Ko e Taimi Ne ʻIkai Fakatokangaʻi Ai Aú

Naʻa mau toki aʻu atu pē ki homau loki he mōtelé mo e tatangi ʻa e telefoní. Ne u ʻosi ʻilo pē ko e ongoongo fakamamahi ʻeni fekauʻaki mo Soti, ko hoku kiʻi tehina māhina hivá. Ne talu ʻene mohe mei hono fāʻeleʻí pea naʻe fie maʻu ke tauhi houa ʻe 24 mo fafanga pē ʻo fakaʻaongaʻi e tiupí. Naʻe tuku fakataimi ʻa Soti ʻi ha senitā tauhiʻanga mahakí kae lava homau fāmilí ʻo ʻeveʻeva he naʻe fuʻu fie maʻu ke mau fai ia.

Naʻá ku tali e telefoní. Ko ʻeku kuitangatá naʻe lea maí. Naʻe ongo fefeka mai hono leʻó: “Ui hoʻo tamaí.”

Naʻe nounou ʻaupito ʻena talanoá. Naʻe tonu ʻeku ongó. Kuo mālōlō ʻa Soti.

ʻI he ʻaho hono hokó, ʻi heʻemau aʻu atu ki ʻapí, naʻá ku fiemālie. Naʻe tau mai ʻa e pasi akó ʻi he halá. ʻE haʻu hoku ngaahi kaungāmeʻá. Faifai pea ʻi ai ha taha hoku toʻú ke u vahevahe mo ia hoku mamahí.

Kae lolotonga ʻeku tuʻu ʻi heʻemau tauʻanga meʻalelé ʻo tali ki hoku ngaahi kaungāmeʻá, naʻe hoko ha meʻa faikehe. Naʻe hangē ia ʻoku ʻikai te u ʻi aí. Ne u sio pē kae kolosi hoku ngaahi kaungāmeʻá ki he kauhala ʻe tahá pea nau fepōtalanoaʻaki ʻiate kinautolu pē. Naʻe ʻikai ke nau teitei sio mai.

ʻI he pongipongi hono hokó naʻe ʻikai ke fou ange hoku ngaahi kaungāmeʻá ke mau ō ʻo hangē ko e meʻa angamahení. Naʻá ku fakakaukau, “ ʻOku mahino pē kiate au. Mahalo naʻa nau ʻilo pē he ʻikai ke u ʻalu ki he akó koeʻuhí ko e palani ki he putú. Ka naʻe ʻikai ke nau fou ange he ʻaho hono hokó pe ʻaho hokó pe ʻaho hono hokó. Pea naʻe ʻikai ke nau toe tali ange kiate au ʻi he tuku ʻa e akó.

Lolotonga e taimi ko iá ne maʻu ha poupou lahi homau fāmilí mei he Fineʻofá mo e kāingalotu kehe ʻo e uōtí. Ka neongo ia, naʻe ʻikai tokoni ʻa e poulu moá ia ke fakanonga hoku loto-mamahi, taʻu 13. ʻI heʻeku foki ki he Mutualé, naʻe fakahoko ʻe he ʻetivaisá ha lēsoni kau ki he moʻui hili ʻa e maté. Naʻe kamata ke u tangi. Naʻe hanga hifo ʻa e ʻetivaisá pea hoko atu ʻene laú. Naʻe sio fakamamaʻu pē ʻa e toenga ʻo e kalasí ki muʻa. Naʻá ku tangi halotulotu. Ne u fakaʻamu ne tangi ha taha mo au pe fāʻofua mai kiate au.

ʻI heʻeku manatu ki he ngaahi meʻa ko ʻeni ne hokó, ne u ʻiloʻi naʻe ʻikai ke tāufehiʻa pe taʻetokanga mai hoku ngaahi kaungāmeʻá. Naʻe ʻikai pē ke nau ʻilo pe te nau tokoniʻi fēfē hoku mamahí. Naʻa nau pehē ne u fie maʻu ke tukunoaʻi au ke u tengihia, pea naʻe ʻikai ke u fie fai ha meʻa naʻe fakafiefia.

Ko e meʻa ʻeni ʻoku ou fakaʻamu naʻe ʻilo ʻe hoku ngaahi kaungāmeʻá mo e ʻetivaisá:

Ke ke ʻi ai maʻá ho kaungāmeʻá. ʻAve ki ai ha kiʻi tohi pe matalaʻi ʻakau, kae mahuʻinga angé, ʻalu pē koe. Fāʻofua kiate ia pea ʻai ke ne ʻilo ʻokú ke tokanga ange. Pea ʻofa mai ka lava, ʻalu ki he ʻāpoó pe meʻafakaʻeikí.

Fakakau ho kaungāmeʻá ʻi he ngaahi meʻa angamaheni ʻoku ke faí. Kuo ʻosi aʻusia ʻe ho kaungāmeʻá ʻa e ngaahi liliu ke fakahoko ʻi he mole ʻo ha taha ʻoku ʻofa aí. ʻOua te ke ʻai ke toe feinga ia ke fakahoko ha ngaahi liliu ʻi he mole mo hono ngaahi kaungāmeʻá. ʻOku ʻi ai pē ʻa e fakanonga ʻi hono fakahoko ʻo e ngaahi meʻa angamahení.

ʻOua te ke ongoʻi ʻoku fie maʻu ke ke malanga ʻaki ha lēsoni fekauʻaki mo e moʻui hili ʻa e maté. ʻI he taimi ʻoku fakahoko ai e faʻahinga lēsoni ko ʻení, fai leva ʻa e meʻa naʻe akonaki ki ai ʻa ʻAlamaá: “Tangi fakataha mo kinautolu ʻoku tangí; ʻio, pea fakafiemālieʻi ʻa kinautolu ʻoku ʻaonga ki ai ʻa e fakafiemālié” (Mōsaia 18:9). Kuo ʻosi ʻilo mahalo ʻe ho kaungāmeʻá ʻe toe fetaulaki pē mo e tokotaha ʻoku ʻofa aí, pea ka ʻikai, ʻe fakanatula ʻene haʻú ʻi haʻane kamata vahevahe ʻene ngaahi fakakaukaú mo e ngaahi meʻa ʻoku hohaʻa ki aí. Ko e taimi ia ke ke vahevahe ai hoʻo fakamoʻoni ki he palani ʻo e fakamoʻuí.

Hili ha taʻu ʻe taha mei he mālōlō hoku tehiná, ne mālōlō e faʻē hoku kaungāmeʻá. Naʻá ku ongoʻi mamahi moʻoni. Ne u fakakaukau, “Ko ʻeku toe sio pē ki ai, te u fakahā ange ʻeku fie kaungāmamahí. Naʻá ku manatuʻi ʻa e meʻa naʻá ku fouá, peá u ʻilo naʻe fie maʻu au ʻe hoku kaungāmeʻá. ʻI heʻeku lue ki honau ʻapí naʻe hohaʻa hoku lotó. Fēfē kapau he ʻikai ke fie sio mai ia kiate au? Mahalo ʻoku ʻikai loto hono fāmilí ke u ʻi ai. Te u tatali nai ʻo toki talanoa mo ia ʻamui ange? Ka ʻi heʻene fakaava ʻa e matapaá, naʻá ku lava pē ʻo tala naʻe fiefia ʻi heʻeku haʻú. Naʻe moʻua ʻene tamaí mo e ngaahi tokouá mo e tuongaʻané ʻi hono palani e meʻafakaʻeikí. Naʻá ma lue ʻo ʻeva. Naʻe ʻikai ke u hohaʻa ki ha meʻa ke lea ʻaki. Naʻe mei fai kotoa pē ʻe ia ʻa e talanoá.