Maʻu Fakahaá Lilingi Hifo mei he Langí

ʻOku pīponu ʻa kinautolu ʻoku ʻalu ʻo fuʻu ofi ki he Vaitō Puluhapanakí ʻi Honitūlasí. Ka ʻoku ʻikai ke tokanga ki ai ʻa Hōsea Sanitiako Kasitilo ia. Kia Hōseá, ʻoku fakafofongaʻi ʻe he tō hifo ʻa e vaí ha talaʻofa ʻoku ʻuhingamālie ʻaupito kiate ia talu hono fuofua tali ʻe he Tamai Hēvaní ʻene ngaahi lotu fekauʻaki mo e ongoongoleleí.

ʻOku pehē ʻe Hōsea, “Kapau ʻoku tau fie maʻu ʻa e potó, ʻe lava ke tau kole ia,” ko e fakamatala ia ʻa Hōseá (vakai, Sēmisi 1:5). ʻOku talaʻofa mai ʻa e ʻEikí te Ne lilingi hifo ʻa e ʻiló ki he Kāingalotú ʻo “hangē pē ko e ʻikai ke lava ʻe ha tangata ʻo taʻofi e tafe ʻa e vai ko ʻení.” (Vakai, T&F 121:33.)

Kuo ako ʻe Hōsea ʻo ʻilo ʻi he meʻa kuó ne aʻusia ʻi he Siasí ko e fakamoʻoní ʻoku tupulaki ia ʻi he ʻotu lea ki he ʻotu lea, ka ʻoku ʻikai ʻuhinga ia ke māmālie ʻa e founga hono maʻú. ʻOku hulu fau ʻa e ngaahi fakahā ke maʻú.

Naʻe akonaki ʻa e Palōfita ko Siosefa Sāmitá ʻo pehē, “Naʻe teʻeki ai fakahā ʻe he ʻOtuá ha meʻa kia Siosefa, ka ko ia pē te Ne fakahā ki he Toko Hongofulu Mā Uá, pea naʻa mo e Tokotaha Māʻoniʻoni siʻisiʻi tahá te ne ʻilo ʻa e meʻa kotoa pē ʻo fakatatau mo e meʻa te ne mafuesiá.”¹

Ko e fakamatala ʻeni ʻa Hōseá, ʻa ia ʻoku palesiteni ʻi he kōlomu ʻo e kaumātuʻá, “Kimuʻa pea papitaiso aú, naʻá ku kole ki he Tamai Hēvaní ke Ne fakapapauʻi mai ʻoku moʻoni ʻa e ngaahi meʻa naʻá Ne fakahā maí: ʻa e Tohi ʻa Molomoná, Lea ʻo e Potó, vahehongofulú.” “ ʻOku maʻu ʻa e ngaahi talí ʻi he kole kiate Iá.” (Vakai, Mōsese 1:18.)

Neongo ia, kuo pau ke tau teuteuʻi kitautolu ke maʻu ʻa e fakahaá. ʻOku pehē ʻe Hōsea, “Kapau ʻoku tau fie viviku, kuo pau ke tau ʻi he loto vaí. Kapau ʻoku tau fie maʻu fakahā, kuo pau ke tau ʻalu ki he feituʻu ʻoku maʻu ai e fakahaá. Kuo pau ke tau ʻi he feituʻu ʻoku totonu ke tau ʻi aí, ʻo fakahoko ʻa e meʻa ʻoku totonu ke tau faí. ʻOku tau ako ʻa e ngaahi meʻa lahi ʻo kapau te tau faivelenga.” (Vakai, 1 Nīfai 15:8–11.)