Elaine S. Dalton

A o avea ma se teine talavou, sa matuai fiafia lava ia Elaine Schwartz Dalton i le siva. Ae i le avea ai ma se tina talavou faatasi ma se fanau e toaono, na ia iloa ai ua le toe talafeagai le siva, o lea sa ia amata ai loa ona tamoe e avea o se gaoioiga e fiafia i ai i aso taitasi. O le taimi muamua sa ia tamoe ai mo laa e 10 ona savali lea mo laa e 10 seia oo lava ina ua mafai ona ia tamoe i le maila. Talu mai lena amataga faigofie, ua 18 malafoni ua ia tamoe ai.

“O le tamoe ou te maua ai se taimi e to’a ai lo’u mafaufau ma manatunatu ai i le olaga,” o le saunoaga lea a Sister Dalton.

Na soifua mai Sister Dalton i Ogden, Iuta, ISA, i le aso 1 o Novema, 1946, i ona matua o Melvin Leo Schwartz ma Emma Martin Schwartz. Sa faaipoipo atu ia Stephen Eugene Dalton i le aso 13 o Setema, 1968, i le Malumalu o Sate Leki. Sa maua lona faailoga o le tagata malaga i le Igilisi mai le Iunivesite o Polika Iaga. Sa ia auauna atu i le fono faatonu aoao a Tamaitai Talavou ma se fesoasoani muamua ma le lua i le au peresitene aoao o Tamaitai Talavou. Sa ia auauna atu foi o se peresitene o Tamaitai Talavou a le siteki, fautua o le Lora, fautua i se Aualofa a le autalavou matutua nofofua, ma se faiaoga o le Aualofa.

I le avea ai ma peresitene aoao fou o Tamaitai Talavou, na saunoa ai Sister Dalton, “O la’u savali autu i tamaitai talavou o le Ekalesia o le mea lava lea e tasi latou te faalogo i ai mai o latou matua i taimi uma latou te savavali ai i fafo i le faitotoa i luma: ‘Ia manatua po o ai oe.’ ”

Ua faamoemoe o ia e fesoasoani atu i tamaitai talavou ia malamalama o i latou o afafine o lo latou Tama Faalelagi, o le e alofa ia i latou. “Latou te tautalagia lena mea i le autu a Tamaitai Talavou i vaiaso taitasi, ae mo le toatele o tamaitai talavou, e lei magoto ifo lava i o latou loto,” na saunoa ai Sister Dalton. “A malamalama se tamaitai talavou o ia o se afafine o le Atua, e faamatala mai ai isi ona sootaga uma.”

Na ia uunaia i latou ina ia mama. “O se tasi o galuega taua na faapolopoloina ai i latou o le faia lea o galuega faalemalumalu,” na ia saunoa ai. “E leitioa a osofai mai Satani, e faalavelaveina tamaitai talavou mai le agavaa. Ia mama. O loo i ai le mana i se olaga mama.”