រីករាយជារៀងរហូត
សេចក្តីពិត អំណរយូរអង្វែង និងភាពអស់កល្បជានិច្ចជាមួយនឹងអស់អ្នកដែលយើងស្រឡាញ់ គឺជាចំណុចដ៏សំខាន់នៃផែនការសុភមង្គលរបស់ព្រះ ។
មិត្តសម្លាញ់ និងបងប្អូនប្រុសស្រីជាទីស្រឡាញ់ តើបងប្អូនចាំពីការជឿ ឬការចង់ជឿលើភាពរីករាយជារៀងរហូតតទៅដែរឬទេ ?
ហើយក្រោយមកស្រាប់តែជីវិតជាក់ស្ដែងជួបរឿងរ៉ាវផ្សេងៗ ។ យើង « បានធំដឹងក្ដី » ។ ទំនាក់ទំនងនានាកាន់តែមានភាពស្មុគស្មាញ ។ ពិភពលោកនេះមានសភាពកងរំពង អ៊ូអរ មានមហិច្ឆតា មានពុត និងក្លែងបន្លំ ។ ប៉ុន្តែនៅក្នុង « ជម្រៅដួងចិត្ត » របស់យើង១ នោះយើងជឿ ឬចង់ជឿថា ភាពរីករាយជារៀងរហូតគឺជាការពិត និងអាចធ្វើបានតាមមធ្យោបាយណាមួយនៅកន្លែងណាមួយ ។
« រីករាយជារៀងរហូត » មិនមែនជារឿងស្រមើស្រមៃដែលមានតែនៅក្នុងរឿងនិទាននោះទេ ។ សេចក្តីពិត អំណរយូរអង្វែង និងភាពអស់កល្បជានិច្ចជាមួយនឹងអស់អ្នកដែលយើងស្រឡាញ់ គឺជាចំណុចដ៏សំខាន់នៃផែនការនៃសុភមង្គលរបស់ព្រះ ។ មាគ៌ាដែលបានរៀបចំដោយក្ដីស្រឡាញ់របស់ទ្រង់ អាចធ្វើឲ្យដំណើរដ៏អស់កល្បជានិច្ចរបស់យើង រីករាយជារៀងរហូតបាន ។
យើងមានអ្វីៗជាច្រើនដែលត្រូវសាទរ ហើយមានអំណរគុណ ។ ប៉ុន្តែ គ្មានពួកយើងណាម្នាក់ ហើយក៏គ្មានគ្រួសារណាមួយល្អឥតខ្ចោះនោះដែរ ។ ទំនាក់ទំនងរបស់យើងរួមមានសេចក្តីស្រឡាញ់ ទំនាក់ទំនងសង្គម និងបុគ្គលិកលក្ខណៈ ប៉ុន្ដែជាញឹកញាប់យើងក៏មានភាពរកាំរកូស និងការឈឺចាប់ផងដែរ ហើយជួនកាលឈឺចាប់ខ្លាំងទៀតផង ។
« ព្រោះដូចជាគ្រប់មនុស្សទាំងអស់បានត្រូវស្លាប់ ក្នុងលោកអ័ដាមជាយ៉ាងណា នោះគ្រប់គ្នាក៏នឹងបានប្រោសឲ្យរស់ ក្នុងព្រះគ្រីស្ទយ៉ាងនោះដែរ » ។២ ប្រោសឲ្យរស់ក្នុងព្រះយេស៊ូវគ្រីស្ទ រួមមានអមតភាព—អំណោយទាននៃការរស់ឡើងវិញខាងរូបកាយរបស់យើង ។ នៅពេលយើងរស់នៅដោយមានសេចក្ដីជំនឿ និងការគោរពប្រតិបត្តិ នោះការប្រោសឲ្យរស់ក្នុងព្រះគ្រីស្ទ ក៏អាចរួមបញ្ចូលនូវជីវិតអស់កល្បជានិច្ចដែលពោរពេញដោយអំណរដ៏លើសលប់ជាមួយព្រះ និងជាមួយមនុស្សដែលយើងស្រឡាញ់ផងដែរ ។
តាមរបៀបមួយដ៏អស្ចារ្យ ព្យាការីរបស់ព្រះអម្ចាស់កំពុងទាញយើងឲ្យខិតទៅកាន់តែជិតព្រះអង្គសង្រ្គោះរបស់យើង រួមមាន តាមរយៈពិធីបរិសុទ្ធ និងសេចក្ដីសញ្ញាដ៏ពិសិដ្ឋនៃព្រះវិហារបរិសុទ្ធ ដែលកំពុងមកកាន់តែជិតយើង នៅកន្លែងកាន់តែច្រើនឡើង ។ យើងមានឱកាស និងអំណោយទានដ៏ធំធេងមួយ ដើម្បីរកឃើញការយល់ដឹងខាងវិញ្ញាណថ្មី សេចក្ដីស្រឡាញ់ ការប្រែចិត្ត និងការអភ័យទោសឲ្យគ្នាទៅវិញទៅមក និងក្រុមគ្រួសាររបស់យើង ក្នុងពេលនេះ និងក្នុងភាពអស់កល្បជានិច្ច ។
ដោយមានការអនុញ្ញាត ខ្ញុំសូមចែកចាយបទពិសោធន៍ដ៏ពិសិដ្ឋចំនួនពីរ ជាបទពិសោធន៍ផ្ទាល់ខ្លួនខាងវិញ្ញាណដ៏អស្ចារ្យ ដែលបានតំណាលប្រាប់ដោយមិត្តភក្តិខ្ញុំ អំពីការដែលព្រះយេស៊ូវគ្រីស្ទបានបង្រួបបង្រួមក្រុមគ្រួសារ តាមរយៈការព្យាបាលជម្លោះដែលកើតឡើងឆ្លងជំនាន់ ។៣ ដង្វាយធួនរបស់ព្រះយេស៊ូវគ្រីស្ទអាចជួយយើងឲ្យមានភាពសុខសាន្តសម្រាប់អតីតកាលរបស់យើង និងសេចក្តីសង្ឃឹមសម្រាប់ពេលអនាគតរបស់យើងក្នុងពេល « ដ៏និរន្តរ៍ និងអស់កល្បជានិច្ច »៤ ដែល « ខ្លាំងជាងចំណងនៃសេចក្ដីស្លាប់ »៥ ទៅទៀត ។
នៅពេលពួកគេបានចូលជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មិត្តរបស់ខ្ញុំ និងស្វាមីរបស់នាងបានរៀនដោយអំណរថា ទំនាក់ទំនងគ្រួសារមិន « ចប់ត្រឹមពេលស្លាប់ » នោះទេ ។ នៅក្នុងដំណាក់របស់ព្រះអម្ចាស់ នោះក្រុមគ្រួសារអាច ( បានផ្សារភ្ជាប់ ហើយ ) រួមរស់នឹងគ្នាអស់កល្បជានិច្ច ។
ប៉ុន្តែមិត្តរបស់ខ្ញុំមិនចង់ផ្សារភ្ជាប់ជាមួយឪពុករបស់នាងទេ ។ នាងនិយាយថា « គាត់មិនមែនជាស្វាមីល្អចំពោះម្តាយខ្ញុំទេ ។ គាត់មិនមែនជាឪពុកល្អសម្រាប់កូនៗរបស់គាត់ទេ ។ ឪពុកខ្ញុំត្រូវរង់ចាំសិន ។ ខ្ញុំគ្មានបំណងចង់ធ្វើកិច្ចការព្រះវិហារបរិសុទ្ធរបស់គាត់ ហើយគ្មានបំណងផ្សារភ្ជាប់ជាមួយគាត់សម្រាប់ភាពអស់កល្បនោះទេ » ។
អស់រយៈពេលមួយឆ្នាំ នាងបានតមអាហារ អធិស្ឋាន បានទូលសួរព្រះអម្ចាស់អំពីឪពុករបស់នាងយ៉ាងខ្លាំង ។ ទីបំផុត នាងបានត្រៀមខ្លួនរួចរាល់ ។ កិច្ចការព្រះវិហារបរិសុទ្ធរបស់ឪពុកនាងត្រូវបានបញ្ចប់ ។ ក្រោយមក នាងបាននិយាយថា « ពេលខ្ញុំដេក ខ្ញុំសុបិនឃើញឪពុករបស់ខ្ញុំស្លៀកពាក់ស ។ គាត់បានផ្លាស់ប្តូរ ។ គាតបាននិយាយថា « មើល មកប៉ានេ » ។ ប៉ាបានស្អាតអស់ហើយ ។ អរគុណកូនដែលបានធ្វើកិច្ចការសម្រាប់ប៉ា នៅក្នុងព្រះវិហារបរិសុទ្ធ › » ។ ឪពុករបស់នាងបានបន្ថែមថា « ចូរក្រោកឡើង ហើយត្រឡប់ទៅព្រះវិហារបរិសុទ្ធវិញ បងប្រុសរបស់ឯងកំពុងរង់ចាំទទួលបុណ្យជ្រមុជទឹកដែរ » ។
មិត្តរបស់ខ្ញុំនិយាយថា « ជីដូនជីតារបស់ខ្ញុំ និងអ្នកដែលបានចែកឋានទៅ កំពុងរង់ចាំយ៉ាងអន្ទះសាឲ្យកិច្ចការរបស់ពួកគាត់បានធ្វើរួចរាល់ » ។
នាងនិយាយថា « សម្រាប់ខ្ញុំ ព្រះវិហារបរិសុទ្ធគឺជាកន្លែងមួយនៃការព្យាបាល ការរៀនសូត្រ និងទទួលស្គាល់នូវដង្វាយធួនរបស់ព្រះយេស៊ូវគ្រីស្ទ » ។
បទពិសោធន៍ទីពីរ ។ មិត្តម្នាក់ទៀតបានស្រាវជ្រាវពង្សប្រវត្តិគ្រួសាររបស់គាត់យ៉ាងឧស្សាហ៍ព្យាយាម ។ គាត់ចង់ស្គាល់តាទួតរបស់គាត់ ។
នាព្រឹកព្រលឹមមួយ មិត្តរបស់ខ្ញុំបាននិយាយថា គាត់មានអារម្មណ៍ថា មានវត្តមាននៃវិញ្ញាណបុរសម្នាក់នៅក្នុងបន្ទប់របស់គាត់ ។ បុរសនោះចង់ឲ្យគ្រួសាររបស់គាត់រកគាត់ឲ្យឃើញ និងស្គាល់គាត់ ។ បុរសនោះមានអារម្មណ៍សោកស្តាយចំពោះកំហុសមួយ ដែលឥឡូវនេះគាត់បានប្រែចិត្តហើយ ។ វិញ្ញាណបុរសនោះបានជួយមិត្តរបស់ខ្ញុំឲ្យដឹងថា បុគ្គលម្នាក់ដែលមិត្តរបស់ខ្ញុំគិតថា ជាតាទួតរបស់ខ្លួននោះ គ្មានទំនាក់ទំនង ឌីអិនអេ អ្វីជាមួយមិត្តខ្ញុំឡើយ ។ មិត្តរបស់ខ្ញុំបាននិយាយថា « បើនិយាយទៅ ខ្ញុំបានរកឃើញតាទួតរបស់ខ្ញុំហើយ តែខ្ញុំបានដឹងថា គាត់មិនមែនជាតាទួតខ្ញុំ ដូចដែលកំណត់ត្រាគ្រួសាររបស់យើងបានប្រាប់មកនោះទេ » ។
ទំនាក់ទំនងគ្រួសាររបស់គាត់ត្រូវបានបញ្ជាក់ច្បាស់ ហើយមិត្តរបស់ខ្ញុំបាននិយាយថា « ខ្ញុំមានអារម្មណ៍ថា មានសេរីភាព មានភាពសុខសាន្ត ។ វាខុសគ្នាខ្លាំងណាស់ ពេលខ្ញុំស្គាល់ក្រុមគ្រួសារពិតប្រាកដរបស់ខ្ញុំ » ។ មិត្តភក្តិរបស់ខ្ញុំសញ្ជឹងគិតថា « មនុស្សម្នាក់ក្នុងគ្រួសារធ្វើអ្វីមួយខុស មិនមែនមានន័យថា គ្រួសារទាំងមូលអាក្រក់នោះទេ ។ យើងកើតមកក្នុងស្ថានភាពគ្រួសារបែបណា វាមិនសូវសំខាន់ទេ ដែលសំខាន់នោះគឺ ស្នាដៃដែលយើងបានបន្សល់ទុកពេលយើងលាចាកលោកនេះទៅវិញទេ » ។
ព្រះគម្ពីរដ៏បរិសុទ្ធ និងបទពិសោធន៍ដ៏ពិសិដ្ឋនៃការព្យាបាល និងភាពសុខសាន្តផ្ទាល់ខ្លួន រួមជាមួយអស់អ្នកដែលរស់នៅក្នុងពិភពវិញ្ញាណ គូសបញ្ជាក់គោលការណ៍ខាងគោលលទ្ធិចំនួនប្រាំ ។
ទីមួយ ៖ ចំណុចសំខាន់ក្នុងផែនការនៃសេចក្តីប្រោសលោះ និងសុភមង្គលរបស់ព្រះ គឺថាតាមរយៈដង្វាយធួនរបស់ទ្រង់ ព្រះយេស៊ូវគ្រីស្ទសន្យាថានឹងរួបរួមវិញ្ញាណ និងរាងកាយរបស់យើងវិញ « ដោយមិនបែកបាក់ទៀតឡើយ ប្រយោជន៍ឲ្យពួកគេអាចបានទទួលភាពពោរពេញនៃសេចក្ដីអំណរ » ។៦
ទីពីរ ៖ ដង្វាយធួន—ការក្លាយជាតែមួយក្នុងព្រះគ្រីស្ទ—កើតឡើងនៅពេលយើងអនុវត្តសេចក្តីជំនឿ ហើយបង្កើតផលចំពោះការប្រែចិត្ដ ។៧ វាតម្រូវឲ្យមានការអនុវត្តសេចក្ដីជំនឿ និងការប្រែចិត្តទាំងក្នុងជីវិតរមែងស្លាប់ និងក្នុងអមតភាព ។ ពិធីបរិសុទ្ធនៃព្រះវិហារបរិសុទ្ធតែឯងមិនបានផ្លាស់ប្ដូរយើង ឬអស់អ្នកដែលនៅក្នុងពិភពវិញ្ញាណនោះទេ ។ ប៉ុន្តែពិធីបរិសុទ្ធដ៏ទេវភាពទាំងនេះ អាចធ្វើឲ្យសេចក្ដីសញ្ញានានាជាមួយព្រះអម្ចាស់បានបរិសុទ្ធ ដែលអាចនាំមកនូវភាពសុខដុមជាមួយទ្រង់ និងរវាងគ្នាទៅវិញទៅមក ។
អំណររបស់យើងបានពោរលេញ នៅពេលយើងទទួលអារម្មណ៍នៃព្រះគុណ និងការអភ័យទោសរបស់ព្រះយេស៊ូវគ្រីស្ទចំពោះយើង ។ ហើយនៅពេលយើងផ្តល់អព្ភូតហេតុនៃព្រះគុណ និងការអភ័យទោសរបស់ទ្រង់ ឲ្យគ្នាទៅវិញទៅមក នោះសេចក្ដីមេត្តាករុណាដែលយើងទទួល និងសេចក្ដីមេត្តាករុណាដែលយើងផ្តល់ អាចជួយធ្វើឲ្យភាពអយុត្តិធម៌ក្នុងជីវិតមានភាពយុត្តិធម៌ឡើងវិញ ។៨
ទីបី ៖ ព្រះទ្រង់ស្គាល់ និងស្រឡាញ់យើងយ៉ាងឥតខ្ចោះ ។ « ព្រះមិនត្រូវបានចំអកទេ »៩ ហើយទ្រង់ក៏មិនអាចបោកបញ្ឆោតបានដែរ ។ ដោយមានសេចក្តីមេត្តាករុណា និងភាពយុត្តិធម៌ដ៏ល្អឥតខ្ចោះ នោះទ្រង់បានឱបក្រសោបអ្នកដែលបន្ទាបខ្លួន និងអ្នកដែលប្រែចិត្តដោយព្រះហស្តដ៏សុវត្ថិភាពរបស់ទ្រង់ ។
នៅក្នុងព្រះវិហារបរិសុទ្ធ ខឺតឡង់ ព្យាការី យ៉ូសែប ស្ម៊ីធ បានឃើញ អាលវិន ជាបងប្រុសលោកនៅក្នុងនគរសេឡេស្ទាល នៅក្នុងការនិមិត្ត ។ ព្យាការី យ៉ូសែប មានការភ្ញាក់ផ្អើលណាស់ ដោយសារ អាលវិន បានស្លាប់មុនពេលទទួលបានពិធីបរិសុទ្ធដ៏សង្គ្រោះនៃពិធីបុណ្យជ្រមុជទឹក ។១០ ព្រះអម្ចាស់បានពន្យល់ពីមូលហេតុនេះដោយការលួងលោម ៖ ព្រះអម្ចាស់ « នឹងជំនុំជម្រះ [ ពួកយើង ] ស្របតាមកិច្ចការ [ របស់ពួកយើង ] គឺស្របតាមសេចក្ដីប៉ងប្រាថ្នានៃដួងចិត្ត [ របស់ពួកយើង ] » ។១១ ព្រលឹងរបស់យើងថ្លែងទីបន្ទាល់អំពីកិច្ចការ និងបំណងប្រាថ្នារបស់យើង ។
ដោយអំណរគុណ យើងដឹងថា អ្នកនៅរស់ និង « ពួកអ្នកស្លាប់ណាដែលប្រែចិត្ត នោះនឹងបានប្រោសលោះ តាមរយៈការគោរពតាមពិធីទាំងឡាយនៃដំណាក់របស់ព្រះ »១២ និងដង្វាយធួនរបស់ព្រះគ្រីស្ទ ។ នៅក្នុងភពវិញ្ញាណ សូម្បីតែអ្នកដែលមានអំពើបាប និងអ្នកដែលបានរំលង ក៏មានឱកាសប្រែចិត្តដែរ ។១៣
ផ្ទុយទៅវិញ អ្នកដែលជ្រើសរើសអំពើទុច្ចរិតដោយចេតនា អ្នកដែលពន្យារពេលក្នុងការប្រែចិត្តដោយចេតនា ឬអ្នកដែលបានគិតទុកជាមុន ឬគិតដោយចេតនាពីរបៀបបំពានព្រះបញ្ញត្តិ ដោយគ្រោងនឹងប្រែចិត្តយ៉ាងងាយ នឹងត្រូវជំនុំជម្រះពីព្រះ ហើយ « នឹកឃើញឡើងវិញយ៉ាងជាក់ច្បាស់នូវអស់ទាំងទោសកំហុស [ របស់ពួកគេ ] » ។១៤ យើងមិនអាចគិតដោយចេតនាដើម្បីធ្វើអំពើបាបនៅថ្ងៃសៅរ៍ បន្ទាប់មករំពឹងថា នឹងបានការអភ័យទោសដោយស្វ័យប្រវត្តិ តាមរយៈការទទួលទានសាក្រាម៉ង់នៅថ្ងៃអាទិត្យនោះទេ ។ ចំពោះអ្នកផ្សព្វផ្សាយសាសនា ឬអ្នកដទៃទៀតដែលនិយាយថា ការធ្វើតាមព្រះវិញ្ញាណមានន័យថា មិនត្រូវគោរពតាមបទដ្ឋានបេសកកម្ម ឬព្រះបញ្ញត្តិនោះ សូមចាំថា ការគោរពតាមបទដ្ឋានបេសកកម្ម និងព្រះបញ្ញត្តិទាំងឡាយយាងអញ្ជើញឲ្យមានព្រះវិញ្ញាណ ។ យើងទាំងអស់គ្នាមិនគួរពន្យារពេលប្រែចិត្តឡើយ ។ ពរជ័យនៃការប្រែចិត្តចាប់ផ្ដើម នៅពេលយើងចាប់ផ្ដើមប្រែចិត្ត ។
ទីបួន ៖ ព្រះអម្ចាស់ប្រទានឱកាសដ៏ទេវភាពឲ្យយើងក្លាយកាន់តែដូចជាទ្រង់ នៅពេលយើងផ្តល់ពិធីបរិសុទ្ធនៃព្រះវិហារបរិសុទ្ធដ៏សង្គ្រោះជំនួសដល់អ្នកដទៃដែលត្រូវការ ប៉ុន្តែមិនអាចធ្វើពិធីនោះដោយខ្លួនឯងបាន ។ យើងប្រែកាន់តែមានភាពពេញលេញ និងល្អឥតខ្ចោះ១៥នៅពេលយើងក្លាយជា « ពួកអ្នកដែលបានសង្គ្រោះ … ឡើងមកឯភ្នំស៊ីយ៉ូន » ។១៦ ពេលយើងបម្រើអ្នកដទៃ នោះព្រះវិញ្ញាណបរិសុទ្ធនៃការសន្យាអាចបញ្ជាក់ពីពិធីបរិសុទ្ធ និងញែកទាំងអ្នកផ្តល់ឲ្យ និងអ្នកទទួលឲ្យបានជាបរិសុទ្ធ ។ ទាំងអ្នកផ្តល់ឲ្យ និងអ្នកទទួលអាចចុះ និងធ្វើឲ្យសេចក្ដីសញ្ញានៃការផ្លាស់ប្តូរកាន់តែស៊ីជម្រៅបាន ហើយយូរៗទៅទទួលបានពរជ័យដែលបានសន្យានឹង អ័ប្រាហាំ អ៊ីសាក និង យ៉ាកុប ។
ចុងក្រោយគេ គឺទីប្រាំ ៖ ដូចជាច្បាប់មាស១៧ បង្រៀន ភាពស៊ីមេទ្រីគ្នាដ៏បរិសុទ្ធរវាងការប្រែចិត្ត និងការអភ័យទោសអញ្ជើញពួកយើងម្នាក់ៗឲ្យផ្ដល់ដល់អ្នកដទៃនូវអ្វីដែលខ្លួនយើងផ្ទាល់ត្រូវការ និងប្រាថ្នាចង់បានដែរ ។
ពេលខ្លះឆន្ទៈរបស់យើងដើម្បីអភ័យទោសឲ្យបុគ្គលម្នាក់ អាចធ្វើឲ្យពួកគេផង និងខ្លួនយើងផងជឿថា យើងអាចប្រែចិត្ត ហើយត្រូវបានអភ័យទោសឲ្យបាន ។ ពេលខ្លះឆន្ទៈក្នុងការប្រែចិត្ត និងសមត្ថភាពដើម្បីអភ័យទោសបានកើតឡើង នៅពេលផ្សេងៗគ្នា ។ ព្រះអង្គសង្គ្រោះរបស់យើងជាអង្គសង្រួបសង្រួមរបស់យើងជាមួយនឹងព្រះ ប៉ុន្ដែទ្រង់ក៏ជួយយើងឲ្យស្គាល់ខ្លួនឯង និងពង្រឹងទំនាក់ទំនងយើងជាមួយអ្នកដទៃ ពេលយើងមកទ្រង់ផងដែរ ។ ជាពិសេស ពេលការឈឺចាប់ និងទុក្ខព្រួយមានភាពខ្លាំងក្លា នោះការផ្សះផ្សាទំនាក់ទំនង និងការព្យាបាលដួងចិត្តរបស់យើងមានការលំបាកណាស់ ហើយប្រហែលជាមិនអាចទ្រាំទ្របានដោយខ្លួនឯងទៀតផង ។ ប៉ុន្តែស្ថានសួគ៌អាចផ្ដល់កម្លាំង និងប្រាជ្ញាដល់យើង លើសពីសមត្ថភាពរបស់យើងផ្ទាល់ ដើម្បីដឹងពីពេលដែលត្រូវស៊ូទ្រាំ និងរបៀបដើម្បីឈប់ខ្វល់នឹងបញ្ហាទាំងនោះ ។
យើងមិនសូវឯកោទេ ពេលយើងដឹងថា យើងមិននៅតែឯងនោះ ។ ព្រះអង្គសង្រ្គោះរបស់យើងទ្រង់ឈ្វេងយល់ជានិច្ច ។១៨ ដោយមានជំនួយពីព្រះអង្គសង្រ្គោះ នោះយើងអាចលះបង់អំនួត ការឈឺចាប់ និងអំពើបាបរបស់យើងថ្វាយទៅព្រះបាន ។ មិនថាយើងអាចមានអារម្មណ៍បែបណាពេលយើងចាប់ផ្តើមនោះទេ យើងនឹងកាន់តែបានជាសះស្បើយ នៅពេលយើងទុកចិត្តលើទ្រង់ ដើម្បីព្យាបាលទំនាក់ទំនងរបស់យើង ។
ព្រះអម្ចាស់ដែលទតឃើញ ហើយឈ្វេងយល់យ៉ាងល្អឥតខ្ចោះ អត់ទោសដល់អ្នកណាដែលទ្រង់នឹងអត់ទោសឲ្យ តែយើង ( ជាជនមិនល្អឥតខ្ចោះ ) នោះត្រូវអភ័យទោសឲ្យមនុស្សទាំងអស់ ។ ពេលយើងមករកព្រះអង្គសង្រ្គោះនៃយើង នោះយើងមិនសូវផ្តោតទៅលើខ្លួនយើងទេ ។ យើងវិនិច្ឆ័យតិច ហើយអភ័យទោសច្រើន ។ ការទុកចិត្តលើគុណបុណ្យ សេចក្តីមេត្តាករុណា និងព្រះគុណរបស់ទ្រង់១៩ អាចរំដោះយើងចេញពីជម្លោះ កំហឹង ការបំពាន ការបោះបង់ចោល ភាពអយុត្តិធម៌ និងឧបសគ្គផ្លូវកាយ និងផ្លូវចិត្ត ដែលជួនកាលកើតឡើងជាមួយនឹងរូបរាងកាយ នៅក្នុងពិភពនៃជីវិតរមែងស្លាប់នេះ ។ រីករាយជារៀងរហូតមិនមានន័យថា គ្រប់ទំនាក់ទំនងនឹងរីករាយជារៀងរហូតនោះទេ ។ ប៉ុន្តែមួយពាន់ឆ្នាំនៃសហស្សវត្សរ៍ ពេលដែលសាតាំងត្រូវបានចង២០អាចផ្ដល់ឲ្យយើងនូវពេលវេលាចាំបាច់ និងរបៀបដ៏គួរឲ្យភ្ញាក់ផ្អើល ដើម្បីស្រឡាញ់ យល់ និងដោះស្រាយបញ្ហានានា នៅពេលយើងត្រៀមខ្លួនសម្រាប់ភាពអស់កល្បជានិច្ច ។
យើងនឹងយល់ពីទំនាក់ទំនងសង្គមនៅឯស្ថានសួគ៌ ដែលមាននៅក្នុងគ្នាទៅវិញទៅមក ។២១ កិច្ចការ និងសិរីល្អរបស់ព្រះ រួមមាននូវការនាំឲ្យមានភាពរីករាយជារៀងរហូត ។២២ ជីវិតអស់កល្បជានិច្ច និងភាពតម្កើងឡើង គឺជាការស្គាល់ព្រះ និងព្រះយេស៊ូវគ្រីស្ទ ដូច្នេះតាមរយៈព្រះចេស្តានៃព្រះ នោះយើងអាចទៅរស់នៅកន្លែងដែលទ្រង់ទាំងទ្វេគង់នៅ ។២៣
បងប្អូនប្រុសស្រីជាទីស្រឡាញ់ ព្រះជាព្រះវរបិតាសួគ៌របស់យើង និងព្រះរាជបុត្រាជាទីស្រឡាញ់របស់ទ្រង់មានព្រះជន្មរស់នៅ ។ ទ្រង់ទាំងទ្វេប្រទានភាពសុខសាន្ត អំណរ និងការព្យាបាលដល់មនុស្សគ្រប់រូប គ្រប់ភាសា និងដល់យើងម្នាក់ៗ ។ ព្យាការីរបស់ព្រះអម្ចាស់កំពុងដឹកនាំផ្លូវ ។ វិវរណៈថ្ងៃចុងក្រោយនៅតែបន្ត ។ សូមឲ្យយើងខិតកាន់តែជិតព្រះអង្គសង្រ្គោះរបស់យើង នៅក្នុងដំណាក់ដ៏បរិសុទ្ធរបស់ព្រះអម្ចាស់ ហើយសូមឲ្យទ្រង់នាំយើងទៅកាន់តែជិតព្រះ និងទៅកាន់គ្នាទៅវិញទៅមក នៅពេលយើងចងក្រងដួងចិត្តរបស់យើងរួមគ្នា ជាមួយនឹងសេចក្ដីអាណិតអាសូរនៅក្នុងព្រះគ្រីស្ទ ផ្តល់នូវសេចក្ដីពិត និងសេចក្ដីមេត្តាករុណា នៅគ្រប់ជំនាន់ទាំងអស់របស់យើង—នៅកាលវេលានេះ និងអស់កល្បជានិច្ច ព្រមទាំងរីករាយជារៀងរហូត ។ នៅក្នុងព្រះយេស៊ូវគ្រីស្ទ កិច្ចការនេះអាចធ្វើបាន នៅក្នុងព្រះយេស៊ូវគ្រីស្ទ កិច្ចការនេះជាកិច្ចការពិត ។ ខ្ញុំសូមធ្វើជាសាក្សី នៅក្នុងព្រះនាមដ៏បរិសុទ្ធរបស់ទ្រង់ គឺព្រះយេស៊ូវគ្រីស្ទ អាម៉ែន៕