Naʻe ʻIkai Lava ke Fakatatali ʻEku Vahehongofulú

ʻI hoku taʻu hongofulu tupu lahí, ʻi he kamata ke u feohi mo e kau faifekau taimi kakató, naʻá ku ʻilo ai hono mahuʻinga ke u maʻu ha fakamoʻoni ki he ngaahi tefitoʻi moʻoni naʻe vavé ni mai haʻaku akoʻi ʻi haʻaku hoko ko e faifekaú. Ne u pehē ko e taha ʻo e ngaahi tefitoʻi moʻoni naʻá ku fie maʻu ke mahino ange kiate aú ko e vahehongofulú.

ʻOku maʻu ʻe he kakai tokolahi ʻa e fakamoʻoni ki he totongi vahehongofulú lolotonga e ngaahi taimi ʻo e faingataʻa fakapaʻangá. Ka ʻi heʻeku tupu haké, naʻe hulu maʻu pē ʻa e meʻa naʻá ku maʻú. Kapau naʻe ʻi ai haʻaku fie maʻu fakapaʻanga, ʻe totongi ia heʻeku ongomātuʻá. Naʻá ku houngaʻia ai, ka neongo ne u ʻilo te na totongi ʻeku ngāue fakafaifekaú, naʻá ku fakakaukau ke u totongi ʻe au ʻa e vaeua ʻo ʻeku ngāue fakafaifekaú mei heʻeku kiʻi ngāue fakataimi ko e faiakó.

ʻI he taimi tatau pē, ne u fakatokangaʻi naʻe teʻeki ke u totongi kakato ʻeku vahehongofulú ʻa e pēseti ʻe 10 mei heʻeku vahe kuoʻosí. Naʻá ku fakakaukau ke u fakaʻaongaʻi ʻeku vahe hokó ke fakakakato ʻa e nounoú koeʻuhí ke u hoko ko e tokotaha totongi vahehongofulu kakato.

Ka ʻi he aʻu ki he vahe ʻo e māhina hokó naʻe nounou ia ʻi he meʻa naʻá ku ʻamanaki ki aí. Ne fetōʻaki ʻeku taimi ngāué, ʻo kehekehe leva ʻeku vahé ʻi he māhina takitaha. Naʻe vave ʻeku fakatokangaʻi naʻe ʻikai ke lava ʻe heʻeku vahé ʻo fakakakato ʻeku ngaahi fakamolé mo fakafaingamālieʻi au ke u totongi ʻa e paʻanga naʻá ku kei moʻua ʻaki ki he ʻEikí ʻi he vahehongofulu mei he vahe kimuʻá.

Naʻá ku fakakaukau ki he ngaahi meʻa ne u lava ʻo faí, peá u pehē, “ ʻE fie maʻu ke u fakakakato ʻeku vahehongofulú ʻi he māhina hoko maí.” Ka ne u manatuʻi hake ha lēsoni ʻi he ʻinisititiutí fekauʻaki mo e vahehongofulú. Naʻá ku manatuʻi lelei ha meʻa naʻe folofola ʻaki ʻe he ʻEikí ʻi he Fuakava Motuʻá: “Mou ʻahiʻahiʻi ai au” (Malakai 3:10). Ko e faingamālie ʻeni kiate au ke u ʻahiʻahiʻi ʻa e tefitoʻi moʻoní mo maʻu ha fakamoʻoni mālohi ange ki he meʻa naʻe ʻamanaki ke u akoʻi ki he niʻihi kehé.

ʻI heʻeku totongi ʻeku vahehongofulú, naʻá ku ongoʻi lelei koeʻuhí ko ʻene kakató. Ka naʻe hoko mai ʻa e faingamālie ʻo e “ ʻahiʻahiʻi” e ʻEikí ʻi he ʻaho hono hokó pē—ʻo vave ange mo lahi ange ʻi he meʻa naʻá ku ʻamanaki ki aí—ʻi heʻeku maʻu ʻa e ngāue taimi kakato ke u hoko ko e faiako kinitakātení. ʻE lava ke u ngāue ʻo aʻu ki he taimi ke u ʻalu ai ʻo ngāue fakafaifekaú, pea ko e paʻanga te u maʻú ʻe lahi ange ia ʻi he meʻa naʻá ku fie maʻu ke totongi ʻaki ʻa e vaeua ʻo ʻeku ngaahi fakamole ʻi he ngāue fakafaifekaú. Ne tupulaki ʻaupito ʻeku fakamoʻoni ki he vahehongofulú mei he tāpuaki ko ʻení. Ne tupulaki ʻa e fakamoʻoni ko iá ʻi heʻeku toutou vahevahe ʻa e meʻa ne u aʻusiá mo e kakai ne u malangaʻi ʻi he Misiona Siamane Miuniki/ʻAosituliá ʻi he taʻu ʻe ua ne hoko maí.

ʻOku ou ʻilo ʻoku moʻoni ʻa e tefitoʻi moʻoni ʻo e vahehongofulú pea ʻoku hanga ʻe he ʻEikí ʻo “fakaava [kiate kitautolu] ʻa e ngaahi matapā ʻo e langí” mo lilingi hifo ha ngaahi tāpuaki lahi “ ʻe ʻikai ha potu ʻe faʻa hao ia ki ai” (Malakai 3:10).