Ang Akong Lisud nga Desisyon

Nicole, ang pamilyang Johnson manganhi og balik karong gabii,” miingon si Mama. “Nag-ampo ka na ba sama sa ilang gihangyo kanimo?”

“Wala, wala pa,” miingon ko.

Sila si Elder ug Sister Johnson ang magtiayon nga misyonaryo sa among ward. Mag-anhian sila sa family home evening aron sa pagtudlo kanako sa mga panaghisgutan sa misyonaryo.

Ang akong pamilya dili kanunay nga makaadto sa simbahan, mao nga dunay mga butang nga wala kaayo nako masabti. Karon nga hapit na ko mag-edad og walo, si Mama miingon nga akong gikinahanglan ang paghukom kon ako magpabunyag ba.

Niadtong unang semana sila si Elder ug Sister Johnson mitudlo kanako kon sa unsang paagi si Joseph Smith nag-ampo aron makahibalo sa kamatuoran. Dayon ila kong gihangyo sa pag-ampo mahitungod sa pagpabunyag.

“Paminawa gayud kon unsay imong gibati,” si Sister Johnson miingon. “Ingon niana kon unsaon sa pagtabang sa Espiritu Santo kanato aron masayud sa tinuod.”

Naghuna-huna ko nga tingali maghulat pa ko hangtud nga 14 na ang akong edad sama kang Joseph Smith.

Karong gabii sa among leksyon si Elder Johnson mipatong-patong og mga baso aron sa paghimo og usa ka tore. Miingon siya nga kon ikaw walay maayo nga pundasyon, ang tibuok nga tore mahugno.

“Sa imong hunahuna ngano nga ang Simbahan adunay ingon kalig-on nga pundasyon?” siya nangutana.

Akong nahinumduman ang leksyon sa miaging semana. “Tingali tungod kay ang Langitnong Amahan ug si Jesus misulti kang Joseph Smith kon unsaon sa pagpahiuli niini,” miingon ko.

“Husto,” si Elder Johnson miingon. “Ug duna kitay mga buhing propeta ug mga apostoles nga magsusi nga kanunay kining nagsubay sa husto.”

Kana adunay kahulugan. Kanunay nga maayo ang akong pagbati kon makadungog ako mahitungod kang Presidente Thomas S. Monson.

Dayon si Sister Johnson nangutana kanako sa pangutana nga akong gikahadlokan.

“Nag-ampo ka ba mahitungod sa pagpabunyag?”

“Wala, wala pa,” miingon ko.

“Gusto ka bang mabunyagan?” Si Sister Johnson nangutana.

Nanghinaut kong motubag kaniya, apan gilihok lamang nako ang akong mga abaga.

Ang gamay nakong igsoong babaye nagtuo nga nahadlok ko nga itunlod sa tubig tungod kay mao sab kana ang iyang gikahadlokan. Apan ganahan ko sa tubig, mao nga dili ko sigurado kon unsay akong gikabalak-an.

“Nahadlok ka ba sa responsibilidad?” Nangutana sa Sister Johnson.

Pagkahuman og sulti ni Sister Johnson niana, nahibalo ko nga husto siya. Si Mama miingon nga human ko mabunyagi, duna na koy tulubagon. Nagpasabut kana nga responsable na ako sa akong pagpili. Kinahanglan ako nga mag-amping sa pagsunod sa mga sugo sa Dios. Dili ako sigurado kon andam na ba kaha ko niana nga responsibilidad. Unsa kaha kon mohunong ko sa pagsimba sama sa akong papa?

“Kon mowalo na ang imong edad, may tulubagon ka sa imong mga pagpili bisan kon dili ka pa mabunyagan,” si Sister Johnson miingon. “Apan human sa imong pagbunyag ug pakumpirma, makadawat ka og dugang pa nga tabang sa paghimo og mga pagpili. Kana tungod kay anaa kanimo ang gasa sa Espiritu Santo.”

Naghisgot kami mahitungod sa mga sugo nga kinahanglan nakong sundon. Nahibalo na ako nga ang pagpanigarilyo ug ang alkohol ug ang drugas dili maayo kanimo, busa ang pagtuman sa Balaod sa Kaalam dili lisud paminawon.

Sa dihang nanglakaw na ang mga Johnson, wala na ako mahadlok nga mabunyagan. Gusto na akong mohimo og husto nga mga pagpili ug motuman sa mga sugo sa Langitnong Amahan. Ug malipayon ako nga ang Espiritu Santo motabang diay kanako.

Misulod ko sa akong kwarto ug miluhod kilid sa akong higdaanan. Samtang nag-ampo ko, akong gibati nga usa ka maanindot nga ideya ang mabunyagan. Nahibalo ako nga kadto nga pagbati mao ang tubag sa akong pag-ampo.