Ko e Mālohi ʻo e Fakamoʻoni ʻe Uá
Lolotonga haʻaku sio ʻi ha ʻaho ʻe taha ʻi he ngaahi tohi he falekoloa ʻo e Kautaha Teseletí ne ofi mai ki homau ʻapí, ne u pehē ke u fakatau ha Tohi ʻa Molomona ke foaki ki haku kaungāmeʻa ʻi he pongipongi Toetuʻú. Naʻá ku maʻu ha tohi kuo lahi hono fakaʻaongaʻí, ʻo faʻo ki heʻeku salioté pea hoko atu pē ʻeku kumí. Naʻe faifai peá u toe maʻu ha tohi ʻe taha naʻe ʻasi ngali kei sai ange peá u fakafetongi leva ia mo e tohi naʻe ʻi he salioté peá u hangatonu atu ki he faifakataú.
ʻI heʻeku aʻu ki ʻapí, ne u fakahū leva ʻa e Tohi ʻa Molomoná ki hoku tesí ke maluʻi ai ʻo tatali ki he Toetuʻú. ʻI he hoko ʻo e Toetuʻú, ne u toʻo mai leva ia peá u pehē ke hiki ʻi loto ʻeku fakamoʻoní.
ʻOkú ke fakakaukau ki heʻeku ʻohovale he taimi naʻá ku fakaava hake ai ʻa e tohí, ʻo u maʻu ai ha tā ʻo hoku fāmilí naʻe fai ʻi he taʻu ʻe 25 ki muʻá. Naʻe ʻi lalo ʻi he taá ha fakamoʻoni naʻe hiki ʻe heʻeku tangataʻeikí. Naʻe toki mālōloó ni atu pē pea kamata leva ke u fakatēloʻimata ʻi heʻeku lau ʻene fakamoʻoní peá u ongoʻi iá.
Naʻá ku manatuʻi, naʻe fakatukupaaʻi ʻe ʻEsela Tafu Penisoni ʻa e ngaahi fāmilí ʻi heʻeku kei taʻu hongofulu tupú ke nau ʻai fakatāutaha ha Tohi ʻa Molomona ʻo fokotuʻu ai honau taá mo ʻenau fakamoʻoní pea ʻoatu ia ki he hetikuota ʻo e Siasí ke tufaki ʻi he funga ʻo māmaní.1 ʻI heʻeku maʻu ʻa e Tohi ko ʻeni ʻa Molomoná, naʻá ku nofo ʻi ha ngaahi maile siʻi pē mei he feituʻu naʻe nofo ai hoku fāmilí, ʻi he taimi naʻa mau fuofua maʻu ai ʻa e tohí.
Hili haʻaku tānaki atu ʻeku fakamoʻoní ki he fakamoʻoni ʻa ʻeku tangataʻeikí, naʻá ku foaki leva ʻa e Tohi ʻa Molomoná ki hoku kaungāmeʻá. Naʻá ku fakafetaʻi leva ki heʻeku Tamai Hēvaní ʻi he tāpuaki kuo foaki mai ʻe he ʻuluaki ngāue ki he Tohi ʻa Molomoná, kiate au pea mo hoku kaungāmeʻá. Naʻe ongo moʻoni ki hoku kaungāmeʻá ʻa e fakamoʻoni ʻeku tangataʻeikí pea pehē ki he “meʻa” mahuʻinga ne hokó. Naʻe iku pē ʻo maʻu haʻane fakamoʻoni ki he Tohi ʻa Molomoná peá ne foua e vai ʻo e papitaisó.
Naʻe fakamālohia ʻeku fakamoʻoní ʻi he ongo kiate au ʻa e fakahinohino fakalaumālie ʻa Penisoní pea mo e tāpuaki ʻo e aʻu mai ʻa e Tohi ʻa Molomoná ki hoku nimá ʻi he hili ia ha taʻu ʻe 25.