Woh Mujhe Changa Kar Sakta Hai!
Uddhaarkarta ki changai aur mukti dilaane waali shakti aakasmik galtiyon, kharaab nirnayon, chunautiyon, aur har prakaar ki mushkilo—ke saath-saath humaare paapon par bhi laagoo hoti hai.
Moroni vaada karta hai ki agar hum Mormon Dharamshaastr padhte hain aur phir sache dil se, vaastavik iraade se, Masih me vishwaas rakhte hue Anant Pita Parmeshwar se poochate hain, agar yeh sach hai, to Parmeshwar Pavitr Aatma ki shakti se apni sachchai prakat karega.1 Laakhon logon ne is vaade ko lagoo kiya hai aur Ishu Masih ke susamaachaar ki poornata ki Punahsthaapna ki ek ashuwaasan dene waali gawahi praapt ki hai.
Jab hum Moroni ki Dharamshaastr padhte hai, toh Moroni humein updesh dete hai, “yaad rakhein ki Adam ki srishti se lekar [iss] samay tak, Parmeshwar maanav ke santaan ke prati kitna dayalu raha hai, … aur [humaare] dilon me iss par vichaar karein.”2 Mormon Dharamshaastr ki kahaniyaan aur shikshaaen humein hamare Rakshak ke prem, krippa aur daya ki yaad dilaati aur gawahi deti hai.
Mere pita 2013 ke April me guzar gaye. Jab mainne unke antim sanskaar me bolne ki taeyaari ki, mujhe ehsaas hua ki mai unke pasandeeda shaastron ko jaanne aur unhe pyaar karne ke liye kitna dhany tha. Unhonne unhein paarivaar ke ikhata hone par bataye the, aur jab mujhe salaah ki zaroorat thi, ya apne vishwaas ko mazboot karne ki avashyakta hui toh unhonne unhein mere saath padha. Mainne unhein bhashano aur assignment me unhein batlate hue suna. Mai na keval unhein jaanta tha, balki mai abhi bhi unki aawaaz aur un aadhyaatmik bhaavnaon ko yaad kar sakta hoon jab woh unhein batlaate the. Shaastron aur bhaavnaon ko batlane ke dwara, mere pita ne mujhe Prabhu Ishu Masih me vishwaas ki ek mazboot neenv sthaapit karne me madad ki.
Mere pita ko woh kahani pasand thi jab Rakshak Nephi ke logon se milne gaya tha.3 Yeh pavitr kahani punarjiwit aur unnati paae Prabhu Ishu Masih ki hai. Usne kadve pyaale ko pi liya tha aur sab kuch saha tha taaki yadi hum pashcaataap karein toh humein kasht na uthaana pade.4 Usne aatmaon ki duniya ka daura kiya tha aur wahaan susamaachaar ke prachaar ka aayojan kiya tha.5 Woh mrtakon me se jee utha tha, aur Woh Pita ke sath tha aur aadesh paaya tha Nephitiyon ke saath shaastr baatne ke liye jisse bhavishye ki peedhiyon ko aashirvaad mile.6 Use unnati mili aur Uske paas Apni saaree anant shakti aur kshamata thi. Hum Unki shikshaon ke har vivran se seekh sakte hain.
3 Nephi 11 me, hum padhte hain ki kaise Rakshak Nephitiyon ko yeh sikhaane ke liye swarg se neeche utra ki woh Ishu Masih tha, jiski duniya me aane ki gawahi bhavishyevaktaon ne ki thi. Usne ghoshna kee ki Woh Jagat ki Jyoti hai aur Usne jagat ke paapon ko apne oopar lene se Pita ki mahima badhaai hai. Usne logon ko Apne haathon ko apne panjar me daalne ke liye aur Uske haathon aur Uske pairon par neelon ke nishaanon ko mehsoos karne ke liye aamantrit kiya. Woh chaahata tha ki log jaane ki Woh Israel ka Parmeshwar hai, jo sansaar ke paapon ke liye maara gaya tha. Weh log khushi-khushi aage badhe, ek-ek karke gaye jab tak ki sab ne dekha aur mehsoos kiya ki yeh vaastav mein wahi hai jiske baare mei bhavishyevaktaon ne likha tha ki woh aaega.7
Ishu ne Nephitiyon ko pashchataap ke mahatv ke baare me, ek chhote bache ke roop me banne ke baare me, aur uske adhikaar waale vyakti dwara baptisma lene ki aavashyakta ke baare me sikhaaya. Phir Unhonne us siddhaant ke baare mein bahut kuch sikhaaya jiska adhyan hum is varsh Naya Niyam me kar rahe hain.
3 Nephi 17 me, humne padha ki Ishu ne logon se kaha ki ab samay aa gaya hai ki Woh Pita ke paas jaye aur khud ko Israel ki khoee hui janjaatiyon ko dikhae.8 Jaise hi Usne bheed par Apni aankhien firaai, Usne dekha ki woh aansoo baha rahe the, Use drdhata se dekh rahe the jaise ki woh Use thodi der rukne ke liye keh rahe ho.9
Nephitiyon ke prati Rakshak ki pratikriya chu-dene waali aur shikshaaprad dono thi. Usne kaha, “Dekho, mera antarmann tujh par daya karne se bhar gaya hai.”10
Mera maanna hai ki Unki kripa logon ke aansuwon ki pratikriya se kahin adhik thi. Aisa prateet hota hai ki Woh Apne praeshchit ke balidaan kee aankhon se unhein dekh sakta tha. Usne unke har dard, peeda aur behkaawe ko dekha. Usne unki beemaariyaan dekhi. Usne unki durbaltaon ko dekha, aur Woh Gethsemane me aur Golgotha pe apni kasht-daayak peeda se jaanta tha ki kaise unki durbaltaon ke anusaar unhe sahayta kare.11
Isee tarah, jab humaare Rakshak, Ishu Masih, humein dekhte hain, to Woh humaare paapon ke dard aur bojh ko dekhte aur samajhte hain. Woh humaare latton aur chunautiyon ko dekhta hai. Woh humaare sangharshon aur kisi bhi prakaar ki peedaon ko dekhta hai—aur Woh humaare prati kripa se bhar jaata hai.
Nephitiyon ke liye uske anugrahapoorn nimantran ke baad: “Kya tum me koi beemaar hai ? Unhe yaha le aao. Kya tum me se koi langda, andha, ya apang jo nirbaal ho chuka ho, ya behra, ya kisi bhi prakaar ke kasht mein hai? Unhe yahan le aao aur Mai unhein changa karunga, kyunki mujhe tum par daya aati hai; hum andar se daya se bhar gaya hai.”12
Aur log nikal aae “unke saath jo kisi na kisi prakaar se dukhi the aur; aur jaise hi woh uske paas aae un me se ek ek ko changa kiya.”13
1990 me hum Victoria, Australia ke chhote se town Sale me reh rahe the. Hum parivaar, Girjaghar aur kaam sambandhi zimmedaariyon me khushi se vyast the. Christmas se thik pehle Sanichar ki ek khoobsoorat garmee me, humne kuchh park aur ek pasandeeda samudr tat par jaane ka faesla kiya. Ek parivaar ke roop me ek shaandaar din ka anand lene ke baad, humne sabhi ko gaadi me bithaaya aur ghar ki orr chal pade. Gaadi chalate samay, mai kshan bhar ke liye so gaya aur ek gaadi(car) durghatna ka kaaran bana. Thoda hosh aane ke kuch pal baad, mainne gaadi ke chaaron or dekha. Meri patni Maxine, ka paer buree tarah toot gaya tha aur use saans lene me dikkat ho rahi thi. Uska sternum(chaati ki beech haddi) toot gaya tha. Humaari teenon betiyaan sadme me thee lekin shukr hai ki theek lag rahi theen. Mujhe kuchh maamooli choten aaee theen. Lekin humaara paanch mahine ka beta theek hone jaisa nahi tha.
Us durghatna ke drshy ke tanaav aur bhram ke beech, humaari sabse badi beti, 11-varsheey-Kate ne tatparata se kaha, “Pitaji, aapko Jarom ko aashirwaad dene kee aavashyakta hai.” Kuch sangharsh ke baad, mai aur meri betiyaan gaadi se baahar nikalne me kaamyaab rahe. Maxine ko hila nahin sakte the. Mainne saavdhaani se Jarom ko uthaaya; phir, apni peeth ke bal zameen par letate hue, mainne dheere se use apni chaati par rakkha aur use purohiti ka ashirwaad diya. Kareeb 40 minute baad jab tak ambulance pahunchee, Jarom ko hosh aa gaya tha.
Us raat mainne parivaar ke teen sadasyon ko aspataal me chhod diya aur do betiyon ke saath ek shaanti se taxi me baeth karghar pahunche. Lambi raat me, mainne Swarg ke Pita se yaachna kee ki mera parivaar aur doosre van me ghaayal hue log theek ho jaaenge. Dayaaluta se, meri praathnaon aur kai anye logon dwara utsaahpoorvak ki gayi praathnaon ka uttar diya gaya. Samay ke saath sabhi ko changaai mili, ek mahaan aashirwaad aur komal daya.
Phir bhi itni bhayaanak durghatna karne ke liye mujhme dosh aur pashchaataap ki gaharee bhaavnaen bani raheen. Mai raat mei jaagta aur bhayanak ghatnaon ko phir se jee leta. Mainne apne aap ko maaf karne aur shannti paane ke liye saalon tak sangharsh kiya. Phir, ek purohiti leadar ke naate, doosaron ko pashchataap karne me sahaayta karte hue aur unhein Rakshak ki kripa, daya, aur prem ko mehsoos karne me madad karte hue, mainne mehsoos kiya ki woh mujhe changa kar sakta hai.
Uddhaarkarta ki changai aur mukti dilaane waali shakti aakasmik galtiyon, kharaab nirnayon, chunautiyon, aur har prakaar ki mushkilo ke saath-saath humaare paapon par bhi laagoo hoti hai. Jaise hi maine Unki or muda, apraadh aur pachataawa ki meri bhaavnaon ko dheere-dheere shaanti aur aaraam se badal diya gaya.
President Russell M. Nelson ne sikhaya: Jab Rakshak ne saari maanavjaati ke liye praeshchit kiya, to Usne ek raasta khol diya ki jo log Uska anusaran karte hain weh Uski changaai, mazbuti, aur mukti ki shakti tak pahunch sakenge. Ye aadhyaatmik visheshaadhikaar un sabhi ke liye uplabdh hai jo Use sunna aur Uska anusaran karna chahate hai.”14
Bhaiyon aur bahanon, chaahe aap ansuljhe paap ka bojh utha rahe ho, apne khilaaf bahut pahile kiye gae apraadh ko yaad kiye ho, ya kisi bhool se hui galti ke liye khud ko kshama karne ki koshish kar rahe ho, aapke paas Rakshak Ishu Masih ki changaee aur mukti ki shakti hai.
Main gawahi deta hoon ki Woh jiwit hai. Woh hamare Rakshak aur Muktidaata hai. Woh humein pyaar karta hai. Use um par taras aata hai, Us me bahut daya hai, aur Woh tumhe changa kar sakta hai. Ishu Masih ke naam se, amen.