Maʻu Fakahaá ʻI he Tulutā ki he Tulutā

ʻOku siofi fakalelei ʻe Lui ʻOnitulei Vālela ʻa e tātānaki ha tulutā vai ʻi he ngataʻanga ʻo e maka ʻoku tautau hifo ʻi he loto ʻAna ʻo Taulapé ʻi Honitūlasí. ʻOku hanga ʻe he tulutā takitaha ʻo ʻai ke tupu lahi ange ʻa e foʻi maká ʻi heʻene tānaki atu ha konga siʻi ki he ngaahi tulutā kimuʻá.

Ka ʻoku ʻikai ke sio pē ʻa Lui ki he foʻi maká—ʻokú ne vakai ia ki ha lēsoni fekauʻaki pē mo ia.

ʻOkú ne pehē, “ ʻOku tupu ʻa e maká ʻi he tulutā ki he tulutā. ʻOku pehē foki ʻa e tupu ʻetau ngaahi fakamoʻoní. ʻOku akoʻi kitautolu ʻe he Laumālie Māʻoniʻoní ʻi he kiʻi konga siʻi ki he kiʻi konga siʻi. ʻOku tokoni ʻa e tulutā takitaha ke tau tupulaki ʻi he ʻilo fekauʻaki mo e ongoongoleleí.” (Vakai, 2 Nīfai 28:30.)

ʻOku manatuʻi ʻe Lui ha meʻa tatau ne hoko ʻi heʻene moʻuí. Lolotonga ʻa e lau folofola honau fāmilí ʻi ha ʻaho ʻe taha, naʻá ne ongoʻi ha nonga mo ha fakapapauʻi ʻoku moʻoni ʻa e meʻa naʻá ne laú.

ʻOkú ne pehē, “Ko hoku taʻu 14 pē ʻeni, ka ʻoku ou ʻilo kuó u maʻu ha fakahā koeʻuhí kuó u ongoʻi hono fakahā mai ʻe he Laumālie Māʻoniʻoní ʻoku moʻoni ʻa e Siasí pea ko Siosefa Sāmitá ko ha palōfita. Mahalo kuo teʻeki ke lahi ʻa e ngaahi meʻa kuó u maʻú—ʻoku ou hangē pē ha kiʻi maka siʻisiʻi ʻaupitó—ka ʻo kapau te u fai e meʻa ʻoku totonu ke u fai ke maʻu ai ha fakahaá, ʻe hokohoko atu ʻa e tupulaki ʻeku ʻiló mo e fakamoʻoní.”

ʻOku pehē ʻe Lui ʻoku teuteuʻi kitautolu ʻe he ʻalu ki he lotú, ʻalu ki he seminelí, ako e folofolá, ʻaukai, mo lotú ke tau maʻu ha “fakahā hoko mo e fakahā” (T&F 42:61).

ʻOkú ne pehē, “Kapau te u fai e ngaahi meʻá ni, ʻe hangē ʻeku tuí ko e ngaahi maka ko iá, pea lava ʻo aʻu atu ia mei heni ki hēvani,”.