Ko Sīsū Kalaisi ʻa e Uho ʻo e Palani ʻa e Tamai Hēvaní

Naʻe teuteu ʻe he Tamai Hēvaní ha palani ke tokoniʻi kitautolu ke tau hoko ʻo tatau mo Ia mo maʻu kakato ʻa e fiefiá. Naʻá Ne folofola, “Ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39).

ʻI heʻetau hoko ko e fānau fakalaumālie ʻa ʻetau Tamai Hēvaní, naʻa tau nofo ʻi Hono ʻaó ʻi he maama fakalaumālié. ʻOku ui ʻeni ko hotau ʻuluaki tuʻungá. Naʻa tau kau fakataha kotoa ki ha Fakataha Alēlea ʻi he Langí ʻa ia naʻe fakahā mai ai ʻe he Tamai Hēvaní ʻEne palaní kiate kitautolu: Te tau omi ki he māmaní, ko hotau tuʻunga hono uá, ʻo maʻu ha sino fakamatelie. Te tau “fakamoʻoniʻi” foki ai “[te] tau fai ʻa e ngaahi meʻa kotoa pē … [ʻe] fekau ʻe he ʻOtuá kiate [kitautolú]” (ʻĒpalahame 3:25). ʻE fai ʻa e fakaleleí ʻe ha Fakamoʻui maʻá e ngaahi angahala kotoa ʻa e faʻahinga ʻo e tangatá, ke tau lava ai ʻo fakatomala pea hoko ʻo toe maʻa. (Vakai, ʻAlamā 42:23–26.)

Naʻa tau fili ke tali ʻa e palani ʻa ʻetau Tamai Hēvaní pea hoko ʻa Sīsū Kalaisi ko hotau Fakamoʻui. Tuʻunga ʻi he Fakalelei ʻa e Fakamoʻuí pea mo e Toetuʻú, te tau lava ke foki ai ki he ʻao ʻo ʻetau Tamai Hēvaní ʻo moʻui ʻi he faʻahinga moʻui ʻokú Ne maʻú.

1. Naʻa tau fakataha ʻi ha Fakataha Alēlea lahi ʻi he Langí mo ʻetau Tamai Hēvaní ke fanongo ki Heʻene palaní.

2. Naʻe fie maʻu ʻi he palani ʻa e ʻOtuá ha Fakamoʻui ke fakalelei maʻa ʻetau ngaahi angahala ʻi he māmaní. Naʻe fehuʻi ai ʻe he ʻOtuá, “Ko hai te u fekauʻí?” (ʻĒpalahame 3:27).

3. Naʻe ʻafioʻi ʻe Sīsū Kalaisi, ko e ʻUluaki Fānau ʻa ʻetau Tamai Hēvaní, kuo pau ke tau tauʻatāina ke tau fili ke talangofua ki he ʻOtuá. Naʻe folofola ai ʻa Sīsū, “Ko au ʻeni, fekauʻi au” (ʻĒpalahame 3:27). “ʻE Tamai, ke fai pē ʻa ho finangaló, pea ke ʻoʻou ʻa e lāngilangí ʻo taʻengata” (Mōsese 4:2).

4. Naʻe ʻikai ke tui ʻa Lusifā, ko e taha ia ʻo e fānau ʻa e ʻOtuá, ʻoku totonu ke tau tauʻatāina ke fili ke talangofua ki he ʻOtuá. Naʻá ne pehē ai, “Ko au ʻeni, fekauʻi au. … Te u huhuʻi ʻa e faʻahinga kotoa pē ʻo e tangatá, koeʻuhí ke ʻoua naʻa mole ha foʻi laumālie ʻe toko taha … ; ko ia ke ke foaki kiate au ʻa ho lāngilangí” (Mōsese 4:1).

5. Naʻe folofola ʻetau Tamai Hēvaní, “Te u fekauʻi ʻa e ʻuluakí”—ʻa Sīsū Kalaisi (ʻĒpalahame 3:27).

6. Naʻa tau “kalanga fakafiefia” (Siope 38:7).

7. Tuʻunga ʻi he pau ke hoko ʻa Sīsū Kalaisi ko e Fakamoʻuí, naʻe ʻita ai ʻa Lusifā ʻo angatuʻu. Naʻe muimui ʻiate ia ha vahe tolu ʻe taha ʻo e tokolahi naʻe ʻi he langí. (Vakai, T&F 29:36–37.)

8. Naʻa tau fili ke tali e palani ʻa e ʻOtuá mo muimui ʻia Sīsū Kalaisi. Naʻa tau tauhi hotau ʻuluaki tuʻungá pea tau fakalakalaka mei ai ki hotau tuʻunga hono uá, ʻo tau maʻu ai hotau sino fakamatelié.

9. ʻOku tau maʻu ʻa e ngaahi lelei ʻo e Fakalelei ʻa Sīsū Kalaisí ʻi heʻetau tui kiate Ia, fakatomala mei heʻetau ngaahi angahalá, papitaiso ʻi he mafai ʻo e lakanga fakataulaʻeikí, maʻu ʻa e meʻafoaki ʻo e Laumālie Māʻoniʻoní, mo tauhi e ngaahi fekau ʻa e ʻOtuá ʻi hono kotoa ʻo ʻetau moʻuí (vakai, 2 Nīfai 31:16–20; Ngaahi Tefito ʻo e Tui 1:3–4).