Nag-ampo alang kang Papa

Ako sakop sa pamilya nga lima, ug kami nagtambong sa simbahan kada Dominggo, kaming tanan gawas sa akong papa. Siya dili miyembro sa Simbahan, ug kini nakapaguol kanako. Siya maayo kaayo nga papa ug usahay motambong og mga pagsalo-salo o mga biyahe nga gipasiugdahan sa ward. Ako ganahan kaayo kon siya kanunay nga mouban.

Ang akong mama mitudlo kanako sa Primary nga ang Langitnong Amahan maminaw sa atong mga pag-ampo ug gustong motabang kanato. Busa ako namulong og usa ka pag-ampo nga Iyang tabangan ang akong amahan nga makasabut unsa ka importante ang ebanghelyo alang sa among pamilya.

Niana nga Sabado motan-aw na unta ako og TV sa dihang may usa ka butang nga nahitabo. Ang akong papa miabut ug miingon nga adunay mas maayong mga butang nga akong mabuhat kay sa maglingkod atubangan sa TV. “Sama pananglit,” siya miingon, “unsa ang imong mahunahuna kon ako mobasa kanimo og usa ka nindot nga istorya gikan sa Liahona?”

Busa siya milingkod uban kanako ug sa duha nako ka gagmay’ng igsoong mga lalaki ug nagbasa ngari kanamo. Ako wala masayud giunsa sa akong papa pagkahibalo nga anaa sa Liahona kadto nga mga istorya. Apan ako nasayud nga ang Langitnong Amahan naminaw sa akong mga pag-ampo ug mitubag, mihikap sa kasingkasing sa akong amahan aron siya mobasa og usa ka butang diha sa magasin sa Simbahan.

Ako nagpasalamat sa akong Langitnong Amahan tungod kay Siya naminaw sa akong mga pag-ampo.