Mētali Koula ʻa e Kuiní

Naʻe toe moʻui ʻa Kulisitofā Vinikou ʻo e Uooti Kingi Liní ʻi he Siteiki Nouisi ʻIngilaní, ʻi ha ngaahi kafo ki hono ʻutó ʻi heʻene kei siʻí ʻo ne maʻu ai ha maaka A ʻe ono ʻi he tuʻunga māʻolunga tahá he taʻu kuo ʻosí. ʻOku tatau ia mo haʻate lavaʻi lelei ʻa e sivi hū ki he kolisí pea mo ha lēsoni ʻe ono ʻi he sivi fakafuofuaʻi hoto tuʻungá. Naʻe maʻu ʻe Kulisitofā ʻi he lavameʻa kāfakafá ni ʻa e Mētali Koula ʻa e Kuiní ʻi he Lavameʻa Fakaʻakatēmiká.

Ko Kuini ʻElisapeti II naʻá ne foaki kia Kulisitofā ʻa e palé. ʻOku pehē ʻe Kulisitofā, ʻa ia ʻoku lolotonga ngāue fakafaifekau he taimí ni ʻi Liiti ʻi ʻIngilani, “Naʻe anga fakakaumeʻa pea naʻe faingofua ke te talanoa mo ia.” Naʻe aʻu ʻo ne kiʻi fakamatala ange ki ai fekauʻaki mo e ngāue fakafaifekau ki he Siasí.

ʻI hono taʻu onó, ne tuiʻi ʻa Kulisitofā ʻe ha kā lolotonga ʻene kolosi ʻi he halá. Naʻe ʻaho ʻe ono mo e ʻikai ke ne toe ʻilo ha meʻa pea naʻe pakupaku mo ha toto ʻi hono ʻutó. Naʻe fakaofo ki he kau toketaá ʻene toe moʻuí. Ko e taimi naʻe fakamatalaʻi ai kia Kuini ʻElisapeti ʻa e fakatuʻutāmaki ne hoko kia Kulisitofaá pea mo e anga ʻene fakaakeaké, naʻe kiʻi tūkuhua ʻo pehē, “Mahalo pē naʻe hū atu ai ha fakakaukau lelei kiate ia.”