ʻOku Mahuʻinga ʻa e Fāmilí ki he Palani ʻa e Tupuʻangá

ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku kamata ʻa e tokāteline ʻo e fāmilí ʻaki ha mātuʻa fakalangi. Ko ʻetau fakaʻānaua taupotu tahá ke tau hoko ʻo tatau mo kinaua… .

“Talu mei he kamataʻangá, mo hono fokotuʻu ʻe he ʻOtuá ʻa e fāmilí pea mo ʻai ia ke taʻengata. Naʻe silaʻi ʻa ʻĀtama mo ʻIvi ʻi ha mali ki he moʻuí ni pea mo ʻitāniti kotoa… .

“Pea ʻi hono toe fakafoki mai ʻo e ngaahi kií ni mo e mafai ʻo e lakanga fakataulaʻeikí, ʻoku maʻu ai mo ha faingamālie ki he taha kotoa ʻoku moʻui taau, ke ne maʻu ʻa e ngaahi tāpuaki ʻo e fāmili taʻengatá… . ʻOku fokotuʻutuʻu mai ʻe he ʻEikí ʻa e talaʻofá pea mo e ngaahi meʻa ʻoku fie maʻú ʻi he veesi toputapu ko ʻení:

“ʻPea ko e tahá, ko e moʻoni ʻoku ou pehē kiate kimoutolu, kapau ʻe mali ha tangata mo ha uaifi ʻi heʻeku leá, ʻa ia ko ʻeku fonó, pea ʻi he fuakava foʻou mo taʻengatá, pea ʻoku fakamaʻu ia kiate kinaua ʻi he Laumālie Māʻoniʻoni ʻo e talaʻofá, ʻe ia ʻa ia kuo paní, ʻa ia kuó u fili ki he mālohi ko ʻení pea mo e ngaahi kī ʻo e lakanga fakataulaʻeiki ko ʻení; pea ʻe pehē kiate kinaua—Te mo ʻalu atu ʻi he ʻuluaki toetuʻú; pea kapau ʻe hoko ia hili ʻa e ʻuluaki toetuʻú, ke ʻalu atu ʻi he toetuʻu hono hokó, ʻo maʻu ʻa e ngaahi taloni mo e ngaahi puleʻanga, ngaahi pule fakapilinisi mo e ngaahi mālohi, ngaahi pule, ko e ngaahi māʻolunga mo e ngaahi loloto kotoa pē—pea ʻe tohi leva ʻi he Tohi ʻo e Moʻui ʻa e Lamí … ʻe mālohi kakato ia ʻo ka na ka mamaʻo mei he māmaní; pea te na fakalaka atu ʻi he kau ʻāngeló mo e ngaahi ʻotuá, ʻa ia kuo fokotuʻu ʻi aí, ʻo maʻu hona hākeakiʻí mo e nāunau ʻi he meʻa kotoa pē, ʻo hangē ko ia kuo fakamaʻu ki hona ʻulú, ʻa ia ko e nāunaú ko ha kakato ia pea ko ha hokohoko atu ai pē ia ʻo e ngaahi hakó ʻo taʻengata pea taʻengata’ (T&F 132:19)… .

“… Ko e taimi ʻoku lele lelei ai ʻa e ngaahi fāmilí ʻo hangē ko hono tuʻutuʻuni ʻe he ʻOtuá, ʻoku hoko ʻa e feohi ʻoku maʻu aí ko e meʻa mahuʻinga taha ia ʻi he moʻui fakamatelié. Ko e palani ʻa e Tamaí ke hokohoko atu ʻo taʻengata ʻa e ʻofa mo e feohi ʻa e fāmilí.” (“The Eternal Family,” Ensign, Nov. 1996, 64–65).

Palesiteni Henelī B. ʻAealingi TokoniUa ‘i he Kau Palesitenisī ‘Uluakí: “ʻOku mahuʻinga ʻa e ʻiuniti ʻo e fāmilí … ʻi heʻetau fakaʻānaua ki he moʻui taʻengatá. ʻOku tau kamata ke fakahoko ia ʻi ʻapi, ko e ʻiuniti ia ʻoku siʻisiʻi angé, ʻa e meʻa ʻe toki mafola atu mei ai ki he Siasí pea ki he sosaieti ʻoku tau nofo ai ʻi he māmaní, ʻa ia ko e meʻa ia kuo tau fakahoko ʻi he ngaahi fāmili kuo haʻi fakataha ke taʻengata ʻaki ʻa e ngaahi fuakavá pea mo e angatonú. ʻE lava ke tau kamata pē he taimí ni ke ʻpoupouʻi ʻa e ngaahi founga ko ia kuo ʻosi fakataumuʻa mai ke ne pukepuke pea mo fakamālohia ʻa e fāmilí.’ ʻOku ou lotua te tau fai ia. ʻOku ou lotua ke mou fehuʻi angé ʻo pehē, ʻʻE Tamai, ʻe fēfē haʻaku lava ʻo teuteu?’ Fakahā kiate Ia ʻa hoʻo fie maʻu lahi ʻa e meʻa ko ia ʻokú Ne finangalo ke foaki maʻaú. Te ke maʻu ha ngaahi fakakaukau pea kapau te ke ngāue ʻo fakatatau ki ai, ʻoku ou talaʻofa atu te ke maʻu e tokoni ʻa e ngaahi mālohi ʻo e langí” (“Ko e Fāmilí,” Liahona, ʻOkatopa 1998, 23).

Makalita S. Lifeti, tokoni ʻuluaki ʻi he kau palesitenisī lahi ʻo e Palaimelí: “Ka ʻi māmani he ʻahó ni, ʻoku ʻikai ngata pē ʻi hono fie maʻu ʻe he fānaú ha faʻē mo ha tamai moʻui mateakí, ka te nau fie maʻu foki kitautolu fakataautaha ke tau maluʻi, akoʻi mo ʻofaʻi kinautolu… . Ko e talangofua fakatāutahá mo e hoko ko ha faʻifaʻitakiʻanga angatonu ʻi he tapa kotoa pē ʻo ʻetau moʻuí, ko e ngaahi lēsoni mahuʻinga taha ia ʻo e ongoongoleleí maʻá e fānaú. Ko ia fakatotolo, ako pea moʻui ʻaki ʻa e ongoongoleleí” (“Vakai Ki Hoʻomou Fānau Īkí,” Liahona, Nōvema 2006, 74–75).