Misyonaryo nga Pagserbisyo Mipanalangin sa Akong Kinabuhi sa Kahangtoran

Salamat, Presidente Nelson, sa pagpaambit og balik nianang tambag kalabot sa misyonaryo nga pagserbisyo.

Mga kaigsoonan, pipila ka tuig ang milabay samtang namulong ko sa kinatibuk-ang komperensiya, ang panan-aw sa akong wala nga mata kalit lang mihanap tungod sa gitawag og macular degeneration, nga sa kadugayan migrabe ug hinungdan sa pagkawala sa akong panan-aw niana nga mata.

Samtang nagsagubang ko niini nga hagit, mas mapasalamaton pa gayod ako sa ubang mga matang sa panan-aw, lakip na ang panan-aw bahin sa nanglabay nga mga panghitabo. Samtang akong gilantaw og balik ang akong kinabuhi, nakita nako ang piho nga mga kasinatian nga nakahimo og mahinungdanon nga kalainan. Usa nianang mga kasinatian mao nga kon sa unsang paagi nga ang akong full-time nga misyonaryo nga pagserbisyo isip batan-ong lalaki didto sa England mipanalangin sa akong kinabuhi ug miumol sa akong espirituhanong padulngan.

Ako namalandong kon sa unsang paagi nga ang mga hagit sa ekonomiya nga may kalabotan sa Grabe nga Depresyon sa mga 1930 misangpot sa lisod nga kahimtang sa akong mga ginikanan ug among pamilya. Ang akong amahan naningkamot gyod nga mapadayon ang iyang pagpamaligya og sakyanan ug masuportahan ang pamilya atol niining lisod nga panahon nga adunay higayon nga ang akong mga ginikanan dili makatambong sa simbahan.

Bisan kon dili kami makatambong sa mga tulomanon sa simbahan isip pamilya, wala kana makapugong nako sa pagtambong panagsa kuyog sa akong mga higala.

Nianang mga panahona, ang pagmisyon anaa na sa akong hunahuna, apan wala ko maghisgot niana sa akong mga ginikanan.

Samtang nag-eskwela sa kolehiyo, pipila ka higala ug ako nakadesisyon nga moserbisyo og mga misyon. Sa pagpakig-istorya sa akong bishop, naghimo ko sa akong misyonaryo nga aplikasyon samtang ang akong mga ginikanan nangadto sa laing lugar. Sa dihang mipauli na ang akong mga ginikanan, gisurprisa nako sila sa balita nga gitawag ko sa pagserbisyo ngadto sa Great Britain. Ako mapasalamaton sa ilang madasigong suporta niini nga desisyon ug sa buotang mga higala nga mitabang nako aron moserbisyo.

Ang akong misyonaryo nga pagserbisyo miandam nako nga mahimong mas maayo nga bana ug amahan ug mahimong malamposon sa negosyo. Kini miandam usab nako alang sa tibuok kinabuhi nga pagserbisyo sa Ginoo diha sa Iyang Simbahan.

Sa Abril 1985 nga kinatibuk-ang komperensiya, gisangonan ko nga mamulong sa priesthood nga sesyon. Akong gitumong ang akong mga pamahayag ngadto sa mga batan-ong lalaki. Ako namulong mahitungod sa pagpangandam sa pagserbisyo isip misyonaryo. Ako miingon, “Sa tanang pagbansay nga akong nadawat sa akong mga buluhaton sa Simbahan, walay mas importante nako kaysa pagbansay nga akong nadawat isip dise-nuybe anyos nga elder nga nagserbisyo og full-time nga misyon.”¹

Ang Ginoo nakaila ninyo. Kon kamo magserbisyo sa inyong misyon, kamo makabaton og mga kasinatian nga makatabang ninyo nga mas makaila Kaniya. Kamo molambo sa espirituhanong paagi diha sa pagserbisyo Kaniya. Sa Iyang ngalan, kamo ipadala sa mga buluhaton sa pagserbisyo sa uban. Siya mohatag ninyo og mga kasinatian uban sa mga pag-aghat gikan sa Espiritu Santo. Ang Ginoo mohatag ninyo og awtoridad sa pagtudlo diha sa Iyang ngalan. Kamo makapakita Kaniya nga Siya makasalig ninyo ug kamo makasalig Kaniya.

Mga lima pa lang ka bulan ang milabay, si Elder Jeffrey R. Holland ug Elder Quentin L. Cook, nga nakaserbisyo usab isip mga misyonaryo sa British Isles, mikuyog nako sa pagbisita sa mga miyembro ug mga misyonaryo nianang matahom nga yuta. Samtang anaa didto, ako namalandong sa akong mga kasinatian isip usa ka batan-ong misyonaryo. Ako mopamatuod nga didto sa akong misyon akong nasayran nga ang akong Langitnong Amahan ug ang akong Manluluwas, si Jesukristo, nakaila ug nahigugma nako.

Ako gipanalanginan og duha ka maayong mga presidente sa misyon, si Selvoy J. Boyer ug Stayner Richards, uban sa ilang mahalaron nga mga kompanyon, nga sila si Gladys Boyer ug Jane Richards. Sa paglantaw og balik, mas klaro nakong nakita nga sila misalig nako ug nahigugma nako. Sila mitudlo nako sa ebanghelyo. Sila daghan og gilaoman gikan nako. Sila mihatag nako og daghang mahagiton nga mga buluhaton ug mga responsibilidad sa pagpangulo aron makatabang nako nga molambo ug maandam alang sa usa ka kinabuhi sa pagserbisyo.

Ako namalandong usab bahin sa pagtawag ni Presidente Spencer W. Kimball nako aron modumala sa Canada Toronto Mission uban sa akong minahal nga asawa, si Barbara, ug among mga anak sa among kiliran. Si Presidente Kimball mitawag namo sa pagserbisyo niadtong Abril 1974, wala madugay human sa iyang paghatag sa iyang dinasig nga mensahe alang sa mga misyonaryo nga giulohan og “Kon ang Kalibotan Makabig.”² Niana nga mensahe si Presidente Kimball mipasabot sa iyang panan-awon kon sa unsang paagi nga ang ebanghelyo isangyaw ngadto sa tibuok kalibotan. Siya nanawagan og daghan pa nga mga misyonaryo sa tibuok kalibotan. Siya mipahinumdom nato bahin sa gilaoman sa Ginoo “nga ang matag tawo kinahanglan … mopataas og usa ka tingog sa pahimangno ngadto sa mga lumulupyo sa yuta.”³ Ang pagtulon-an ni Presidente Kimball mahitungod sa gilaoman alang sa mga batan-ong lalaki sa pagserbisyo og misyon nahimong hilisgotan sa panagsultihanay diha sa mga panimalay sa tibuok kalibotan. Kana nga gilaoman wala mausab. Ako mapasalamaton nga si Presidente Russell M. Nelson mimatuod usab karong buntaga sa gilaoman sa Ginoo.

Hapit na 10 ka tuig sukad nga si Presidente Thomas S. Monson mipahibalo sa pagpaubos sa edad sa misyonaryo alang sa mga batan-ong lalaki ug mga batan-ong babaye.⁴ Sa akong panglantaw, ang nag-unang rason niini nga kausaban mao nga mahatagan ang atong kabatan-onan og makausab sa kinabuhi nga oportunidad sa pagserbisyo isip misyonaryo.

Isip Apostol ni Ginoong Jesukristo, ako nanawagan ninyo mga batan-ong lalaki—ug niadtong mga batan-ong babaye kinsa nagtinguha sa pagserbisyo og misyon—nga mosugod na karon sa pagpakig-istorya sa inyong mga ginikanan mahitungod sa pagserbisyo og misyon. Ako modapit usab ninyo sa pagpakig-istorya sa inyong mga higala mahitungod sa pagserbisyo og misyon, ug kon usa sa inyong mga higala dili sigurado mahitungod sa pagserbisyo, awhaga sila sa pagpakig-istorya sa ilang bishop.

Ipasalig sa inyong kaugalingon ug sa Langitnong Amahan nga kamo moserbisyo og misyon ug nga sukad karon kamo maningkamot sa pagpabiling limpyo ug takos sa inyong mga kasingkasing, mga kamot, ug mga hunahuna. Ako modapit ninyo sa pagbaton og lig-ong pagpamatuod bahin sa gipahiuli nga ebanghelyo ni Jesukristo.

Mga amahan ug mga inahan niining talagsaon nga kabatan-onan, kamo adunay mahinungdanong tahas niini nga proseso sa pagpangandam. Sugdi karon ang pagpakig-istorya sa inyong mga anak mahitungod sa misyonaryo nga pagserbisyo. Kita nasayod nga ang pamilya mao ang labing mahinungdanong impluwensya sa pagtabang sa atong mga batan-ong lalaki ug mga batan-ong babaye sa pag-andam.

Kon kamo anaa pa sa edad alang sa misyonaryo nga pagserbisyo apan wala pa makaserbisyo tungod sa pandemya o uban pang mga rason, ako modapit ninyo sa pagserbisyo karon. Pagpakig-istorya sa inyong bishop, ug pangandam sa pagserbisyo sa Ginoo.

Ako moawhag ninyo mga bishop nga tabangan ang tanang batan-ong lalaki ug mga batan-ong babaye nga hapit na moabot sa pangidaron sa misyonaryo nga mangandam sa pagserbisyo, ug ako moawhag usab ninyo mga bishop sa pag-ila niadtong igo na ang pangidaron apan wala pa makaserbisyo. Dapita ang matag batan-ong lalaki aron mahimong misyonaryo, ingon man ang matag batan-ong babaye kinsa nagtinguha nga moserbisyo.

Sa mga misyonaryo nga kasamtangang nagserbisyo, kami nagpasalamat ninyo. Ang inyong misyon nahitabo atol pandemya sa tibuok kalibotan. Isip resulta, ang inyong kasinatian sa misyon dili sama sa akong kasinatian sa misyon o sa mga kasinatian ni bisan kinsa nga mga misyonaryo nga nagserbisyo sa wala pa ang 2020. Ako nasayod nga dili kini sayon. Apan bisan niining lisod nga mga panahon, ang Ginoo adunay buhat nga gipahimo ninyo, ug nahimo ninyo kini sa talagsaong paagi. Pananglitan, kamo naggamit og teknolohiya sa bag-ong mga paagi sa pagpangita niadtong andam nga makat-on mahitungod sa Pagpahiuli sa ebanghelyo ni Jesukristo. Samtang kamo makugihon nga nagserbisyo ug sumala sa inyong mga abilidad, ako nasayod nga ang Ginoo nalipay sa inyong paningkamot. Ako nasayod nga ang inyong pagserbisyo makapanalangin sa inyong kinabuhi.

Kon kamo ma-release na gikan sa inyong misyon, hinumdomi nga kamo wala ma-release sa pagkaaktibo diha sa Simbahan. Palamboa ang maayo nga mga kinaiya nga inyong nakat-onan sa inyong misyon, ipadayon ang pagpalig-on sa inyong pagpamatuod, pagtrabaho og maayo, pag-ampo, ug pagmasulundon sa Ginoo. Tahora ang mga pakigsaad nga inyong gihimo. Ipadayon ang pagpanalangin ug pagserbisyo sa uban.

Ako nag-ampo nga kamo mga batan-ong lalaki ug mga batan-ong babaye ug ang inyong mga ginikanan makakita ug masayod kon sa unsang paagi nga ang misyonaryo nga pagserbisyo mopanalangin sa inyong kinabuhi sa kahangtoran. Hinaot nga inyong masayran sa inyong mga hunahuna ug mabati sa inyong mga kasingkasing ang gahom sa pagdapit nga gihatag sa Ginoo ngadto sa banggiitan nga misyonaryo nga mga anak nga lalaki ni Mosiah. Siya miingon, “Lakaw … ug ipahayag ang akong pulong; gani kamo magmapailubon diha sa pagkamainantuson ug sa mga kasakit, nga kamo mahimo nga makapakita og maayo nga mga panig-ingnan … mahitungod kanako, ug Ako mohimo og usa ka himan kaninyo sa akong mga kamot ngadto sa kaluwasan sa daghan nga mga kalag.”⁵

Hinaot nga ang Dios mopanalangin sa kabatan-onan sa Simbahan nga magtinguha sa pagpangandam ug pagserbisyo Kaniya mao ang akong mapainubsanong pag-ampo, nga akong gihalad karong buntaga sa sagradong ngalan ni Ginoong Jesukristo, amen.