Ang Akong Unang Gubat

Sa dihang ako 17 anyos, ako mipalista sa Royal Canadian Army Reserve. Ako gipadala ngadto sa usa ka bansayanan nga base [training base], ug sa unang higayon sa akong kinabuhi, ako nag-inusara sa pagpili sa akong dalan. Ako nagsuspetsa nga ako pagatintalon nga dili magpabiling aktibo sa Simbahan ug ang akong pagpamatuod pagahagiton.

Sa dihang ako miabut sa base, usa ka sarhento nga tigbansay milibut sa pagpakita sa nagkalain-laing mga building ug mga simbahan. Ako naaghat sa pagpangutana asa dapita ang LDS branch. Ang sarhento mihunong sa makadiyot. Dayon siya miingon nga ang Simbahan sa LDS wala sa sulod sa base, apan kon ako buot nga moadto, ako mahimong mokuyog niya ug sa iyang asawa. Siya bag-o nga nakabig sa Simbahan ug malipayon nga modala ni bisan kinsa nga buot moadto. Ako nalipay nga ako adunay kapilian sa pag-adto, bisan tuod ako wala pa makahukom kon ako moadto ba niana nga Dominggo. Total, ako nag-inusara ug gawasnong mopili alang sa akong kaugalingon karon. Apan usa ka butang anaa sa akong kasingkasing nagsulti kanako nga ako kinahanglang motambong.

Nianang gabii sa Sabado mao ang usa sa labing lisud sa akong kinabuhi. Sukad niadtong panahona ako kining gitawag og akong “kahoy sa kinabuhi” nga kasinatian. Kini nagsugod sa dihang ang akong mga higala buot nga ako makig-istorya-istorya uban kanila sa kan-anan. Ako nasayud nga sila mag-inom lamang, ug ako misulti kanila nga ako nagkinahanglan og katulog tungod kay ako sayo nga mobangon alang sa pagsimba. Sila mikatawa sa akong pagpili ug mipadayon sa ilang padulngan.

Human sila milakaw, ako mihigda sa akong higdaanan. Gikan didto, akong makita ang bintana ug nagtan-aw sa akong mga higala diha sa balkonahe sa kan-anan, nag-inom ug nagkinataw-anay. Ako nakahinumdom giunsa nila ako pagsungog sa wala pagkuyog kanila. Ako mao rag naghanduraw sa gibati ni Lehi sa dihang siya mitan-aw sa dako ug lapad nga gambalay, diin ang katawhan susamang nangatawa kaniya (tan-awa sa 1 Nephi 8:26–27). Ako mitalikod ug miatubang sa akong lamesa, nga nakamatikod lamang sa akong mga kasulatan. Ako sa dakong tinguha miabli niini ug misugod sa pagbasa. Kini mao ang akong gunitanan nga puthaw, ug sama lamang sa pulong sa Dios nga nagbutang sa pamilya ni Lehi sa luwas nga lugar, ako nasayud nga kini sa sama nga paagi mopanalipod kanako.

Ako dili makahinumdom unsa ang akong gibasa nianang gabhiona apan ako nakahinumdom sa Espiritu nga akong gibati. Kini akong gibati pag-usab sa dihang ako mitambong sa simbahan pagkasunod buntag. Pinaagi sa pagtambong sa simbahan matag Dominggo samtang ako nagpuyo sa base, ako nakatukod og lig-on nga pagpamatuod sa ebanghelyo ni Jesukristo. Sukad sa akong panahon didto sa kampo sa pagbansay ako nahatagan og kahigayonan sa pagpakigbahin sa akong pagpamatuod ngadto sa uban isip usa ka full-time nga misyonaryo sa California Sacramento Mission.