Family Home Afternoons

Usa ka adlaw samtang ako diha sa simbahan, usa sa mga sister mipahayag kanako nga siya mibati nga nag-inusara. Sama kaniya, ako usab usa ka biyuda ug nagpuyo nga nag-inusara. Sa kalit, ako dihay ideya: nganong dili kami magpundok kada Lunes ug maghimo og family home evening? Kami usab makahimo sa pagdapit sa ubang mga sister kinsa nagpuyo nga nag-inusara.

Ako naghimo og gamay nga pagsiksik ug nakakita og walo ka mga babaye sa among ward kinsa mahimong moapil. Unom mga biyuda, usa dili minyo, ug ang usa ang bana dili miyembro sa Simbahan.

Uban sa pagtugot sa akong bishop, ako nangandam alang kanamong tanan nga magpundok alang sa family home “afternoons”. (Amo kining gibuhat nga sayo sa adlaw tungod kay kadaghanan kanamo dili makakita og klaro ug dili buot nga anaa sa gawas inig ka gabii.) Kami nagpuli-puli nga mag-abut sa usag usa nga panimalay ug naghatag og gamay nga leksyon. Tingali ang labing importanteng butang nga nakuha gikan niini mao ang tinuod nga pagbati sa paghinigalaay nga nagbugkos kanamo sa gugma isip mga sister.

Kaming tanan mahinamon kaayo alang sa among family home “afternoons.” Kami mibati og kalipay sa pagtuon og dungan sa ebanghelyo, ug kami nakatagamtam og talagsaong panaghigalaay nga naglig-on sa among hugot nga pagtuo ug sa among gugma alang ni Ginoong Jesukristo.