O Le Ekalesia Moni ma le Ola

A o tatou lagolagoina ia Thomas Spencer Monson e avea ma perofeta, tagatavaai, ma talifaaaliga, ma Peresitene o le Ekalesia, faapea ma D. Todd Christofferson e avea ma se Aposetolo ma se uso o le Korama a Aposetolo e Toasefululua, ua tatou vaaia ma lagonaina ai le faamaoniga O Le Ekalesia a Iesu Keriso o le Au Paia o Aso e Gata Ai, e moni ma o loo ola foi. Na fetalai le Alii ia i latou o e na Ia toefuatai mai i ai le Ekalesia i aso e gata ai. Na Ia fetalai atu ia i latou e faapea “e mafai ona maua le mana e faataatia ai le faavae o lenei ekalesia, ma ia aumaia i fafo nai le mea lilo ma le pogisa, le ekalesia ola e tasi ma le faamaoni i luga o le fogaeleele atoa, ua fiafia i ai au, o le Alii, o loo tautala atu i le ekalesia atoa a e le o tagata taitoatasi—

“Aua o a’u o le Alii e le mafai ona vaai atu i le agasala ma faatagaina ai sina mea itiiti lava;

“A e ui i lea, o le salamo ma faia poloaiga a le Alii o le a faamagaloina;

“A o le le salamo, o le a aveeseina lava mai ia te ia le malamalama lea na ia maua; aua ua fetalai mai le Alii o ‘Au e le uunaiina pea le tagata e lo’u Agaga.”¹

O le Ekalesia moni lenei, le Ekalesia moni e tasi, aua o loo i ai i totonu ia ki o le perisitua. E na o totonu o lenei Ekalesia ua tuuina mai i ai e le Alii le mana e faamaufaailogaina ai i le lalolagi ma faamaufaailogaina ai i le lagi e pei ona sa Ia faia i le taimi o le Aposetolo o Peteru. O na ki na toefuataiina mai i a Iosefa Samita o le na faatagaina e faaee atu i luga o uso o le Korama a le Toasefululua.

Ina ua fasiotia le Perofeta o Iosefa, sa manatu fili o le Ekalesia o le a mate ai le Ekalesia. Sa latou manatu o se mea na faia e se tagata faaletino ma o le a fano faatasi ai ma ia. Ae na faivavale o latou faamoemoega. O le Ekalesia e moni, ma o loo i ai foi le mana e ola ai pea, e tusa lava pe maliliu i latou o e na filifilia e taitaia mo se vaitaimi.

Ua tatou vaaia i le asō se faataitaiga o le Ekalesia moni ma le ola lava lenei. O ki o le perisitua o loo umia e tagata i la le tino, ae ua uma ona saunia e le Alii le auala e faatumauina ai pea ona gaoioi nei ki i luga o le fogaeleele pe afai lava e faaalia e tagata lo latou faatuatua e le gata i le i ai o ki i le lalolagi ae ua tuufaasolo mai foi i le finagalo o le Atua i Ana auauna filifilia.

Sa lei agavaa pea tagata o le Atua e mauaina le aafiaga ofoofogia lea sa tatou faasoaina i lenei aso. Sa faaauau pea ona faaaogaina e Aposetolo ia ki na Ia tuuina atu ia i latou ina ua mavae le Afio Ae o Keriso. Ae ona o le le usiusitai ma le leai o se faatuatua i tagata, o lea na maliliu ai Aposetolo e aunoa ma le tuufaasoloina atu o ki i nisi e suitulaga i ai. Tatou te taua lena vaitau matautia “o le Liliuese.” Ana fai e maua e tagata o le Ekalesia i na aso le avanoa ma le naunautaiga e faaaoga ai le faatuatua e pei ona outou maua i nei aso, semanu e le aveeseina e le Alii ia ki o le perisitua mai le lalolagi. O se aso la lenei e tulagaese ma faavavau lona taua i le talafaasolopito o le lalolagi ma le fanau a lo tatou Tama Faalelagi.

O lenei, o la tatou matafaioi o le tumau lea i le agavaa mo le faatuatua e moomia mo i tatou ina ia faataunuuina ai la tatou folafolaga e lagolagoina i latou o e ua valaauina. Sa matuai fiafia le Alii i le Ekalesia i le amataga o le Toefuataiga, e pei foi ona i ai o Ia i aso nei. Ae sa ia lapataia tagata i na taimi, e pei ona Ia faia nei, e le mafai ona Ia vaai atu i le agasala ma faatagaina ai sina mea itiiti lava. Mo i tatou e lagolagoina i latou o e ua valaauina i le asō e tatau ona tatou iloiloina o tatou olaga, salamo pe a talafeagai ai, ia folafola atu e tausia poloaiga a le Alii, ma mulimuli i Ana auauna. Ua lapatai mai le Alii e faapea afai tatou te le faia na mea, o le a alu ese le Agaga Paia, tatou te le toe maua le malamalama lea sa tatou mauaina, ma o le a le mafai ona tatou tausia le folafolaga ua tatou faia i lenei aso e lagolagoina ia auauna a le Alii i Lana Ekalesia moni.

E tatau ia i tatou taitoatasi ona faia se iloiloga a le tagata lava ia. Muamua, e moomia ona tatou fuaina muamua le loloto o lo tatou faafetai mo lo tatou auai i le Ekalesia moni a Iesu Keriso. Lua, e moomia ona tatou iloa e ala i le mana o le Agaga Paia ia auala e mafai ai ona tatou faia ia sili atu ona lelei i le tausiga o poloaiga.

Ua tatou iloa mai valoaga e faapea e le gata o le a le toe aveesea le Ekalesia moni ma le ola mai le lalolagi, ae o le a faateleina le lelei. O le a suia o tatou olaga mo le lelei a o tatou faataitaia le faatuatua e tau atu i le salamo, ia manatua pea le Faaola, ma ia matuai taumafai e tausia Ana poloaiga. O loo aofia ai i tusitusiga paia ia folafolaga e faapea afai e toe afio mai le Alii i Lana Ekalesia o le a Ia silafia le sauniaina faaleagaga mo Ia. E tatau ona tatou naunautai ma faamoemoe i ai i lena mea. E tatau ona tatou faia ia sili atu ona lelei. Tatou te mafai. Ma o le a tatou faia lava.

Atonu o se mea atamai i lenei aso taua ona fuafua e lagolagoina ma lo tatou faatuatua ma a tatou tatalo i latou uma o loo tautuaina i tatou i le malo. Ua ou malamalama lelei i le mana o le faatuatua o tagata o le Ekalesia e lagolagoina ai e ua valaauina. I vaiaso ua tuanai atu sa ou lagonaina ai i ni auala mamana ia tatalo ma le faatuatua a tagata o e ou te le iloaina ae latou te iloaina au o se tagata ua valaauina e auauna atu e ala i ki o le perisitua. O le a faamanuiaina Peresitene Thomas S. Monson i lo outou faatuatua lagolago. O le a faapena foi ona liligi ifo faamanuiaga i lona aiga ona o lo outou faatuatua ma a outou tatalo. O i latou uma na outou lagolagoina i lenei aso o le a lagolagoina e le Atua ona o lo latou faatuatua faapea ma lo outou faatuatua.

O le a maua e tagata uma ia avanoa e lagolagoina ai e ala i le auaunaga latou te tuuina atu i le suafa o le Atua. O le Ekalesia o se malosiaga mamana mo le faamanuiaina o ona tagata faapea ma tagata uma i le lalolagi. Mo se faataitaiga, ua faia e le Ekalesia se galuega fesoasoani alofa maoae i le lalolagi atoa. Na mafaia uma lena mea ona o le faatuatua o tagata ma uo e faapea o loo soifua le Atua ma e finagalo le Alii ina ia fesoasoani atu i e uma e moomia le fesoasoani o e e mafai ona Ia aapa atu i ai e ala i Ona soo faamaoni.

E le gata i lea, e auala mai i le Ekalesia lenei ma sauniga o i ai ona oo atu faamanuiaga o le mana o faamauga i le lalolagi o agaga. O se Ekalesia moni lenei ma le ola, e aapa atu e oo lava i e ua le o toe ola. A o ia te oe le faatuatua e saili ai igoa o ou tuaa, a o e alu atu i le maota o le Alii e tuuina atu ia i latou ia sauniga e fai ai ma sui, ua e lagolagoina lava lenei galuega tele o lona faamoemoega o le tuuina atu lea o le faaolataga i fanau uma a le Tama Faalelagi e o mai i lenei lalolagi.

Ou te fia tautala i nisi o mafuaaga e tatau ai ona tatou maua le loto faafetai mo se Ekalesia moni ma le ola. Ona ou fautuaina atu lea o nisi o auala ua ou vaaia ua saunia ai le Ekalesia mo le toe afio mai o le Faaola. Ma le vaega mulimuli, o le a ou tuuina atu la’u molimau i le auala ua ou iloa ai o le Ekalesia moni lenei ma le ola.

O le mea silisili ou te faafetai mo lo’u iloa o le mana faamama lea e maua e ala i sauniga e faatinoina i le mana o le perisitua. Sa ou lagonaina le faamagaloga ma le faamamaina e ala i le papatisoina e i latou o i ai le pule. Sa ou lagonaina le mu i totonu o lo’u fatafata e mafua mai ona o upu na fofogaina e auauna a le Atua: “Talia le Agaga Paia.”

O lo’u lagona o le faafetai e mafua mai foi i faamanuiaga i lo’u aiga. O le mana o faamauga ma lo tatou malamalama i ai lea e suia ma liliuina ai o tatou olaga faaleaiga iinei ma o tatou faamoemoega mo le olioli i le olaga faaleaiga i le lalolagi a sau. O le manatu ma le faamoemoe ina ia mafai ona ou maua ia ni mafutaga e faavavau e faamalosia ai au a o onosaia ia faigata o le tuueseeseina ma le tuua toatasi lea ua avea o se vaega o le olaga faaletino. O le folafolaga i e faamaoni i le Ekalesia a Iesu Keriso o le Au Paia o Aso e Gata Ai e faapea e mafai ona tatou maua ia sootaga ma se faalauteleina o aiga i le faavavau. O lena faamautinoaga e suia e faavavau ma mo le lelei o a tatou mafutaga uma faaleaiga.

Mo se faataitaiga, ua ou i ai i se tulaga o lo’u olaga ona o le vavamamao ua le mafai ai ona ou iloaina lelei ia fanau a la’u fanau, ma e i ai le taimi, e oo ai foi i fanau a fanau a la’u fanau. O loo i ai foi tagata e lei maua lava le avanoa e faaipoipo ai pe avea ai ma matua o e o loo i ai foi le faanaunauga lava lea e tasi e pei o au o le latalata atu lea i le aiga. Talu ai ona o le toefuataiga o le malamalama i aiga e faavavau, ua sili atu ai ona tatou faamoemoe ma sili atu ona agalelei i a tatou sootaga uma faaleaiga. O le fiafiaga sili i lenei olaga e tutotonu lea i aiga e pei ona o le a latou i ai i lalolagi a sau. Ou te matuai faafetai mo le faamautinoaga ua ou maua e faapea afai tatou te faamaoni, o fegalegaleaiga lava nei o loo tatou olioli ai i lenei olaga o le a faavavau ma i tatou i le lalolagi a sau, i le mamalu e faavavau.²

E mafai ona ou iloaina le faamaoniga o le valoaga o le faaatoatoaina o le Ekalesia. Mo se faataitaiga, a o o’u femalagaai ai ma ou iloaina tagata o le Ekalesia, ua ou vaaia o loo mautu se agaigai i luma i o latou olaga. I le faigofie o lo latou faatuatua ma le usiusitai, ua suia ai e le Togiola ma faamalamalamaina tagata. Ou te masani ona i ai soo i sauniga ma ni tagata e iloga le lotomaulalo o e ua faatagaina e aoao atu ia lesona ma tuu atu ni lauga lea o loo i ai i totonu le mana e pei o ia na tuuina atu e Liae ma Nifae, o atalii o Helamana. Tou te manatua le tala:

“Ma ua oo ina talai atu e Nifae ma Liae i sa Lamana ma le mana tele ma le pule, aua ua tuuina mai le mana ma le pule ia te i laua ina ia la tautala atu; ma ua foaiina mai ia te i laua upu la te fai atu ai.”³

Ou te mautinoa o le moomooga faisoo o Peresitene Gordon B. Hinckley o le a tuuina atu i ai. Sa ia aoao atu e faapea o i latou uma o e o mai i le Ekalesia e mafai ona faatumauina i le faaaumeaina atoatoa pe afai e faafaileleina i latou i le afioga lelei a le Atua. Ou te manatuaina lona faapea atu o upu mulimuli o le a ia tautala i ai i le faaiuga o lona sauniga o le “faatumau, faatumau, faatumau.” O loo olaola pea ana upu i le taitaiga a Peresitene Monson ma i tatou uma lava a o tatou agavaa ina ia maua le mana o se Liae ma se Nifae ina ia faafaileleina i le afioga lelei a le Atua. Ou te mautinoa o le a outou faaauau, e pei o au, ona maofa i le Au Paia o Aso e Gata Ai faamaulalo o e aoao atu i aiga, faiaoga asiasi, ma tautatala atu ma le mana tele i a latou uo e le auai i le Ekalesia.

Mo le tele o tausaga tatou te manatuaina ai upu a Peresitene Tavita O. MaKei, “O tagata taitoatasi uma o se faifeautalai.” Ou te mautinoa o le a oo mai le aso ona o le faatuatua o tagata o le Ekalesia o le a tatou vaaia ai se faateleina o le numera o tagata e valaaulia ina ia faalogo i le afioga lelei a le Atua ma o mai i totonu o le Ekalesia moni ma le ola.

O loo i ai se isi tulaga alualu i luma ou te mautinoa o le a oo mai. O loo sailia e aiga i le Ekalesia atoa ia ni auala e faamalolosia ma puipuia ai a latou fanau ina ia tetee atu i mea leaga o loo siomia ai i latou. I nisi o tulaga, o na matua ua matuai taumafai lava e toe aumaia i o latou aiga nisi ua se ese. Ou te mautinoa o le a i ai, se taui faateleina e tuuina mai e le Atua mo a latou taumafaiga. O i latou o e le fiu o le a latou iloaina e le fiu le Atua ma o le a Ia fesoasoani ia i latou.

O le tele o lena fesoasoani o le a sau mai ia i latou o e ua valaauina e auauna i le Ekalesia. O le agaga o le aapa atu o le a faateleina i le tele o auala e pei ona sa i ai Epikopo Thomas Monson i lona talavou, e musuia i auala faatino ina ia valaaulia ma faamalosiau i latou o e, mo sina taimi, ua le iloaina ia faamanuiaga o loo teuina e le Atua mo i latou. O loo manatuaina e Peresitene Monson i le taimi nei ia tagata sa ia auauna i ai ina ia laveaiina a o avea o ia ma o latou epikopo. Ou te faamoemoe mo i tatou uma ia mautinoa o le a taitaiina i tatou e le Atua e aapa atu, ma toe aumai i latou e finagalo le Atua tatou te toe aumaia a o tatou foi atu i le aiga ia te Ia.

O se isi tulaga ua faaleleia ua ou vaaia ua oo mai i le malo o se manao lea ma se malosi e aapa atu ai i e matitiva ma e le tagolima. Ua ou vaaia ma le maofa se faateleina o tagata o le Ekalesia i le manatu alofa mo e aafia i mala faalenatura i le lalolagi atoa. I faasilasilaga o maliu ua ou vaaia ai talosaga a aiga afai e i ai ni foai tautupe ia ave i le Tupe Faaagaga mo Aoga po o le Tupe mo Fesoasoaniga Alofa a le Ekalesia.

Sa tagai le Perofeta o Iosefa Samita i lena atinaega matagofie. Na ia saunoa faapea a liua moni se tagata o le a ia manao e faasopolia le lalolagi atoa i le tausiga o fanau a le Tama Faalelagi.⁴ O lea ua amata ona tupu lena mea i le toatele o tagata o le Ekalesia. O le mea e ofoofogia ia te au, o le mamanu o le foai atu ia i latou o loo moomia le fesoasoani ua faalautele atu ia i latou o e utiuti le tamaoaiga ma e foliga mai e le o aafia e tusa lava pe o tatou i ai i ni taimi lelei po o le faaletonu o le tamaoaiga. O se faamaoniga lena ia te au o loo faateleina pea ona aoga le Togiola i tagata.

O la’u molimau o le Ekalesia moni lenei ma le ola sa amataina mai i lo’u laitiiti. O se tasi o mea ou te manatuaina i lo’u laitiiti o se sauniga lea o le konafesi sa faia i se potu na totogi o se faletalimalo. Sa lauga ai se tamaloa ou te le iloaina pe ou te iloa foi lona igoa e oo mai i lenei taimi. Na pau le mea na ou iloa o ia o se tagata na auina atu i si o matou tamai itu i le misiona e se tasi sa umia le perisitua. Ou te le iloa mea sa ia tautala ai. Ae sa ou maua se molimau mamana a e lei atoa le valu o o’u tausaga, ou te lei papatiso foi, sa ou faalogo i se auauna a le Atua i le Ekalesia moni a Iesu Keriso. E le o le potu na totogi, e le o le toatele o le potopotoga, lea sa matua toalaiti lava, ae o se molimau mautinoa sa faamanuiaina ai au i lena taimi i le i ai i se sauniga a le Ekalesia moni.

Ina ua matou siitia atu ma lo’u aiga i siteki ua faatulagaina o le Ekalesia i tausaga o lo’u talavou, o le taimi muamua lea sa ou lagonaina ai le mana o korama a le perisitua faapea ma se epikopo alofa. Ou te manatua pea ma mafai ona ou lagonaina le mautinoa na oo mai a o o’u nofo i se korama a ositaulaga e sosoo ma se epikopo ma iloa ai o loo ia te ia ia ki o se faamasino moni ia Isaraelu.

Na vave foi ona oo mai lena lava molimau i lo’u olaga, i ni Aso Sa se lua, e tasi i Albuquerque, Niu Mekisiko ma le isi i Boston, Massachusetts. I tulaga nei taitasi sa ou i ai i le aso sa faatulagaina ai se siteki mai se itu. Na foliga mai o alii e masani ai sa ou iloaina lelei sa valaauina o ni peresitene o siteki. Sa sii i luga lo’u lima i na aso e pei ona outou faia i le asō ma maua se molimau na oo mai ia te au faapea ua valaauina e le Atua Ana auauna ma o le a faamanuiaina au i la latou auaunaga ma mo le lagolagoina o i latou. Ua le mafaitaulia foi ona ou lagonaina lena vavega i le Ekalesia i le taimi nei.

Sa ou vaaia i aso ma masina na sosoo mai ai ina ua maea lo latou lagolagoina, le siitia i luga o na peresitene o siteki i o latou valaauga. Ua ou vaaia foi lena lava vavega i le auaunaga a Peresitene Monson ina ua ia maua le valaauga e avea ai ma perofeta ma Peresitene o le Ekalesia ma faaaogaina ki uma o le perisitua i le lalolagi. Na oo mai faaaliga ma musumusuga ia te ia a o o’u i ai, lea ua faamautuina ai ia te au o loo faamamaluina e le Atua na ki. O ki o se perisitua lea na ta’ua i afioga a le Alii, “ua leai sona amataga po o sona gataaga.”⁵

Ou te tuuina atu ia te outou la’u molimau paia o le Ekalesia moni lenei ma le ola a Iesu Keriso. O le a tali mai e le Tama Faalelagi a outou tatalo faamaoni ina ia outou iloa ai lena mea mo outou lava. E mafai ona outou maua se molimau o valaauga sa outou lagolagoina i le asō e mai le Atua. E le gata i lea, e mafai ona outou iloa o sauniga o loo faatinoina i totonu o lenei Ekalesia e mafai ona faamamaina ai agaga ma fusifusia ai i le lalolagi ma le lagi, e pei ona sa i ai i aso o Peteru, Iakopo, ma Ioane. O na ki ma sauniga ua toefuatai mai nei i o latou atoatoaga e ala mai i le Perofeta o Iosefa Samita ma ua tuufaasolo mai e ala mai i e na suitulaga ia te ia. O Iesu o le Keriso. O loo soifua o Ia. Ou te molimau atu o Thomas S. Monson o Lana perofeta soifua. O Le Ekalesia a Iesu Keriso o le Au Paia o Aso e Gata Ai e moni, ma e ola pea. Ou te molimau atu ai, i le suafa o Iesu Keriso, amene.