bił dahózhǫ́ǫgo yił naaldeehgo yee shił hoolne’. Bí yáłti’. Łah honeeni baa na’aldeehgo, hahóó’áagi, t’áá sáhí naashá niizį́į́’. Haash ínít’įįd bidéniid. Ashkii yázhí nishlį́įgo, shimá bitsásk’eh sédá, shináznii’go bénáashnii’. Áko binák’eesh to’ hazlį́į́’. Shił bééhózinígíí éí t’áá aníí át’é bidiiniid: “Haghandóó héé’azhchiid hool’áágóó hoł nilį́į́ doogo éí ałtsé t’ááhó hoł nilį́į́go t’éiyá Diyin bighandi bee hool’áágóó ahił na’aldeeh o’ool’įįł háida bee bika’azh doolwoł.”

Hait’áo ii’sizį́ bił haz’ą́ądi naaldeeh doodaii’ náá’iiná bikéédéé’ áhodoonííł doo bééhózin da. Ákondi bééhózin Elijah Diyin yá yáłti’í beeha’oodzi’ígi’ át’áo níyá azhe’é danilinéé ba’áłchíní yaa ákodadínóozįįł dóó áłchíní bizází yaa ákodadínóozįįł.³ Áádóó nihił béé dahózin hool’áágóó ił hózhǫ́ éí t’áá ákót’áo ił hózhóonii nihizází lą’ígo baa dadiilyééł.

T’áá éí nahshiiłnáago hoghan nahaz’ą́ą́dóó dahiinánígíí yideihah daazlį́įgo Diyin bighandi hool’áágóó ahił hózhǫ́ áda’ool’įįł baa dahidoolyééł dóó yaa dahodoonih. Éí nihoogháádi ak’ihojídlí bee ha’oodzíí’go Israel dine’é ahínéíkaah łahdóó bídéét’i’ aníbaal t’áa ałch’ijí nda’aldeehjí.

Nihighan nahaz’á ániid ndaakaigo ts’ídá nizhónígo ba’ahóót’i’. Christ bibee adinídiin aadahaasyá bee ndabi’diizhchį́. Yee yá’át’ééhii dóó doo yá’át’ééhii yaa ákodanízin. Éí bąą, Diyin God bighan yidoołtsééłgo doodaii’ eelkidgo biiníłką́ągo áadi yah adeeshááł danízingo ntsídaakees doo.

Áádóó baa hodoolzhizh, dahóyáanii danilį́įgo, Diyin bighan ntsaa bik’ehgo yah i’iildééh bee dahólǫ́ǫgo aadi háida yá tó beebida’iilzį́į́h doo. Éí bił áhoodzaago, Diyin bighan ntsaa bił danilį́įgo da dínóósééł áko bi’o’ool’įįł Yisdá’iiníiłii dóó Nina’nídléii yich’į’ dah atsih. Ii’sizį́ kééhat’į́į́di diné bibąąhígi’ át’éii nahjį’ kólnééh bił nilį́įgo, Yisdá’iiníiłii Binaanish dilzinii NihiTaa’ yá’ąąshdi hólóonii be’awéé’ bik’aa’’ayeed bił nilį́į́ doo.

Éí t’áá hóyáanii ła díí adziil bibe’adziil yii’tádííyáhígíí be’iina łahgo ayilaago yííłtsą́. Díkwííshį́į́ naahai yéédą́ą́’ hííłch’į’go shitsi’ Diyin bighan ntsaagóó bił nshé’áázh. Akéedi ła’ yá tó beebi’doolzį́įgo. Shitsi’ áda’ool’įįł diné dabízhi’ hasht’edaalyaa bee nihíká anilyeedgoo’ísh t’áá bííghah bi’dooniid. Aoo’ dííniid.

Shitsi’ yázhí tó bee alzį́į́hgi tó yiih yíyáago yiiłtsą́. Áádóó tó bee alzį́įh bee hahóóyá. Shitsi’ yázhí tó binii’ bąąh náálį́įgo táyi’dóó háánílniih. “Ła’ísh ánáánídlééh?” nábi’di’niih. T’áá áko aoo’ ndíniih.

Azhe’é aa’ákoníziní nishłį́įgo, ałtso íidoolííł nisingo baa laanaa niizį́į́’. Ákondi yinízinígíí t’ah yee bidziilgo bénáshniih ła’ísh ánáádíídlííł bi’diníigo bízhí ałts’iisí bidziilgo “Aoo’,” ńdí’niih. T’áá áká’análwo’go diné dabízhi’ígíí tó bee alzįįh Jesus Christ bizhi’ binahjį’ bee ak’ihójídlígíí bá ádaalyaa.

Diyin bighandóó ch’ééniit’aazhgo, yiiłtsánígíí shił át’į́įgo baa ntsésíkééz. Awee’ nésh’į́įgo shinááł bił áhoodzaa dóó łahgo ádzaa Diyin Bóhólniihii bighan góne’ yíká análwo’go. Adinídíín dóó k’é hólǫ́ǫgo Diyin bighandéé’ ch’íniit’áazhgo bénáshniih.

Áádóó ła’í nááhai. T’ahdii aoo’ ńdíniih Diyin Bóhólníihii ndanitł’áa’ígíí ła’ísh ánáádiidlííł nábidi’niihgo. Áko Diyin bighanjí áká’ana’áwo’go kót’áo nihił áhodoonííł dóó łahgo ádii’nííł. Áko díí biniyé nihí dóó nihighan haz’ą́ bá nihá laanaa nisin Diyin bighan ntsaa nihá bííghahdą́ą́’ t’áá ahąąh ndaahkah bee danohsindóó bíká ádaaht’íinii danoosééł.

Éí hóshdę́ę́’ nihididooniił. NihiTaa’ ba’áłchíní bijéí biyi’ ákǫ́ǫ́ danízingo ádadoołííłgo biká sodiszin, áko bił dahólǫ́ǫ doo, dóó nihizásí hágo dabidohníigo yinaaldeehgo ahool’áa doo.

Díí saad nihił danilį́į doo.

T’áá’anii baa hodíínísingo baa hashne’ NihiTaa’ Yá’ąąshdi Hólóoni ba’áłchíní daniidlį́. BiYe’ Jesus Christ ayóó áyóníinii yik’idiilnii’ nihida’iiníiłii dóó Nihániná’nídléí nilį́į dooleełgo. Nihighan haz’ą́ dóó Bí Bił kénáádahoniit’į́į doogo Diyin bighan ntsaa biyi’ áda’ool’įįł ádeil’į́įgo t’éiyá. T’áá aníigo shił bééhózin President Russell M. Nelson Diyin God bibe’edziil bee ąą’andaal’įįhii dah yoolééł dóó yee naalnishgo Diyin God ba’áłchíní yee hool’áago bił iiná áhodoonííłgo ályaa. Shí Jesus Christ bízhi’ baa hasti’íi binahjį’ adishní, áámen.