Te tamataraa i te rave i te mea e ore e noaa i te rave

I to ratou pii-raa-hia i te fenua Marite, ua faaue te Fatu ra o Iesu Mesia i na pĭpĭ ahuru ma piti : « E teie nei, te hinaaro nei au ia maitai roa outou mai to‘u e to to outou Metua i te ao e maitai roa ra ».¹ No faaoti noa’tu ra ho‘i te Faaora i ta’na misioni hanahana e te manuïa, e te nounou ore i ni‘a i te fenua nei. Na te reira i faati‘a Ia’na ia parau ma te mana e ua riro Oia e To’na Metua, to tatou Metua, ei mau hoho‘a e ti‘a ia peehia e tatou tata‘itahi.

Na roto i te hoê hi‘oraa taata noa i te haamataraa, e au ra e ohipa teie e ore e noaa i te rave, e au ra râ e nehenehe te reira e tupu na roto i te iteraa e, no te faatupu i te reira, e ere ïa o tatou ana‘e ra. Te vai noa ra te mau tautururaa hau atu i te faahiahia e te puai ta te hoê taata e nehenehe e imi. A tahi o te rima maitai e te aroha ïa o te Metua Mure Ore o te hinaaro ia ho‘i tatou i mua i To’na ra aro e amuri noa’tu. Ei Metua no tatou, ua ineine e ua hinaaro noa Oia i te faaore i ta tatou mau hape e mau paruparu, e te mau hara ta tatou i rave, te faaoreraa hara ia tatarahapa hope mau râ tatou. Ei tautururaa i te reira, e ei faaiteraa hopea no To’na here rahi i Ta’na mau tamarii tata‘itahi, e horo‘a Oia ia tatou te mau hotu no te ohipa taa ê tei faatupuhia e te Faaora, oia ho‘i te Taraehara, tei faahaerehia mai e te hoê Tamaiti haapa‘o tei ineine noa i te rave i te hinaaro o te Metua ei maitai no tatou tata‘itahi.

Ua heheu mai te Mesia i te peropheta Iosepha Semita i teie i muri nei : « E, mai te mea e haapa‘o oe i ta‘u mau faaueraa e e itoito noa e tae noa’tu i te hopea e noaa ïa ia oe te ora mure ore, o te horo‘a hau a‘e te reira i te mau horo‘a atoa a te Atua ».² E nehenehe e tupu teie fafauraa hanahana. Te ora mure ore o te oraraa ïa i piha‘iho i to tatou Metua e to tatou mau utuafare e amuri noa’tu.³ Eita anei teie fafauraa e riro ei tura‘iraa ia tatou ia rave maitai atu â i te mau mea e vai ra ia tatou nei e ia horo‘a ia tatou iho a tutava ai tatou i tei fafauhia ia tatou?

I te omuaraa o te faaho‘i-faahou-raa mai, i te taime a fatata ai teie ohipa rahi e te maere i te tupu i rotopu i te mau tamarii a te taata nei, ua parau mai te Fatu e : « No reira, o outou o te haamata i te rave i te ohipa a te Atua, a mata na outou i te taviniraa ia’na ma to aau atoa, ma to puai, to mana‘o e ma to itoito ho‘i, ia ti‘a parau-ti‘a mai outou i mua i te aro o te Atua ia tae i te mahana hopea ra ».⁴ Ma to tatou aau atoa, ma to tatou mana‘o atoa, ma to tatou itoito atoa, e ma to tatou puai atoa – oia ho‘i ma to tatou huru atoa.

Ua parau te peresideni David O. McKay : « E tae mai te utua maitai hau roa‘e ia ratou ana‘e ra o tei aro ma te itoito i roto i te mau fifi ».⁵ E noaa ïa teie mau utua maitai i te feia tei aupuru i te faaroo ia Iesu Mesia e tei haa mai te au i To’na hinaaro, tei faatusia, e tei pûpû i te mau mea atoa ta ratou i farii no te turu e te paturaa i te basileia o te Atua.

Te manuïaraa o te fafauraa hanahana, ia noaa te ora mure ore, ia farii i te maitai-roa-raa e ia oaoa e amuri noa’tu i roto i te utuafare tahoê, e titauhia ïa te faaiteraa i to tatou faaroo ia Iesu Mesia, te haapa‘oraa i te mau faaueraa, te tamau-maite-raa, e te vai ti‘a-noa-raa i roto i to tatou oraraa.

Aita te Fatu e titau ia tatou ia rave i te mea eita e nehenehe ia tatou ia rave. Te faaueraa ia riro mai Ia’na i maitai roa ra e faaitoitoraa ïa te reira ia tatou ia noaa te mea maitai a‘e ia tatou iho, ia ite e ia faaohipa i te mau taleni e te mau horoo ta te hoê Metua here Mure Ore i haamaitai ia tatou, o te ani nei ia tatou ia faatupu i to tatou ti‘araa ei mau tamarii na te Atua. Ua ite Oia e o vai tatou, ua ite Oia i to tatou mau aravihi e to tatou mau oti‘a. Te aniraa e te tutavaraa ia riro ei taata maitai roa ra e ia noaa te ora mure ore, na te mau taata atoa ïa.

I muri noa‘e i to’na haapiiraa e « … aita ho‘i i hinaarohia ia horo te taata i te oioi e au ore i to’na ra puai », ua faaite te arii Beniamina e « tena na, ia itoito oia e au ai, ia roaa ïa ia’na te berabeio… »⁶ Eita te Atua e titau hau atu i te mea ta tatou e nehenehe e horo‘a no te mea eita te reira i te mea ti‘a, eita atoa râ Oia e nehenehe e farii i tei iti mai, no te mea eita atoa te reira i te mea ti‘a. No reira, ia horo‘a noa tatou i te maitai roa ta tatou e nehenehe e horo‘a i roto i te taviniraa i te Atua e i to tatou mau taata tupu. Ia tavini tatou i roto i to tatou mau utuafare e i roto i to tatou mau piiraa i roto i te Ekalesia ma te maitai roa. Ia rave tatou i te maitai mai te au i ta tatou e nehenehe e rave, e ia maitai atu â i te mahana tata‘itahi.

Eita te faateteiraa e te ora mure ore e noaahia ahani e aita e taraehara i ravehia e to tatou Faaora, o Oia ho‘i te tumu no te mau mea atoa e fatuhia ra e tatou. Tera râ te manuïaraa o teie mau haamaitairaa i roto i to tatou mau oraraa e ti‘a ia tatou ia rave i ta tatou tuhaa, « ua ite ho‘i tatou e, no roto i te aroha e ora’i tatou, hope noa’tu to tatou itoito atoa ».⁷ Ia rave tatou i te mau mea atoa o ta tatou e nehenehe e rave na roto i te faaroo, te anaanatae, te itoito, te haapa‘o, e te here e rave ïa tatou i te mau mea atoa e nehenehe e rave no te faatupu i te mea e ore roa e nehenehe e rave… E faatupuraa teie i te mea ta te mana‘o taata i mana‘o eita e nehenehe i te tupu, ua riro râ te tautururaa a to tatou Metua here e te tusia taraehara i ravehia e to tatou Faaora ei horo‘a rahi roa‘e, ei parau mau hanahana roa‘e, te oraraa e amuri noa’tu i piha‘iho i te Atua e to tatou mau utuafare.

Te pure nei au ia haamana‘o tatou tata‘itahi e ia faaapî tamau noa tatou, na roto i te amu ti‘amâraa i te oro‘a, i te faaotiraa ta tatou i rave e to tatou Metua i te Ao ra i te taime a tomo ai tatou i roto i te pape no te bapetizoraa e i te taime a farii ai tatou i te mau oro‘a atoa no te evanelia tei faaho‘ihia mai. Te pure nei au e ia rave maitai tatou, ia au i tei maraa ia tatou, i ta tatou ohipa i roto i to tatou ti‘araa ei hoa faaipoipo, ei mau metua, ei mau tamarii, ei mau taea‘e e mau tuahine, i roto i to tatou mau piiraa, i te faaiteraa i te evanelia, i te faaoraraa i te feia tei hahi ê atu, i te haaraa no te faaora i to tatou mau tupuna, i roto i ta tatou raveraa ohipa, e i roto i to tatou mau oraraa i te mau mahana atoa.

Te pure nei au e ia faati‘a to tatou mau oraraa ia tatou ia parau mai ta te aposetolo Paulo i parau, « I tô na vau i te tôraa maitai, ua oti ta‘u hororaa, i mau maite na vau i te faaroo ».⁸

Ia na reira ana‘e tatou, te faatupu ra ïa tatou i te mau titauraa tei faataahia mai e to tatou Metua i te Ao ra no te haamaitai hau atu â ia tatou, i roto i teie nei oraraa e i roto atoa i te oraraa amuri atu. Te hiaai nei oia i te horo‘a ia tatou Ta’na mau mea atoa, e tae noa’tu i te faariroraa ia tatou ei feia fana‘o i Ta’na horo‘araa rahi roa‘e oia ho‘i te ora mure ore.

Noa’tu e, i roto i ta tatou hi‘oraa, ua riro te maitai-roa-raa ei titauraa hope-ore, te faaite papû nei au e, ua faaite mai te Metua e te Faaora ia tatou, e nehenehe e faaoti i teie titauraa. Oia mau, e nehenehe ia tatou ia roaa i te ora mure ore. Oia mau, e nehenehe tatou ia vai oaoa i teie nei e a muri atu.

Te fatu no te faanahonahoraa maitai roa‘e no teie mau fafauraa hanahana, o to tatou ïa Metua i te Ao ra e te ora nei Oia. Ua rave Ta’na Tamaiti, o Iesu Mesia, i ni‘a Ia’na iho te teimaha o ta tatou mau hara e te mau peu tano ore atoa e ravehia nei i roto i te ao nei, ia nehenehe tatou ia faaorahia i te mau faautuaraa no te reira. Ua ite au e te ora nei to tatou Fatu o Iesu Mesia. Ua faaho‘ihia mai te evanelia e te autahu‘araa i te fenua nei no te taime hopea na roto i te peropheta Iosepha Semita. I teie mahana, te vai nei te haamaitairaa rahi roa no te mau aposetolo e te mau peropheta tei piihia e te Atua no te arata‘i ia tatou i ni‘a i te e‘a no te ho‘i atu i to tatou Metua ra. Ua piihia te peresideni Thomas S. Monson no te arata‘i i teie ohipa rahi roa i teie mau mahana. E peropheta oia na te Atua. O ta‘u ïa e faaite papû nei na roto i te i‘oa mo‘a o Iesu Mesia, amene.