Pagkakabig ngadto sa Kabubut-on sa Dios
Ang atong personal nga pagkakabig naglakip sa katungdanan sa pagpakigbahin sa ebanghelyo ni Jesukristo ngadto sa kalibotan.
Ako mapasalamaton sa gamhanan nga propetikanhong tawag ni Presidente Russell M. Nelson ngadto sa misyonaryo nga pagserbisyo ug sa makadasig nga mga mensahe ni Presidente M. Russell Ballard ug Elder Marcos A. Aidukaitis karong adlawa kabahin sa misyonaryo.
Ang usa ka misyonaryo nga tahas ngadto sa Great Britain sa hinapos sa miaging tuig mitugot kanako sa pagpamalandong sa bililhon nga mga espirituwal nga mga panghitabo nga mao ang pundasyon sa akong desisyon sa pag-alagad isip usa ka misyonaryo.1 Dihang nag-edad ko og 15 anyos, ang akong pinalangga nga magulang nga igsoon, si Joe, 20 anyos na—ang edad nga mahimong kwalipikado niadtong panahona aron makaserbisyo og misyon. Sa Estados Unidos, tungod sa kagubot sa Korea, gamay ra kaayo ang gitugotan nga moserbisyo. Usa lang ka tawo ang mahimong tawagon gikan sa matag ward kada tuig.2 Usa kadto ka surprisa dihang ang among bishop mihangyo ni Joe sa paghisgot niini nga posibilidad ngadto sa among amahan. Si Joe dugay nang nangandam sa mga aplikasyon alang sa medikal nga pagtuon. Ang among amahan, kinsa dili aktibo sa Simbahan, mihimo og pinansiyal nga mga pagpangandam aron sa pagtabang kaniya ug dili ganahan nga si Joe moadto og misyon. Si papa misugyot nga si Joe makahimo og mas daghang kaayohan pinaagi sa pag-eskwela sa medikal. Usa kadto ka dako kaayo nga isyu sa among pamilya.
Sa usa ka talagsaong panaghisgot uban sa akong maalamon ug sulundon nga magulang nga igsoong lalaki, kami nakahukom nga ang iyang desisyon kon moserbisyo ba og misyon ug langayon ang iyang edukasyon nagdepende sa tulo ka pangutana: (1) Si Jesukristo balaan ba? (2) Ang basahon ni Mormon pulong ba sa Dios? ug (3) Si Joseph Smith mao ba ang Propeta sa Pagpahiuli? Kon ang tubag niini nga mga pangutana oo, klaro nga si Joe mas makahimo og daghang kaayohan pinaagi sa pagdala sa ebanghelyo ni Jesukristo ngadto sa kalibotan kay sa pagkahimong doktor sa mas sayo nga panahon.3
Niadtong gabhiona nag-ampo ko nga matinguhaon ug uban sa bug-os nga katuyoan. Ang Espiritu, sa dili malimod nga gamhanang paagi, mipamatuod kanako nga ang tubag sa tanan niining tulo ka pangutana tinuod. Usa kadto sa mahinungdanon kaayo nga hitabo alang kanako. Naamgohan nako nga ang matag desisyon nga akong himoon sa tibuok nakong kinabuhi maimpluwensiya niini nga mga kamatuoran. Ako usab nasayod nga ako moalagad og misyon kon hatagan sa kahigayonan. Sa tibuok kinabuhi nga pagserbisyo ug espirituwal nga mga kasinatian, akong nasabtan nga ang tinuod nga pagkakabig maoy resulta sa gihunahuna og maayo nga pagdawat sa kabubut-on sa Dios ug nga kita mahimong magiyahan diha sa atong mga lihok pinaagi sa Espiritu Santo.
Ako aduna nay pagpamatuod sa pagkabalaan ni Jesukristo isip ang Manunubos sa kalibotan. Niadtong gabhiona nakadawat ko og espirituwal nga pagpamatuod sa Basahon ni Mormon4 ug ni Propeta Joseph Smith.
Si Joseph Smith Usa ka Instrumento sa mga Kamot sa Ginoo
Ang inyong pagpamatuod mapalig-on kon inyong mahibaloan diha sa inyong kasingkasing pinaagi sa inyong mga pag-ampo nga si Propeta Joseph Smith usa ka instrumento sa mga kamot sa Ginoo. Atol sa milabayng walo ka tuig, ang usa sa gisangon kanako nga mga gimbuhaton diha sa Napulog Duha ka Apostoles mao ang pagrebyo ug pagbasa sa talagsaon nga mga sulat ug mga dokumento ni Joseph Smith ug ang pagsiksik nga misangpot ngadto sa pagmantala sa Mga Santos nga mga volume.5 Ang akong pagpamatuod ug pagdayeg ni Propeta Joseph Smith nalig-on kaayo ug napalambo human makabasa sa makadasig nga mga detalye sa iyang kinabuhi ug sa giorden nang daan nga propetikanhong pagpangalagad.
Ang kang Joseph nga paghubad sa Basahon ni Mormon pinaagi sa gasa ug gahom sa Dios usa ka pundasyon sa Pagpahiuli.6 Ang Basahon ni Mormon adunay sulod nga may kalabotan sa usag usa, maanindot nga pagkasulat, ug naglakip sa mga tubag sa dagkong mga pangutana sa kinabuhi. Kini usa ka laing tugon ni Jesukristo. Ako mopamatuod nga si Joseph Smith usa ka matarong, puno sa hugot nga pagtuo, ug usa ka instrumento diha sa mga kamot sa Ginoo sa pagpatungha sa Basahon ni Mormon.
Ang mga pagpadayag ug mga hitabo nga gisulat diha sa Doktrina ug mga Pakigsaad naghatag og mga yawe, mga ordinansa, ug mga pakigsaad nga gikinahanglan alang sa kaluwasan ug kahimayaan. Kini wala lamang maglatid sa mahinungdanong mga butang nga gikinahanglan aron maestablisar ang Simbahan apan naghatag usab og halawom nga doktrina nga nagtugot kanato nga makasabot sa katuyoan sa kinabuhi ug naghatag kanato og mahangtorong panglantaw.
Usa sa daghan kaayong mga ehemplo sa propetikanhon nga tahas ni Joseph Smith makita diha sa ika-76 nga seksiyon sa Doktrina ug mga Pakigsaad. Kini usa ka klaro kaayo nga rekord sa panan-awon bahin sa langit, lakip sa mga gingharian sa himaya, diin si Propeta Joseph Smith ug Sidney Rigdon bulahan nga nakadawat niadtong Pebrero 16, 1832. Niadtong higayona, ang naglabi nga kadaghanan sa mga simbahan nagtudlo nga ang Pag-ula sa Manluluwas dili makahatag og kaluwasan alang sa kadaghanan sa katawhan. Gituohan kaniadto nga adunay pipila nga maluwas ug ang naglabi nga kadaghanan itambog ngadto sa impiyerno ug pagtunglo, lakip sa walay kataposan nga pagsakit pinaagi “sa labing ngil-ad ug dili matukib nga kasakit.”7
Ang pagpadayag nga anaa sa ika-76 nga seksiyon naghatag og usa ka mahimayaon nga panan-awon sa mga ang-ang sa himaya diin ang naglabi nga kadaghanan sa mga anak sa Langitnong Amahan kinsa mga malig-on didto sa ilang premortal nga kahimtang mapanalanginan og maayo human sa kataposan nga paghukom.8 Ang panan-awon sa tulo ka ang-ang sa himaya, diin ang labing ubos niini “walay usa nga makasabot,”9 maoy direkta nga pagsupak niadtong lig-on apan sayop nga doktrina nga ang kadaghanan itambog ngadto sa impiyerno ug pagtunglo.
Kon inyong maamgohan nga si Joseph Smith 26 anyos pa lamang niadtong panahona, adunay limitado nga edukasyon, ug adunay gamay o walay kahibalo sa klasikal nga mga pinulongan diin nagagikan ang paghubad sa Biblia, siya sa tinuoray usa ka instrumento diha sa mga kamot sa Dios. Diha sa ika-17 nga bersikulo sa ika 76 nga seksiyon, siya nadasig sa paggamit sa pulong dili makiangayon kaysa pagtunglo nga mao ang gigamit diha sa Ebanghelyo ni Juan.10
Makaikag hunahunaon nga 45 ka tuig sa kadugayan ang usa ka lider sa simbahang Anglican ug pinasidunggan sa akademika nga usa ka klasikal nga eskolar,11 si Frederic W. Farrar, kinsa misulat sa The Life of Christ [Ang Kinabuhi ni Kristo],12 miinsister nga ang kahulogan sa pagtunglo diha sa King James nga Bersiyon sa Biblia maoy resulta sa mga sayop nga paghubad gikan sa Hebreohanon ug Gresyanhon ngadto sa Iningles.13
Sa atong panahon, daghan ang misagop sa konsepto nga kinahanglan walay sangpotanan sa sala. Ilang gisuportahan ang walay kondisyon nga pagpasagad sa sala nga walay paghinulsol. Ang atong pinadayag nga doktrina wala lamang magsupak sa ideya nga kadaghanan sa mga tawo pagasilotan sa hangtod ngadto sa impiyerno ug pagtunglo apan nag-establisar usab nga ang personal nga paghinulsol usa ka sugo nga kinahanglang buhaton aron makaambit sa Pag-ula sa Manluluwas ug makapanunod sa celestial nga gingharian.14 Ako mopamatuod nga si Joseph Smith sa tinuod usa ka instrumento diha sa mga kamot sa Ginoo sa pagpahinabo sa Pagpahiuli sa Iyang ebanghelyo!
Tungod sa Pagpahiuli sa ebanghelyo ni Jesukristo, kita nakasabot sa importansiya sa paghinulsol ug sa “mga buhat sa pagkamatarong.”15 Kita nakasabot sa makasanap sa pagbati nga kahulogan sa Pag-ula sa Manluluwas ug sa Iyang makaluwas nga mga ordinansa ug mga pakigsaad, lakip niadtong gipahigayon diha sa templo.
Ang “mga buhat sa pagkamatarong” naggagikan sa ug mao ang mga bunga sa pagkakabig. Ang tinuod nga pagkakabig mahitabo tungod sa gihunahuna og maayo nga pagdawat ug pagpasalig nga mosunod sa kabubut-on sa Dios.16 Ang daghang mga sangpotanan ug mga panalangin nga mao ang resulta sa pagkakabig mao ang tinuod ug kanunay nga kalinaw ug personal nga kasegurohan sa labing taas nga kalipay17—bisan pa sa mga unos niini nga kinabuhi.
Ang pagkakabig ngadto sa Manluluwas mousab sa usa ka kinaiyanhon nga tawo ngadto sa usa ka nabalaan, natawo pag-usab, naputli nga tawo—usa ka bag-o nga linalang diha ni Jesukristo.18
Daghan Ang Natago gikan sa Kamatuoran Tungod kay Wala Sila Masayod Asa Kini Pangitaa
Unsa ang mga obligasyon nga moabot gikan sa pagkakabig? Didto sa Liberty Jail, si Propeta Joseph mipahinumdom nga daghan “[ang] natago gikan sa kamatuoran tungod kay sila wala masayod asa kini pangitaa.”19
Sa pasiuna sa Ginoo alang sa Doktrina ug mga Pakigsaad, ang usa ka dakong talan-awon sa katuyoan sa Ginoo gipadayag. Siya mipahayag, “Busa, Ako ang Ginoo, nahibalo sa katalagman nga moabot diha sa mga lumulupyo sa yuta, mitawag sa akong sulugoon si Joseph Smith, Jun., ug namulong ngadto kaniya gikan sa langit, ug mihatag kaniya og mga sugo.” Siya midugang sa pagtudlo, “Nga ang kahingpitan sa akong ebanghelyo mahimo tingali ikapahayag pinaagi sa mahuyang ug yano ngadto sa mga lumulupyo sa kalibotan.”20 Kana naglakip sa full-time nga mga misyonaryo. Kana naglakip sa matag usa kanato. Kana angay nga mao ang tutokan og maayo sa kada tawo nga gipanalanginan sa pagkakabig ngadto sa kabubut-on sa Dios. Ang Manluluwas mabination nga midapit kanato nga mahimong Iyang tingog ug Iyang mga kamot.21 Ang gugma sa Manluluwas mao ang mahimo natong giya nga kahayag. Ang Manluluwas nagtudlo sa Iyang mga disipulo, “Panglakaw kamo ug himoa ninyong mga tinun-an ang tanang kanasoran.”22 Ug ngadto ni Joseph Smith, Siya mipahayag, “Isangyaw ang akong ebanghelyo ngadto sa matag linalang kinsa wala makadawat niini.”23
Usa ka semana human sa pagpahinungod sa Kirtland Temple niadtong Abril 3, 1836, nga mao ang Dominggo sa Pasko sa Pagkabanhaw ug usab ang Pagpalabay, ang Ginoo mipakita sa usa ka halangdon nga panan-awon ngadto ni Joseph ug Oliver Cowdery. Ang Ginoo midawat sa templo ug mipahayag, “Kini mao ang sinugdanan sa panalangin nga ibu-bo diha sa mga ulo sa akong mga katawhan.”24
Human natapos kini nga panan-awon, Si Moises mipakita “ug mitugyan … sa mga yawe sa pagpundok sa Israel gikan sa upat ka mga bahin sa yuta, ug sa pagdala sa napulo ka mga kaliwatan gikan sa yuta sa amihanan.”25
Si Presidente Russell M. Nelson, ang atong pinalanggang propeta karon kinsa naghupot sa mao gihapon nga mga yawe, nagtudlo karong buntag: “Kamong mga batan-ong lalaki gitagana alang niini nga panahon diin ang gisaad nga pagpundok sa Israel mahitabo. Samtang kamo nagserbisyo og mga misyon, kamo adunay importante kaayo nga papel niining wala pa sukad mabuhat nga panghitabo”26
Aron ang mando sa Manluluwas sa pagpaambit sa ebanghelyo mahimong kabahin sa atong pagkatawo, kinahanglan kita nga mahimong makabig ngadto sa kabubut-on sa Dios; kinahanglan kita nga mohigugma sa atong mga silingan, mopaambit sa gipahiuli nga ebanghelyo ni Jesukristo, ug modapit sa tanan aron moduol ug mosusi. Isip mga miyembro sa Simbahan, atong gihandom ang tubag ni Propeta Joseph ngadto ni John Wentworth, ang editor sa Chicago Democrat, niadtong 1842. Nangayo siya og impormasyon mahitungod sa Simbahan. Si Joseph Smith mitapos sa iyang tubag pinaagi sa paggamit sa “Sumbanan sa Kamatuoran” isip usa ka pasiuna ngadto sa trese ka Artikulo sa Hugot nga Pagtuo. Ang sumbanan nagpasabot, sa tukma nga paagi, kon unsa ang kinahanglan nga buhaton:
“Walay dili balaan nga kamot ang makapugong sa buhat sa paglambo; mga pagpanggukod mahimong magkakusog, ang mga manggugubot mahimong maghiusa, mga kasundalohan mahimong magpundok, mga pasangil mahimong modaot sa kadungganan, apan ang kamatuoran sa Dios magpadayon nga maisogon, halangdon, ug gawasnon, hangtod nga kini makasulod sa matag yuta, makabisita sa matag dapit, molukop sa matag nasod, ug makasulti sa matag dungganhangtod ang mga katuyoan sa Dios matuman, ug ang Halangdong Jehova moingon nga ang buhat nahuman na.”27
Mao kini ang bug-os nga hangyo alang sa tanang mga henerasyon sa mga Santos sa Ulahing mga Adlaw, ilabi na sa mga misyonaryo. Diha sa diwa sa “Sumbanan sa Kamatuoran,” kita mapasalamaton nga taliwala sa tibuok kalibotan nga pandemya ang matinud-anon nga mga misyonaryo nagpakigbahin sa ebanghelyo. Mga misyonaryo, gihigugma namo kamo! Ang Ginoo naghangyo sa matag usa kanato sa pagpakigbahin sa Iyang ebanghelyo pinaagi sa pulong ug buhat. Ang atong personal nga pagkakabig naglakip sa katungdanan sa pagpakigbahin sa ebanghelyo ni Jesukristo ngadto sa kalibotan.
Ang mga panalangin sa pagpakigbahin sa ebanghelyo naglakip sa pagpalambo sa atong pagkakabig ngadto sa kabubut-on sa Dios ug pagtugot sa Dios nga mao ang mopatigbabaw sa atong mga kinabuhi.28 Kita mopanalangin sa uban aron makasinati og usa ka “dako nga kausaban” sa kasingkasing.29 Anaa tinuod ang mahangtorong hingpit nga kalipay diha sa pagtabang sa pagdala sa mga kalag ngadto ni Kristo.30 Ang paghago alang sa pagkakabig sa kaugalingon ug sa uban mao ang halangdon nga tahas.31 Ako gayod mopamatuod sa ngalan ni Jesukristo, amen.