Pasiuna nga Mensahe
Among gipasidunggan ang mga anak nga babaye sa Dios dinhi niining espesyal nga sesyon pinaagi sa pagtutok diha sa ilang mga kabalaka ug niadtong anaa sa ilang mga organisasyon.
Samtang magsugod kita niining talagsaon nga kababayen-an nga sesyon sa kinatibuk-ang komperensiya, malipayon akong mohatod niining pasiuna nga mensahe sa Unang Kapangulohan.
Ang atong Sabado nga mga sesyon adunay kasaysayan sa nagkalainlain nga katuyoan ug lainlain nga mga tumatambong. Karong gabhiona magdugang kita niana nga kasaysayan samtang kita magsugod og bag-o nga katuyoan ug pamaagi alang sa nahibaloan na nga umaabot. Ang ebanghelyo ni Jesukristo dili mausab. Ang doktrina sa ebanghelyo dili mausab. Ang atong personal nga mga pakigsaad dili mausab. Apan latas sa katuigan, ang mga miting nga atong gipahigayon aron ipahibalo ang among mga mensahe mausab ug dako kaayo ang kalagmitan nga padayon nga mausab sa umaabot nga katuigan.
Sa pagkakaron, kining Sabado sa gabii nga miting usa ka sesyon sa kinatibuk-ang komperensiya, dili usa ka sesyon sa bisan unsa nga organisasyon. Sama sa tanang sesyon sa kinatibuk-ang komperensiya, ang pagplano, mga mamumulong, ug musika gidesinyo sa Unang Kapangulohan.
Among gihangyo si Presidente Jean B. Bingham, Kinatibuk-ang Presidente sa Relief Society, sa pagpahigayon niini nga sesyon. Ang umaabot nga Sabado sa gabii nga mga sesyon tingali ipahigayon sa usa sa ubang Kinatibuk-ang mga Opisyal sa Simbahan, sama sa mga sakop sa mga Kapangulohan sa Relief Society, Young Women, ug Primary, nga sangonan sa Unang Kapangulohan.
Karong gabhiona, kining Sabado sa gabii nga sesyon sa kinatibuk-ang komperensiya magtutok diha sa mga kabalaka sa kababayen-an nga mga Santos sa Ulahing mga Adlaw. Kini maglakip sa doktrina sa Ang Simbahan ni Jesukristo sa mga Santos sa Ulahing mga Adlaw, sa mga polisiya sa Simbahan nga piho nga may kalabotan sa kababayen-an, ug sa kinatibuk-ang mga responsibilidad ug buhat sa mga organisasyon nga naglakip sa kababayen-an ug mga batang babaye sa Simbahan. Bisan kon gituyo nga isibya ngadto sa tibuok kalibotan nga tumatambong sama sa tanang sesyon sa kinatibuk-ang komperensiya, ang tumatambong nga gidapit nga moanhi sa Conference Center alang niini nga sesyon mao ang kababayen-an ug mga batang babaye nga nagpangidaron og 12 pataas. Among giapil ang ubang mga lider sa pagkapari kinsa nagdumala sa miapil nga mga organisasyon.
Ang among gipasiugdahan dinhi nahisubay sa mga kapanguhaan sa komunikasyon nga kasamtangang anaa sa tibuok kalibotan nga mga pangulo ug mga miyembro sa Simbahan sa Ginoo. Ang doktrina sa ebanghelyo ni Jesukristo alang sa tanan, busa mao kana ang among nag-unang motibo ug katuyoan sa pagsibya. Among gipasidunggan ang mga anak nga babaye sa Dios dinhi niining espesyal nga sesyon pinaagi sa pagtutok diha sa ilang mga kabalaka ug niadtong anaa sa ilang mga organisasyon.
Kami mapasalamaton nga ang teknolohiya sa pagsibya karon naghatag sa mga lider sa Simbahan sa kapasidad sa pagpahigayon og detalyado nga pagbansay pinaagi sa pagpakigpulong ngadto sa piho nga mga tumatambong diha sa lagyo nga dapit. Amo usab nga gihangop ang kamatuoran nga ang kasamtangan nga mga oportunidad sa pagbiyahe nagkadaghan. Kana nagtugot kanamo sa pagpadala og mga lider sa Simbahan aron sa pagpahigayon sa gikinahanglan nga kanunay nga face-to-face nga pagbansay sa pagpangulo diha sa lagyo nga dapit.
Kini mao ang buhat ni Ginoong Jesukristo. Kami Iyang mga sulugoon, gigiyahan sa Iyang Balaang Espiritu. Kami nangamuyo nga ang mga panalangin sa atong Ginoo maanaa sa mga lider niini nga mga organisasyon ug sa matinud-anon nga kababayen-an ug mga batang babaye kinsa nagserbisyo sa Ginoo niini nga mga organisasyon ug sa ilang indibidwal nga kinabuhi. Sa ngalan ni Jesukristo, amen.