Ang Inyong mga Ehemplo

Sa edad nga 14, si Martin nga taga-Westlands Branch nalayo sa iyang panimalay sa Nairobi, sa pag-eskwela sa usa ka boarding school diin siya lamang ang miyembro sa Simbahan. Sa eskwelahan ni Martin, sa mga piho nga adlaw sa semana, tsa ug pan ra ang ihatag alang sa pamahaw. Nga adunay 700 ka mga estudyante, ang mga awtoridad sa eskwelahan walay igong pundo nga makahatag og espesyal nga menu alang sa usa, mao nga gipili ni Martin ang pagkaon sa pan parisan og tubig.

Sa matag Dominggo motambong siya sa simbahan kuyog sa mga kauban niya sa eskwelahan. Didto maminaw siya sa relihiyusong mga pagtulun-an nga nahibaloan niyang usahay walay klaro. Sa matag higayon ang mga kaubanan niya sa eskwelahan modaklit og tan-aw kaniya nga maghinunghungay mahitungod sa iyang “lahi” nga mga gituohan. Panagsa, ang pipila gani motawag kaniya nga usa ka tigsimba og yawa.

Kini nga mga hagit milig-on kay sa mopahuyang kang Martin. Dako ang iyang kadasig tungod sa binulan nga pagbisita sa iyang mga ginikanan ug kanunay nga mga mensahe gikan sa iyang presidente sa branch, kinsa kanunay nga nagpadala og pinakabag-o nga isyu sa New Era. Ang pagbasa niini nakatabang sa pagdugang sa iyang kaisug sa pag-atubang niini nga mga pagsulay.

Si Joseph sa Riruta Ward naghupot sa office nga teacher sa Aaronic Priesthood. Nagpabilin siyang matinud-anon sa ebanghelyo bisan siya lamang ang miyembro sa simbahan didto sa usa ka dako nga eskwelahan diin daghan sa iyang mga kaedad miapil sa mga drugas ug uban pang mga kadautan. Si Joseph wala gayud makapalta og simba. Kanunay siya nga sayo, ug limpyo siya ug andam sa pagserbisyo sumala sa giingon kaniya sa iyang presidente sa korum ug sa bishop. Motabang siya sa pag-andam sa sakrament hapit sa matag Dominggo.

Si Humphrey sa Upper Hill Ward usa usab ka teacher. Nabunyagan siya sa Simbahan mga duha ka tuig pa lang ang milabay. Sama sa gibuhat ni Martin, si Humphrey kasamtangan nga nag-eswela sa boarding school. Ang ubang hinungdan sa paghugot gayud sa iyang pagtuo sukad siya mipasakop sa Simbahan mao nga siya nakadawat sa tanan niyang mga assignment sa seminary pinaagi sa post office (sa sulat), himoon kini, ug ipadala og balik sa hustong panahon ngadto sa iyang magtutudlo sa seminary.

Kon mahuman na ang ting-eskwela sa boarding school, si Humphrey sa naandan maglakaw sulod sa 45 minutos aron makasakay matag Dominggo padulong sa simbahan. Bisan pa man, kanunay siyang sayo sa simbahan ug andam nga moserbisyo sumala sa gi-assign.

Sa matag higayon nga siya i-assign sa pagpamulong, si Humphrey kugihan kaayo sa pagpangandam. Maklaro gayud sa tanang naminaw nga gipangandaman gayud niya ang iyang pakigpulong.

Karon kasagaran sa kalibutan, ang sumbanan sa moralidad padayon nga nagkakunhod. Sa kasagaran ang mga batan-on kinsa nagtinguha sa pag-apil sa mga butang nga maayo og dalaygon wala mahibalo kon asa kini pangitaa. Ang mga institusyon sa pagkat-on misagop sa sayop nga hunahuna nga ang mga sumbanan sa moral gipersonal sa pagpasabut ug nagkalain-lain.

Apan pinaagi sa pagsunod sa mga sumbanan sa inyong hugot nga pagtuo, matabangan ninyo ang inyong mga kaedad aron sa pagsaksi sa kalig-on, pagsalig sa kaugalingon, kalinaw, ug hingpit nga kalipay nga moabut pinaagi sa ebanghelyo. Ang inyong ehemplo makatabang sa pag-andam sa uban nga makadawat sa mga pagtulun-an sa gipahiuli nga ebanghelyo. Ang Katungdanan ngadto sa Dios alang sa batan-ong mga lalaki ug ang Personal nga Kauswagan alang sa batan-ong mga babaye makatabang kaninyo nga mas maduol sa Dios ug makaangkon sa pagsalig sa mga hingkod ug sa mga kaedad.

Mabatan-ong lalaki ka man o babaye, inyong gitahud ang priesthood samtang kamo nagpakabuhi sa paagi nga makasulti ang inyong mga kaedad ug sa uban nga nanaglibut kaninyo nga kamo tinuoray nga nagsunod sa Manluluwas. Ang kinabuhi sa Manluluwas isip usa ka batan-on nga tawo nagpahiluna og usa ka maanindot nga ehemplo alang kaninyo. Sa 12 anyos pa lamang Siya, gisugdan na Niya ang buluhaton sa Iyang Langitnong Amahan, sama sa Iyang pagtahud sa Iyang yutan-on nga mga ginikanan. Ang mga kasulatan nag-ingon nga Siya nanudlo sa uban didto sa templo. Iyang napahingangha ang mas magulang, ang mas maalamon nga mga tawo uban sa Iyang panabut ug doktrina (tan-awa sa Lucas 2:42–52). Gipakita sa Manluluwas nga ang 12 ka tuig nga pangidaron dili na gayud linghud para makasugod sa pagsabut sa lawom nga mga butang sa ebanghelyo ko kita makasarang sa pagbaton sa Espiritu uban kanato.

Ang mga kasulatan naghatag og daghang dugang nga mga modelo nga mga batan-on kinsa may kaisug sa ilang pagtuo: Si Joseph nga anak ni Jacob; Daniel; Nephi; ug uban pa. Agi og dugang, atong malantaw ang mga propeta ug mga apostoles sa ulahing mga adlaw nga mga ehemplo sa atong panahon.

Ang pagpahiuli sa Aaronic Priesthood usa ka ebidensya nga ang Langitnong Amahan misalig sa mga batan-ong lalaki ug mga batan-ong babaye sa Simbahan. Naglaum siya kaninyo mga batan-ong lalaki sa paggamit sa priesthood aron sa pagpanalangin sa Iyang mga anak batan-on ug tigulang. Mahimo ninyo kini pinaagi sa pagtudlo sa ebanghelyo, pagbunyag, pagpangalagad sa sakrament, pagtabang sa masakiton ug nag-antus, sa pagbisita sa mga panimalay sa paglig-on sa mga pamilya, ug sa pagserbisyo sigon sa ipabuhat sa inyong bishop o presidente sa branch. Pinaagi sa Aaronic Priesthood nga pagserbisyo nga inyong gihimo, ang mga tawo mobati sa gugma nga anaa sa Langitnong Amahan alang kanila. Sa samang paagi, kamo mga batan-ong lalaki makasunod sa ehemplo sa Manluluwas pinaagi sa pagpuyo nga takus sa pagsulod sa templo, sa pagserbisyo sa mga tawo sa inyong palibut, pag-atiman sa mga nanginahanglan, ug sa pagpalambo sa inyong mga kusog ug mga talento.

Sa daghang mga unit sa Simbahan, nakakita ako og mga batan-ong lalaki nga naghimo niini nga mga katungdanan sa priesthood uban sa balaang pagtahud ug dignidad. Nakakita usab ako og mga batan-ong babaye nga nagserbisyo sa tibuok nilang kasingkasing ug kalag. Ang sama niini nga pagserbisyo ug ang paagi sa paghatag niini makalig-on sa inyong pagtuo sa Dios nga Amahan ug sa Iyang Anak, si Jesukristo. Makalig-on usab kini sa pagtuo niadtong inyong giserbisyohan.