“O Au Upu … E Leai se Gataaga”

Peresitene Monson, pe mafai ona ou faaaogaina sina taimi o lo’u avanoa?

I le avea ai ma se tasi o le Usoga ua lauga muamua e sosoo ma lau savali tupito i le Ekalesia i lenei taeao, ou te fia tuuina atu ai se faamatalaga e fai ai ma sui o ou Uso uma o le Au Pulega Aoao ae faapea foi ona avea ma sui o le Ekalesia atoa.

I le tele o avanoa ua matou maua i lenei konafesi logologoa, e aofia ai le auai i se potopotoga paia lea sa mafai ai ona matou tutulai ma lagolagoina oe o se perofeta, tagatavaai, ma talifaaaliga, e le mafai ona ou tatalia le lagona e faapea o le avanoa sili ona taua ua matou maua uma o le molimau tino lea i le oo ifo o le ofu talaloa paia ma faaperofeta i luga o ou tauau, e toetoe lava pei na tuu ifo e lima o agelu lava latou. O e sa auai i le sauniga aoao a le au perisitua anapo ma i latou uma sa auai i le faasalalauga i le lalolagi atoa o le sauniga i lenei taeao sa avea ma molimau o lenei mea na tupu. Mo i latou uma sa auai, ou te momoli atu la matou faafetai mo se taimi faapea. Ou te faapea atu ma le alofa ia Peresitene Monson aemaise le alofa i lo tatou Tama o i le Lagi mo le avanoa taua sa maua e avea ai ma “molimau i lona mamalu” (2 Peteru 1:16), e pei ona fai mai ai le Aposetolo o Peteru.

I le konafesi aoao ia Oketopa talu ai, sa ou fai atu ai e lua lava mafuaaga autu e matuai tuuaia sese ai le Ekalesia a Iesu Keriso o le Au Paia o Aso e Gata Ai, e le o ni Kerisiano. O le taimi lena sa ou laugaina ai se tasi o na mataupu faavae—o la tatou vaaiga faatusipaia i le Aigaatua. O le asō ou te fia tautalagia ai le isi aoaoga faavae autu lea o loo iloga ai lo tatou faatuatuaga ma ua mafua ai le popole i nisi, ua faaupuina o le matuai folafola atu ma le le fefefe o loo tumau pea ona fetalai mai e le Atua Lana afioga ma faaali mai Ana faaaliga moni, lea o loo lagolagoina ai le faatagaina pea o nisi faaopoopoga i tusitusiga paia.

O nisi Kerisiano, o le toatele lava ona o lo latou alolofa faapelepele i le Tusi Paia, ua folafola mai ai e le mafai ona toe i ai nisi tusitusiga paia e faatagaina e sili atu nai lo le Tusi Paia. I le faasilasila mai la faapea ua le faatagaina se tuufaatasiga o faaaliga, ua tapunia ai e a tatou uo i nisi o tapuaiga le faitotoa i faaaliga paia lea e matuai taua lava ia i tatou O Le Ekalesia a Iesu Keriso o le Au Paia o Aso e Gata Ai: o le Tusi a Mamona, o le Mataupu Faavae ma Feagaiga, o le Penina Tau Tele, ma taiala faifai pea o loo mauaina e perofeta ma aposetolo faauuina a le Atua. E ui e leai ni o tatou manatu alualua ia i latou e faia sea ituaiga o faaiuga, ae tatou te teenaina ma le migao sea faauigaga e le o i ai i tusitusiga paia i le faauigaina o le faaKerisiano moni.

O se tasi o finauga e masani ona faaaoga e taumafai ai e puipuia le faapea ua faasaina se tuufaatasiga o ni faaaliga faaauauina pea o loo tusia lea i se fuaiupu i le Feagaiga Fou i le Faaaliga e 22:18: “Aua ou te tautino atu ia i latou uma o e faalogo i upu … o lenei tusi, Ai se tasi e faaopoopo mai se upu i nei upu, e faaopoopoina atu e le Atua ia te ia o mala ua tusia i lenei tusi.” Ae peitai, o loo maoae le maliliega auau faatasi i le au atamamai i tusi paia e faapea o lenei fuaiupu e na o le tusi o Faaaliga o loo faatatau tonu i ai, ae le o le Tusi Paia atoa. E toetoe lava o le au atamamai uma i o tatou vaitaimi ua faailoa mai se aofaiga o “tusi” o le Feagaiga Fou lea e toetoe lava a mautinoa na tusia ina ua mavae ona mauaina le faaaliga e Ioane i le Motu o Patamo. E aofia ai i le vaega lenei ia le tusi a Iuta, o tusi e tolu a Ioane, ma e toetoe lava foi o le Evagelia atoa a Ioane lava ia.¹ Atonu e tele atu nisi tusi nai lo nei.

Ae o loo i ai se tali faigofie i le mafuaaga e le mafai ai ona faatatau lena fuaiupu o loo i le tusi faaiu o le Feagaiga Fou i le Tusi Paia atoa. Aua o le Tusi Paia atoa e pei ona tatou iloa—o se aotelega e tasi o tusitusiga ua tuufaatasia i se voluma e tasi—e lei i ai ina ua tusia lena fuaiupu. Mo le tele o auga seneturi ina ua maea ona gaosia e Ioane lana tusiga, sa feaveai solo lava ia tusi taitasi o le Feagaiga Fou pe atonu foi sa na o ni nai tusi sa tuufaatasia, ae le o se voluma atoa. Mai le 5,366 tusiga o le Feagaiga Fou faaEleni uma ua iloa, e na o le 35 o loo aofia ai i le Feagaiga Fou atoa e pei ona tatou iloa nei, ma o le 34 atoa sa tuufaatasia ina ua tuanai le tausaga e 1000 T.A.²

O le mea moni lava ia i lenei mataupu, e toetoe lava o perofeta uma o le Feagaiga Tuai ma le Feagaiga Fou sa latou faaopoopoina ia ni tusitusiga paia i mea sa maua mai i e na muamua atu ia i latou. Afai o upu a Mose i le Feagaiga Tuai ua matuai lava ma totoe, e pei ona manatu sese i ai nisi,³ aisea la na toe manaomia ai isi valoaga ia na aumaia mulimuli e Isaia po o Ieremia lea na sosoo ma ia? Ae le o taua ai ia Esekielu ma Tanielu, o Ioelu, o Amosa, faapea ma le isi toatele. Afai o se faaaliga e tasi i se perofeta e toatasi i se taimi e tasi ua lava lea mo taimi uma, o le a la se mea e faamaonia ai le isi anoano nei? O le mea e faamaonia ai sa matuai faamanino mai e Ieova lava Ia ina ua Ia fetalai atu ia Mose, “E leai se gataaga o au galuega, ma … au upu … e leai se gataaga.”⁴

Na fesiligia ma le atamai e se tagata Porotesano atamai le aoaoga faavae sese o le faasaina o nisi tusitusiga paia. Na ia tusia: “O a ni faamaoniga faatusipaia pe faasolopito ua faatapulaaina ai ia musumusuga a le Atua ua na o tusiga lea ua faaigoaina nei e le ekalesia o le Tusi Paia? … Afai sa musuia e le Agaga na o tusiga o le seneturi muamua, o lona uiga ea la e le o toe tautala mai le Agaga lea e tasi i aso nei i le ekalesia e faatatau i mataupu e matuai taua lava?”⁵ E na ona tatou faia foi ma le lotomaulalo o na lava fesili.

E le o taufaatauvaaina pe faaleaogaina e faaaliga faifaipea ia faaaliga ua i ai. E le aveesea le taua o le Feagaiga Tuai i la tatou vaai ina ua faailoa mai ia i tatou le Feagaiga Fou, ma o le Feagaiga Fou e faatoa faalauteleina pe a tatou faitau i le Tusi a Mamona: O Se Tasi Molimau ia Iesu Keriso. I le manatu i ai i tusitusiga paia faaopoopo ua taliaina e le Au Paia o Aso e Gata Ai, e mafai ona tatou fesili: Pe sa le fiafia ea na uluai Kerisiano o e, mo le tele o tausaga sa na o le Evagelia a Mareko (lea sa manatu i ai o le uluai tusi lea na tusia o le Feagaiga Fou)—ina ua latou mauaina ia ni tala sili ona auiliili lea na aumai mulimuli ane e Mataio ma Luka, ae le o taua ai ia fuaiupu maoae ma le faamamafa faafaaaliga na aumaia mulimuli ane e Ioane? E mautinoa lava sa tatau ona latou matuai fiafia aua o loo auauai mai pea ia faamaoniga e talitonu ai i le paia o Keriso. Ma e faapea foi ona tatou fiafia.

Faamolemole aua nei i ai se le malamalama. Tatou te fiafia ma faaaloalo i le Tusi Paia, e pei ona matuai manino ona aoaoina ai i tatou e Elder M. Russell Ballard mai lenei pulelaa i le tausaga talu ai.⁶ O le Tusi Paia o le afioga a le Atua. O loo faailoa muamua lava i le tuufaatasiga, o a tatou “tusi faavae.” E moni lava o se faitauga na musuia mai le lagi i le fuaiupu e lima o le mataupu muamua o le tusi a Iakopo lea na taitai atu ai Iosefa Samita i lana faaaliga vaaia i le Tama ma le Alo lea na fanau mai ai le Toefuataiga o le talalelei a Iesu Keriso i o tatou vaitaimi. Ae na iloa lava e Iosefa i lena taimi, le le mafai ona avea na o le Tusi Paia e fai ma tali i fesili uma faalelotu sa ia te ia faapea ma isi e pei o ia. E pei ona ia fai mai i ana lava upu, sa fefinauai faifeau o lo latou nuu—o nisi taimi e matuai feita lava—i a latou mataupu. “[Sa] finau le tagata failotu i le tagata failotu, o le tagata lotu [sa finau] foi i le tagata lotu; … i feupuaiga ma finauga e uiga i o latou taofi,” na ia saunoa ai. O le mea lava e tasi sa taatele ai nei finauga faalelotu, o le eseese lea o talitonuga i le Tusi Paia, ae pei ona tusia e Iosefa, “sa matua eseese malamalamaga o faiaoga o lotu eseese i se mau e tasi mai tusitusiga paia [po o le fea lotu e moni], sa matuai faafaigata ai lava ona tapa i le Tusi Paia mo se tonu.”⁷ O loo manino lava o le Tusi Paia, e pei ona faamatalaina soo i lena taimi o se “mea sa talitonu uma i ai,” aua e leai se isi mea faapena—ae paga lea, sa avea ma faapogai sa latou fefinauai ai.

O lea o se tasi o faamoemoega maoae o faaaliga faifaipea e auala mai i perofeta soifua o le faailoa atu lea i le lalolagi e ala i molimau faaopoopo e faapea e moni le Tusi Paia. “Ua tusia lenei tusi,” e pei ona fai mai ai se perofeta anamua, e uiga i le Tusi a Mamona, “ina ia outou talitonu i lena,” o loo tautala e faatatau i le Tusi Paia.⁸ I se tasi o uluai faaaliga na mauaina e Iosefa Samita, na fetalai atu ai le Ali, “Faauta, ou te le aumaia [le Tusi a Mamona] e faaumatia … [le Tusi Paia], a ia atiina ae ai.”⁹

O le isi manatu e ao ona faia. Talu ai ona o loo manino lava sa i ai Kerisiano a o lei taitai ona i ai se Feagaiga Fou po o se tuufaatasiga foi o afioga a Iesu, e le mafai la ona faatumauina le faapea ane o le Tusi Paia e avea ai se tasi ma se Kerisiano. I upu a se tagata atamai o le Feagaiga Fou, o N.T. Wright, “O le Iesu toetu, i le faaiuga o le Talalelei a Mataio, e lei fetalai mai, ‘O le pule uma i le lagi ma le lalolagi o le a tuuina atu i tusi o le a outou tusia uma,’ ae ‘Ua tuuina mai ia te au le pule uma lava i le lagi ma le lalolagi.’”¹⁰ I se isi faaupuga, “E le o faasino le mau ia te ia lava … ae o le mea moni o loo faasino atu lea i le pule moni e a le Atua lava ia.”¹¹ O tusitusiga paia la, e le o le pogai mulimuli lea o le malamalama mo le Au Paia o Aso e Gata Ai. O ni faaaliga o le pogai sili. O le punavai sili o le malamalama ma le pule mo se Au Paia o Aso e Gata Ai, o le Atua soifua lea. O le fesootaiga mai o na meaalofa e sau mai le Atua o se faaaliga moni, olaola, ma paia.¹²

O lenei aoaoga faavae o loo taoto i le fatu O Le Ekalesia a Iesu Keriso o le Au Paia o Aso e Gata Ai ma la tatou savali i le lalolagi. Sa faatinoina ai le taua o se potopotoga paia ananafi lea sa tatou lagolagoina ai Thomas S. Monson o se perofeta, tagatavaai, ma se talifaaaliga. Tatou te talitonu i se Atua o loo i ai i o tatou olaga, e le o gūgū, e le o alu ese, e le faapei o le atua o faitaulaga a Paala lea na fai mai ai Elia, o loo “alu o Ia [i] se malaga, pe ai lava ua moe o ia, ma e tatau ona [fagufagu i ai].”¹³ I lenei Ekalesia, e oo lava foi i a tatou fanau laiti o le Peraimeri latou te taulotoina, “Matou te talitonu i mea uma lava ua faaalia mai e le Atua, ma mea uma o loo ia faaalia mai nei, ma matou te talitonu o le a ia faaalia mai le tele o mea silisili ma le taua tau i le Malo o le Atua.”¹⁴

I le faailoaina mai o ni tusitusiga paia fou ma faaaliga faifai pea, tatou te tatalo ina ia aua lava nei o tatou faasausili pe le magafagafa. Ae ina ua mavae se faaaliga vaaia paia i se vao paia lea sa taliina ai ma le mautinoa le fesili, “Pe i ai ea se Atua?,” o le mea ua uunaia nei ia Iosefa Samita ma le Ekalesia a Iesu Keriso o le Au Paia o Aso e Gata Ai latou te faafeagai o le isi fesili lea e sosoo mai ai: “Pe tautala ea o Ia?” Tatou te aumaia le tala fiafia e faapea o loo fetalai mai o Ia ma sa Ia fetalai mai. Faatasi ai ma le alofa ma le naunautai e tupu mai i la tatou faaKerisiano, matou te valaaulia ai tagata uma ina ia suesue i le ofoofogia o mea na fetalai mai ai le Atua ma mea o loo fetalai mai ai e oo lava i le taimi nei.

E i ai se lagona atonu na taliina e Iosefa Samita ma perofeta na sosoo mai ma ia i lenei Ekalesia le luitau na tuuina atu e Ralph Waldo Emerson i tamaiti aoga o le Aoga Faalelotu a Harvard i le 170 tausaga talu ai i le taumafanafana o lumanai nei. I lena vasega o tamaiti Porotesano sili ona lelei ma atamamai, sa aioi atu ai le toeaina atamai i Concord ina ia latou aoaoina “o loo i ai le Atua, ae lē o le sa i ai; o loo fetalai mai o Ia, ae lē o le sa fetalai mai.”¹⁵

Ou te molimau atu o loo matala le lagi. Ou te molimau atu o Iosefa Samita o se perofeta, ma o le Tusi a Mamona e moni lava o se tasi molimau ia Iesu Keriso, o Thomas S. Monson o se perofeta a le Atua, o se Aposetolo o ona po nei o loo i ai i ona aao ki o le malo, o se tamalii ua ou vaaia le i ai i ona luga o le pule. Ou te molimau atu o le i ai o ni siufofoga faaperofetaga ua faatagaina, atoa ai ma tuufaatasiga o faaaliga faaauauina pea sa i ai lava lea i le totonugalemu o le savali faaKerisiano i soo se taimi sa i ai i le lalolagi le galuega faatagaina a Keriso. Ou te molimau atu o sea ituaiga galuega ua toe i ai i le lalolagi ma o loo maua i lenei Ekalesia a Iesu Keriso o le Au Paia o Aso e Gata Ai.

I lo matou tuuto atu ia Iesu o Nasareta o le Alo lava o le Atua, o le Faaola o le lalolagi, matou te valaau atu ai i tagata uma ina ia suesue i mea ua matou mauaina ia te Ia, ia auai faatasi ma i matou e matuai feinu naunautai i le “vaipuna o loo puna ae pea i luga i le ola faavavau,”¹⁶ o nei faaaliga faifaipea o loo faamanatu mai ai o loo soifua le Atua, ma e alofa o Ia ia i tatou, ma o loo Ia fetalai mai. Ou te momoli la’u lava faafetai patino ona e leai se gataaga o Ana galuega ma e “leai foi se gataaga o [Ana] upu.” Ou te molimau atu i lena silafaga alofa paia atoa ma lona faamaumauina, i le suafa paia o Iesu Keriso, amene.