Christ Bee Ha’ólní

Shik’is dóó shilakéí, díí Christ Bééhániih Hoolzhishdi Jesus Christ, Yisdá’iiníiłii, Diyin Bóhólníihii ayóó á’táo Nááhiina’ baa ntsídeekees. Nizhónígo hágo nihiłnínée béédeilniih, “Shaa nohkááh, t’áá ałtso ndááłnishii dóó nihíyéél dandaazii, dóó bee háádoołyį́ niháá dideesh’ááł.”

“Shi zéédeetą ádą́ą́h danitįįh, dóó shóhooł’ááh; shijéídi át’e’ dóó hashké áden: dóó nihii’sizį́i Shee háádoolyį́h.

Háálá shi’zéédéetání doo nantł’agóó bee na’anish, áádóó shiyéél éí ászólí.”¹

Yisdá’iiníiłii Shaahokááh nínígíí doo t’óó shaadoohkah níida ákondi BiSodizin da’niitah doo.

Saad shaahokááh níigo dashijaa’í bikéé’ góne’ígíí, Jesus díí hait’áo ádoolníłígíí yaahalne’ haniit’áago bikéé’ iidááłgo. Diné, “Diné [doodaii’ asdzání] aYe’ doo ła’ yééhósin da, aZhe’é t’éiyá; doodaii’ diné [doodaii’ asdzání] doo ła’ aZhe’é yééhósin da, aYe’ t’éiyá, dóó hastiin [doodaii’ asdzání] aYe’ íínízinígíí yee yił hodoolnih.”²

Jesus éí Diyin God aTáá’ Yá’ąąshdi Hólóonii ayóó anihóníigo baa ákodíníidzįįł.

NihiTaa’ Yá’ąąshdi Hólóonii ayóó anihóníigo nił bééhózingo háí íít’ínígíí dóó ayóó át’áo hool’áágóó bighan atah nilį́ bóhwii’aahgo yee nihíka’adoolwoł.

Azee’ álį́ Mayodéé’ ádaaní: “Atah hojílóonii ts’ídá hólóonii. … Atah hojílǫ́ t’áá ałtso bitah jílínígíí bii’ hólǫ́.” Díí naaltsoos ałdó’ ání, “Atah ídlį́ ats’íís dóó hwintsékees doo bits’ą́ądi hólǫ́ǫ da”³—áádóó, ii’sizį́, bee chánah na’adá ałdó’ bił nisin.

I’íí’ą́ągo t’ahdoo Gethsemanedi ti’hoonííhgo dóó tsin ałnáoz’á bikáá’gi bi’dilyééhgóó, Yisdá’iinííłii bikéé’ naazinii akéedi i’íí’ą́ą yił da’ííyą́ą́’. Nahasdzáán bikáa’gi nihich’į’ nidahwii’náa doo: nidi chánah danohłį́, shí nihokáá’ bił nidahazt’i’ii bik’eh déshdlį́į́’.”⁴ Biiskání t’ahdoo e’e’aahgóó, Jesus Christ ti’hooznii’ dóó “[tsin ałnáoz’á bik’áá’] nihibąąhígi ádaat’éii yá naabi’diilyá.”⁵

Baa ntséskees sáanii dóó hastóí da’oodláanii daats’í Jersalemdi yíniíł daniizį́į́’ e’e’aah dóó chahałheeł bii’ náhádzid hoł hazlį́į́’.⁶

Díí akéé’ naazíiniigi’ át’áo 2,000 ndááhai yę́ędą́ą́’, nihíshį́į́ ałdó’ yínííł danohsin łeh. Díígi’ át’áo bii’ niséyá shich’ooní ayóó íínishníinii, Barbara, dahnídiidzá yę́ę́dą́ą́ naaki náahai’í’dą́ą́’. Shił bééhózin bił hajiijéé’, danihik’is, dóó bił neildeehii nihinaagóó hólóo ndi t’ah yínííł niidzin—háálá ayóó íínishníigo bił naashaash yę́ę doo kǫ́ǫ́ shił hólǫ́ǫ da.

Lą’í COVID-19 dikos ntsaa kó’táó t’áá sáhí dóó yínííł yéédanihiis’nii’. Ákót’ée ndi, azhą́ iiná bii’ nanihi’dinitaah ndi, Jesus Bééhániihihgi’ át’áo, iiná ániidígíí bii’ ch’éédiidził Christ bił, éí aniid dóó ayóó át’éii bee ąą’ádahoot’é dóó ániid ádahoot’é Diyin Bóhólniih bich’į’ hada’ííniilní dóó atah dadiidleeł daniidzį́į́’.

Atah ídlį́ doo yaa ákódanízinígíí yee ti’dahoonííh éí shił nilį́. Adawiis’áágóó atseezį́ baahane’go, t’óó ahayóí doo bił dahatsidígíí baa ákonisin. Baa ntséskeesgo, lą’ída, NihiT’áá Yá’ąąshdí Hólóonii ayóó ábóó’ninígíí dóó hool’áago bighan haz’ą́ądi atah daniidlį́įgo doo bił béédahózin da. Diyin God ayóó anihóní deiniidlą́ągo dóó Be’awéé’ daniidlį́įgo baa hózhǫ́ dóó t’áá ákonééhii daniidzin.

Háálá Diyin God ii’sizį́ k’ehjí be’awéé’ daniidlį́įgo t’áá áníít’é Diyin bits’ą́ą́doo dahoniidlį́, diyingo ádaniit’é, dóó diyingo ada’diilnííłgo nihá ahoot’i’. T’áá ła’í niizinígo “iisizíinii k’ehgo aye’ dóó atsi’ ayóó abi’dóníinii daniidlį́ yá’ąąshdi bishchííniibits’ą́ą́déé’.”⁷ Díí íiyisíí daniidlį́! Díí t’áá aníigo daniidlį́!

Ii’sizíinii niidlínígíí bee hózhǫ́ nahasdzáán bik’áági niidlínígíí baa ákoniidzįįh, éí nihitsi’ ałaah át’éhígíí, o’ool’įįł, doodaii ntsaago haz’ą́ daniidlinígíí.

Díí ii’sizį́ dóó nahasdzáán bik’áá danidlinígíí, bee ayóó o’oo’ní, dóó atah daniidlínígíí éí bee ha’íínilní dóó Jesus Christ ayóó ádeiyíníí’ní.

Christ bee ha’ííniilní baa yashti’ doo éí t’óó sha’shingo baa ntséskees da. Ákondi ha’oolni baa yáshti’go éí biká áhátinígíí t’áá áníí dooleeł. Éí ha’oolninígíí éí ach’inahwiiná bee ak’eh dadiidleeł, ii’sizíinii bee jítł’iz dóó bee jiłdzil, dóó bee Ahool’áago NihiTáá ayóó anihóóninígíí dóó Be’awéé’, dóó bighan haz’ą́ądóó atah daniidlį́.

Christ bee hada’ííniilníigo, dilzingo bee ahada’dit’aah adadiilnííł dóó dadiníílzin doo, íiyisíí niidzinígíí dóó biká íítin’ígíí éí Bí binahjį’ bida’diilnííł

Hastói naakits’áadah bik’ih dahodiinii’ígíí sodadilzingo áláh ndadlééh dóó t’áá sáhí dóó doo atah danidlį́į da danizinígíí hait’áo yiká adoojahgo yá laanaa danízin. Ákot’áo bił ndahazánígíí biká adiijah laanaa danizingo. Ła íiyisíí, baa haasdziih, k’ad t’áá sáhí ndaakai’ígíí.

Shik’is dóó shiláh danóhlíinii dííjį́ hastói dóó sáanii ałníí’ biláahgo sodizin da’atahígíí bich’ooní andahaskai, yoo’adabi’diistą́, doodaii’ tahdoo da’iiyehígíí. Ła’ Diyin God bihoot’ááł dóó Sodizin góne’ áda’doolíłígíí yaa ntsédaakees. Hool’áágóó Diyin God bił iiná doo ahé’eské bik’ehgo t’óó hoł olta’ da ákondi akéé’ asdzį́ dóó “Jesus t’áá aníí át’é jiníigo.”⁸ T’áá sáhí ndaakai baa laanaa hwiindzinígi’ át’áo t’áá ałtso Diyin Bóhólníihii biSodizin ninályahígíí atah danilinígíí t’áá ákodaat’ée doo—Christ bibee ajooba’ “beehaz’áanii bik’eh hólį́ dóó Diyin bina’nitin dóó bibee ó’ool’įįł” binahjį’ bee bá ahoot’i’. ⁹

Nááná ła’ na’nitin ayóó adaat’éhígíí bik’ida’didiit’į́į́łgo bee haasdziih.

Áłtséhígíí éí, Diyin God bizaad dóó dííjį́į́di Diyin yá yádaałti’ii ádaaní t’áá át’é Diyin God bina’nitin bee ałhadiit’aah yik’eh dahółinígíí éí Diyin God bił iináágóó bee bá ahoot’i’ doo. President Russell M. Nelson naneezt’ą́ą́’: “Diyin Bóhólníihii bee o’ool’įįł dóó bihoolzhiizh, ihidiikai da’oodlánígíí ak’idahojóódlí dóó bits’ą́ą́ ni’kólzin da doo. Diyin Bóhólníihii nahidiyoo’ááł dóó bijéí yiyi’di déínízinígíí dóó áda’iilaa’ígíí yee baa da’doolyééł.”¹⁰

Naaki góne’, Diyin God bił iiná bee ak’ihojídlį́ hahgo dóó hait’áo adoolníłígíí t’áhdoo ííshją́ą́ álnééh da, ákondi t’áá íiyisíí bééhózin.¹¹ President Dallin H. Oaks ání ła’ “nihokáá’gi adahooniłígíí Millennium hoolzhizhdi hazho’í ádadool’nííł, áko índa t’áá ałtsóní bida’dool’nííł ayóó á’táo ił hózhǫ́ bohoot’ááł biyi’ t’áá ałtso nihiTaa’ nilíinii ba’áłchíní bikéé’ deiyíkahígíí bá.”¹²

Doo éí t’áá át’é akihojídlį́ Millenniumdi índa hasht’e’dadoolnííł da; ła’ éí ałtso ndahaasyá, dóó ła’ éí áájį’ ahoolzhizhgo bidahidoolnííł.¹³

Táá góne’, Diyin Bóhólníihii biba’ ha’ninígíí éí bik’eh hól’į́ dóó ii’sizį́ bik’ehgo bich’į’ oodááł ááhyiłní. Diyin Bóhólníihii biba’ ha’ninígíí éí doo t’óó biba’ azdáago óólyée da. Doo aba’ jizdánahalingo hwił haz’ą́ą da.

Diyin Bóhólníihii biba’go éí ádiilníłígíí bídéét’i’. Díí nilei yihahdą́ą́’ bik’ediitą́ háída bíká anéelwo’go Christ bich’į’ ha’ííníílninígíí ntsaa yileeh. Jesusgi’ át’áo áká’iilwo’go, bada’ííníídlíhígíí t’áá bí ntsaa yileeh.

Diyin Bóhólníihii biba’asdá k’ad azhdoolíłígíí éí t’áá hó jidínóoséłígíí bideit’i’ éí bee ha’oodzih yę́ę ts’ídá ílíinii át’é, diyingo yee naha’áhígíí t’áá ánííltso nihídéít’i’. Sodizin nahasdzáán bik’áá’gi bee áká’adoowołígíí dóó Israel ahąh ánálnéhígíí éí t’áá íiyisíí nidzin. Áhé’aské éí áká’adoowoł bínl’ánígíí doo binahjį’ á’diilííł da. Diyin Bóhólníihii áká’anál’wo’ígíí yaa haniih dóó da’oodlánígíí dóó hada’ólnínígíí yibá sidá.¹⁴

Dį́į́’ góne’, Diyin God hool’áágóó bił iiná Ba’áłchíní yee yá has’ą́. T’áá ájít’é Yisdá’iinííłii adaaná’ookąąh bee a’ílyé dóó Bibeehaz’áanii yik’eh dahół’ínígíí hool’áágóó Diyin bił iiná baa doolyééł, ázhą́ nihook’áági doo t’áá át’é bee ádajít’éhígíí dóó hadaałt’éhígíí át’ée da ndi. Ádaanída’ooskanígíí, éí Diyin Bóhólníihii baanda’didoot’ááłgo t’áá aníí át’é: “Aoo’, t’áá ahąąh shidine’é ádanída’ookąąhgo shik’ihjį’ nda’iisihígíí bee baanídideesh’ááł .”¹⁵

T’áá át’é nél’į́įgo, diné í’iilaahígíí, dóó yinízinígíí, dóó t’áá bí bóhólnííhgo néiyizlá’ígíí, hool’áágóó ak’ihojídlį́ bee bá’ahoot’i’ silį́’ígíí, éí Diyin Bóhólníihii t’éiyá yá nahodoo’ááł.

Ashdlą’ góne’, díí t’áá aníí ádaat’éhígíí éí Jesus Christ woodlą́ bee hadadít’é, éí bibee’ajooba’ t’áá át’é nihookáá’ bidadéét’i’ígíí bee hasht’e’ńdadoolnííł.¹⁶ T’áá át’é aki’hojídl bee hada’iisdzihígíi éí Bí binahjį’ bóhóneedzą́, éí, Ti’hooznii’go Niná’nídlá, “t’áá ałtsóní yitł’ááhdi tádííyᔹ⁷ dóó “nihookáá’gi’ígíí yik’ehdeesdlį́į́’.”¹⁸ Bí éí “Diyin God binishnáájí dahneezdá, be’ajooba’ Azhe’é bits’ą́ą́déé’ Bíhígíí néídidoolééł éí nihook’áá’ ba’áłchíní bágo … ; éí bąą’ nihookáá’ dine’é ba’áłchíní bá hoot’ááł yá sizį́.”¹⁹ Nihóníyáadi, “akéé’ naazinígíí bi’ayóó át’éí bii’ dahólǫ́ǫ doo, dóó baadahaasyáhígíí daabí dooleeł”²⁰ “Christ yił daabí doo.”²¹

Díí éí daniidzin bee nda’nitinígíí éí Christ yee ha’olní bii’ ntsaa dadooleeł dóó yinahjį’ atah ídlį́ danízin doo.

Diyin God be’awéé’ nilínígíí baa yónééh łago, éí Hool’áágóó NihiTaa nilį́, k’ad dóó ahool’áágóó. Ayóó ánihó’ní, dóó Sodizindéé’ nihi’dinidzin dóó niha’oodlí. Aoo’, danihiniidzin! Nihizhí, bee danóhłinígíí, daohchį́į́hígíí, bee yá’ádant’ééhígíí, dóó Diyin k’ehgo deiyínóhkáhígíí daniidzin.

Łą’í naahai, baa yádeilti’go “ániid t’áá sáhí ndaakai’ígíí,” “t’áá sáhí ndaakai’ígí,” dóó “dahóyáanii.” Kót’áo baa yá’áti’ígíí naat’áanii ádlį́įjí áká’andaalwo’ łahda t’áadoo baa ákódaniiziní łahgi’ át’áo baa ntsáhákees łeh.

Díí bíla ashda’ii bik’eh áda’iilínígíí nahjį’ kwííníílzin doo áko doo ałtsánihidoonił da?

President Nelson anihiłní Jesus Christ Bisodizin Dííjį́į́di Yá Naazinígíí atah daniidlį́ dadohníigo bee nisoozį́. Díí t’áá áníít’é nihik’ésti’, t’ááshaaníí?

Jesus Christ bina’nitin bidziilgo ałhąą ánihidoolííł. T’áá ániiltso ayóó aheniilt’é łahgo ániit’éhígíí éí t’áá ach’į’go. Diyin God bighan haz’ą́ą́dóó da’niitahgo, t’áá ánííltso ahidadiilchíín. Paul ání, “Áádóó [Diyin God] nihookáá’ dine’é dahdeiyíkahígíí t’áá ła’hídóó háájéé’.”²²

Stake binaat’áanii danóhłinígíí, bishops, dóó hastói dóó sáanii binaat’áanii danóhłinígíí, díí t’áá áłtso stake, ward, quorum, doodaii’ t’áá át’é bił dahnahaz’ánígíí atah danilį́įgo áka’andaajahígíí dóó ndaal’a’í dóó bik’idahodiiníí’go ndaal’a’ígíí lą’ígo áká’andaahjah nihidishní.

T’áá áłtso quorums, dahdeiyíkahígíí, wards, dóó stakes Diyingo-aada’iilyé dóó yee danilínígíí bee k’ad Diyin bisodizin ndeidoo’ááł.

T’áá sáhí ndaakaigo atah danilínígíí bik’ih dahidoonihgo áká’adoojah, dóó nda’dínóot’į́į́ł. Áłk’ihdą́ą́’ bee baa ntséhíkees yę́ę ni’ kódáołééh dóó doo atah nishłíi da dóó doo áká’anashwo’ da danízin yę́ę.

Díí Easter hoozhizhgi Yisdá’iinííłii, Jesus Chris,t bá yoołkáłígíí oo’íinii bá nishłį́įgo hool’áágóó she’iina’ sheiniláhígíí dóó t’áá ałtso Bízhi’ binahjį’ deiyoodlanígíí bee ádíshní. Hajooba’go t’áá aníígo baa hashne’, éí Bízhi’ binahjį’ Jesus Christ, amen.