Ang mga Pakigsaad uban sa Dios Makalig-on, Makapanalipod, ug Makaandam Kanato alang sa Mahangtoron nga Himaya
Samtang kita mopili sa paghimo og mga pakigsaad ug pagtuman niini, kita mapanalanginan og dugang nga kalipay niini nga kinabuhi ug usa ka mahimayaon nga kinabuhing dayon nga moabot.
Mga sister, pagkahingpit sa kalipay nga kita magkapundok sa tibuok kalibotan nga pag-inigsoonay sa mga babaye! Isip kababayen-an kinsa naghimo ug nagtuman og mga pakigsaad uban sa Dios, kita nag-ambit og mga espirituhanong kasuod nga nagtabang kanato sa pag-atubang sa mga hagit sa atong panahon ug nag-andam kanato alang sa Ikaduhang Pag-anhi ni Jesukristo. Ug ang pagtuman niana nga mga pakigsaad motugot kanato nga mahimong kababayen-an nga adunay impluwensiya kinsa makadala sa uban ngadto sa Manluluwas.
Kadtong kinsa nabunyagan mipakigsaad nianang dili gayod hikalimtan nga adlaw nga dad-on ang ngalan ni Jesukristo diha kanila, nga kanunay mohinumdom Kaniya, motuman sa Iyang mga sugo, ug moserbisyo Kaniya hangtod sa kataposan. Kon kita mobuhat niining mga butanga, ang Langitnong Amahan nagsaad nga mopasaylo sa atong mga sala ug mohatag kanato sa pagpakig-uban sa Espiritu Santo. Kini nga mga panalangin mopahiluna kanato diha sa dalan nga, kon kita mopadayon sa unahan ug molahutay ngadto sa kataposan, motugot kanato aron makapuyo uban Kaniya ug sa Iyang Anak didto sa celestial nga gingharian. Ang matag tawo nga nabunyagan gisaaran niini nga mga pribilehiyo kon siya motuman sa mga pakigsaad nga iyang gihimo nianang espesyal nga adlaw.
Kadtong kinsa mohimo og dugang nga mga pakigsaad diha sa templo makadawat og gamhanan nga mga saad sigon sa personal nga pagkamatinud-anon. Kita ligdong nga mipakigsaad nga mosunod sa mga sugo sa Dios, mosunod sa ebanghelyo ni Jesukristo, mahimong lunsay sa moral nga paagi, ug mopahinungod sa atong panahon ug mga talento ngadto sa Ginoo. Agig balos, ang Dios nagsaad og mga panalangin niini nga kinabuhi ug sa oportunidad nga mobalik ngadto Kaniya.1 Niana nga proseso, kita hatagan, o tugahan, sa gahom sa pag-ila tali sa kamatuoran ug sayop, tali sa sakto ug dili sakto, taliwala sa daghan kaayong negatibo nga mga tingog nga nagsamok-samok kanato. Pagkagamhanan nga gasa!
Agig pagpangandam alang sa akong unang pag-adto sa templo, ang akong mama ug ang sinati nga mga sister sa Relief Society mitabang kanako sa pagpili sa mga butang nga akong gikinahanglan, lakip na sa maanindot nga pangseremonya nga sinina. Apan ang labing importante nga pagpangandam nahitabo sa wala pa gani masayod kon unsay isul-ob. Human sa pag-interbiyo nako aron sa pagsuta kon ako takos ba, ang akong bishop mipasabot sa mga pakigsaad nga akong himoon. Ang iyang mainampingon nga pagpasabot mihatag kanako og kahigayonan sa paghunahuna ug sa pagkahimong andam sa paghimo niadto nga mga pakigsaad.
Dihang miabot na ang adlaw, miapil ko uban sa mapasalamaton ug malinawon nga pagbati. Bisan kon wala ko makasabot sa tibuok nga kahulogan sa mga pakigsaad nga akong gihimo, ako nahibalo nga gibugkos ko ngadto sa Dios pinaagi niadto nga mga pakigsaad ug gisaaran og mga panalangin nga halos dili nako matugkad kon ako kining tumanon. Sukad nianang una nga kasinatian, kanunay akong gipasaligan nga ang pagtuman sa mga pakigsaad nga atong gihimo ngadto sa Dios motugot kanato sa paggamit sa gahom sa Manluluwas, nga molig-on kanato diha sa dili kapugngan nga mga pagsulay, mohatag sa proteksiyon gikan sa impluwensiya sa kaaway, ug moandam kanato alang sa mahangtorong himaya.
Ang mga kasinatian sa kinabuhi mahimong maglakip sa mga kasinatian gikan sa kataw-anan ngadto sa makapasakit sa kasingkasing, gikan sa masulob-on ngadto sa mahimayaon. Ang matag kasinatian makatabang kanato nga mas makasabot pa mahitungod sa malukpanon nga gugma sa atong Amahan ug sa atong kapasidad sa pag-usab pinaagi sa gasa sa grasya sa Manluluwas. Ang pagtuman sa atong mga pakigsaad motugot sa gahom sa Manluluwas sa paglimpyo kanato samtang kita magkat-on pinaagi sa kasinatian—mahimong usa kini ka gamayng sayop sa paghusga o dakong kapakyasan. Ang atong Manunubos anaa aron mosalo kanato kon kita mahulog kon kita moduol Kaniya.
Nakasulay na ba kamo sa pagbarog ibabaw sa habog nga pangpang nga ang inyong mga tudlo sa tiil nagtungtong sa ngilit niini ug nagtalikod sa lawom kaayo nga bung-aw sa ubos? Sa pagkanaog sa pangpang gamit ang pisi, bisan kon ikaw segurado nga pagkahigot ngadto sa usa ka sistema sa lig-on nga mga pisi ug mga ekipo nga makahatod nimo nga luwas, ang pagbarog sa ngilit makapakulba kaayo. Ang paatras nga pag-ambak sa pangpang ug pagtabyog diha sa nipis nga hangin nagkinahanglan og pagsalig ngadto sa angkla nga gisiguro og higot ngadto sa dili matarog nga butang. Kini nagkinahanglan og pagsalig sa tawo kinsa mopugong sa pisi samtang kamo mopadulong sa ubos. Ug bisan tuod nga ang ekipo makahatag kaninyo og abilidad sa pagkontrol sa inyong pagdulhog, kamo kinahanglang adunay pagsalig nga ang inyong kauban dili motugot nga kamo mahulog.
Tataw nakong nahinumdoman nga nanaog sa pangpang gamit ang pisi uban sa usa ka grupo sa mga young women. Ako maoy nag-una sa grupo. Samtang mitikang ko paatras ngadto sa pangpang, nagsugod ko sa pagkahulog nga dili na makontrol. Salamat na lang, ang pisi nabunlot ug ang akong paspas ra kaayo nga pagdulhog nahunong. Samtang nagbitay ko sa tunga-tunga sa gansangon nga bato nga bungbong, hugot ako nga nag-ampo alang sa tawo o sa bisan unsa nga nagpugong kanako aron dili ko mahulog ngadto sa mga bato.
Pagkahuman, nahibaloan nako nga ang tornilyo sa angkla wala diay mataod og tarong, ug sa akong paglayat gikan sa ngilit, ang tawo nga naggunit sa akong higot nabunlot sa iyang likod ug nabira padulong ngadto sa ngilit sa pangpang. Sa wala mahibaloi nga paagi, nabangil niya ang iyang tiil sa ubang mga bato. Napwesto niana nga posisyon, nakahimo siya sa malisod nga pagpadulhog nako, pulipuli ang duha ka kamot, gamit ang pisi. Bisan wala ko makakita niya, nasayod ko nga naningkamot siya gamit ang tanan niyang kusog aron sa pagluwas kanako. Laing higala anaa didto sa ubos sa pangpang, andam nga mosalo nako kon ang pisi dili na makapugong. Sa dihang ako makab-ot na niya, iyang gigunitan ang akong gapos ug gipaubos ko ngadto sa yuta.
Uban ni Jesukristo nga mao ang atong angkla ug hingpit nga kauban, kita gipasaligan sa Iyang mahigugmaon nga kalig-on diha sa mga pagsulay ug sa kataposan nga pagkaluwas pinaagi Kaniya. Sama sa gitudlo ni Presidente M. Russell Ballard: “Ang hugot nga pagtuo ngadto sa Dios ug sa iyang Anak, si Ginoong Jesukristo, mao ang … angkla nga kinahanglang anaa sa atong kinabuhi aron hugot nga mohawid kanato atol sa mga panahon sa sosyal nga kasamok ug kadaotan. … Ang atong hugot nga pagtuo … kinahanglan nga isentro diha ni Jesukristo, sa iyang kinabuhi ug sa iyang pag-ula, ug sa pagpahiuli sa iyang ebanghelyo.”2
Ang espirituwal nga ekipo nga mopugong kanato gikan sa pagkadugmok ngadto sa mga bato sa kalisdanan mao ang atong pagpamatuod kang Jesukristo ug ang mga pakigsaad nga atong gihimo. Kita makasalig niini nga mga suporta aron mogiya ug modala kanato ngadto sa kahilwasan. Isip atong andam nga kauban, ang Manluluwas dili motugot kanato nga mahulog lapas sa Iyang kapasidad sa pagtabang. Bisan sa mga panahon sa atong mga pag-antos ug kaguol, anaa Siya aron mobayaw ug modasig. Ang Iyang gahom motabang kanato nga maayo gikan sa kasagarang makahugno nga epekto sa mga pagpili sa uban. Hinuon, ang matag usa kanato kinahanglan nga mosul-ob sa pangproteksiyon nga gapos ug segurohon nga ang mga higot segurado nga nagaid. Kita kinahanglang mopili nga maangkla ngadto sa Manluluwas, aron mabugkos ngadto Kaniya pinaagi sa atong mga pakigsaad.3
Unsaon nato sa pagpalig-on niana nga angkla? Mag-ampo kita uban sa mapaubsanon nga kasingkasing, magtuon ug mamalandong sa mga kasulatan, moambit sa sakramento nga adunay tinguha sa paghinulsol ug kaligdong, maningkamot sa pagsunod sa mga sugo, ug mosunod sa tambag sa propeta. Ug samtang atong tumanon ang atong inadlaw-adlaw nga mga gimbuhaton diha sa “mas halangdon ug mas balaanon”4 nga mga paagi, kita mahimong mas masuod ngadto sa Manluluwas ug, sa samang higayon, makatabang sa uban sa pagduol ngadto Kaniya.
Unsa man ang hulagway nianang “mas halangdon ug mas balaan” nga paagi? Kita maningkamot sa pagsunod sa ebanghelyo sa tanan nato nga mga pagpakig-uban. Kita moatiman niadtong nanginahanglan pinaagi sa tinuoray nga pagpangalagad, mopadayag sa atong gugma pinaagi sa simple nga serbisyo. Kita mopakigbahin sa maayong balita sa ebanghelyo niadtong kinsa nagkinahanglan og kalinaw ug kalig-on ug “wala masayod asa kini pangitaa.”5 Kita motrabaho aron sa paghiusa sa mga pamilya alang sa kahangtoran sa duha ka habig sa tabil. Ug alang niadtong kinsa nakahimo na og mga pakigsaad diha sa balay sa Ginoo, sigon sa gipasabot ni Presidente Russell M. Nelson, “ Ang matag hamtong nga patron sa templo mosul-ob sa sagradong garment sa pagkapari, [nga] … nagpahinumdom kanato …[nga] maglakaw sa dalan sa pakigsaad matag adlaw sa mas halangdon ug mas balaan nga paagi.”6 Kini nga mga aksiyon dili lang kay panagsa nga buhaton para sa atong kaugalingon apan gikinahanglan alang sa atong inadlaw nga kalipay—ug mahangtorong hingpit nga kalipay.
Walay laing mas importante sa atong mahangtoron nga pag-uswag kay sa pagtuman sa atong mga pakigsaad uban sa Dios. Kon ang atong mga pakigsaad sa templo mapatuman na, kita makasalig sa malipayon nga paghiusa sa atong mga minahal didto sa pikas nga habig sa tabil. Kanang anak o ginikanan o kapikas kinsa mibiya na sa mortalidad naglaom sa tibuok niya nga kasingkasing nga kamo magmatinud-anon sa mga pakigsaad nga mobugkos kaninyong tanan. Kon atong ibaliwala o dili kaayo hatagan og gibug-aton ang atong mga pakigsaad uban sa Dios, atong gibutang kanang mahangtoron nga mga higot diha sa peligro. Karon mao ang panahon sa paghinulsol, pag-ayo, ug pagsulay og usab.
Ang kalipay mabaw ra kon atong ibaylo ang mga panalangin sa mahangtorong hingpit nga kalipay ngadto sa daklit nga kasayon. Bisan pila ang atong edad, mao kana ang bug-os nga kamatuoran: ang yawe sa malungtaron nga kalipay mao ang pagpuyo sa ebanghelyo ni Jesukristo ug ang pagtuman sa mga pakigsaad. Ang atong propeta, si Presidente Nelson, mipamatuod nga ang “atong kinatas-ang seguridad ug ang atong bugtong malungtaron nga kalipay nagdepende sa paggunit sa gunitanan nga puthaw sa gipahiuli nga ebanghelyo ni Jesukristo, nga kompleto sa mga pakigsaad ug mga ordinansa niini. Kon kita mobuhat niini, kita luwas nga makalawig latas sa unoson nga katubigan tungod kay kita adunay koneksiyon ngadto sa gahom sa Dios.”7
Daghan kanato ang nagsinati og unoson nga katubigan. Samtang kita ibalibali sa mga balod sa kalisod ug usahay mabutahan sa bul-og sa mga luha nga miabot uban niana nga mga kalisod, kita tingali dili masayod kon asa nga direksiyon kita mobugsay sa atong bangka sa kinabuhi. Tingali dili kita makatuo nga kita adunay gahom nga makaabot sa baybayon. Ang paghinumdom kon si kinsa kamo—usa ka hinigugma nga anak sa Dios—nganong ania kamo sa kalibotan, ug ang inyong tumong nga mopuyo uban sa Dios ug sa inyong mga minahal makahayag sa inyong panglantaw ug motudlo kaninyo sa insakto nga direksiyon. Bisan diha sa taliwala sa unos, adunay hayag nga suga nga mopakita sa dalan. “Ako ang kahayag nga nagdan-ag sa kangitngit,” si Jesus mipahayag.8 Kita gipasaligan og kahilwasan kon kita motan-aw ngadto sa Iyang kahayag ug mopadayon sa integridad sa atong mga pakigsaad.
Usa kini ka pribilehiyo nga makighimamat sa kababayen-an sa tanang edad nga nagpuyo sa nagkalainlaing mga sirkumstansiya kinsa nagtuman sa ilang mga pakigsaad. Matag adlaw, sila nagtan-aw ngadto sa Ginoo ug sa Iyang propeta alang sa giya, kay sa ngadto sa sikat nga medya. Bisan pa sa indibidwal nila nga mga hagit ug sa makadaot nga mga pilosopiya sa kalibotan nga nagsulay sa pagpatipas kanila gikan sa pagtuman sa ilang mga pakigsaad, sila determinado nga magpabilin diha sa dalan sa pakigsaad. Sila nagsalig sa saad sa “tanan nga [anaa sa] Amahan.”9 Ug bisan pila ang inyong edad, ang matag usa kaninyong mga kababayen-an kinsa nakahimo og mga pakigsaad uban sa Dios adunay abilidad sa pagpadan-ag sa kahayag sa Ginoo ug sa pagdala sa uban ngadto Kaniya.10 Pinaagi sa inyong pagtuman sa mga pakigsaad, Siya mopanalangin kaninyo sa Iyang gahom sa pagkapari ug motugot kaninyo nga makabaton og makahuloganon nga impluwensiya sa tanan kinsa inyong ikauban. Sama sa gipahayag ni Presidente Nelson, kamo ang mga kababayen-an nga mopahinabo sa mga propesiya nga gipanagna!11
Minahal nga mga sister, labaw sa tanan, padayon diha sa dalan sa pakigsaad ngadto kang Jesukristo! Napanalanginan kita nga moanhi sa yuta sa panahon nga ang mga templo mikatap sa kalibotan. Ang paghimo ug pagtuman sa mga pakigsaad sa templo mahimong buhaton sa matag takos nga miyembro sa Simbahan. Mga young adult, dili kamo kinahanglang maghulat hangtod maminyo o makamisyon aron mohimo niana nga sagradong mga pakigsaad. Kamo makapangandam isip usa ka batan-ong babaye aron makadawat sa proteksiyon ug kalig-on nga mahatag sa mga pakigsaad sa templo human dayon sa edad nga 18 kon kamo andam na ug mobati og tinguha nga motahod niana nga mga pakigsaad sa templo.12 Kamo kinsa nakadawat na sa mga panalangin sa templo, ayaw tugoti ang mga tigbalda o mga pagbalda nga mobira kaninyo gikan sa mahangtorong mga kamatuoran. Pagtuon ug pangayo gikan sa kasaligan nga mga tinubdan alang sa mas dako nga salabotan sa sagrado nga kahulogan sa mga pakigsaad nga inyong gihimo. Adto sa templo kanunay kutob sa inyong mahimo ug paminaw sa Espiritu. Kamo mobati sa matam-is nga kasegurohan nga kamo anaa sa dalan sa Ginoo. Kamo makakaplag sa kaisog sa pagpadayon ingon man sa pagdala sa uban kuyog kaninyo.
Ako mopamatuod nga samtang kita mopili sa paghimo og mga pakigsaad ngadto sa Langitnong Amahan ug mogamit sa gahom sa Manluluwas aron motuman niini, kita mapanalanginan og dugang nga kalipay niini nga kinabuhi kay sa ato karong mahunahuna ug usa ka mahimayaon nga kinabuhing dayon nga moabot.13 Sa ngalan ni Jesukristo, amen.