O Le Talalelei a Iesu Keriso

Na folafola mai ma le lototele e le Aposetolo o Paulo, “Aua ou te le ma i le talalelei ia Keriso: aua o le mana lava lea o le Atua e ola ai i latou uma o e faatuatua” (Roma 1:16). O le lototele foi lenei o loo folafolaina atu e o tatou faifeautalai faamisiona a o latou auauna atu i le tele o itu o le lalolagi.

I se tulaga lautele, o le talalelei a Iesu Keriso o se fua [recipe] e lima ona elemene mo le ola e faavavau. Muamua, sei o tatou mafaufau pe o le a se mea tatou te oo i ai pe a tatou mulimuli i lenei fua, ona tatou mafaufau lea i elemene taitasi.

O le a se mea o tatou iloa e uiga i le ola e faavavau? Ua tatou iloa mai le Mose 1:39 e faapea, o le galuega ma le mamalu o le Alii ia faataunuu le faaofuina o le tagata i le tino ola pea ma le ola faavavau. Ua aoaoina i tatou i lenei mea e faapea, o le tino ola pea ma le ola faavavau e mavaevae ma eseese. O le meaalofa o le ola faavavau, lea e folafolaina mai pe afai e ausia nisi o tulaga faapitoa, e sili atu ona maoae nai lo le meaalofa o le tino ola pea.Fai mai Elder Bruce R. McConkie: “O le ola faavavau e le o se igoa e faatatau i le na o le umi e le gata o se olaga i le lumanai; o le tino ola pea o le ola i le faavavau i le tulaga toetutu, ma o le alofa tunoa o le Atua o le a maua ai e tagata uma lenei tulaga faaauau o le olaga e le muta. Ae e na o i latou o e usitai i le atoatoa o le tulafono o le talalelei o le a maua le ola e faavavau… . O le ‘meaalofa sili lea o meaalofa uma a le Atua,’ … , aua o le vaega, faatulagaga, natura, ma le ituaiga olaga lea o loo soifua fiafia ai le Atua lava ia. O i latou o e maua le ola e faavavau e maua le faaeaga; o i latou o atalii o le Atua, o suli faatasi ma Keriso, o tagata o le Ekalesia a le Ulumatua; latou te manumalo i mea uma, maua le mana uma, ma maua le atoatoa o le Tama” (Mormon Doctrine, 2nd ed. [1966], 237).

O le tiute o o tatou faifeautalai e pei ona taua i le itulau 1 o le Talai La’u Talalelei, o le “ia valaaulia isi e o mai ia Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le … Agaga Paia, ma tumau e oo i le iuga” (2004).

O le tele o tusi o kuka o loo i ai ata o meaai ua lelei atoatoa e fai mai i na fua—o le atoatoa o le fiafia i le kuka. E taua nei ata aua e fesoasoani tatou te vaai faalemafaufau ai i le taunuuga pe afai tatou te mulimuli atoatoa i faatonuga e pei ona tuuina mai i le fua. E taua le amata ae ua i ai i le mafaufau le taunuuga, ae o le taunuuga o loo faaalia mai i ata o le tusi kuka o se taunuuga e pau lava le ala e mafai ai ona ausia, o le sa’o lea ona fai o mea uma. Afai e le mulimulitaia ia faatonuga pe ua galo se mea pe ua sese foi le fua, e seasea lava ona maua le tofo ma le foliga na manaomia. Ae peitai, o le ata o se meaai ua lelei atoatoa, e mafai ona avea o se uunaiga e toe taumafai e fai se meaai sasala toe matagofie.

Pe a tatou mafaufau i le ola e faavavau, o le a le ata e oo mai i le mafaufau? Ou te talitonu, afai e mafai ona tatou fatuina i o tatou mafaufau se ata manino ma moni o le ola faavavau, o le a amata ona ese a tatou amioga. O le a le manaomia ona tau uunaia i tatou e fai le tele o mea e aofia i le tumau e oo i le iuga, e pei o le faia o a tatou asiasiga faaleaiga po o faiaoga asiasi, auai i a tatou sauniga, o atu i le malumalu, ola i ni olaga mama, fai a tatou tatalo, po o le faitauina o tusitusiga paia. O le a tatou mananao e fai nei mea uma ma nisi mea e sili atu ona ua tatou iloa o ia mea o le a saunia ai i tatou tatou te o atu i se mea o loo tatou moomoo e o atu i ai.

Aisea e manaomia ai le amata atu o le faamoemoega o se faifeautalai i le fesoasoani i isi ia maua le faatuatua ia Iesu Keriso ma Lana Togiola? Ina ia mafai ona opogi le talalelei a Iesu Keriso, e ao i tagata ona opogi muamua o Ia o lē ana le talalelei. E ao ona latou faatuatua i le Faaola ma mea ua Ia aoaoina ai i tatou. E tatau ona latou talitonu o loo ia te Ia le mana e tausi ai Ana folafolaga ia i tatou e ala i le taua o le Togiola. A faatuatua tagata ia Iesu Keriso, ua latou talia ma faaaoga Lana Togiola ma Ana aoaoga.

Na aoaoina e le Faaola Ona soo, e pei ona tusia i le mataupu e 27 o le 3 Nifae, o le felagolagoma’i o Lana talalelei ma Lana galuega i le lalolagi ma le Togiola ina ua Ia fetalai:

“Faauta, ua ou [tuuina] atu ia te outou la’u talalelei o le talalelei lenei ua ou tuuina atu ia te outou—na ou sau i le lalolagi e fai le finagalo o lo’u Tama, aua na auina mai a’u e le Tama… .

“E oo foi ina faatumauina le salamo ma papatisoina i lo’u igoa; afai foi e tumau o ia seia oo i le gataaga, faauta, ou te tauamiotonuina o ia i luma o lo’u Tama i le aso ou te tu ai e faamasino i le lalolagi” (f.13, 16).

O le faatuatua ia Iesu Keriso ma Lana Togiola tatou te liliu atu ai ia te Ia. Ua aoao mai le lalolagi e faapea o le vaai o le talitonu lava lea, ae o lo tatou faatuatua i lo tatou Alii e taitaiina atu ai i tatou i le talitonu e mafai ona tatou vaai ia te Ia ma le fuafuaga a le Tama mo i tatou.

O lo tatou faatuatua foi e oo atu ai i faatinoga—e oo atu ai i tautinoga ma suiga e o faatasi ma lo tatou salamo moni. E pei ona aoao mai Amoleka i le mataupu e 34 o le Alema:

“O lenei ua na o lē faatuatua e oo i le salamo e oo i ai le ala o le faaolataga sili ma le faavavau.

“O lea ia alofa mai ai le Atua ia te outou, ou uso e, ina ia amata ona outou faaaoga lo outou faatuatua e oo i le salamo, ma ia amata ona outou valaau i lona suafa paia, ina ia alofa mai o ia ia te outou;

“Ioe, ia tagi atu ia te ia ina ia alofa; aua ua malosi o ia i faaola” (f. 16–18).

Aisea e ao ai i tagata taitoatasi ona salamo muamua ae latou te lei papatiso ma maua le Agaga Paia? O le siufofoga o Keriso na tautino atu ai i tagata sa Nifae se iuga i le tulafono o le ositaulaga, lea na Ia fetalai atu ai: “Ia outou fai ma taulaga ia te au le loto momomo ma le agaga salamo. Ai se sau foi ia te au ma le loto momomo ma le agaga salamo, ou te papatisoina o ia i le afi ma le Agaga Paia” (3 Nifae 9:20).

O lenei lava foi tulaga manaomia o loo talanoaina i le vaega e 20 o le Mataupu Faavae ma Feagaiga i se fuaiupu e masani ona tatou faaaogaina e faamatala ai tulaga e manaomia mo le papatisoga. Fai mai le fuaiupu e 37, “O le a talia i latou uma i le ekalesia i le papatisoga o e faamaulalo i latou lava i luma o le Atua, ma mananao ia papatisoina, ma o mai ma le loto momomo ma le agaga salamo … ma molimau atu i luma o le ekalesia ua salamo faamaoni lava i a latou agasala uma”

O nei fuaiupu o mau o loo aoao mai ai lesona aoga e uiga i le natura o le salamo e sauniuni ai mo le papatisoga ma le mauaina o le Agaga Paia. Muamua, o le salamo e aofia ai se uiga o le lotomaulalo. Ina ia saunia e papatisoina ma tauave i o tatou luga le suafa o Keriso, e tatau ona faamaualalo i tatou lava i Ona luma—tuuina atu la tatou taulaga o se loto momomo ma se agaga salamo ma talia Lona finagalo. Lua, ua tatou iloa e ao i tagata ona molimau atu i luma o le Ekalesia, po o se sui o le Ekalesia, ua latou salamo i a latou agasala. Ma le mea mulimuli, ua tatou iloa o le salamo, o se faagasologa lea o le faamamaina, e muamua atu i le papatisoga, o se sauniga lea o le faamamaina, e mafai ai ona saunia se tagata e maua le Agaga Paia. O le Agaga Paia o se sui lona tolu lea o le Aigaatua. O le meaalofa o le Agaga Paia e na o i latou lava ua faamamaina e ala i le salamoina o agasala o le lalolagi e mafai ona mauaina.

Aisea e manaomia ai ona papatisoina i tatou ma maua le Agaga Paia? Na aoao mai Elder Orson F. Whitney: “O le papatisoga e lua vaega, ma e i ai ni misiona se lua e faataunuuina. E le gata ina faamama—na te [faamalamalamaina] le agaga, e faailoa mai mea a le Atua, i le taimi ua tuanai, taimi nei ma le lumanai, ma faaali mai se molimau mautinoa e uiga i le Upumoni. O le agaga, ua faamamaina mai agasala, ua i ai i se tulaga o le olioli i aafiaga tumau a le Agaga Paia, lea ‘e le nofo i malumalu le mama.’ O le papatisoina i le vai e amata ai le galuega o le faamamaina ma le faamalamalamaina. O le papatisoga i le Agaga na te faaatoatoaina.” (Baptism—The Birth of Water and of Spirit [n.d.], 10).

O le sauniga o le papatisoga i le vai ma le afi ua faamatalaina e Nifae o se faitotoa (tagai 2 Nifae 31:17). Aisea e avea ai le papatisoga ma se faitotoa? Aua o se sauniga ua faatusaina i le ulu atu i se feagaiga paia ma faamauina i le va o le Atua ma le tagata. E folafola atu e tagata e lafoai le lalolagi, alofa ma auauna atu i ona uso a tagata, asiasi i e matuaoti ma fafine ua oti a latou tane i o latou tiga, talai atu le filemu, folafola atu le talalelei, auauna atu i le Alii, ma tausi Ana poloaiga. Ua folafola mai le Alii e “liligi atili ai lona Agaga i luga ia i [tatou]” (Mosaea 18:10), faaola Lana Au Paia i le faaletino ma le faaleagaga, faitauina faatasi ma i latou i le Uluai Toetu ma aumaia ai le ola faavavau. O le papatisoga ma le mauaina o le Agaga Paia o auala faatonuina ia e ulufale atu ai i le ala sa’o ma le vaapiapi i le ola e faavavau.

Fai mai le Aposetolo o Paulo, o le papatisoga ua faatusaina i lo tatou o ifo i se tuugamau vai lea tatou te tulai a’e ai i se “ola toefuataiina” (Roma 6:4) ia Keriso. O le sauniga o le papatisoga ua faatusaina i le maliu ma le Toetu mai o Keriso—tatou te oti faatasi ma Ia ina ia mafai ona tatou toe mafuta faatasi ma Ia. I lenei tulaga o le papatisoga o le sauniga faaola muamua lea, ae o le mauaina o le Agaga Paia e fesoasoani lea ia i tatou taitoatasi e fetaomi atu ai i luma ma tumau e oo i le iuga.

E faapefea ona tatou tumau e oo i le iuga? O le tumau e oo i le iuga e manaomia ai le faamaoni e oo i le iuga, e pei o le tulaga ia Paulo, o le na tauina atu ia Timoteo, “Ua ou tau le taua lelei, ua iu ia te au le tausinioga, ua ou taofi i le upu o le faatuatua” (2 Timoteo 4:7). E manino lava, e le o se galuega faigofie lenei. Na fuafuaina lava ia faigata, luitauina, ma matuai, faamamāina a o tatou sauniuni e toe foi atu e mafuta ma lo tatou Tama oi le Lagi ma maua faamanuiaga e faavavau.

O le tumau e oo i le iuga e mautinoa lava e le o se galuega e mafai ona e faia na o oe. Muamua, e manaomia ai le mana faaola o le Faaola. E le mafai ona tatou toe foi atu i le afioaga o lo tatou Tama Faalelagi sei iloga ua tatou mama, ma o lea e tatau ai ona faaauau lo tatou salamo. O le mea e lelei ai, tatou te salamo i lea taimi ma lea taimi, ae tatou te auai foi i sauniga faamanatuga i vaiaso taitasi e aai ma feinu i le faamanatuga ma faafou a tatou feagaiga o le papatisoga. Lua, o le tumau e oo i le iuga e manaomia ai le Agaga Paia, o le e taialaina ma faamamaina i tatou. Tolu, e tatau ona avea i tatou ma se vaega taua o se nuu o le Au Paia, e tuuina atu auaunaga ma maua ni auaunaga mai o tatou uso ma tuafafine i totonu o le talalelei. O le papatisoga e avea ai i tatou ma se vaega o le tino o Keriso (tagai 1 Korinito 12:11–13); e tofu i tatou ma se vaega e fai, e taua i tatou taitoatasi, ae ina ia mafai ona faamanuiaina e tatau ona tasi i tatou i lo tatou Faaola. Fa, e ao ona tatou fetufaai atu le talalelei i isi. O folafolaga i le aumaia tau lava o se agaga e toatasi i le Alii e maoae ma faavavau (tagai MFF 18:15). Ma le isi, e masani ona mautu le talalelei ia i latou e masani ona faasoaina atu. Ma le mea mulimuli, e tatau ona tatou faatumauina e le aunoa le faatuatua ma le faamoemoe ia Keriso ina ia tumau ai e oo i le iuga, ma o nisi o auala e tele e mafai ona tatou faia ai lenei mea o le tatalo, anapogi, ma le faitauina o tusitusiga paia. O nei faiga masani o le a faamalolosia ai i tatou e tetee atu i faiga taufaasese ma u fanafana mu a le fili.

Ou te alofa i le talalelei a Iesu Keriso, aua o loo faamalamalama mai ai le ala e mafai ai ona tatou aai i fua o le talalelei, ma iloa ai le “olioli tele lava” (1 Nifae 8:12) lea e aumaia ai, ma tumau i le iuga i luitau uma o le olaga faaletino. Ua aoao mai e le talalelei mea uma e tatau ona tatou iloa e toe foi atu ai e mafuta ma lo tatou Tama oi le Lagi o ni tagata toetutu ma faamamaluina. Talosia ia tumau i o tatou mafaufau le vaaiga mamao i le ola e faavavau. Talosia ia tatou filiga e mulimuli i le fua mo le ola e faavavau, o le talalelei lea a Iesu Keriso. Talosia ia tatou tumau e oo i le iuga. I le suafa o Iesu Keriso, amene.