Ang matag miyembro sa Simbahan kinahanglan nga magpalambo og mas hugot nga pagtuo diha kang Kristo, si Elder M. Russell Ballard ug si Elder D. Todd Christofferson sa Korum sa Napulog Duha ka mga Apostoles miingon ngadto sa mga miyembro sa Guatemala, Honduras, ug sa Nicaragua panahon sa ilang mga buluhaton didto sa Central America niadtong Enero 2011. Kauban sa ubang mga lider sa Simbahan, ilang gitambagan ang mga miyembro sa paglig-on sa ilang mga pamilya pinaagi sa pag-ampo, pagtuon sa kasulatan, pagserbisyo sa templo, family home evening, pagbalaan sa Adlawng Igpapahulay, pagsunod sa mga sugo, ug sa pagpaambit sa ilang pagtuo ngadto sa naglibut kanila.

Si Elder Christofferson ug si Elder Ballard nangulo sa komperensya sa pipila ka mga stake ug miapil sa mga fireside alang sa lokal nga mga lider sa priesthood, mga ginikanan ug managtiayon, mga young single adult, ug mga kabatan-onan. Nahimamat usab nila ang 1,100 ka mga misyonaryo sa upat ka misyon, mga presidency sa stake, mga bishop, ug mga presidente sa branch.

“Kamo ang pipila sa pinakabililhong mga anak dinhi sa yuta, ug ang Dios nahigugma kaninyo,” si Elder Richard G. Scott sa Korum sa Napulog Duha ka mga Apostoles miingon sa mga Santos sa Ulahing mga Adlaw sa Mozambique samtang didto siya karong bag-o sa Africa Southeast Area. Onse ka tuig human sa pagpahinungod niini nga nasud alang sa pagsangyaw sa ebanghelyo, si Elder Scott mibalik niadtong Enero 2011 nga nakita ang dakong kalamboan sa Simbahan.

Sa una nga pagbisita ni Elder Scott, dunay 40 pa lamang ka miyembro sa Simbahan didto sa Mozambique, ug ang nasud sakop pa sa South Africa Johannesburg Mission. Atol sa ikaduha niya nga pagbisita, ang Simbahan mitubo ngadto sa kapin sa 5,000 ka mga miyembro nga mikatap sa tibuok 2 ka district, 19 ka branch, ug 3 ka grupo nga nagmiting sa tibuok nasud. Ang Mozambique mao usab ang headquarters sa Mozambique Maputo Mission, nga naglangkob sa tibuok Mozambique ug sa Angola.

Sa wala pa mobiya, si Elder Scott migahin og panahon sa pagpakighimamat ug sa pagpasalamat sa mga doktor nga didto sa Mozambique uban sa programa sa humanitarian aid sa Simbahan.

Ang mga miyembro sa Simbahan ug mga misyonaryo sa Pasipiko bag-o lang nga natudloan, nabayaw, ug nalig-on tungod sa duha ka sakop sa Korum sa Napulog Duha ka mga Apostoles, Elder David A. Bednar ug Elder Neil L. Andersen.

Si Elder Bednar nakighimamat sa mga misyonaryo ug sa mga miyembro sa Tonga, New Zealand, Hawaii, ug sa Marshall Islands. Alang sa mga miyembro sa Marshall Islands, ang pagbisita ni Elder Bednar usa ka importante nga hitabo, kay gituohan nga kadto ang unang panahon nga ang sakop sa Korum sa Napulog Duha ka mga Apostoles mibisita didto.

Si Elder Andersen mituman sa iyang mga buluhaton sa Australia, Papua New Guinea, New Zealand, ug sa French Polynesia.

“Samtang nagbiyahe kami sa mga isla sa kadagatan ug sa pinakalayo nga bahin sa yuta, among nakita nga ang Simbahan anaa bisan asa,” miingon si Elder Bednar. “Lig-on ang pagkatukod niini, nagtubo kini, ug naay matinud-anon, maayong mga tawo. Sa tinuoray milagro kini.”