Ishu Masih Par Dhyaan Kendrit Karna
Prabhu Ishu Masih humaari samasyaon ka samaadhaan hai, lekin humein Use dekhne ke liye apni aankhein uthaani chaahiye aur apni drshti badhaani chaahiye.
Mere pita mujhse kehte the, “apne mushkilon par itna dhyaan mat do ki tumhe samadhaan dikhaai na de.”
Mein gawahi deta hoon ki Prabhu Ishu Masih hamare sabse kathin samasyon ka bhee samadhaan hai. Vishesh roop se, Usne chaar samasyon par vijay praapt ki hai jinka hum me se pratyek vyakti saamna karta hai aur jise hum mein se koi bhi apne dum par hal nahin kar sakta hai:
-
Pehli samasya shaareerik mrtyu hai. Hum ismen deri karne ya ise andekha karne ki koshish kar sakte hain, lekin hum ise apne dum par door nahin kar sakte. Halaanki, Ishu Masih ne humaare liye mrtyu par vijay praapt ki, aur iske parinaam, hum sabhi ek din punarjiwit honge.1
-
Doosare samasya me is duniya ke klesh, kathin anubhav, dukh, dard aur anyaaye shaamil hain. Ishu Masih ne in sab par vijay praapt ki. Unke liye jo Uske piche chalne ka prayaas karte hain, Woh ek din “saare aansoo ponchh daalega” aur phir se sab sahi karega.2 Is beech, Woh humein aatmavishvaas, achhe utsaah, aur shaanti ke saath humaare pareekshaon se guzarane ke liye bal de sakta hai.3
-
Teesari samasya paap se utpann hone waali aatmik mrtyu hai. Ishu Masih ne “dand saha taaki hamein shaanti mil sake.”4 Unke praeshchit ke balidaan ke kaaran, hum apne paapon ke parinaamon se mukt ho sakte hain agar hum Rakshak me vishwaas rakhte hain, imaanadaari se pashchataap karte hain, us anubandh ko swikaar karte hain jo Pita humein baptisma jaisee aavashyak vidhiyon ke maadhyam se pradaan karta hai, aur anth tak sahan karte hain.5
-
Chauthi samasya humaare seemit, apoorn swabhaao hai. Is samasya ka bhi samadhaan Ishu Masih ke paas hai. Woh na keval humaare trutiyon ko mita deta hai aur humein phir se nirdosh bana deta hai. Woh “humaare dilon mein ek mahaan parivartan … laa sakta hai, ki humaare paas burai karne ke liye aur ichcha nahin rahe, balki lagataar acha karne ke liye.”6 Hum Masih ke anugrah se siddh ho sakte hain aur ek din Uske jaise ban sakte hain.7
Durbhaagy se, bahut baar hum apne samasyaon par itna adhik dhyaan kendrit karte hain ki hum samadhaan par se dhyaan hata dete hain, jo humaare Rakshak Ishu Masih hai. Hum us galtee se kaise bach sakte hain? Mera maanna hai ki uttar un vachano me hai jinhein humein Unse aur Swarg mein humaare Pita ke saath banaane ke liye aamantrit kiya gaya hai.
Vachano ke Zariye Ishu Masih par Dhyaan Kendrit Karna
Humaare vachan humein humaara dhyaan, humaare vichaar, aur humaare kaaryon ko Masih par kendrit karne mein madad karte hain. Jab hum “un vachano ko thaamte hai jo [hum ne] banae hai,” hum “is duniya ke cheezon” ki pehchaan aasaani se kar sakte hain jinhein humein “alag rakhna chahiye” aur “ ek behtar[duniya] ki cheezon” ko humein lagan se khojna chahiye.8
Yahi Ammon ke logon ne Mormon ki Dharamshaastr me kiya tha. Jab unhonne Ishu Masih ke baare me seekha aur Us par apne jeevan ko kendrit karna shuroo kiya, toh unhonne pehchaana ki unhein apne yuddh ke hathiyaaron ko daphan kar dena chaahiye aur poori tarah se imaanadaar ban gaye aur “Ishwar ke prati apne utsaah ke liye pratishthit” ho gaye.9
Vachano ka paalan humein us cheez ki talaash karne ki or le jaata hai jo Aatma ke prabhaav ko aamantrit karti hai aur jo kuchh bhi ise door karta hai use aswikaar kar deta hai—“kyonki hum jaante hain ki yadi hum Pavitr Aatma ki upasthiti ke yogy ho sakte hain, to hum Swargiye Pita aur Uska Putr, Ishu Masih ki upasthiti me rahane ke yogy bhi ho sakte hai.”10 Iska matlab yah ho sakta hai ki humein dayaalu shabdon ka upyog karke apni shabdaavali badalani hogi. Iska arth dhaarmik roop se aswaasth aadaton ko nayi aadaton se badalna ho sakta hai jo Prabhu ke saath humaare sambandh ko majboot karti hain, jaise vyaktigat roop se aur humaare parivaar ke saath daenik praathna aur shaastr adhyan.
President Russell M. Nelson ne kaha ki “har ek vyakti jo baptisma phont aur mandiron me vachan banaata hai—aur unhen rakhta hai— ko Ishu Masih ki shakti ki zyaada pahunch hoti hai. …
Parmeshwar ke saath vachano ko nibhaane ka pratiphal swargiye shakti hai—vah shakti jo hameni apne parikshanon, behkaawon, aur dil ke dard ko behtar dhang se jhelne ke liye mazboot karti hai.”11
Har Raviwaar ko pradhubhoj ke dauraan apne vachano ko naveenkrt karna khud ko parakhne ka ek mahaan avsar hai12 aur apne jeevan ko Ishu Masih par phir se kendrit karne ka. bhaag le kar, hum ghoshna karte hai ki hum “unhein hamesha yaad karte hain.”13 Yeh shabd humesha itna mahatwapoorn hai. Yah humaare jeevan ke har hisse me Rakshak ke prabhaav ko badhaata hai. Hum Use keval girjaghar me ya keval apni subah ki praathna ke dauraan ya keval tab yaad nahin karte hain jab hum museebat mei hote hain aur humein kuchh chaahiye hota hai.
Haan, hum kabhi-kabhi dhyaan nahi dete hain. Hum bhool jaate hain. Hum dhyaan kho dete hain. Haan, hum kabhi-kabhi dhyaan nahi tika paate hai. Lekin humaare anubandhon ko naveeneekrt karne ka matlab hai ki chaahate hain ki hum humesha Rakshak ko yaad rakhen, ki hum poore saptaah aisa karne ki koshish karenge, aur yah ki hum agle saptaah prabhubhoj ki mej par phir se pratibaddh honge aur Un par phir se dhyaan kendrit karenge.
Apne Gharon me Ishu Masih par Dhyaan Kendrit Karna
Spasht roop se, Ishu Masih par dhyaan karna Raviwaar ko, girjaghar-par gatividhi se adhik hona chaahiye. Jab President Nelson ne 2018 me Come, Follow Me ki shuruaat ki thi, toh unhonne kaha, “Yeh ek ghar-pe-kendrit Girjaghar ka samay hai.”14 Unhonne kaha ki humein “[apne] ghar ko vishwaas ke surakshit sthaan me badalna chahiye” aur “susamachaar seekhne ka ek kendr” banana chahiye. Aur agar hum aysa karte hain to Usne humse chaar adbhut vaade keen hai.15
Pehla vaada: “Aapke Sabbath(Pawitr) din vaastav me ananddaayak honge.” Yah ek aisa din hoga jab hum apne Rakshak ke aur kareeb aaenge. Peru ki ek jawaan mahila ne kaha, “Prabhu ka din woh din hai jab mujhe Prabhu se sabse adhik jawaab milte hain.”
Doosra vaada: “Aapke bachche Rakshak ke shikshaaon ko seekhne aur jeene ke liye utsaahit honge.” Isliye “hum Masih ki charcha karte hai, hum Masih mein anandit hote hai, hum Masih ke baare me prachaar karte hai, … taaki hamari santaan yeh jaan sake ki weh apni paapon ki chama ke liye kis taraf dekh sakte hai.”16
Hum aisa isliye karte hain taaki ek din, jab humaara beta kaam karne ya pahaadon par ghoomne ya jangalon mein jaanvaron ka shikaar karne ke liye baahar jae, jaisa ki Enos ne kiya tha, to woh yaad kar sake ki humne use Masih ke baare me aur susamaachaar ko jeene ke aanand ke baare me kya sikhaaya tha. Aur kaun jaanta hai? Shaayad yah woh din hoga jab woh us dhaarmik bhookh ko mehsoos karega jo use Ishu Masih ki or modti hai taaki woh Prabhu ki aawaaz ko sun sake, “Tere paap shama hue, aur too dhanye hoga.”17
Teesra vaada: “ Aapke jeevan aur aapke ghar me shatruwon ka prabhaav kam hoga.” Kyun? Kyonki jitna adhik hum Ishu Masih par dhyaan kendrit karte hain, utana hi adhik paap apna aakarshan kho deta hai.18 Jaise humaare ghar Rakshak ke prakaash se bhare hue hain, isliye virodhee ke andhere ke liye jagah kam hotee jaa rahee hai.
Chautha vaada: “Aapke parivaar me badlaav jald honge aur hote rahenge.” Kyun? Kyunki jo badlaav Ishu Masih laata hai woh “ek zabardast badlaav” hai.19 Woh hamare swabhaao ko hi badal deta hai; hum “naye praani” ban jaate hain.20 Hum dheere-dheere Rakshak ki tarah ban jaate hain, Parmeshwar ke sabhi bachchon ke liye Unke shuddh prem se bhar jaate hain.
Kaun nahin chaahega ki ye vaade unke jeevan mein aur unke parivaaron mein poore hon? Unhein praapt karne ke liye humein kya karna chaahiye? Iska jawaab apne gharon ko vishwaas ke surakshit sthaan aur ek susamachaar seekhne ka kendr me badalna hai. Aur hum aisa kaise karte hain? Swargiye Pita aur Ishu Masih par dhyaan kendrit karke, Unhein hamare paarivaarik jeevan ka kendr banaa kar, humaare ghar ka sabse mahatvapoorn prabhaav.
Kya mai sujhaav de sakta hoon ki aap shaastron me paae gae Masih ke shabdon ko apne jeevan ka ek daenik hissa banakar shuroo karein? Poorn shaastr adhyan ke liye koi nirdhaarit sootr(formula) nahi hai. Yeh har din 5 ya 10 minat ho sakta hai—ya aur zyaada agar aap kar sakte hain. Yeh ek din me ek chapter ya kuch verses ho sakte hain. Kuch parivaar school ya kaam ke liye nikalne se pehle subha padhna pasand karte hain. Aur kuch log raat ko sone se pehle padhna pasand karte hain. Kuch jawaan dampatiyon ne mujhe bataya hai ki woh kaam par jaate samay khud hi adhyan karte hain aur phir text ke dwara ek doosre ke saath antardrishti baatte hai, taaki unki tippaniyon aur charchaaon ko record kiya jaata hai.
Come, Follow Me gatividhiyon aur sansaadhanon ke kai sujhaav pradaan karta hai jo vyaktiyon aur parivaaron ko shaastron se susamaachaar ke siddhaanton ko sikhane me madad kar sakte hain. Baaibal video aur Mormon ki Dharamshaastr ke video bhi aapke parivaar ke liye shaastron ko adhik sulabh banaane ke liye moolyavaan upakaran ho sakte hain. Yuva aur bache aksar shaastron mein yaadgaar kahaaniyon se prerit hote hain. Ye kahaaniyaan, aur unke dwara sikhae jaane waale susamaachaar ke siddhaant, aapke bachchon ke saath bharosemand doston ki tarah rahenge, jab unhen sewa, sadgun, aagyaakaarita, dhaerye, drdhtta, vyaktigat praktikaran, daan, vinamrta aur Ishu Masih me vishwaas ke ache uddahrano ki aavashyakta hogi. Samay ke saath, Parmeshwar ke vachan ka aanand lene mein aapki nirantrata aapke bachon ko Rakshak ke aur kareeb aane mein madad karegi. Woh Use aise jaanenge jaise pehle kabhi nahin the.
Prabhu Ishu Masih aaj jeevit hain. Woh humaare jeevan mein ek sakriye, daenik upasthiti ho sakta hai. Woh humaari samasyaon ka samaadhaan hai, lekin humein Use dekhne ke liye apni aankhein uthaani chaahiye aur apni drshti badhaani chaahiye. Usne yeh kaha, “Har soch me meri or dekho; sandeh na kar, daro mat.”21 Jab hum us par aur Swarg me humaare Pita par dhyaan kendrit karte hain, Unke saath vachano ko banaate aur rakhte hain, aur Unhe apne ghar aur parivaar mein sabse mahatvapoorn prabhaav banaate hain, toh hum us tarah ke log ban jaenge jiski kalpana President Nelson ne ki thi: “Aise log jo saksham hain, taeyaar hain, aur Prabhu ke phir se aane par Unka swaagat karne ke yogy hain, aise log jinhonne pahile se hi is pateet sansaar ke oopar Ishu Masih ko chun liya hai, aise log jo Ishu Masih ke oonche, pavitr niyamon ko jeene ke liye apne adhikaar me aanandit hote hain.”22 Ishu Masih ke naam se, amen.