TOHI KI HE ʻĒTITÁ

ʻOku ou lau maʻu pē ʻa e Liahoná he ʻoku ou ako ai ʻo fekauʻaki mo ha ngaahi meʻa lahi, hangē ko e ngāue fakatemipalé, ngaahi uiuiʻi faka-Siasí pea mo e founga ke ʻofa ai ki he ʻOtuá. ʻOku fakamolū hoku lotó ʻe he ngaahi meʻa ʻoku ou laú. ʻOku ou ako ai ha meʻa lahi pea ʻoku fakaʻau ai ke maʻa ange ʻeku fakakaukaú. ʻOku ongo kiate au ʻa e ngaahi pōpoaki ʻa Kōtoni B. Hingikelií. ʻOku ou vahevahe ʻa e makasiní mo e kāingalotu foʻoú pea mo e kau māmālohí. ʻOkú ne fakamālohia kinautolu pea kuo nau fakatau ʻeni ha ngaahi tatau maʻanautolu pē.

ʻOku ou saiʻia ʻi he makasiní. ʻOku ou mātuʻaki loto ke fai mo ʻomi koeʻuhí he ʻoku ou vahevahe ʻa e Pōpoaki ʻa e Faiako ʻAʻahí mo e kau fafine ʻoku ʻikai ke nau maʻu ʻa e makasiní. Kiate au, ko e meʻaʻofa lelei taha ʻeni ʻe lava ke foaki ʻe ha kaumeʻa.

ʻOku mahino mo mālie moʻoni e fakamatala ʻi he Liahoná. Ko e konga ʻoku ou manako taha aí ko e ngaahi pōpoaki mei he Kau Palesitenisī ʻUluakí, he ʻoku ʻaonga maʻu pē kiate au. ʻOku fonu maʻu pē ʻi he faleʻi fakalaumālie maʻá e fānau kotoa ʻa e Tamai Hēvaní—ko ha matavai mapunopuna maʻu pē ʻo e fakamatala fakalangí ki hono kotoa ʻo kinautolu te nau lava ʻo laú.

Ko e Liahoná ko ha tāpuaki mo ha takaua. Kuó u ʻosi toe lau ʻa e makasini ʻo Sepitema 2003, pea kuo toe fakamāmaʻi pē au ʻe he “ʻIkai ke Aʻu e Taumuʻá.” Naʻá ku lau ia ʻi heʻeku teuteu ki heʻeku ngāue fakafaifekaú peá u toe lau pē ʻi heʻeku ʻosi mei he ngāue fakafaifekaú. ʻOku ʻi ai haʻane tokoni makehe mo lelei moʻoni kiate au.

ʻOku ʻi ai ha ngaahi taimi ʻoku ou ongoʻi ai ʻoku fuʻu lahi ʻa e ngaahi fie maʻu kiate aú. Ka ʻi heʻeku toe lau ʻa e fakamatalá, naʻá ne fakamanatu mai ke u hokohoko atu ʻi he anga faka-Kalaisí. Mahalo he ʻikai ngali lelei maʻu ai pē ʻa e moʻuí, ka ʻoku ou loto lahi ange he taimí ni ke u fai hoku lelei tahá.

Ko e fuofua taimi naʻá ku mamata ai ʻi he konifelenisi lahí ʻi he satelaité, naʻe mālie moʻoni ia kiate au. ʻOku ou ongoʻi houngaʻia lahi koeʻuhí ko ha palōfita moʻui pea mo e kau Taki Māʻolunga kehé. Ko e taimi ne mau fanongo ai ki heʻenau ngaahi fakamoʻoni ki he Fakamoʻuí mo ʻetau Tamai Hēvaní pea mo fanongo ki heʻenau leá ʻi he fakahā pea mo e mālohi mei ʻolungá, ʻoku fakafoʻou fakalaumālie kotoa ai kimautolu. Hili ʻemau mamata ʻi he konifelenisi lahí he satelaité, ʻoku ou maʻu ha mālohi lahi ange ke u vilitaki atu pea ʻoku ou nofo ʻamanaki lahi atu ki he konifelenisi hono hokó. ʻOku hoko foki mo e konifelenisí ʻi he makasiní, ko ha fakafiemālie lahi, ʻo tautautefito kiate kinautolu ʻoku ʻikai ke nau maʻu ha faingamālie ke mamata hangatonu aí.