Naʻe fakataha ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá mo e kau minisitā ʻo e Falealea Sikotilaní ʻi ha houa ʻe ua ʻi Sepitema ke aleaʻi ʻa e founga ʻe lava ai ʻe he kāingalotu Sikotilaní ʻo poupouʻi ʻa e ngaahi kaveinga fakaeangamaʻá pea ke fakamamafaʻi ʻa e ngaahi akonaki ʻa e Siasí ki he mahuʻinga ʻo e fāmilí. Ko e fakatahaʻanga ʻi he Falealea Holilutí ʻi ʻEtinipuá naʻe kau ki ai ha kau minisitā ʻe toko nima ʻo e Falealeá. Naʻe ʻaʻahi foki ʻa ʻEletā Petinā mo e kau taki kehe ʻo e Siasí ki ʻAilani ki ha ngaahi fakataha ʻa e Siasí.

Kuo fakahā ʻe he Kau Palesitenisī ʻUluakí ha liliu ʻi he Kau Palesitenisī Faka-ʻĒlia ʻo e Pasifikí ʻo kamata ʻi ʻOkatopa 2009. Naʻe toki fakahoko ha faitoʻo ʻi Sōleiki Siti kia ʻEletā Tēvita S. Pekisitā ʻo e Kau Fitungofulú, pea ko e Palesiteni ʻo e ʻēliá talu mei ʻAokosi 2008, pea kuo toe ui ia ki he hetikuota ʻa e Siasí. ʻE hoko ʻa ʻEletā Teti R. Kalisitā ʻo e Kau Fitungofulú ko e Palesiteni ʻo e ʻēliá, pea Tokoni ʻUluaki ʻa ʻEletā Sēmisi J. Hamula pea Tokoni Ua ʻa ʻEletā Peleni H. Nilasoni.

Naʻe fakataha atu ha kau taautaha ʻo e Siasí mei Uasingatoni, D.C., ʻAmelika, ki ha feituʻu maomaonganoa ʻi Kuatemala ko e Teleʻa Polosikí ʻi ʻAokosi 2009 ke tokoni ki he kakai Kekisí. ʻI heʻenau ngāue mo ha kautaha ʻoku ʻikai fakatupu paʻangá, naʻa nau tokoni ki hono langa ʻo ha ako lotoloto mo ha laipeli, akoʻi ha kau faiako mo tufaki ha ngaahi vaitamini. Naʻa nau toe fakahoko foki ha ngaahi ako (workshop) ki he tuʻunga ʻo e maʻá, meʻa-tokoní, moʻui lelei ʻa e nifó, paʻanga fakataautahá mo e ngoué ki ha kakai ʻe toko 300 pea kamata hono langa ʻo ha peito ki ha ʻapiako, kilīniki ki he moʻui leleí mo ha fakatafeʻanga vai ki he koló.