Ayaw Kabalaka: Salig Lamang!

Akong itumong ang akong pakigpulong karon ngadto sa batan-ong mga tawo sa Simbahan, nagpasabot sa tanan nga parehas o mas ubos og edad ni Presidente Russel M. Nelson. Panagsa ra kong mogamit og mga biswal, apan di ko kapugong nga mopaambit niining usa.

Imahe

Sulat gikan ni Marin Arnold

Kini nga reklamo naggikan sa akong otso anyos nga higala nga si Marin Arnold, gisulat sa dihang siyete anyos siya. Akong hubaron para ninyo ang iyang daw taga-Ehipto nga sinulatan:

Ah Marin, ang akong ipamulong karon walay duda nga mopasagmuyo nimo og usab. Apan kon mosulat ka man og reklamo bahin nako ngadto sa imong bishop, ingna siya nga ang akong ngalan si “Kearon. Elder Patrick Kearon.”

Hapit magduha ka tuig nga ang kaparehas sa anaa sa biblia nga pandemya milukop sa atong planeta, ug samtang kana nga sakit mibalda sa hapit tanan sa sosyal, klaro nga wala kini mopahunong sa kamangtas, kabangis, ug pintas nga pag-atake sa politikanhong paagi—sa nasyonal o sa internasyonal. Sama og dili pa kini igo, nag-atubang gihapon kita sa dugay nang sosyal ug kultural nga mga hagit, nagsugod sa ekonomikanhong paghikaw ngadto sa panampalas hangtod ngadto sa dili patas nga pagtagad sa kaliwat ug daghan pa.

Ang ingon nga malisod ug ngitngit nga mga adlaw makasagmuyo sa naglibot kanatong kabatan-onan, kinsa positibo ug madasigon natong gilantaw bahin sa mga ugma sa atong kinabuhi. Ginaingon nga “ang gahom sa kabatan-onan mao nga komon nga katigayonan alang sa tibuok kalibotan. Ang … mga batan-on … mao ang atong … kaugmaon.”² Dugang pa, ang atong kabataan mao ang kapiyalan kansang mga kamot mao ang kapalaran sa pagpahimutang niini nga Simbahan.

Sa pagkonsiderar sa atong panahon, masabtan ra kon mokunhod og gamay ang ideyalismo sa kabatan-onan. Si Dr. Laurie Santos, propesor sa Yale University, bag-o lang nagmugna og klase nga giulohan og Psychology and the Good Life. [Sikolohiya ug ang Maayong Kinabuhi]. “Sa unang tuig nga gitanyag ang maong klase, hapit [ikaupat nga bahin] sa [tibuok] undergraduate nga mga estudyante ang mi-enrol.”³ Kapin sa 64 ka milyon ka tawo ang mibisita sa iyang podcast. Nagsulat mahitungod niini nga tilimad-on, usa ka journalist nakabantay unsa kasakit nga makita ang daghan kaayong intelehenting mga estudyante—ug mga hingkod—ang desperadong “nagpangita sa butang nga nawala kanila” o, gani labing ngil-ad, naghandom sa butang nga wala gayod kanila.⁴

Ang akong pangamuyo karon sa atong kabatan-onan, ug ninyong mga ginikanan ug mga hingkod kinsa nagtambag kanila, mao nga sugdi ang inyong pagsiksik alang sa kalipay pinaagi sa paghangop sa kalipay nga atoa nang nadawat gikan sa tighatag sa tanan nga maayong gasa.⁵ Niini gayod nga panahon daghan sa kalibotan dunay lisod nga mga pangutana bahin sa kalag, nga angay natong tubagon uban sa “maayong balita”⁶ bahin sa ebanghelyo ni Jesukristo. Ang Simbahan ni Jesukristo sa mga Santos sa Ulahing mga Adlaw, nga padayong naghupot sa misyon ug mensahe sa Manluluwas sa kalibotan, nagtanyag sa labing mahangturon nga makahuloganong paagi sa pagpangita sa maayo ug pagbuhat og maayo atol sa gikinahanglan kaayong panahon.

Si Presidente Russel M. Nelson miingon nga kini nga henerasyon sa batan-ong katawhan adunay kapasidad nga makabaton og “mas dakong epekto [alang sa kaayohan] sa kalibotan kay sa nangaging henerasyon.”⁷ Kita, tali sa tanang katawhan, “mag-awit sa awit sa matubsanon nga gugma,”⁸ apan nagkinahanglan kana og disiplina—“pagkadisipulo,” kon buhaton ninyo—ang butang nga mopanalipod batok sa negatibong mga kinaiya ug makadaot nga mga batasan nga magpugong nato nga atong ikapakita sa uban ang kalipay sa mahangturon nga kaluwasan.

Gani samtang kita padayon “nga magpositibo,”⁹ kita makasugat og tawo matag karon ug unya nga kanunayng negatibo ug magtan-aw nga ngil-ad ang mga butang sa bisan unsa nga sitwasyon. Kahibalo mo sa iyang motto: “Ingon og sa kanunay kini ang labing ngil-ad sa dili pa kini mahimong hilabihan kangil-ad.” Pagkadaotan nga panan-awon, ug pagka-miserable nga kinabuhi! Oo, tingali usahay gusto kitang makalingkawas sa atong sitwasyon karon, apan siguradong kita dili makalingkawas kon si kinsa kita—mga anak sa buhing Dios kinsa nahigugma kanato, kanunay nga andam mopasaylo kanato, ug kinsa dili gayod, bisan kanus-a motalikod kanato. Kamo Iyang labing bililhon nga anak. Kamo Iyang anak, Iyang anak, kinsa Iyang gihatagan og mga propeta ug mga saad, espirituhanong mga gasa ug mga pagpadayag, mga milagro ug mga mensahe, ug mga anghel sa isig ka habig sa tabil.¹⁰

Siya usab mihatag kaninyo og simbahan nga maglig-on sa mga pamilya alang sa mortalidad ug magbugkos kanila alang sa kahangtoran. Naghatag kini og kapin sa 31,000 ka ward ug mga branch diin ang katawhan magpundok ug manganta ug magpuasa ug mag-ampo alang sa usag usa ug mohatag sa mga kabos. Dinhi ang matag tawo matawag sa ngalan, maihap, ug mapangalagaran ug diin ang mga walay bayad nga mga higala ug mga silingan boluntaryong moserbisyo sa usag usa sa mga calling gikan sa klerikal nga buluhaton ngadto sa pag-atiman sa simbahan. Ang mga young adult—ug senior nga mga magtiayon usab—moserbisyo og mga misyon nga linibo sa ilang kaugalingon nga gasto nga walay pagbalibad bisan unsa o bisan asa sila maghago, ug ang mga miyembro batan-on ug tigulang magkanayan ngadto sa mga templo sa pagpahigayon og sagradong mga ordinansa aron mabugkos ang tawhanong pamilya—usa ka dayag kaayo nga kalihokan sa usa ka nabahin nga kalibotan apan ginaingon nga ang maong pagkabahin temporaryo lamang. Kini mao ang pipila ka rason nga among ihatag alang “sa [atong] paglaom.”¹¹

Dayag lang, sa atong panahon karon, ang labihan kalisod nga mga isyu atubangon ni bisan kinsa nga disipulo ni Jesukristo. Ang mga lider niini nga Simbahan mitugyan sa ilang kinabuhi nga nagtinguha sa giya sa Ginoo sa pagsulbad niini nga mga hagit. Kon ang uban dili masulbad alang sa katagbawan sa matag usa, tingali naglangkob kini og usa ka bahin sa krus nga giingon ni Jesus nga kinahanglan natong pas-anon aron sa pagsunod Kaniya.¹² Ingon niini gayod kay aduna may mga adlaw nga mangitngit ug lisod nga mga suliran diin misaad ang Dios nga Siya, pinaagi sa panganod inigka adlaw ug haligi sa kalayo inig kagabii, mogiya sa mga propeta, mohatag og gunitanan nga puthaw, moabli og pig-ot nga ganghaan padulong sa tul-id nga dalan, ug labaw sa tanan mohatag kanato og gahom aron makatapos sa buluhaton.¹³

Mao nga palihog, palihog, pabilin hangtod mahuman ang kasaulogan bisan ikaw dili ganahan. Tagamtama ang Iyang kahayag ug ipahulam ang inyong kaugalingon nga kandila alang sa maong katuyoan.¹⁴ Aduna sila niini diha gayod sa Primary: Si Jesus sa tinuod gayod “[gusto nga kamo] mahimong bidlisiw.”¹⁵

Dihang ang lider sa Judeo nga si Jairo mihangyo ni Jesus nga ayohon ang iyang 12 anyos nga anak nga babaye, nga naghigda nga himatyon sa balay, ang nagpalibot nga pundok sa katawhan nga naghulat og dugay sa Manluluwas diin usa ka sulugoon miadto nga nag-ingon sa mabalak-ong amahan, “Patay na ang imong anak; ayaw nag samoka ang Magtutudlo.”

“Apan nakadungog si Jesus niini ug iyang giingnan si Jairo, “Ayaw kabalaka: salig lamang ug maayo ang imong anak.”¹⁶

Ug siya naayo. Ug kamo usab. “Ayaw kabalaka: salig lamang.”

Tungod kay ang matag usa ninyo niini nga pundok bililhon ngadto sa Dios ug sa Simbahan, ako motapos uban niining espesyal nga apostolikanhong pamahayag. Sa wala pa ninyo sukad madawat ang gasa sa Espiritu Santo, nagbaton kamo sa Kahayag ni Kristo nga gitisok diha sa inyong kalag,¹⁷ kana ang “kahayag nga anaa sa tanan nga mga butang, … nga naghatag og kinabuhi sa tanan nga mga butang,”¹⁸ ug maoy impluwensiya sa kaayohan sa kasingkasing sa tanang katawhan nga nakapuyo o mopuyo. Kana nga kahayag gihatag aron sa pagprotekta kaninyo ug pagtudlo kaninyo. Usa sa mahinungdanon nga mga mensahe mao nga ang kinabuhi mao ang labing bililhon sa tanan nga gasa, ang gasa nga maangkon lamang pinaagi sa mahangturon nga paagi pinaagi lamang sa Pag-ula ni Ginoong Jesukristo. Isip mao ang Kahayag ug Kinabuhi sa Kalibotan,¹⁹ ang Bugtong Anak sa Dios mianhi sa paghatag kanato og kinabuhi pinaagi sa pagbuntog sa kamatayon.

Kinahanglan atong ibug-os mismo ang atong pasalig ngadto sa gasa sa kinabuhi ug moadto aron motabang niadtong namiligro nga mosalikway niining sagrado nga gasa. Mga lider, mga tigtambag, mga higala, pamilya—bantayi ang mga timailhan sa depresyon, kasagmuyo, o bisan unsang timailhan sa pagpasakit sa kaugalingon. Itanyag ang inyong tabang. Paminaw. Paghimo og pipila ka matang sa pagpakgang kon angay.

Ngadto ni bisan kinsa sa atong kabatan-onan nga anaa sa panglimbasog, bisan unsay inyong mga kabalaka o mga kalisod, ang kamatayon pinaagi sa paghikog napamatud-an nga dili maoy tubag. Dili kini makahupay sa kasakit nga inyong gibati nga sa inyong hunahuna kamo ang hinungdan. Dinhi sa kalibotan nga nagkinahanglan gayod sa tanan nga kahayag nga maangkon niini, palihog ayaw pagamyi ang mahangturon nga kahayag nga gibutang sa Dios sa inyong kalag sa wala pa kini nga kalibotan. Pakigsulti sa uban. Pangayo og tabang. Ayaw gub-a ang kinabuhi nga gibuhisan ni Kristo sa Iyang kinabuhi aron matunhay. Masugakod ninyo ang mga panglimbasog niining mortal nga kinabuhi tungod kay kami motabang ninyo sa pagpas-an niini. Mas lig-on kamo kay sa inyong hunahuna. Anaa ang tabang, gikan sa uban ilabi na gikan sa Dios. Gipangga kamo, ug gipakabili ug gikinahanglan. Nagkinahanglan kami kaninyo! “Ayaw kabalaka: salig lamang.”

Ang tawo nga nakasagobang og mga kahimtang nga labaw pa kalisod sa inyoha ug kanako kausa mituaw: “Padayon [pinangga ko nga batan-ong mga higala]. Pagmaisugon, … ug sa kanunay, ngadto sa kadaogan! Himoa ang inyong kasingkasing nga magmaya, ug [m]aglipay sa hilabihan.”²⁰ Kita daghan kaayo og hinungdan nga maglipay. Kita aduna sa usag usa, ug kita aduna Kaniya. Ayaw ihikaw ngari kanamo ang kahigayonan nga magkauban kita, ako mangamuyo, sa sagradong pangalan ni Jesukristo, atong Agalon, amen.