Chelellakl er a chelsel a Sesel Eolt

Rodam me a rodos er ngak, kede ngeltengat er a chelechal sils el ulerenges er a remesiungel a Dios el milngedecheduch lomekduch a rengud. Dersta er kid, el ngara ngii dil ker, a medengei el kmo kede kiei er a chelsel a meringel el taem. Nglunguchek el kmo ng mo sebechek el ngosukemiu meng diak ko mesim sel omchau a ringel, e obang a budech el reng.¹

A basio el domuchel er ngii a mo melbedebek el kmo kid a mekreos el ngelekel a Dios e Ngii a ngarngii a remesiungel. Tirkel remesiungel a Dios a mla mesa ngarmedal taem el de kiei er ngii. A Apostol Paulus a miluches el mo er a Timothy el kmo, “Mutebengii tial tekoi el kmo, ng mo mekbedubech a ikel morngii a ringel er ngii sel bo lekeed a ulebongel er a beluulechad.”²

Ngii dil chad el ngarngii a mederir el omes a ikel duubech er a chelechang e ngarngii a dingerir el orrenges a tekingir a reprofet a medengei el kmo ng klemerang. A kot el klou el kengaol a merkid lokiu a klisichel a mekngit el lomeruul. E aikel klisiich a merael mo betok. Meng mocha kmal meringel, e diak el beot, sel dongull a telbiil el kired el meruul e oltirakl el kiei er a ebangkelio er a Jesus Kristo.

Tirkel kuk di bekikl el kirir me a tirkel betik er a rengud, ngarngii a urungelel er sel yaksok er a Dios el rirelii a basio er a selbechakl sel bo dechau a ringel er a chelsel tial klengar.

Tiakid a omsodel tial el basio. A rengar el profet a mle blechoel mesaod er ngii. Uai tial okesiu, el llechukl er a Babier er a Mormon, el mellomes e oubeltik el reng el chedam a milekoi er a rengelekel sechal el kmo te mekera e mo melisiich er tir el chelellakl er a chelsel a ringel: Chelechang, kemiu el rengelkek el sechal, molbedebek, molbedebek el kmo ngsel bedul a Osebeled, el ngii a Kristo, el Ngelekel a Dios, e kau kirem el meleketek er a uchetemem; mesel diablong a lodureklii a mesisiich el iolt, ma biskelngel ngara iolt, ma rokui el klisichel bedul kau, eng ngmo diak a klisichel el ngoikau el morsel klengit el reng, ele kau el dechor er sel bad, el ngii a uchetemel a Dios, a lsekum a chad a dechor er ngii eng diak el rebet.³

A klengit el reng me a diak a ulebengelel ringel el Heleman a milekoi el kirel a mekngit el omerellel a klengit a lsekum eng diak bo dungil el ouchel a rengud er kirel. A ringel el di merael mo klou a omengetikaik me a telmelel a Diablong. Chelechang eng sel taem el bai kmal klou a ultutelel sel dodengei el mo omekedechor a dai er kid ultuil er a Rubak. A denguu er ngak, eng diak a ungil basio el debetik er ngii ngbai sel mle ulebongel el osisecheklel a King Benjamin, el dirrek el llechukl er a chelsel a Babier er a Mormon.

A tekingel a ulochel a King Benjamin a sebechel meruul el merkid er a chelechal taem. Eleng okiu a omeruul blolchau e ngii a mle medengei a dektel a mekemad. Ngii a milsebechakl er a rechedal sera le temel a mekemad, el mle ultuil er a klisichel a Dios. Ngii a mle ungil mesang a ikel mekngit el klisichel a Diablong el mo mengetikaik, e melasm el mo mesisiich, e meruul er a rengelekel a Dios el mo moualech a rengrir.

Ngii a ulengit er a rechedal me a kid el mo ultuil er ngkel di chimong el mo sobecheklid, el ngii a Osobel. Ngii a milketeklii el kmo kid a mimokl el mo melilt er a ungil me a mekngit eng di ngdiak el sebeched el chemiis a kekka er a ikel dulilt. Ngdi mle bleketakl el melekoi eleng medengei a klengit el reng a mo er tirkel dimlak el lorrenges e oltirakl a tekingel.

Tiakid sel teletelel er a losaod a kekka el okiuelel aikel dolilt el oltirakl er a odbechel a Chedaol Reng malechub oltirakl er a mekngit el klemechel a Diablong, el moktek er ngii a mo mengetikaik e melemall er kid:

“Morrenges, ng morngii a dellebeakl el mo er ngikei el mo oltirakl er ngikel [mekngit] el chelid; le lesekum eng moltirakl er ngii, e medei el dirke chelsechusem er a kngtil, eng diua le ngilmii omkodall el mo er a delbengel; meng mo nguu a blingelel diak a ulebengelel kelebus, leng mlo omtok er a klaodengei er ngii e tomellii a llechul a Dios. …

“Me a lsekum ngikel chad a diak bol mengkit a rengul er a kngtil, meng di cherreuel a Dios e mo er a kodall, e sel klisiichel a lemeltel a Dios a mo okisii a delbengel e ochotii a klungel a uluchulel me a berredel a rokui el kentil, meng di mo merat er medal a Dios, e mo mui a rengul er a klengit el reng, me a ringel me a dmolech el dakt el di uaia ngau el diak el mad a ngeuil, el di kmard el mo cherechar.”

A King Benjamin a milemolem el milekoi, “O, kemiu el meklou el chad, me kemiu el mekekeri el chad, me kemiu el mekekerei el ngalek el sebechiu el mo medengei a tekingek, le cheldechedechak a bleketakl meng sebechiu el mo medengei, ak meluluuch me bol sebechiu el mo medengei e bom letkii a teletael le borngii tirkel mla ruebet er a klengit.”⁴

A denguu er ngak, e sel klisichel a omellach el mo ouchel a rulak el mo omdasu er sel taem el bo de dechor e mo mukerkeriil er a medal a Osobel er a uriul er tial klengar. Ng soad el mo klou a rengud e diak bo dechiis e bai omes er a Medal, e Mesang el klikmechur, e Morongesii el kmul uasei, “Ngungil a urerem, kau el ungil e blak a rengum el mesiou: … bem [tuu].”⁵

A King Benjamin a milketeklii el mekerang a bol narngii a urunguled el mo orrenges a ikel tekoi a lsekum e kid a mo metik er a rael er tial klengar el mo mengodech a teleteled lokiu a Tngakireng er a Jesus Kristo. Tiakid a di chimong el rolel e kid a toketekii a mesisiich el dodai e melemolem el mesisiich a lengarngii a omengetikaik me a ringel el merael mei. A King Bejamin a ouchais er a omengodech el ngara teleteled loba olechotel a olisechakl el ngii a blechoel rutechii a renguk. Tiang a ulusbech er ngii a reprofet el mlo tal telael el rak me a dirrek el Rubak. Ng tiakid: ng kired el mo uai a ngalek—a remekekerei el ngalek.

A kuk rebebil, a diak el beot er tir a kongei er tiang. Ng betok er kid a sorir el mo mesisiich. Kede omdasu sel deuai a ngalek e kede mechitechut. A betok el roungalek a mad el tmuil er sel sils el rengelekir a diak el sal uai a teletelel a kekerei el ngalek. Engdi a King Benjamin, a mle ungil medengei el di uai a chad el kmo ngera belkul sel omchad el mesisiich e bekeu, a milketeklii el kmo sel bo muai a ngalek a diak el belkul a mo teletelel a kekerei el ngalek. Ngbai mo uai a Osobel, el miluluuch el mo er a Demal mebol ngarngii a klisichel el mo remuul a urerel a Demal e melngakireng a kengtil a rokui rengelekel a Demal meng mlo rullii. A teleteled a kirel mo mengodech el mo uai a ngalek el mo ngmai a klisiich mebol sebeched el mesisiich el dechor e ngara budech sel ngarngii a ringel.

Tiakid a King Benjamin a ouchais er sel omengodech el mo er ngii: “Ele a di klechad er a tech a cheraro el mo er a Dios, el di mla uaisei er a rebetel a Adam el mei, me a mormedad el diak a ulebengelel, ng di merekmo bo loltirakl er a okedongel Edaol Reng, e bol becherei adi klechad el bol santo lokiu a tngakireng er a Kristo el Rubak, e mo uaia ngalk el bekongesenges, e medemdemk, e ngariou e klou a rengul, e mui er a beltik el reng, el di ungil er a rengul a rokui el tekoi el Rubak a omsang el di uaia ngalk el lorrenges er a demal.”⁶

Kid a nguu tial omengodech sel doruul e domekbeches a telbiil lobengkel a Dios. Tiang a uchul a klisichel a Tngakireng er a Dios a mo sebechel ngodechii a chelsel a rengud. Ng sebeched lomelchesiu er ngii er a bek el taem sel dolai er a sakrament, e meruul a chedaol ruoll el kirir tirkel ucheled el ml a mad, e ouchais el sioning er a Osobel, malechub eke domekereu er a tara chad lousbech a ngesou el roltirakl er a Kristo.

Chelsel a ikel omeruul, ea cherengel a taem e kede mo uai a ngalek el mo sebeched el oubeltik el reng e oltirakl. Kid a mo dechor er sel mesisiich e diak el mesim el dai. A klaumerang er kid er a Jesus Kristo a rulid el mo ouchel a rengud e mo oltirakl a Llechul. Kede mo oltirakl, e morngii a klisiched lodngakl a omengetikaik, e mo nguu sel yaksok el Chedaol Reng a mo keldemed.

A teleteled a mengedoch el mo uai a kekerei el ngalek, el bekongesenges el mo er a Dios e mui er a beltik el reng. Tial omengodech a rullid meng sebeched el mo outkeu a ikel sengk el morngii lokiu a Chedaol Reng. Sel dobang a keldemel a Chedaol Reng eng mo mengeload, omekrael, e melisiich er kid.

Ak mla modengei a bebil a belkul a tekoi sera King Benjamin a milekoi el kmo ng sebeched el mo uaia kekerei el ngalek er a medal a Dios. Ngarngii a bla ksuub er a teletael el blok chau el kmo a Chedaol Reng a blechoel mengedecheduch el lobang a kekerei el ngor, el beot a omrengesii sel rengul a chad a medemdemk e bekongesenges, el uai a ngalek. Ng merang, ea nglunguuch el oureor a uasei “Ng di soak a ikel Ngii a soam. Di mouchais er ngak el kmo ngerang klel. E ak mo rulii.”

Sel lemei a ringel er a chelsela klengar, eng sebechiu el mo chelellakl eleng mesisiich a dodai er kemiu el ngara klaumerang er a Jesus Kristo. Seikid el klaumerang a mo omekrael er kemiu el mo ouchel a rengmiu er a bek el sils e mo melemolem el meruul a telbiil. Me kemiu a mo blechoel el melatk er Ngii. Mesel soiseb er a ringel er a klengit el reng me a klechitechut, e kemiu a omelchesuar el chelellakl e ngarngii a urunguliu.

E a ngaruchei, e kom bai metik er kemiu el mo olngeseu el melisiich a klaumerang er a rebebil. A klaumerang el ngara Jesus Kristo a blechoel mo oureng e omelchesiu a bliochel el beltik el reng el mora rebebil, el ngii a klemerang el beltkil a rengul a Kristo.

Ak mengull el sioning el kmo a Rubak el Jesus Kristo a mla meskemiu a ongit el kmo “Mer ngak.”⁷ Ng olengit er kemiu, eleng uchul a beltik el reng el mo er kemiu me a rebetik er a rengmiu, el mor Ngii kirel a budech er a chelsel tial klengar me a diak a ulebengelel klengar er sel beluulechad el mei. Ng kmal ungil medengelii a ringel el kemiu a mo chemau er tia skeng el telengtengil a klou el luldasu el kirel a deu el reng.

Ak kulengit er kemiu me mkengei er tial ongtil a Osobel. El uai a medemdemk e oubeltik el reng el ngalek, em kengei er a Ngelsuil. Moruul e moltirakl a telbiil el Ngii a odars el mo er a Ikelesia er a Jesus Kristo er a Uriul-klebesei el Santo. Ng mo melisiich er kemiu. A Osobel a medengei a sesel iolt me a basio er a selbechakl el ngarsel rael el mo er Ngii me a Demad er a Beluades. Ngii a medengelii a rael. Ngii a Rael. Aika kuuchais el ngara chedaol ngklel a Jesus Kristo, amen.