Mauaina o se Molimau i le Atua le Tama; Lona Alo o Iesu Keriso; ma le Agaga Paia

O au foi, e pei o outou, ou te talisapaia lo’u auai i le faapotopotoga paia. Ae ua ou manatu, atonu o le a ou tuuina atu se vaega o se aoaoga faavae ma se fesoasoani. Ina ua sii o tatou lima i le sikuea i le faapotopotoga paia, sa le na o se palota ae sa tatou tuuina atu i tatou lava i se tautinoga faalilolilo ma patino, o se feagaiga lava, e lagolago ma faamamalu i tulafono, sauniga, poloaiga, ma le perofeta a le Atua, le Susuga a Peresitene Thomas S. Monson. O lea ou te talisapaia ai lo’u auai faatasi ma outou ma le siiina o lo’u lima i le sikuea.

Ou uso e ma tuafafine, o ni nai masina ua tuanai, na ou maua ai se aafiaga faalotomaualaloina ua faapea ona aumaia ai ia te au le avanoa ou te mafaufau loloto ai ma le agaga faafetai i le meaalofa o le ola. I le gasologa o lenei aafiaga, ua faaauau ai pea ona ou mafaufau loloto i la’u molimau e uiga i le Atua lo tatou Tama Faavavau, ma Lona Alo ulumatua, o lo tatou Faaola ma le Togiola, o Iesu Keriso, ma le auala na ou mauaina ai la’u molimau e uiga i le Tama ma le Alo.

O loo saili ma taumafai tagata uma i le lalolagi atoa, i soo se tapuaiga ma talitonuga e fia iloa, Po o ai le Atua? O le a Lana faia ma Iesu Keriso? Ma o le a la tatou faia ma i Laua?

Ua ou iloa ma le mautinoa o loo soifua lo tatou Tama Faalelagi ma Iesu Keriso. E moni lava le Togiola. O le Atua le Tama ma Iesu Keriso o ni tagata eseese, mavaevae, ma e faavavau. La te silafia i tatou o ni tagata taitoatasi, ma La te faafofoga ma tali mai ia tatou talosaga faamaoni. Na molimau atu le Faaola i tagata o le Lalolagi Fou: “Ou te molimau atu i le Tama, o le Tama foi e molimau mai ia te au, a o le Agaga Paia e molimau i le Tama atoa ma a’u.”¹ Ua molimau mai le Agaga Paia ia te a’u ua moni nei mea.

Na amata ona maua la’u molimau a o o’u talavou ina ua ou mafaufau i saunoaga faaperofeta e 13 na taua o Mataupu Faavae o le Faatuatua, na tusia e Iosefa Samita. Sa matou taulotoina i le Peraimeri. Ua faamatalaina ai talitonuga faavae o le talalelei toefuataiina a Iesu Keriso. O le vaega muamua o nei faamatalaga e faitauina faapea, “Matou te talitonu i le Atua, le Tama Faavavau, ma Lona Alo o Iesu Keriso, ma le Agaga Paia.”²

Na silafia e Iosefa Samita le natura o le toatolu o le Aigaatua e ala i [ona] aafiaga patino. A o avea ma se taulealea e 14 tausaga, sa ia fia iloa po o le fea o le tele o lotu Kerisiano e tatau ona ia auai. I le Tusi Paia, i le tusi a Iakopo o le Feagaiga Fou, e faapea, “A e afai ua leai se poto i so outou, ina ole atu ia i le Atua.”³ I [lona] usiusitai sa tootuli ai o ia e tatalo ma na faapea ona asiasi mai ai [ia te ia] le Atua le Tama ma Lona Alo o Iesu Keriso. Sa ia faamatalaina i Laua o ni “Tagata se Toalua, e le mafaamatalaina lo laua mamalu ma lo laua pupula, o tutu mai i luga ae [o Iosefa] i le ea. Sa fetalai mai le tasi o i laua [o le Atua le Tama] ia te [ia], ma sa ia tau [lona] igoa ma fetalai mai, a o tusi ane lona aao i le tasi—O Lou Atalii Pele lenei. Faalogo ia te Ia!”⁴

Mai lava i lo’u tamaitiiti, na avea lava le aafiaga o Iosefa Samita ma se taiala ia te au—ma e mafai foi ona avea ma taiala mo i tatou uma. Na iloa e le perofeta talavou le mea moni e uiga i lo tatou Tama Faalelagi ma Lona Alo o Iesu Keriso, aua sa saili o ia ia iloa mai tusitusiga paia le finagalo o lona Tama Faalelagi, ona usitai lea i ai ma le faatuatua.

O le mamanu lenei na faatulagaina ma na atoatoa ona faataitaia e le Faaola e pei ona tusia i le Tusi Paia. A o avea Iesu Keriso ma se tamaitiiti e 12 tausaga le matua, na maua atu o Ia e Lona tina o Maria, ma Lona tama faalelalolagi o Iosefa, o aoao atu i totonu o le malumalu. Na fetalai atu Iesu ia te i laua, “Lua te le iloa ea e tatau ona ou i le fale o lo’u Tama?”⁵ Peitai e le’i fetalai Iesu e uiga i le galuega a Iosefa. Sa fetalai o ia e uiga i le galuega a Lona Tama moni ma le Faavavau oi le Lagi.

E taua le auala na faailoa atu ai e le Atua le Tama Lona Alo i nisi o taimi: “Ua papatisoina Iesu, ona maliu ae loa lea o ia nai le vai… . Faauta foi, o le siufofoga mai le lagi, ua faapea mai, O lo’u atalii pele lena, ua ou fiafia lava ia te ia.”⁶ Ma le isi, i luga o le Mauga o Liua, “ona oo mai lea o le siufofoga mai le ao, ua faapea mai, O lo’u Atalii pele lena: ia outou faalogo ia te ia.”⁷

Ina ua faaali atu Iesu i le konetineta o Amerika, sa faailoa atu o Ia i le ala lava lena e Lona Tama: “Faauta, o lo’u Atalii Pele, ou te fiafia ia te ia, ua ou faamamaluina lo’u igoa ia te ia—Ia outou faalogologo ia te ia.”⁸ Ma i le toeitiiti lua afe tausaga mulimuli ane, na fetalai mai ai foi nei lava upu i le taulealea o Iosefa Samita: “O Lou Atalii Pele lenei. Faalogo ia te Ia!”⁹

E matuai taua tele le faapea, soo se taimi e finagalo ai le Tama Faalelagi e faailoa mai Lona Alo ia i tatou, Na te poloaiina i tatou ina ia tatou faalogo—ia “lagona” fetalaiga a Iesu.

O ai lenei Iesu? Na auai faatasi o Ia ma Lona Tama i le Foafoaga o le lalolagi, ma i lalo o le taitaiga a Lona Tama, na faatino ai e ia le foafoaina o mea uma ua i luga o le fogaeleele. “Ma e le mafaitaulia lalolagi ua ou foafoaina; ma ua ou foafoaina foi ia lalolagi mo le fuafuaga o ia te au lava; ma na ou foafoaina ia lalolagi e ala atu i le Atalii, o lo’u Atalii lea e Toatasi na Fanaua.”¹⁰ O Iesu Keriso o le Toatasi na Fanaua a le Tama i le tino. O Ia o lo tatou Puluvaga i le Tama. O Ia o le Faaola o le na tuuina mai Lona lava soifua mo i tatou ma fautua mo i tatou i le Tama. O le mea lea, tatou te tatalo ai i le Tama Faalelagi i le suafa o Lona Alo, o Iesu Keriso. O Iesu, o le Atalii, e le o Lona Tama, ae e pei o Ia o Lona Tama. O Ia foi ua faamamaluina i le pule ma le mana.

E ese le manaia ma lo’u faagaeetia pe a mafaufau atu i le ala e talanoa ai Iesu i Lona Tama. I Lana Tatalo Faapuluvaga maoae, lea o loo maua i le Tusi Paia i le tusi a Ioane, e le sese lava le manino o le faailoa atu e Iesu o Ia o le Atalii. Faafofoga i Lana fetalaiga a o Ia lipoti atu le faamaeaina ma le usiusitai o Lana misiona i le lalolagi i Lona Tama oi le Lagi.

“Ua ou tuu atu le viiga ia te oe i le lalolagi: ua ou faaumaina le galuega na e tuuina mai ia te au ou te faia… .

“O upu foi na e tuu mai ia te au, ua ou tuuina atu ia te i latou [o le au soo] … , ua talitonu foi i latou ua e auina mai au… .

“E faapei ona e auina mai au i le lalolagi, ua faapea foi au ona auina atu o i latou i le lalolagi… .

“O le manuia foi ua e foai mai ia te au, ua ou foai atu ia te i latou; ina ia tasi o i latou, faapei o i taua ua tasi.”¹¹

E ala i mea na tutupu i le galuega a le Faaola, e moni na iu lava ina tasi le au soo ae e le o o latou tino faaletino. Sa tasi i latou i le faamoemoe e tasi ma le alofa. O le tasi lenei o le Atua le Tama ma Lona Alo o Iesu Keriso, o loo ta’ua i totonu o tusitusiga paia. O i Laua foi o ni tagata eseese, ae e tasi i Laua i le faamoemoe, i lo Laua alofa mo i tatou, faapea ma le galuega o loo Laua faia e fai ma o tatou sui.

Sa tatalo foi le Faaola:

“Lo’u Tama e, ia e tuu mai ia te au le manuia … o le manuia lava sa ia te i taua ma oe a o lei faia le lalolagi… .

“… Ina ia iloa ai foi e le lalolagi, na e auina mai au ma e alofa mai ia te i latou, faapei ona e alofa mai ia te au.

“… Aua ua e alofa mai ia te au a o lei faavaeina le lalolagi.”¹²

Oi, se finagalo ina a tele o Iesu ina ia tatou iloa le Tama e pei ona Ia silafia. Na tatalo o Ia:

“Le Tama amiotonu e, e lei iloa oe e le lalolagi: a o au ua ou iloa oe, ua iloa foi oe e i latou nei [o le au soo] ua e auina mai au.

“Ua ou faailoa atu foi lou suafa ia te i latou, ou te faailoa atu ai foi: ina ia i totonu ia te i latou le alofa ua e alofa mai ai ia te au, o au foi i totonu ia te i latou.”¹³

Na faaalia e Iesu Lona alofa tele mo i latou o e na filifili e mulimuli atu ia te Ia a o tatalo o Ia mo lo latou puipuiga: “Ou te le ole atu ina ia e ave ese ia te i latou i le lalolagi, a ia e tausia ia te i latou ina nei leaga.”¹⁴ Sa tatalo o Ia mo i tatou, uso e ma tuafafine.

Ona ole atu lea o le Faaola ma le agavaivai ina ia mafai ona latou [o lona uiga o i tatou] toe faatasi ma Ia: “Lou Tama e, o lou loto lenei ia te i latou ua e foaiina mai ia te au, ina ia latou faatasi ma au i le mea ou te i ai.”¹⁵

I le sauniuni atu mo le taulaga togiola, na tatalo ai Iesu i Lona Tama i le Faatoaga o Ketesemane, a o Ia tauaveina i Ona lava luga ia agasala, mafatiaga, ma puapuaga o tagata uma. I na lava itula a o tuua toatasi, sa Ia toe faamanino mai ai e faapea, Na te lei faia Lana lava galuega. Na tatalo o Ia, “Lou Tama e, afai e mafai ia ave ese lenei ipu ia te au: ae aua le faia lo’u loto, a o lou finagalo.”¹⁶ I lenei taimi aupito taua mo Ia ma mo i tatou uma, sa le’i talanoa o Ia ia te Ia lava pe na faalagolago foi i Lona lava malosi. Na valaau atu o Ia i Lona Tama, o le Atua Pule aoao, ina ia fesoasoani ia te Ia ma tuu atu o Ia e fai le finagalo o Lona Tama; ma na auina mai e Lona Tama se agelu “mai le lagi, ua faamalosi ia te ia.”¹⁷ E ese lo’u fiafia i le alofa o le Tama mo Lona Alo faapea ma i tatou uma lava.

Mai lava i le taimi a o lei faavaeina le lalolagi e oo i toe taimi i luga o le satauro, na faia ai lava e le Faaola ia galuega a Lona Tama. Sa Ia faamaeaina le galuega na auina mai o Ia e fai. O le mea lea, tatou te le tau mafaufau ai po o ai na fetalai atu i ai o Ia, i le taimi na i ai i luga o le satauro, “ona fetalai ane lea o ia, Ua taunuu,”¹⁸ ma “valaau , … ua leotele, Lou Tama e, ou te tuuina atu lou nei agaga i ou aao: ua na fetalai ia upu, ona to ai lea o lana manava.”¹⁹ Ua tatou iloa sa tatalo o Ia i Lona Tama Faalelagi.

Ou te molimau atu o loo soifua lo tatou Faaola. O Ia o le Atalii e Toatasi na Fanaua o le Tama, ma o le a toe afio mai o Ia i lenei lalolagi e nofotupu ai. O Ia o Iesu Keriso, o Le Paia o Isaraelu, “ua tumu i le alofa tunoa, ma le alofa, ma le upu moni… . O ia lena e afio mai e aveeseina agasala a le lalolagi, ioe, o agasala a tagata uma o e tutumau i le faatuatua i lona suafa.”²⁰ O Ia o le Alo moni o le Atua, o le na toetu mai le oti i le lona tolu o aso, ma aumaia ai le moni o le toetu i tagata uma o le a o mai i le lalolagi. Ou te molimau atu foi o loo soifua le Atua o lo tatou Tama Faavavau ma e alofa ia te i tatou taitoatasi, aua o i tatou o Lana fanau. E maoae tele Lona alofa ua faapea ona Ia auina mai ai Lona Atalii e Toatasi na Fanaua i le lalolagi ina “ia le fano se tasi e faatuatua ia te ia, a ia maua e ia le ola e faavavau.”²¹

I le avea ai ma se aposetolo a le Alii o Iesu Keriso, ou te molimau atu i le moni o afioga o loo i totonu o tusitusiga paia ma mea na faapea ona tauina mai ia te au ma e mafai foi ona tauina atu ia te outou e le Agaga Paia. O le a faaali atu e tusa ai ma lo outou usiusitai ma manaoga. Na aoao mai e le Faaola ia i tatou i le taimi o Lana galuega i le tino ia lenei upu moni maoae e aoga ia i tatou uma lava: “O mea uma e tatau tou te ole atu ai i le Tama i lo’u igoa, ma le faatuatua tou te maua ai, faauta e foaiina mai ai ia te outou.”²² Ou te molimau atu ua ou iloa nei mea, ma ou te iloa ma le mautinoa o nei mea ua ou tautala atu ai ua moni lava. O la’u tatalo ia outou saili mo lena lava faamaoniga i le suafa o Iesu Keriso, amene.