Nagdayeg kang Kristo ug sa Iyang Ebanghelyo

Ako adunay minahal nga higala nga usa ka maalamon, retirado nga propesor sa unibersidad, tagsulat sa daghang libro, ug, labaw sa tanan, usa ka mapasaligon nga disipulo ni Jesukristo. Siya nakabisita sa Balaan nga Yuta sa makadaghang higayon aron moapil sa mga komperensiya, mopahigayon og akademikanhon nga paniksik, ug mangulo og mga pagsuroy. Sumala niya, sa matag higayon nga siya mobisita sa yuta diin milakaw si Jesus, matingala siya tungod kay siya makakat-on gayod og butang nga bag-o, makapahibulong, ug makapadani mahitungod sa Manluluwas, sa Iyang mortal nga pangalagad, ug sa Iyang minahal nga yutang natawhan. Ang pagdayeg nga gipakita sa akong higala kon maghisgot siya mahitungod sa tanan nga iyang nakat-onan diha sa Balaan nga Yuta daling makatakod, ug kini nga katingala mao ang sukaranan sa iyang mahinungdanon nga mga kalamposan ug akademikanhon nga mga tinguha sa iyang kinabuhi.

Samtang naminaw ko sa iyang mga kasinatian ug mibati sa iyang kadasig, namalandong ko unsa pa kaha sa espirituhanon nga katingala, sa lain pang pagkasulti, nga atong mahimo ug kinahanglan nga mabati alang sa ebanghelyo ni Jesukristo ug sa kalainan nga mahimo niini sa atong pagkadisipulo ug sa atong panaw paingon sa kinabuhing dayon. Ang katingala nga akong gipasabot mao ang pagbati sa emosyon, pagdayeg, o kahibulong nga komon sa tanan kinsa kinasingkasing nga misentro sa ilang kinabuhi sa Manluluwas ug sa Iyang mga pagtulun-an ug mapainubsanon nga miila sa Iyang presensiya sa ilang mga kinabuhi. Ang ingon niana nga pagbati sa katingala, dinasig sa impluwensiya sa Espiritu Santo, makapasiugda sa kaikag nga malipayong mosunod sa doktrina ni Kristo.¹

Ang mga kasulatan naglakip og pipila ka ehemplo kon sa unsa nga paagi kini nga pagbati mapakita. Ang propeta Isaias, sama pananglit, mipahayag sa kinahiladman sa iyang pagpasalamat alang sa Ginoo pinaagi sa iyang pagmaya diha Kaniya.² Kadto kinsa nakadungog ni Jesus nga nagsangyaw diha sa sinaguga sa Capernaum nahibulong sa Iyang doktrina ug sa kalig-on nga Siya mitudlo.³ Kini mao ang sama nga pagbati nga adunay gamhanan kaayo nga impluwensiya sa kasingkasing sa batan-ong Joseph Smith samtang iyang gibasa gikan sa Biblia ang unang kapitulo sa Santiago, nga migiya kaniya sa pagtinguha sa kaalam sa Dios.⁴

Akong mga kaigsoonan, kon kita tinud-anay nga nagdayeg kang Jesukristo ug sa Iyang ebanghelyo, mas malipayon kita, mas aduna kitay kadasig sa buhat sa Dios, ug atong giila ang impluwensiya sa Ginoo diha sa tanang butang. Dugang pa, ang atong pagtuon sa mga pulong sa Dios mas makahuloganon; ang atong mga pag-ampo, mas adunay katuyoan; atong pagsimba, mas adunay balaan nga pagtahod; atong pagserbisyo diha sa gingharian sa Dios, mas makugihon. Kining tanan nga aksiyon makatampo sa impluwensiya sa Espiritu Santo nga mas makanunayon sa atong mga kinabuhi.⁵ Mao nga, ang atong pagpamatuod sa Manluluwas ug sa Iyang ebanghelyo mapalig-on, atong ipabilin nga anaa kanato si Kristo,⁶ ug kita magpuyo sa atong mga kinabuhi “nga nakagamot ug nakabarog ug nga nalig-on diha sa pagtuo … mapasalamaton kanunay.”⁷ Kon kita magpakabuhi niini nga paagi, mahimo kitang mas lig-on sa espirituhanon nga paagi ug mapanalipdan batok sa pagkalit-ag ngadto sa espirituhanon nga walay pagpakabana.

Ang ingon nga kawalay pagpakabana gihulagway sa hinay-hinay nga pagkawala sa atong kahinam nga hingpit nga moapil sa ebanghelyo sa Ginoo. Kasagaran magsugod kini kon kita mobati nga kita nakaangkon na sa tanang gikinahanglan nga kahibalo ug mga panalangin alang sa atong kalipay niini nga kinabuhi. Kini nga pagkakampante, sa lain pang pagkasulti, makaingon kanato nga ibaliwala ang mga gasa sa ebanghelyo, ug sukad niana, atong girisgo nga mapasagdan ang atong makanunayon nga pagbuhat sa labing importante nga mga butang sa ebanghelyo ni Jesukristo⁸ ug ang mga pakigsaad nga atong gihimo. Busa, hinay-hinay natong gipalayo ang atong kaugalingon gikan sa Ginoo, nga nagpahuyang sa atong abilidad nga maka “paminaw Kaniya,”⁹ nga mahimong dili magpakabana ug dili sensitibo sa katalagsaon sa Iyang buhat. Ang pagduhaduha kabahin sa mga kamatuoran nga nadawat na nato mahimong mosulod sa atong hunahuna ug kasingkasing, nga maghimo kanato nga huyang ngadto sa mga tintasyon sa kaaway.¹⁰

Si Pastor Aiden Wilson Tozer, usa ka inila nga tigsulat ug maisogon nga Kristiyano, misulat, “Ang pagkakampante usa ka makamatay nga kaaway sa tanang espirituhanon nga paglambo.”¹¹ Dili ba mao gayod kini ang nahitabo sa katawhan ni Nephi pagkahuman lang gayod sa pagkatawo ni Kristo? Sila “misugod sa pagkaanam og ka kulang sa pagkahibulong sa usa ka timailhan o sa usa ka katingalahan nga gikan sa langit, … [wala mituo] sa tanan diin sila nakadungog ug nakakita.” Sa ingon si Satanas “mibuta sa ilang mga mata ug midani kanila sa pagtuo, nga ang doktrina ni Kristo usa ka binuang ug kawang nga butang.”¹²

Akong hinigugmang kaigsoonan, diha sa Iyang hingpit ug walay kataposan nga gugma ug pagkahibalo sa atong tawhanong kinaiya,¹³ ang Manluluwas miestablisar og paagi alang kanato nga makalikay sa pagkalit-ag sa espirituhanon nga walay pagpakabana. Ang pagdapit sa Manluluwas maghatag kanato og mas halapad nga panglantaw, ilabi na sa pagkonsiderar sa komplikado nga kalibotan diin kita nagpuyo: “Pagkat-on kanako, ug paminaw sa akong mga pulong; lakaw diha sa kaaghop sa akong Espiritu, ug ikaw makabaton og kalinaw ngari kanako.”¹⁴ Samtang kita modawat sa pagdapit sa Manluluwas, atong gipakita ang atong pagkamapainubsanon, atong tinguha nga mahimong daling matudloan, ug atong paglaom nga mahimong mas sama Kaniya.¹⁵ Kini nga pagdapit naglakip usab sa pagserbisyo Kaniya ug sa pagpapangalad sa mga anak sa Dios sa “tibuok [nato] nga kasingkasing, gahom, hunahuna ug kusog.”¹⁶ Ang labing importante nga bahin sa atong paningkamot niini nga panaw mao, siyempre, ang duha ka dagkong sugo: sa paghigugma sa Ginoo nga atong Dios ug sa paghigugma sa atong silingan sama sa atong kaugalingon.¹⁷

Kini nga matang sa batasan kabahin sa balaanon nga kinaiya ni Jesus ug makita diha sa tanan nga Iyang gibuhat atol sa Iyang yutan-ong pangalagad.¹⁸ Busa, kon tuyoon nato ug tinud-anay nga mopahinungod sa atong kaugalingon nga maghunahuna Kaniya ug magkat-on gikan sa Iyang hingpit nga ehemplo,¹⁹ mas makaila kita Kaniya. Kita molambo sa kadasig ug magtinguha sa paglakip sa atong mga kinabuhi sa kinatas-an nga sumbanan kon sa unsang paagi kita kinahanglang magpakabuhi, sa ehemplo nga kinahanglan natong ipakita, ug sa mga sugo nga kinahanglan natong sundon. Kita usab makaangkon og dugang nga pagsabot, kaalam, balaanong kinaiya, ug grasya ngadto sa Dios ug sa atong mga silingan.²⁰ Ako makapaneguro kaninyo nga ang atong abilidad nga mobati sa impluwensiya ug gugma sa Manluluwas mapahingusgan sa atong mga kinabuhi, nga mopadako sa atong hugot nga pagtuo, sa atong tinguha nga matarong nga molihok, ug sa hinungdan sa pagserbisyo Kaniya ug sa uban.²¹ Agig dugang, ang atong pagpasalamat alang sa mga panalangin ug mga hagit nga atong masinati sa mortalidad mopalig-on ug mahimong bahin sa atong tinuod nga pagsimba.²²

Akong minahal nga mga higala, tanan niini nga mga butang magpalig-on sa atong espirituhanon nga katingala kabahin sa ebanghelyo ug modasig kanato aron malipayong motuman sa mga pakigsaad nga atong gihimo sa Ginoo—bisan taliwala sa mga pagsulay ug mga hagit nga atong masinati. Siyempre, aron mahitabo kini nga mga sangpotanan, kinahanglan natong isubsob ang atong kaugalingon uban ang hugot nga pagtuo ug tinuod nga katuyoan diha sa mga pagtulun-an sa Manluluwas,²³ nga maningkamot nga ilakip ang Iyang mga kinaiya sa atong pamaagi sa kinabuhi.²⁴ Agig dugang, kinahanglan nato nga mas magpaduol ngadto Kaniya pinaagi sa atong paghinulsol,²⁵ pagtinguha sa Iyang kapasayloan ug sa Iyang matubsanong gahom sa atong mga kinabuhi ug pagtuman sa Iyang mga sugo. Ang Ginoo Mismo misaad nga tultolan kita Niya sa matarong nga mga dalan kon mosalig kita Niya sa tibuok natong kasingkasing, mohinumdom Kaniya sa tanan natong buhaton ug dili mosalig sa atong kaugalingon nga kaalam.²⁶

Imahe

Si Elder Jones uban ni Wes

Usa ka lalaki nga bag-ohay lang nakong nahimamat, kansang ngalan mao si Wes ug kinsa nagtambong sa komperensiya karon, midawat sa pagdapit ni Kristo nga magkat-on Kaniya ug sa Iyang ebanghelyo ug nagsugod sa pagsinati sa pagdayeg sa Iyang gugma human sa 27 ka tuig nga pagpalayo sa iyang kaugalingon gikan sa dalan sa pakigsaad. Siya misulti kanako nga usa ka adlaw gikontak siya pinaagi sa Facebook sa usa ka misyonaryo, si Elder Jones, kinsa temporaryo nga nadestino sa dapit ni Wes sa dili pa moadto sa orihinal nga nadestinohan nga misyon didto sa Panama. Sa dihang nakit-an ni Elder Jones ang profile ni Wes, nga wala gani makahibalo daan nga miyembro na siya sa Simbahan, nabati niya ang giya sa Espiritu Santo ug nasayod nga kinahanglan niyang kontakon dayon si Wes. Siya daling milihok niini nga pag-aghat. Si Wes nahibulong niining wala damha nga pagkontak ug nagsugod sa pagkaamgo nga ang Ginoo nahibalo bahin kaniya bisan pa sa iyang gilay-on gikan sa dalan sa pakigsaad.

Sukad niadto, si Wes ug ang mga misyonaryo nagsugod sa makanunayong pagkontak. Si Elder Jones ug ang iyang kompanyon mihatag og sinemana nga mga buhat sa pagserbisyo ug espirituhanon nga mga mensahe nga nakatabang ni Wes sa pagpahiuli sa iyang pagdayeg sa Manluluwas ug sa Iyang ebanghelyo. Kini mipukaw sa iyang pagpamatuod sa kamatuoran ug sa gugma sa Manluluwas alang kaniya. Si Wes mibati sa kalinaw nga naggikan sa Maghuhupay ug nakaangkon sa kalig-on nga iyang gikinahanglan aron mobalik sa Simbahan. Siya misulti kanako nga kini nga kasinatian mipahiuli kaniya sa espirituhanon ug emosyonal nga paagi ug mitabang kaniya sa pagwagtang sa mga pagbati sa kayugot nga napundok latas sa katuigan tungod sa lisod nga mga kasinatian nga iyang naagian.

Sama sa naobserbaran sa akong naunang nahisgotan nga mahunahunaon nga magtutudlo nga higala, kanunay nga adunay usa ka butang nga maanindot ug makapadani nga makat-onan mahitungod ni Jesukristo ug sa Iyang ebanghelyo.²⁷ Ang Ginoo mihimo og maanindot nga mga saad nga gipadangat ngadto sa tanan, lakip kanato, kinsa magtinguha sa pagkat-on bahin Kaniya ug molakip sa Iyang mga pulong ngadto sa ilang mga kinabuhi. Ngadto kang Enoch, Siya misulti, “Tan-awa ang akong Espiritu [ma]anaa kanimo, busa ang imong tanan nga mga pulong Ako mohatag og kaangayan; ug ang mga bukid mahanaw sa imong atubangan, ug ang mga sapa mobalhin sa ilang agianan; ug ikaw magpuyo ngari kanako, ug Ako nganha kanimo.”²⁸ Pinaagi sa Iyang sulugoon nga si Hari Benjamin, Siya mipahayag, “Kamo pagatawgon nga mga anak ni Kristo, iyang anak nga mga lalaki, ug iyang anak nga mga babaye; kay tan-awa, niining adlawa siya sa espirituhanon nga paagi nanganak kaninyo; kay kamo nag-ingon nga ang inyong mga kasingkasing nausab pinaagi sa hugot nga pagtuo diha sa iyang ngalan; busa, kamo natawo kaniya ug nahimo nga anak nga mga lalaki ug iyang anak nga mga babaye.”²⁹

Mao nga, samtang kita matinuoron ug magpadayon sa pagpaningkamot nga magkat-on sa Manluluwas ug mosunod sa Iyang ehemplo, ako mosaad kaninyo, pinaagi sa Iyang ngalan, nga ang Iyang balaanon nga mga hiyas mahisulat sa atong mga hunahuna ug mga kasingkasing,³⁰ nga kita mahimong mas sama Kaniya, ug nga kita maglakaw uban Kaniya.³¹

Akong minahal nga mga kaigsoonan, ako nag-ampo nga kita kanunayng mobarog nga nagdayeg ni Jesukristo ug sa Iyang kompleto, walay kataposan, ug hingpit nga gugma. Hinaot nga ang panumdoman sa unsay nakita sa atong mga mata ug nabati sa atong mga kasingkasing makapalambo sa atong katingala sa maulaong sakripisyo sa Manluluwas, nga makaayo kanato sa atong espirituhanon ug emosyonal nga mga samad ug makatabang kanato nga mas makapaduol ngadto Kaniya. Hinaot nga kita mapuno sa pagdayeg sa mahinungdanon nga mga saad nga ang Amahan aduna diha sa Iyang mga kamot ug nga Siya miandam alang niadtong kinsa mga matinud-anon:

“Ang gingharian mainyo ug ang mga panalangin niana mainyo, ug ang mga katigayonan sa kahangtoran mainyo.

“Ug siya kinsa nakadawat sa tanan nga mga butang uban sa pagpasalamat mahimo nga mahimayaon.”³²

Si Jesus mao ang Manunubos sa kalibotan, ug kini mao ang Iyang Simbahan. Ako magpamatuod niini nga mga kamatuoran diha sa makadasig og pagdayeg, sagrado, ug halangdon nga ngalan sa atong Manluluwas, si Jesukristo, amen.