Diyin God Nihił Hólǫ́
Diyin God yá yádaałti’í yich’į’ yáłti’ násdlį́į́’; Diyin God nihił hólǫ́—nihe’iiná nihíká’análwo’ dóó Ba’áłchíní yá hoo’ááł.
Shik’is dóó shiklahkéí, hodeeshzhiizhdą́ą́’, Diyin God bá ndaala’í bá yádaałti’, Diyin God yá yádaałti’í.1 Díí abíní, Diyin God yá yáłti’í adawiis’áago NihiTaa’ ba’áłchíní ha’ólní dóó na’nitin yee neineezt’ą́ą́’go dasidííts’ą́ą́’. Naat’áanii Russell M. Nelson baa ahééhnisin dóó adahwiis’áago t’áá ła’í noozinígo t’áá shǫǫdí bizaad ndaałkaah dóó bik’eh dahonoł’į́.
Naakits’áadah t’ahdoo shináhááhgóó, bił haijéé’ naakidi nihighandóó ch’ínihi’di’noodzood dóó anaa’ dóó wááshindoon bee ałtsá’áldah bee hahonííchaad, hóyéé’, dóó doo ééhózin bii’ nihighan ándeiyilyaa. ÍÍdą́ą́’ nitsináshtłi’ ńt’éé’ ákondi shimá dóó shizhe’é ayóó íínishníínii shį́į́ t’óó báhádzidgo náldzid ńt’éé’.
Shimá dóó shizhe’é díí ndaazgo ak’isilei dį́į́ niilt’éégo doo łą’ígo yee nihił ch’ííní’ą́ą da. Ndaaz dóó ach’į’nahwiinánígíí yídeiyíghahígíí bik’ehgo ní’áázh, hait’áo ba’áłchíní yaa ahalyą́ą dooleełígíí hozhóó’ígo yee ałch’į’ yáłti’ ńt’éé’. Náhádzid shį́į́ ąąhnahwiiłkaad ńt’éé’, bee ida’iilkeed dóó ha’ólní ni’ kóyósin.
Díí naaki góne’ daa’ahijooghą́ą́’ bii’ adahwiis’áago há’ólní adin ńt’éé’. Shído’ t’áá ákóshiilaa.
T’áá sahí yínííł nishłį́įgo, baa ntséskees łeh, “Há’ólníísh háádi da t’ah hólǫ́?”
Diyin Yá Ndaala’í Nihitah hólǫ́
Díí na’ádíkid baa ntséskeesgo, ániid ndaakai’ígíí íídą́ą́’ Diyin God yá nda’nitingo baa tsídékééz. Bighan nizhónígo si’ą́ dóó baa aháyą́ądéé’ tó nteel tsénaa dahdiikai Béésh Bich’ahii Bikéyahjį’—ániid be’anaa’ bikéyahjį’—nihidine’é diyingo ha’ólní yaa deidoolééłgo. Doo éí ak’ídaha’áá’, ach’į’ yá’át’i’, doodaii’ aa yáhásin ádeidoolííłgo nahaaskai da. Doo éí nahasdzáán bikáá’ ndi’doolyééłgo t’áá bí be’iina’ ádaaniidígo, t’óó háída ił hózhǫ́ dóó hodeezyeel yii’ ndaaskaigo bee biká’adeeshwoł danízingo nidahaskai.
Shí danish’į́įgo éí, díí tsiłkéí dóó chíkę́ę́h hadaałt’é niizį́į́’. T’áá shį́į́ aníí nda’iisiih, ndi shí éí doo ákot’áo baa tsídíkeez da. Iiná yilááh ádaat’é nisingo t’áá áłahjį’ baa ntséskees—diyin yá ndaala’í bitsá’ada’dinídíín dóó ayóó adaat’éego, aajooba’, yá’át’ééhii, dóó t’áá aníínii yee nda’nitin.
Nihookáá’ dine’é adaayahoodlí, oolch’į́į́d, oodlá, dóó áhádzid bik’eh dadiidleehgo díí tsiłkéí dóó ch’íkę́ę́h bina’nitin ha’olní shííh deizlá. Diyin bina’nitin washingdoon, nákéé’ náhane’, ak’éhát’ááh, yíníił hwiindzin, dóó t’áá hó t’éí hwiindzin yilááhgo yaa dahoolne’. Díí hoyéé’go haz’ą́ biyi’ na’ádíkid diyingo bits’ą́ą́déé’go yaa dahoolne’.
Díí yaa dahoolne’ígíí éí Diyin God hiiná dóó nihaa’ákonízin, azhą́ dahodiik’ą́ą́, dóó doo ééhózin da, dóó ha’honííchaad biyi’ ndi. Dííjį́į́di neiltsą́ dóó binanitin dóó bidsodizin ninéínídlą́. Diyin God yá yádaałti’í yich’į’ yáłti’ násdlį́į́’; Diyin God nihił hólǫ́—nihe’iiná nihíká’análwo’ dóó Ba’áłchíní yá hoo’ááł.
NihiTaa’ Yá’ąąshdi hólóonii bihoot’ááł éí bee yisdáná’iildééh dóó hool’áágóó Diyin bił iiná, ił hózhǫ́ hoot’ááł, niha’áłchíní bágo ayóó át’áo bits’ą́ą́dóó ó’hodiil’ááł. Doo iiniidlį́, yóó’ánihi’diilyaa, dóó nihaahoyoos’nah niidzingo, Diyin God doo nihaayooznahgóó bik’i’diit’į́į́h; t’áá áníígo éí, tsídá doo bohóghah hwiindzin yę́ę́ niha’áłchíní yich’į’ kwíyiił’įįh: “Diyin God bił neilnish, dóó Christ ałdó’ bił-nideilnishii” dadiidlééł.2
Díísh éí ha’at’íí yaa halne’?
Hool’áágóó dahiiníínáa doo, ił hózhóonii t’áá át’é nihaadoolyééł,3 dóó “bikáá’dóó nidahat’á, diyingo nadahaz’ą́ą́di, doo aláahdi bídahólníihii, áádóó dabidziilii”4 éí nihá bídahónéídzą́ą doo.
Díí ayóó át’áo dóó agháadi náás iiná adoolnííł bííghahgo na’iiná—doo éí nihí nihiniinaa da ákondi Diyin God át’ínígíí biniinaa.
Díí bééhózingo, ha’át’íí biniinaa yiichah, adááyeilti’, doodaii’ t’ah nihádahachį’? Háásh yit’áo ni’diníít’į́į́’ doo Aláahdi bi’aláadi naat’áanii doo bííníghahígíí náásgóó diyingo ił hózhǫ́ yee niháhooł’a’go?5
Yisdá’iildééh Nihá hólǫ́
Diyin God bi’ayóó’ó’óní haałt’éhígíí dóó Jesus Christ hool’áágóó ti’hooznii’ígíí biniinaa, nihi bąąhígi’ át’éíi—ayóó ádaat’éíi dóó ádaałts’ísígíí—éí nahjį’ kódoolnííł dóó doo bééhániih da doo.6 Hadaniilt’éégo, da’ííníídlíigo, dóó díníílzingo Bídááhdóó ndahidiikah.
ShiTaa’ Diyin God shijéí t’áá át’é bee baa ahééh nisin. Baa ákoniizį́į́’ Diyin God Bá’áłchíní doo ach’į’ nahwii’ná t’éiyá yii’ yikahgo yánahoní’ą́ą́ da ákondi ił hózhǫ́ dóó hool’áago náás iiná bá hólǫ́ǫgo yee hada’oolníí doo. Bich’į’ ná’oodááł bee na’nitin nihá áyiilaa. Áádóó BiYe’ Ayóó Ayóóníínii, Jesus Christ,7 dóó Nihániná’nídlahígíí éí bee hahodít’é.
Yisdá’iinííłii doo ninít’į’góó Nihánina’ídlá áko bąąhígi’ ádeit’inígíí dóó nda’iyiilzíhígíí łahgi’ át’áo bik’i’di’diit’į́į́ł. Doo éí áłahjį’ baa ntsííkees da dóó doo yisdá deeshááł da niidzin ndi, bits’ą́ą́dóó ídahodiil’ááł dóó hada’ííníílníi doo.8 Adaana’ookąąh nihaiyílyáago bee łahgo iiná ííl’į́į́hgo binahjį’ nihibąąhígi adaat’éí ni’ kwiil’įįh dóó nihe’iiná aniidígíí áyiiłįįh.9
Jesus Christ binahjį’, ni’iilzííhígíí doo ni’ kónihóósin da dooleeł. Binahjį’ nihe’iina’ yá’át’ééh doo.
Sin ííł’íinii íhooł’aah nahalingo, doo áko’i’iilyaa yę́ę́ nihił bééhózin doo, asiilzih, dóó bąąhígi’ i’iilyaa yę́ę́ bee adaa’ákodíníídziił, hózhǫ́ yéigo diné nihił nilį́įgo ayóó íínííníí doo, dóó adana’ookąąh éí hózhǫ́ bee yá’ániit’ééh doo.
Ádaanda’iikąąhgo, nda’iilzihígíí doo biniinaa nahjį’ kónihidoolííł da. Éí binahjį’ łahdóó bee náás déinííkááh.
T’áá áníít’é awéé’chi’í ndahiniidlin ayóó át’áo dóó tsídá aláahdi ániit’é diidleełgo bííníígah. Doo éí yii’nah dóó yiidááł dóó yiiltał bee náás diidááł da t’áá hózhó’í t’áá ahąąh chą́ą́h nídiitłish, dóó nihikáá’góó neiltłishgo t’éiyá. Éíígi’ át’áo íhwiil’aah.
T’áá áníígo be’iil’į́į́go, Diyin God bibeehaz’áanii t’áá áłahjį’ be’iil’į́į doo, dóó adaaná’iikąąhgo, dóó biniildzilgo, dóó bóhwiil’ą́ą́’ígíí choiniil’į́į́go, t’áá ałkéé’ naaznilígi’ át’áo, ééhózin nihi’sizíinii yee hadidoonííł.10 Áádóó t’áá át’é bííníígahígíí doo baa ákoniidzin da ndi, “Nihił bééhózingo éí,[Yisda’iiníiłii] doogááł,” Bí át’éhígi’ ániit’ée doo dóó “t’áá aníí át’éhígíí bee deidiiltsééł.”11
Dooládó’ ayóó át’áo t’áá aníigo bee ha’oodzíí’ da!
Aoo’, nihokáá’gi hahonoochał. Áádóó aoo’, doo danihidziil da. Ákót’ée ndi doo bik’ee’ nihaahndawiiskaad da doo, háálá Diyin God, dóó biYe’, Jesus Christ, ba’íiniidlí, áádóó Ii’sizį́ Diyinii nihailyáhígíí iiná baa hózhóonii nihii’ hólǫ́ǫgo dóó diyingo ił hózhǫ́ bikáá’ atiin nihoolóósgo dadíníidzįįł.12
Jesus Nihił Hólǫ́
łahda baa ntséskees łeh, Jesus dííjį́ nihitah naagháágo lá háit’áo nanihinitin dóó é’éł’į́į doo?
Náádiidzáá dóó bik’ijį’, Jesus Christ “nááná ła dine’é,” ałdó’ baadeeshááł nínée ye’iilaa.13
Naaltsoos Mormon Wolyéí: Jesus Christ Baa Nááháne’ éí Americadi diné yich’į’ ííshjáán í’diilyaa’ígíí yaa halne’. Díí hane’ ilíinii Yashda’iinííłii binaanish yá oo’íinii nilį́.
Naaltsoos Mormon Wolyéí biyi’ diné nahazdzáán łahdéé’go kéédahat’į́į́ ńt’éé’—binákéé’ hane’, bibee ada’ool’įįł, dóó binaat’áaniishch’íín łahgo ádaat’éé ńt’éé’ Jesus diné neineeztą́ą́ yę́ę́dą́ą́’. Diyingo Haz’ą́ądi yee na’neezt’ą́ą́ yę́ę́ t’áá éí lą’ígo yee nei’neezt’ą́ą́’.
Éí lá ha’át’íí biniyé ákót’áo na’neezt’ą́ą́’?
Yisdá’iinííłii áłahjį’ t’áá aníínii doo ndahat’ééhii yee na’nitin. Éí t’áá ałtso diné ałąą bił adahoot’éíi bidadéít’i’.
Ba hane’ éí bee ha’ahoonih át’é—T’áá aníigo Diyin God nihiTaa’ Yá’ąąshdi Hólóonii Ba’áłchíní doo yaayoozhnah da.
Diyin God éí nihił hólǫ́.
Yisdá’iinííłii naakidi neeznádiin yihah yę́ę́dą́ą́’, nahasdzáán yikáá’jį’ nínáánádzá. BiZhe’é Diyin God yił, Joseph Smith dį́į́’tsáádah binááhaigo yich’į’ ííshjáá ádiilyaa dóó Jesus Christ bisodizin dóó bina’nitin ninéínídlá. Éí bijį́į́dóó k’ad, yá’ąąsh ąą’ádaadzaa, dóó diyin yá ndaal’a’í ayóó át’áo doo nidahazti’ bił ndahaz’ą́ą́déé hadahaaskai. Diyingo dahnahaz’ą́ą́déé’ adinídíín dóó ééhózinii ąą’ályaa.
Diyin Bóhólníihii Jesus Christ nihookáá’ dine’é yich’į’ hanínáánáádzíí’.
Ha’át’íí éí yaa haadzíí’?
Bee nihik’ihojídlíigo, naaltsoos Doctrine and Covenants lą’í bizaad bii’ ndahaasdzoh—éí t’áá háíshį́į́ adahwiisáágóó yídeeshtah dóó bits’ą́ą́dóó ohodeesh’ááł nízinígíí bá. Dooládó’ dííjį́į́di díí saad ílíínii ádaat’é!
Áádóó Yisdá’iinííłii íiyisíí bina’nitin yee nínáá’nítingo doo nihił dahółą́ą́ da doo: “Áko Bóhólníihii nihiDiyin God ayóó’ádeínóh’níigo nihijéí t’áá át’é bee, nihe’adziil t’áá át’é bee, nihini’, dóó t’áá soozį́į́ ńt’éé’ bee anooht’éhígíí bee; Jesus Christ bizhi’ binahjį’ bá ndaał’a’ doo.”14 Diyin God biká íít’į́įgo nanihiiłná15 dóó Diyin yá yádaałti’í, yił ííshjáá áyiilaa’ígíí yee nda’nitinígíí binahjį’ iiná ádeil’į́į doo.16
Ayóó ada’ahíínóhní nihił níígo nanihinitin17 áádóó “t’áá ałtso diné baa dajiinohba’.”18
Shiká’anáhjah nihiłní, yá’át’ééhii bindaałnishgo.19 “Ayóó’áda’ahííníí’ní dadii’níigo, t’áadoo t’óó ádadii’níní, ndi t’áá aníinii bee ayóó’áda’ahííníi’níigo ałk’i nideiildzil doo.”20
Nihe’ayóó’o’ooni’ bee, ahiłdahółne’, t’áá ałtso Shi na’nitin dóó ShiSodizinjį’ nihohkááh dabidohní.21
Diyin bighan ádaołééhgo biyi’ yah adahokááh dóó ndaalnish nihiłní.22
Óhólnííh, ajit’į́, aaha’niih, doodaii’ aláahgo asdzį́ doo nihijéí bee bíká íít’į́į́ da doo. Díí yee nanihinitin “nihookáá silei nahjį’ kódaołééh, bilááhgo siláhígíí biká ádaaht’į́.”23
Ił hózhóonii, binahjį’ ééhózin, k’é, t’áá aníínii, baa hózhóonii,24 áádóó hool’áágóó iiná dóó diyingo bił iiná bee ha’oodzíí yę́ę́ biká ádaoht’į́ nihiłní.25
T’ah náásídí bee ndidiiltał. Jesus nihisodizin báhooghan, doodaii’ dííjį́ nihighandi niyáágóó. Háásh yit’ée doo nínízin?
Nijéí át’éhígíí bił bééhodoozįįł. Bee hadinit’éhígíí éí t’ah dooleełgo yanisékees. T’áá íiyisíí ánit’éhígíí bił bééhodoozįįł. Nijéí yinízinígíí bił bééhodoozįįł.
Jooba’ dóó a’oh nishłį́ danízinígíí yaa ákódinóozįįłgo yiká’adoolwoł.
Bitah dahoneezgai’ígíí neidoołdzih.
Naaki bił danilínígíí éí oodlą́ dóó ayi’dóó adziil yee doolééł.
Nihijéí Diyin God yoodlą́ągo dóó háída biká’adiilwołgo yee nanihidínóot’įįł.
T’áá áníí ádiinínígíí a’ohgo nitsííkees, ajooba’ ahwiindzin, bidziilgo ntsáhákees, oodlą́, aa áhwiinít’į́, dóó ayóó’o’ní yaa akódínóozįįł dóó yaa hodooní.
Bináá’ jinííł’įį’go doo ánii’t’éhę́ęgi ániit’ée doo. Hool’áágóó nihe’iina’ łahgo ádoonííł. Diyin God nihił hólónígíí, t’áá aníí ákót’éego, łahgo ánísht’éego baa ákóniizį́į́’.
Haash Dadii’nííł?26
Tsíłkéí nishłinéé’dą́ą́’ baa ahééh nisingo níyá nisin. Iidą́ą́’ baníyáago, ayóó’o’ooni bichį’ kódeeslííł dóó hozhó’í Diyin k’eh oodááłjí táá bikéé yínááł dóó bik’ihdóóya’ lágo bidideeshnííł. Áádóó Jesus Christ bikéé dahdíínáá bidideeshniił, háálá Diyin God nihił hólǫ́!
Shik’is dóó shilah danohłíínii, áádóó t’áá aníínii, dóó baa hózhóonii hadanóhtáhígíí, t’áá ákót’áo ałdó’ nihich’į’ haasdziih: oodlą́ dóó ha’oolní t’áá aláahjį’ hada’ohsíídgo biká’ádaoht’į́.27
Na’ádiłkid, áádóó naadoolyééł. Dáádílkał nanóhłts’in, áko nihá ąą’ádoolnííł.28 Diyin Bóhólníihii bá da’íínóhłí.29
T’áá ákwííjį’ aláahdi nihinaanish íínóhsin Diyin God baa ákodínóósįįł éí nihik’ihojidoodliiłgo nihich’į’ ąą át’é.
Ádaahodzódlí ats’ą́ąjį’ kódeilyaago dóó hodahgo haz’ą́ą́góó yínííł dóó hojooba’ niidzingo néíkah doo,30 Bí éí nihił hólóo doo.31
Jesus Christ bikéé yiidááł biká íít’į́įgo dóó bikéé’ naazinígíí at’áo bikék’ehgo yiidááłgo, ałkéé honí’ánígíí bik’ehgo, bik’íídoołkááł aláahdi ił hózhóonii a’ílyé doo benáłt’éhígíí bii’ yiidááł doo.
Shik’is dóó shilah ayóó anihíínishníínii, NihiTaa Yá’aashdi hólóonii éí tsídá haałt’éego ayóó anihóóní. Be’ayóó’ó’óní t’óó ahayóígóó nihił ííshjání áyiilaa, ákondi aláahdi éí T’áá éí T’éiyá BiYe Nilíinii ba’áłchíní yá tí’hooznii’ dóó a’ilyé yeinílá binahjį’ diyingo nihizhe’é dóó nihimá bił nááhonidlǫ́ǫgo nihá áyiilaa.
NihiTáá Yá’ááshdi Hólóonii t’áá aníí hiináago nihił ííshjání áshłééh, Jesus Christ biSodizin yilą́ąjį’ sizį́, dóó President Russell M. Nelson éí Diyin yá yáłti’í nilį́.
She’ayóó’ó’óní dóó ak’ihojídlí nihich’į’ kóshłééh díí Yisdá’iinííłii Baa Hózhǫ́ǫnii bee hániih hoolzhizhgi. NihiYisdá’iinííłii dóó Nihánina’nídlei bich’į’ nihijéí ąą ádaołééh, łahgo át’áo nihił ndahaz’ą́ą ndi, nihich’į’ ndawii’ná, ti’dahwii’nííh, doodaii’ nda’iyosííh ndi; Híínáago baa ákodadínóosįįł, ayóó ánihóó’ní, dóó Bí biniinaa, ts’ídá doo t’aa sáhí wohááł da doo.
Diyin God nihił hólǫ́.
Díí t’áá aníí át’éego baa hashne’ Jesus Christ bízhi’ dilzingo, amen.