Ngaahi Fakakaukau Maʻá e Efiafi Fakafāmili ʻi ʻApí

“Sikī pē ʻe Tahá,” p. 12: Lolotonga ha lēsoni, ʻe lava ke ueʻi koe ʻe he Laumālie Māʻoniʻoní pe ko kinautolu ʻokú ke akoʻí ke vahevahe ha ngaahi aʻusia fakafoʻituitui ʻa ia ʻe fie maʻu ke fanongo ki ai e niʻihi kehe (45). Fakakaukau ki ha ngaahi founga te ke lava ʻo ʻoange ki he kau mēmipa ʻo e fāmilí ʻa e ngaahi faingamālie ko ʻení ʻi hoʻo akoʻi mei he fakamatala ko ʻení. Fakatātā ʻaki ʻeni, hili hoʻo ako ki he meʻa naʻe aʻusia ʻe he tokotaha naʻá ne fai e talanoá, ʻe lava ke vahevahe e kau mēmipa ʻa e fāmilí ha ngaahi meʻa naʻa nau aʻusia ʻi he taimi naʻa nau ongoʻi ai ʻa e mālohi mo e anga-ʻofa ʻa e Tamai Hēvaní ʻi heʻenau moʻuí taki taha.

“Hanganaki Atu Ki he Temipalé,” p. 16: Ko e founga ʻe taha ke tokoniʻi e kau akó ke nau ʻiloʻi ʻa e ngaahi tefitoʻi moʻoni ʻo e ongoongoleleí ko ʻenau tā ha ngaahi fakatātā ʻo fekauʻaki mo e kaveinga ʻo e lēsoní (166–67). Hili hono akoʻi e ngaahi tefitoʻi moʻoni ʻe fitu ʻoku ʻomai ʻe he fakamatalá, fakakaukau ki hono fakaafeʻi ʻo e kau mēmipa ʻo e fāmilí ke tā ha fakatātā ʻo e temipalé pe tā ʻa e meʻa naʻa nau ako mei he lēsoní.

“Tupu Hake ki he ʻEikí,” p. 42: ʻE fakalahi ʻa e kau mai ʻa e kau mēmipa ʻo e fāmilí ki he lēsoní ʻi hono kole kiate kinautolu ke nau fanongo ki ha ngaahi fakamatala pau ʻi he fakamatalá (69). ʻI hoʻomou lau fakataha ʻa e fakamatalá, fakakaukau ke ke kole ki he kau mēmipa ʻo e fāmilí ke fanongo ki ha ngaahi kupuʻi lea pau, ngaahi lea pe ngaahi tefitoʻi moʻoni te ne lava ʻo tokoniʻi kinautolu ke nau “tupu hake ki he ʻEikí.”

“Ko e Kofu Foʻou ʻa Maliá,” p. 62: “ʻI he taimi ʻokú ke ngāue ʻaki ai ha ngaahi ʻekitivitī fakaako kehekehe, ʻoku malava ʻa e kau akó ke ʻiloʻi lelei ange mo manatuʻi lahi ange ʻa e ngaahi tefitoʻi moʻoni ʻo e ongoongoleleí” (89). Fakakaukau ange ki ha ngaahi founga ʻe lava ai hoʻo fānaú ʻo fanongo, hivaʻi pe vahevahe ʻa e ngaahi moʻoni ʻoku nau ako mei he fakamatala ko ʻení. Fakatātā ʻaki ʻeni, ʻi hoʻo lau ʻa e talanoá, fakaafeʻi hoʻo fānaú ke hiki honau ngaahi nimá pe ʻai honau tuhú ki honau ihú ʻi he taimi ʻoku nau fakatokangaʻi ai ʻoku ʻikai tokanga ʻa Maliá. Fakakaukau angē ke hivaʻi ʻe hoʻo fānaú ha foʻi hiva Palaimeli fekauʻaki mo e meʻa naʻa nau ako mei he talanoá.