Ole Atu ma le Faatuatua

O le faataitaiga e masani ai o le ole atu ma le faatuatua o Iosefa Samita ma le Uluai Faaaliga. A o saili le alii talavou o Iosefa e fia iloa le mea moni e uiga i talitonuga faalelotu, sa ia faitauina le fuaiupu nei o loo i le mataupu muamua o le Iakopo:

“A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua; ona foaiina mai ai lea ia te ia.

“A ia ole atu ma le faatuatua, aua lava ne’i masalosalo” (Iakopo 1:5–6).

Faamolemole ia matau le tulaga manaomia e ole atu ai ma le faatuatua, lea ou te malamalama o lona uiga e le gata ina taua le faailoa atu ae ia faia, o le matafaioi valalua e ole atu ma ia faatino, o le tulaga manaomia o le talanoa atu ma ia faia.

O le manatunatu loloto i lenei mau faatusipaia na taitai atu ai Iosefa e mapu i se togavao i tafatafa ane o lona fale e tatalo ai ma saili se malamalama faaleagaga. Matau fesili na taialaina ai le mafaufau ma le olega a Iosefa.

“O le taulotoaiga o lea tauaiupuga ma le lasi o taofi na ou faapea ifo ai ia te au lava: O le a se mea e ao ina ou faia? O ai o nei lotu uma ua sao; po o ua sese i latou uma? Afai foi ua sao se tasi o i latou, o le fea, ma pe faapefea foi ona ou iloa?

“O lo’u faamoemoe e fesili i le Alii o lo’u fia iloa lea po o fea o nei lotu ua sa’o, ina ia ou iloa ai po o le fea ou te auai” (Iosefa Samita—Talafaasolopito 2:10).

E le i taulai atu fesili a Iosefa i le na o le mea sa ia fia iloa ae po o le a foi le mea sa tatau ona fai! O lana tatalo sa le na o le: O le fea lotu e sa’o? O lana fesili o le: O le fea lotu e tatau ona ou auai? Sa alu Iosefa i le vao e ole atu ai ma le faatuatua, ma sa naunau foi o ia e faatino.

O le faatuatua moni e taulai atu i le Alii o Iesu Keriso ma e tau atu e le aunoa i faatinoga amiotonu. Sa aoao mai e le Perofeta o Iosefa Samita o le “faatuatua [o le] mataupu faavae muamua i le talalelei ua faaalia mai, ma o le faavae o le amiotonu uma”ma o le “mataupu faavae foi o faatinoga a tagata atamamai uma” (Joseph Smith, comp. Lectures On Faith, [1985], 1). O le na o le faatino lava ia, e le o se faatuatua lena i le Faaola, peitai o le faatino e tusa ai ma mataupu faavae sao, o se vaega autu lea o le faatuatua. O le mea lea, “ua mate lava le faatuatua pe a leai ni galuega” (Iakopo 2:20).

Na toe faamalamalama mai e le Perofeta o Iosefa o le “faatuatua ua le gata o le mataupu faavae o le faatinoga, ae o le mana foi, i tagata atamamai uma, pe o i le lagi po o le lalolagi” (Lectures On Faith, 3). O le mea lea, o le faatuatua ia Keriso e taitai atu ai i faatinoga amiotonu lea e faateleina ai lo tatou malosi faaleagaga ma le mana. O le malamalama faapea o le faatuatua o se mataupu faavae o le faatinoga ma le mana e musuia ai i tatou e faaaoga la tatou filifiliga saoloto e tusa ai ma upumoni o le talalelei, e valaaulia ai mana togisala ma faamalosiau o le Togiola a le Faaola i o tatou olaga, ma faalauteleina ai le mana ua i totonu ia i tatou, lea tatou te pulea ai i tatou lava (tagai MFF 58:28).

Ua leva ona uunaia au i le upumoni e faapea, o le tatalo anoa e manaomia ai le fesootaiga paia ma le galuega faapaiaina. O faamanuiaga e manaomia ai ni a tatou taumafaiga a o lei mafai ona tatou mauaina, ma o le tatalo, o se “ituaiga o galuega, o le auala tofia lea mo le mauaina o faamanuiaga aupito maualuluga o faamanuiaga uma” (Bible Dictionary, “Prayer,” 753). Tatou te fetuleni atu i luma ma vilita’i i le galuega faapaiaina o le tatalo pe a uma ona tatou faapea atu “amene” e ala lea i le galueaiina o mea na tatou ta’u atu i le Tama Faalelagi.

O le ole atu ma le faatuatua e manaomia ai le faamaoni, taumafaiga, tautinoga, ma le finafinau. Se’i ou tuuina atu sina faapupulaga i le uiga o la’u tala ma tuuina atu ai se valaaulia.

Atonu tatou te tatalo mo le saogalemu ma le manuia o faifeautalai faamisiona i le lalolagi atoa. Ma o se elemene masani i le tele o a tatou tatalo o se talosaga lea ia taitai faifeautalai i tagata ma aiga ua saunia mo le mauaina o le savali o le Toefuataiga. Ae o le mea moni lava, o lo’u tiutetauave ma lou tiutetauave le sailia o tagata mo faifeautalai e aoao. O faifeautalai o faiaoga i le taimi atoa; o oe ma au o le au saili i le taimi atoa. O oe foi ma au i le avea ai o ni faifeautalai i le olaga atoa, tatou te le tatalo e fai e faifeautalai faamisiona le galuega a tatou!

Afai e te tatalo ma ou tatalo ma ole atu ma le faatuatua, e faapei ona faia e Iosefa Samita—afai tatou te tatalo ma le faamoemoe e galulue a e le na o le faailoa atu o o tatou manao—ona agai ai lea i luma o le galuega o le folafola atu o le talalelei i se ala ofoofogia. O lena tatalo o le faatuatua e mafai ona aofia ai nisi o elemene nei:

• Faafetai atu i le Tama Faalelagi mo aoaoga faavae ma sauniga o le talalelei toefuataiina a Iesu Keriso, lea ua aumaia ai le faamoemoe ma le fiafia i o tatou olaga.

• Ole atu mo le lototele ma le toa e tatala ai o tatou gutu ma faasoa atu le talalelei i o tatou aiga ma uo.

• Ole atu ma le faatauanau i le Tama Faalelagi ina ia fesoasoani mai ia i tatou ina ia iloa tagata taitoatasi ma aiga o le a taliaina la tatou valaaulia ina ia aoaoina e faifeautalai i o tatou fale.

• Tautino atu e faia la tatou vaega i le asō ma lenei vaiaso ma faatoga atu mo se fesoasoani e faatoilalo ai le atuatuvale, fefe, ma le faalotolotolua.

• Saili mo le meaalofa o le iloatino—mo mata ia vaai ma taliga e faalogo ai i avanoa faafaifeautalai pe a tulai mai.

• Tatalo faatauanau mo le malosi e faatino ai pe a tatou iloa ua tatau ai.

O le a faaalia le lotofaafetai, ma e mafai foi ona talosagaina isi faamanuiaga i lena tatalo, lea o le a faaiuina i le suafa o le Faaola. Ona faaauau ai lava lea ma faateleina le galuega faapaiaina o lena tatalo.

O le mamanu foi lava lea o le fesootaiga paia ma le galuega faapaiaina e mafai ona faaaoga i a tatou tatalo mo e matitiva ma ē le tagolima, mo e mama’i ma e puapuagatia, mo tagata o aiga ma uo o loo tauivi ma faigata, ma i latou e le o auai mai i sauniga a le Ekalesia.

Ou te molimau atu e anoa le tatalo, pe a tatou ole atu ma le faatuatua ma faatino. Ou te valaaulia i tatou uma ina ia tatalo ma le faatuatua mo le poloaiga ua tuuina mai le lagi ia i tatou e folafola atu le talalelei. A tatou faia, ou te folafola atu o le a talaia faitotoa ma o le a faamanuiaina i tatou i le iloa ma galueaiina avanoa o le a tuuina mai.

O la’u faataitaiga lona lua e faamamafaina ai le taua o le tumau mausali i tofotofoga o lo tatou faatuatua. I nai tausaga talu ai sa i ai se aiga sa malaga i Europa mai le Iunaite Setete. E lei leva ona taunuu i le mea sa malaga i ai, ae ma’i tigaina se atalii e 13 tausaga. Sa muai manatu le tama ma le tina na mafua ona tiga lona manava ona o le vaivai i le umi o le malaga, ma o lea sa faaauau ai pea la latou malaga.

A o faagasolo pea le aso, sa faateteleina le tigaina o le atalii. Ua faateleina le leai o se vai i le tino. Sa tuuina atu e le tama i lona atalii se faamanuiaga faaleperisitua, ae sa iloga le leai o se suiga vave.

Ina ua mavae ni itula se tele, sa faapea ona tootuli le tina i autafa o lana tama, ma faatoga atu i le Tama Faalelagi mo le manuia o le tamaitiiti. Sa mamao ese i latou mai lo latou aiga i se atunuu e le masani ai, ma sa latou le iloa pe faapefea ona maua se fesoasoani faafomai.

Sa fesili atu le tina i lana tama, pe manao la te tatalo faatasi. Sa iloa e le tina, o le a le lava le na o le faatalitali mo le faamanuiaga sa naunau i ai; sa manaomia ona latou galulue pea. O le faamalamalama atu o loo aoga lava le faamanuiaga sa tuuina atu ia te ia, o lea na toe fautuaina ai e le tina se olega i le tatalo, e faapei ona faia e aposetolo anamua, “Le Alii e, ia e faatuputeleina lo matou faaatuatua” (Luka 17:5). O le tatalo na aofia ai le tautino atu o le faatuatuaina o le mana o le perisitua ma se tautinoga e tu mausali e faia soo se mea e manaomia e faamamaluina ai le faamanuiaga—pe afai na ogatasi lena faamanuiaga i lena taimi ma le finagalo o le Atua. E lei leva ona uma atu lena tatalo faatauvaa, ae maua le suiga lelei o le atalii.

O le gaoioiga faatuatua a le tina ma lana tama na fesoasoani e valaaulia ai le mana folafolaina o le perisitua, ma i se isi itu na faamalieina ai le tulaga manaomia tatou te “le fefinauai ai ona ua le vaaia e [i tatou], aua e le maua e [i tatou] se mau, seia uma le tofotofoina o lo outou faatuatua” (Eteru 12:6). E faapei o le falepuipui na taofia ai Alema ma Amoleka, e lei solovi ifo i lalo “vagana ina ua [uma ona totofotoina] lo la faatuatua,” ma e faapei foi o Amona ma ona uso faifeautalai latou te lei molimauina ni vavega ofoofogia i la latou galuega “seia muamua ona latou faatuatua” (tagai Eteru 12:12–15), o le mea lea, o le faamalologa o lenei taulealea e 13 tausaga, e lei tupu seia muamua ona latou faatuatua ma sa faataunuuina “e tusa ma lo latou faatuatua i a latou tatalo” (MFF 10:47).

O la’u faataitaiga lona tolu e laualuga ai le taua o le iloa ma talia le finagalo o le Atua i o tatou olaga. I ni tausaga ua mavae, sa i ai se tamā talavou sa toaga i le Lotu a o tamaitiiti, ae sa ia filifilia se ala ese i lona talavou. Ina ua uma lana tautua i le militeli, sa faaipoipo o ia i se tamaitai lalelei, ma e lei pine ae faamanuiaina lo laua aiga i ni fanau.

I se tasi aso, e aunoa ma se faali’ali’a sa matua ma’i tigaina ai le la tama teine e 4 tausaga le matua ma sa taofia ai i le falemai. Ona o le atuatuvale ma o le taimi muamua lea talu mai tausaga e tele, sa tootuli ai le tama e tatalo, ma ole atu ina ia faasaoina le ola o lona afafine. Ae sa faateteleina lona tigaina. Na faasolosolo ina lagona e lenei tama o le a le ola lona afafine, ma sa amatamata malie ona sui ana tatalo; ua le toe tatalo mo se faamalologa ae ua tatalo mo se malamalama. “Ia faia Lou Finagalo” o le uiga lea ua i ai nei ana aioiga.

E lei pine ae le toe iloa e lona afafine se mea, ma sa iloa e le tama e le o toe umi sona taimi i le lalolagi. I le faamalosia i le malamalama, faatuatuaga, ma le mana e sili atu i lo la’ua malosi, sa toe tatalo ai nei matua talavou, ma ole atu mo se avanoa e toe sii tasi ai o ia a o ala. Sa pupula mata o le afafine, ma sa sisii ae ona lima vaivai i ona matua mo se toe opo mulimuli. Ona maliu ai lea o ia. Sa iloa e lenei tama na tali mai a la’ua tatalo—sa faamafanafanaina e se Tama o i le Lagi agalelei ma le agaalofa o la’ua loto. Sa faia le finagalo o le Atua—ma sa la mauaina le malamalama. (Sii mai ia H. Burke Peterson, “Adversity and Prayer,” Ensign, Ian. 1974, 18.)

O le iloatino ma talia le finagalo o le Atua i o tatou olaga o ni elemene taua ia o le ole atu ma le faatuatua i tatalo anoa. Ae ui i lea, o le na ona ta’u o upu, “Ia faia Lou finagalo” ua le lava lea. E manaomia e i tatou taitoatasi le fesoasoani a le Atua e faamatuu atu ai o tatou loto ia te Ia.

“O le tatalo o le faatinoga lea e aumaia faatasi ai le finagalo o le Tama ma le manao o le tamaitiiti “ (Bible Dictionary, ‘Prayer,” 752–53). O le tatalo faamaulalo, faamaoni, ma le faatauanau e mafai ai ona tatou iloa ma faaogatusa i tatou lava ma le finagalo o lo tatou Tama Faalelagi. Ma o lea mea na aumaia ai e le Faaola le faataitaiga tonu a o ia tatalo i le Togalaau o Ketesemane, “na fetalai atu, Lo’u Tama e, a e finagalo i ai, ia e ave ese lenei ipu ia te au: a e aua le faia lo’u loto, a o lou finagalo… . “Ua puapuaga o ia, ua atili ai lana tatalo” (Luka 22:42, 44).

O le faamoemoega o a tatou tatalo e le o le tuuina atu ai o se lisi o manaoga po o se faasologa o talosaga ae ia faamautinoa ai mo i tatou lava ma isi ia faamanuiaga o loo naunau le Atua e tuuina mai, e tusa ai ma Lona finagalo ma Lona taimi. E faafofogaina tatalo uma ma le loto faamaoni ma e tali mai e lo tatou Tama Faalelagi, ae o tali tatou te mauaina atonu e le o mea ia sa tatou faamoemoe i ai, pe oo mai foi i le taimi tatou te mananao ai, po o le ala foi tatou te faanaunau i ai. Ua molimauina lenei upumoni i faataitaiga e tolu ua ou tuuina atu i le asō.

O le tatalo o se avanoa ma le moomooga moni o le agaga. E mafai ona sili atu nisi tatalo tatou te faia nai lo na o tatalo masani ua na o se “lisi” ae leai se uiga, ae faia se tatalo anoa a o tatou ole lelei atu ma le faatuatua ma ia faatino, a o tatou tu mausali i tofotofoga o lo tatou faatuatua, ma tatou faailoa atu ma le lotomaulalo ma talia le “aua le faia lo’u loto, a o Lou finagalo.”

Ou te ou molimau atu i le moni ma le paia o lo tatou Tama Faavavau, o Lona Alo Pele e Toatasi, le Alii o Iesu Keriso, ma le Agaga Paia. Ou te molimau atu e faafofoga ma tali mai lo tatou Tama i a tatou tatalo. Ia taumafai i tatou taitoatasi ma se faanaunautaiga sili atu e ole atu ma le faatuatua, o lona uiga ia matuai anoa moni a tatou tatalo. Ou te tatalo atu ai i le suafa paia o le Alii o Iesu Keriso, amene.