Bidyo: “Kamo ang mga Babaye nga Iya nang Nakita”

Niadtong 1979 si Presidente Spencer W. Kimball naa sa ospital ug mihangyo sa iyang asawa, si Camilla, sa pagbasa sa iyang pakigpulong sa usa sa kinatibuk-ang miting sa kababayen-an.

Sister Camilla Kimball: “Ang dakong pagtubo nga moabot sa Simbahan sa kataposang mga adlaw moabot tungod kay daghang buotang mga babaye sa kalibotan (kinsa adunay labaw ka sensitibong pagbati nga espirituhanon) ang mapaduol sa Simbahan sa tumang kadaghan. Kini mahitabo sa kahimtang nga ang mga babaye sa Simbahan moaninaw sa pagkamatarong ug sa ilang pagkamaayo og abilidad sa pagpahayag sa ilang mga kaugalingon ug sa kahimtang nga ang mga babaye sa Simbahan makita nga talagsaon ug lahi––sa malipayong paagi––gikan sa mga babaye sa kalibotan.”¹

Presidente Russell M. Nelson: “Minahal kong mga sister, kamo nga maoy among mahinungdanong mga kauban niining kataposang mga adlaw, ang panahon nga nakita nang daan ni Presidente Kimball mao karon. Kamo ang mga babaye nga iya nang nakita! Ang inyong hiyas, kahayag, gugma, kahibalo, kaisog, kinaiya, hugot nga pagtuo ug matarong nga kinabuhi mopaduol sa maayo nga mga babaye sa kalibotan, uban sa ilang mga banay, ngadto sa Simbahan sa dili ordinaryong gidaghanon!

“Kami … nagkinahanglan sa inyong kalig-on, sa inyong pagkakabig, sa inyong konbiksyon, sa inyong abilidad sa pagpangulo, sa inyong kaalam, ug sa inyong mga tingog. Ang gingharian sa Dios dili kompleto ug dili mahimong makompleto kon wala ang mga babaye kinsa naghimo og sagradong mga pakigsaad ug dayon sundon kini, mga babaye nga makasulti uban sa gahom ug awtoridad sa Dios! …

“… Bisan unsay inyong calling, bisan unsay inyong kahimtang, nagkinahanglan kami sa inyong hunahuna, panabot, ug sa inyong inspirasyon. Kami nagkinahanglan kaninyo nga motingog ug mamulong diha sa mga konseho sa ward ug sa stake. Nagkinahanglan kita sa matag minyo nga sister nga mamulong isip ‘usa ka makatampo ug hingpit nga kauban’ samtang kamo makighiusa sa inyong bana sa pagdumala sa inyong pamilya. Minyo o dili, kamong mga sister adunay talagsaong mga kapasidad ug espesyal nga panabot nga inyong nadawat isip gasa gikan sa Dios. Kaming mga lalaki dili makapareha sa inyong talagsaong impluwensya.

“Kita nasayod nga ang labing halangdon nga buhat sa paglalang mao ang paglalang sa babaye! Nagkinahanglan kami sa inyong kalig-on! …

“… Magpasalamat ko kaninyo, minahal nga mga sister, ug mopanalangin kaninyo nga makab-ot ang inyong hingpit nga paglambo, sa pagtuman sa katuyoan sa inyong pagkalalang, samtang kita magtinabangay niining sagradong buhat. Mag-uban kita nga motabang sa pag-andam sa kalibotan alang sa Ikaduhang Pag-anhi sa Ginoo.”²