Christ Nááhii’na’; Yiniidlą́ągo Dził Hididiilnááł
Jesus Christ woodlą́ íyisíí adziilii át’éego díí iiná bii’ nihich’į’ kólyaa. Da’oodlánígíí yee t’áá ałtsóní yídaneel’ą́.
Shik’is dóó shilahké ayóó anihííníshní, Baa’ahééh nisin díí Damóo Jesus Christ Bééhániih biyi’ nihich’į’ haasdziihgo.1 Jesus Christ ti’hooznii’ nina’nidlahígíí dóó Nááhii’na’ígíí hool’áago nihe’iina’ łahgo áyilaa. Ayóó Ííniiní dóó baa’ahééh daniidzingo bádahodíníílzin dóó NihiTaa’ Yá’ąąshdi Hólóonii.
Hastą́ą́ ndeezid dóó kojį’, dahwiis’áágóó dikos nitsaa t’ah bił da’ahiighą́. Bich’į’ danihidziilígíí baa ayóó íinizin dóó diyin k’ehgo atah honeezgai, anoonééł dóó doo hats’ííd bich’į’ danihidziil’ígíí. Áłahjį’ nihásodiszin, áko ałtsogo, Diyin be’ayóó o’óní doo ni’kónéehii baa ákonohsin doo. Nihich’į’ ndahwiináa ndi nihidziilgo ákéé’soozį́į́ nt’éego, nahaidą́ą́’ dóó kojį’ígíí doo t’óó t’áadoo biniyé da doo ńt’éé’.
Díí abíní, t’áá diné kéédahat’į́į́déé’ sodizinjí naat’áanii dasidiits’ą́ą́’. T’áá aníí, Diyin bina’nitin bee ak’ihojídlí ałąą dine’é, saad ałąą ádaat’éédéé’ dóó diné t’áá át’é bá ádaat’é. Jesus Christ biSodizin éí nahasdzáán si’ąądéé’ sodizin át’é. Jesus Christ nihinaat’áanii nilį́.
Baa ahééh’ílį́, dikos nitsaa ndi Bit’áa aníinii bee náás’oodááł t’áadoo ni’ kó’da.yilaa Jesus Christ bina’nitin díí doo ééhózin, ałk’ijį’ ídlį́’ dóó ch’ééh a’deesdzáago haz’ą́ bii’ íyisíí ndzin.
Diyin God ba’áłchíní ła’í nízinígo Jesus Christ baa hane’ na’áłdziihii, hane’ bee yisda’iildééhii deididoots’į́į́ł go bee bá ahóót’i’ doo. Doo nááná ła’ nihi baa hózhǫ́ íiyisíí nidzingo baah hane’ da—k’ad dóó ahoyool’áágóó.2 Doo nááná ła’ hane’ íiyisíí sih ídlį́ hólǫ́ǫ da. Doo nááná ła’ hane’ ałk’ijį’ ídlį́ nahjį’ kwíidoolííł da.
Jesus Christ woodlą́ éí oodlą́ t’áá át’é bitł’ááh siléí át’é dóó binahjį’ diyingo adziil aahalyé. Paul Hastóí Naakits’áadah atah nilíinii ání, “Hwe’oodlą’ t’áágéédgo éí [Diyin God] ts’ídá doo bił hozhdooshǫ́ǫł da: háálá Diyin God yeigháhígíí t’áá aníí hiináago yaa ntsékees doo, dóó yéigo yíká át’inígíí ya’iiléí nilį́.”3
T’áá ałtso iiná bee yá’át’ééh doo’ígíí—t’áá ałtso ahool’áágóó ílį́į ak’ijidoodliiłígíí—éí oodlą́ bee háát’i’. Diyin God nihe’iina’ yik’i bóhólníih doogo oodlą’ yee nihoolóós doogo oodlą́’ ałtsé choidiilįįł. Jesus Christ deiniidláago t’áá áníi ádaana’iidiikaał áko be’adziil yee bąąhígi át’éii nahjį’ kwíídoolííł, nanihidoołdzih, dóó nihidziilgo anihidoolííł.4
“Diyin God bibe’adziilii t’áadoo nahjį’ kółehé,” Moroni Diyin yá yáłti’í ání, “adziilii yee naalnish, nihokáá’ dine’é ba’áłchíní be’oodlą’ binahjį’.”5 Nihe’iina’ bii’ nihe’oodlą’ Diyin God be’adziil ąą’áyił’įįh.
Ákondi, oodlą’ chojooł’į́įgo łahda hade’át’ée łeh. Łahda oodlą’ azhą́ ałts’íísígo choidiil’įįł ndi doo bíínííghah da nidzin łeh binahjį’ íiyisíí nidzinígíí bee nihik’ihojidoodlííł. Ákondi, Diyin Bóhólníihii éí náhádzid ni’kóyił’įįh Alma bizaad Naaltsoos Mormon Wolyéí biyi’ígíí binahjį’.
Alma doo nanitł’agóó saad bínótaah dóó “oodlą’ łahdóó chooł’įįh nihił ní, aoo’, azhą́ t’óó daats’í [niidzin] ndi.”6 Saad ńti’ “oodlą’ łahdóó” éí Bóhólníihii Diyin God bizaad biyi’ bee ak’ihójídlíigo haadzíí yę́ę bee bénashniih éí “nanise’ mustard bílástsii’,” nahalingo nihe’oodlą’ choisiil’įįdgo, “dził da, Kójígo ninílts’ííd;“ bididii’niil; dóó éí hididoo’nááł áko t’áá áłtsóní [bíínóhghah] doo.”7
Diyin Bóhólníihii nihits’íís doo bidziilígíí bił bééhózin. T’áá áníít’é łahda ni’kwíít’įįh. Ákondi Bí ayóó át’áó bíínííghahígíí ałdó’ bił bééhózin. Nanise’ mustard bílástsii’ áłts’íísígo dínísééh ákondi tsin ntsaa yileeh tsídii yii’ dabighango. Nanise’ mustard bílástsii’ éí oodlą’ áłts’íísí ndi dínítseehgo beełt’é.8
Diyin Bóhólnííhii oodlą’ doo haałt’éego yinízin da Be’adziil haałt’é bich’į’ nihá ahóót’i nihá íídoolííłgo. Ákondi da’iinohdlą́ nihiłníigo nihíyókeed.
Shik’is dóó shiklahkéí, bee nihich’į’ haasdziih díí abíní Diyin Jesus bééhánii góne’ dííjį́ nihe’oodlą’ bidziilgo ádiilnííł. Nihe’oodlą’ bee, Jesus Christ nihe’iina’ bii’ dził náás deest’ą́gi’ át’áó bííníighahgo ánihidoolííł,9 ach’į’nahwii’ná Mount Everest nahalingo ntsaa ndi.
Doo nił hats’ííd, doo iinídlą́, nitahoneezgai, doodaii’ hait’áo da nihich’į’ nahwiin’ná da dziłgi’ ádaat’ée doo. Éí dził łahgo anáániił, ákót’ée ndi nihidáásiléí nihe’oodlą’ hózhǫ́ bidziilgo bilááh díínááł. Éí nanilnishgo ła’ dííłííł. Idahoołaah bił dahóyé’ígíí dóó t’óó t’áákáá da akéé’ sizinígíí éí áłahjį’ bich’į’ nahwii’náago be’oodlą ałts’íísí ndi doo choidooł’įįł da.
T’áá áłtsóní ázhdoolííłii éí biizhdiilkaalgo t’éiyá ázhdoolííł. Jesus Christ t’áá aníigo bikéé’jizį́į doogo doo łahgo át’ée da. Joodlą́ dóó ba’jólíigo bizhdiilkaalgo t’éiyá. Nihe’oodlą’ dóó ba’íínóhłí ółééhgo ashdla’ bee áká’a’ayeed ła’ nihich’į’ kóshlééh.
Áłtséhígíí éí, bik’e’didootį́łígíí baa íínółta’. Óhoo’aah yídeelkaalii wohłeeh. Diyin God bizaad yéigo bii’dínóh’į́į́’ áko Christ yíká át’ínígíí dóó yinaalnishígíí hózhǫ́ bik’e’didiitį́į́ł. Christ bina’nitin nihił bééhoozįįh áko nihe’iina bidziil dooleełgo bik’edi’dohtį́į́ł. Díí t’áá aníinii ádiihdaahdlé áko Jesus Christ Nina’nídláhígíí nihá ályaa. Bí nihich’į’nahwii’nánígíí, nda’ ayoosi’ígíí, doo binółdzilígíí, dóó nihi bąąhígi’ adaat’éí. Yee nina’doodlééłii niinílá dóó t’áá ałtso dziłgi’ át’áo nihidááhsiláhígíí bik’inhidziilgo nihá íídoolííł. Éí adziil nihe’oodlą’, ba’íínólíigo, dóó Bik’eé’ yishááł doo nohsingo bee ndoolá.
Dził nahjį’ kólééhgo álílee da choidoo’įįł. Álílee’ ádaat’éíi bee ákoninizįįh. Álílee Diyin Bóhólníihii iinídlą́ągo nihwiileeh. Ajoodlą́ą doogo Íínízin dóó hahgo doleełígíí ba’íínídlíi doo—hait’áó dóó haa’í hoolzhizhgo álílee nínízinígíí yee Nik’ihijidooliiłgo. Ní doo iiniidlánígíí t’éiyá bee Diyin God álílee bee ne’iina bii’ daadziłígíí nahjį’ ná kodoolnííłgo nik’ihojidoodliił.10
Yisdá’iiníiłii hózhǫ́ baa ákonoohsįįhgo, Bibeeajooba’, Be’ayóó o’óní doo ninít’i’ii, dóó Be’adziil, na’ałdziih, dóó nina’nídlá be’adziil doo nanitł’agóó ba’ííníídlii doo. Yisdá’iiníiłii éí hózhǫ́ nił hólǫ́ǫ doo oodlą’ choidííł’įįł dził ndáázgi si’ą́ dóó bąąh yínahgo.
Naaki góne’, Jesus Christ yidíídląął. NihiTaa’ Diyin God dóó BiYe’ Ayóó Ayóníinii doo ba’íínólíígóó doodaii’ Jesus Christ bina’nitin t’áá aníí ninályáhígíí doodaii’ Joseph Smith t’áá aníí Diyin yáyáłti’í nilį́įgo bik’ihodiinii doo yinidlą́ą́go, oodlą’ nídiilé 11 dóó bee iinídlą́. Diyin Bóhólníihii dóó t’áá aníí adaat’éí naazláágóó nabídíłkid. Iinídlą́ągo na’íłkaah t’áadoo Diyin yá yáłti’í be’iina’ bii’ asdzih hanítáhí doodaii’ Diyin bizaad bii’ doo ákodaat’é hanita’í. Doo da’oodlánígíí ni nił naaki nilinígíí t’áadoo bił chéénít’áhí. Diyin Bóhólníihii ii’sizíiniik’eh íhoolaahjí nooloosgo bá hooł’aah.
T’áá’ góne’ éí, oodlą’ choiníł’į́. Ne’oodlą’ hózhǫ́ bidziilgo ha’át’íí éí ádíílííł? Díí baa ntsiníkees. Baa na’ízoh. Áádóó hózhǫ́ iinídlą́ągo á’dilnééh ha’át’íí da hózhǫ́ bee oodlą’ choidííł’įįł ánilééhgo.
Dį́į́’ góne’ éí, dadílzingo áda’ool’įįł bá hodíníílzingo atah áneinil’įįh doo. Áda’ool’įįł Diyin God bibe’adziil hwe’iina’ biyi’ ąą’áyił’įįh.12
Áádóó ashdla’ góne’, NiTaa’ Yá’ąąshdi Hólóonii, Jesus Christ bizhi’ binahjį’ níká’adoolwołgo, nabídíłkid.
Oodlą’ éí naanish bił silá. Diyingo hach’į’ ííshjání a’doolnííłgo naanishgo át’é. Ákondi “háida na’ídíłkidígíí éí bił hodoonih; áádóó háida ha’nitáhígíí éí yik’íh dínóotaał, dóó háíshį́į́ dáádílkał neiniłts’inígíí bich’į’ ąą ádoolnííł.”13 Diyin God bił bééhózin ha’át’íí éí ne’oodlą’ dínóóseełgo yíká’adoolwoł. Na’ídíłkid, áádóó nináábididííłkił.
Doo oodlánígíí da oodlą’ éí doo bitsxe’ígíí bá didooniił Ákondi éí doo oodláanii éí oodlą’ bee adziil ts’ídá t’ahdoo yii’tádíghaah da. Yisdá’iiníiłii biHastóí Yik’idiilnii’ígíísh Bina’nitin t’ah yee nda’nitin doo ńt’éé’ Dahńidiidzáago, be’iina’ yii’ tihdahwiidoonihgo, doo bił danilį́į́góó?14 Joseph dóó Hyrum Smithish ti’hwiidoonih diyoolyeeł Diyin Bóhólníihii Bisodizin Ninályéhígíí yá naa’aash doo ńt’éé’ t’áá hazho’ó t’áá aníigo yá’oo’íinii silį́į́’ ńt’éégo? Da’ 2,000 Jesus Christ Dayoodláaníísh pioneer be’atiingóó dadínóónééł ńt’éé’15 Jesus Christ bina’nitin ninályá doo deiyoodláágóó? T’áá aníí, oodlą’ éí adziilii át’é háálá doo baa áhódlíí doo bóhónéédzáanii yíneil’ą́ągo íídoolííł.
T’áadoo ne’oodla’ neehólónígíí a’ohgo áníłiní. Oodlą’ choo’įįh Sodizin bizhdiighááhgo dóó t’áá atah ajoodlą́ągo. Oodlą’ choo’įįh Diyin Yá Yádaałti’í bikéé jiizįįhgo bił éédahózinii dóó alááhgo baa yáda’ati’ éí dooda. Oodlą’ choo’įįh dikos ntsaa naałniihgo nanitingóó jigháágo. Oodlą’ choo’įįgo t’éiyá chin hąąh ádingo iiná áko nihokáá’góó bee dahodiwosh Diyin God chin hąąh ádin bibeehaz’áanii éí ałk’idą́ą́ t’éiyá choo’įį ńt’éé. Oodlą’ choo’į́ Jesus Christ bina’nitin áłchíní bee na’nitingo díí ats’íís bee iináadi. Oodlą’ choo’į́ hak’éí iiná nááyoołtih doo bee bá n’jookąąhgo áádóó oodlą’ hózhǫ́ choidoołįįł jókeedígíí doo hábe’alįįhgóó.
Naaki nááhaai’ídą́ą́’, Sister Nelson dóó shí Samoa, Tonga, Fiji, dóó Tahitigóó nishiit’áázh. T’áá át’é lą’ída deiską́ bił nahaz’ą́ągóó yéigo ndahastą́. Da’oodláanii nahałtin tł’óó’góó áłah da’dooleeł doo bik’ih nahidoołtįįł da danízingo ch’iiyáan ádąąhdesst’įįd dóó sodadoolzin.
Samoa, Fiji, dóó Tahitidi, tsídá ałah da’dooleełgo nahałtin ni’ kódzaa. Ákondi Tongadi, nahałtin t’áadoo ni’ kódzaa da. Ákondi 13,000 Jesus Christ deiyoodlánígíí dineezbindóó díkwííshį́į́ ahéé’ílkid, hada’ólníigo shábíighah bik’i nda hast’ą́ą́’, áádóó yéigo bik’indahałtingo naaki ahee’ílkidgo áłah silį́į́’.
Diné T’áłkáá’di kéédahat’ínígíí oodlą’ baa hózhǫ́ǫgo choo’íigo deiltsą́—oodlą’ nahałtin ni’kóyilaa bíighahgo dóó oodlą’ nahałtin doo ni’ kónééhgóó bidziilgo.
Nihe’iina’ bii’di dził hait’áo da doodaii’ hahgo da nihá yá’át’ééhgo hididoonaał da. Ákondi nihe’oodlą’ t’áá áłahjį’ náás kónihodoolííł. Oodlą’ diyingo adziil bich’į’ ahóót’i’ t’áá áko deikót’įįh.
T’áá shǫǫdí díí baa ákodanohsin: T’áá ałtsóní dóó t’áá ałtso kéyah bikáá’góó bada’íínółíhígíí doo yideighahgóó, Jesus Christ dóó BiSodizin tsídá doo ni’ kódoonííł da. Diyin Bóhólníihii doo bił hóyéé’ da, doodaii Bí éí doo ałhosh da.16 Bí “t’áá adą́ą́dą́ą́’, dííjį́, dóó [yiską́ągo] doo łahgo ádoonííł da.”17 Bi aha’da’diit’ah,18 yee ádééHadzii’ii, doodaii’ Bidine’é ayoó Áyóníínii doo nahjį’ kwíídoolííł da. Dííjį́, dóó yiską́ągo álílee choyooł’į́.19
Jesus Christ woodlą’ éí nihookáá’gi aláahdi adziilii át’é. Da’oodlánígíí yee t’áá ałtsóní yídaneel’ą́.20
Nihe’oodlą’ yee nihinooséłígíí dził yididoołnááł—dził tsé dóó nahasdzáán yee nizhónígíí éí dooda ákondi nihe’iina’ bii’ ach’į’nahwii’ná bee dziłígíí. Nihe’oodlą’ k’ee’ąą noot’į́łígíí nihidááhnaazláhígíí yíká’adoolwoł doo beełt’éégóó dínóósééł dóó ádoołííłii nihich’į’ ąą’át’ée doo.
Díí Jesus Christ Bééhániih Damóogo, t’áá íiyisíí ayóó anihíínishní dóó nihaa ahééh nisingo, bee ánihidishní, Jesus Christ éí nááhii’na’. BiSodizin yiyoołwoł doogo nááhii’na’. Diyin God ba’áłchíní t’áá át’é be’iina’ yik’idahojidoodliiłgo nááhii’na’. Yiniidlą́ągo, nihe’iina’ biyi’di dził nahjį’ dadidiit’ááł Ts’ída t’áá aníigo Jesus Christ bízhi’ baa hasti’ii binahjį’ adishní, amen.