Ang Gahum sa Matarung nga Ehemplo

Niadtong Abril 1992 ang akong pamilya og ako nagpuyo sa Provo, Utah, diin namalhin kami gikan sa Canada aron akong mahuman ang akong kurso sa engineering sa Brigham Young University. Ang akong anak nga lalaki si Jase, nga 17 ang edad, nagkahigalaay uban sa batan-ong babaye nga ginganlan og Krista.

Pagka-Sabado sa gabii sa katapusan sa semana sa kinatibuk-ang komperensya, si Jase misulod sa sala ug nangutana kon mahimo ba siyang mohulam sa sakyanan aron dalhon si Krista manggawas sila aron mag-milk shake. Akong giitsa ngadto niya ang yawe, ug miadto siya sa kusina sa pagtawag ni Krista. Akong madungog ang pikas nga bahin sa ilang panag-istorya, nga ingon niini:

“Hi, Krista, ako ni, si Jase. Naghunahuna ko kon ganahan ka bang manggawas ta aron mag-milk shake.” Nahilom. “Buot nimong ipasabut human sa miting sa priesthood? O, sigi, motawag lang unya ko nimo. Kita lang ta.”

Gibutang ni Jase ang telepono ug mibalik sa sala.

“Unya mogawas ka kuyog niya?” Nangutana ko.

“Miingon siya nga ganahan siyang moadto,” mitubag si Jase, “apan miingon siya nako nga manawag ko og balik inig pauli nako human sa sesyon sa priesthood.” Uban sa subo nga panagway, mihinay-hinay siya og sulod sa kwarto.

Ingon og may miigo kanako sama sa usa ka tonelada nga hollow blocks. Nagdako ako sa southern Alberta, hapit 80 ka milya (130 ka kilometros) gikan sa stake center. Walay nagdahum kanako o gani ang akong mga ginikanan, nga mga lider sa among branch, nga mopatim-aw alang sa mga sesyon sa komperensya, sagdi nalang nang sesyon sa priesthood. Karon usa ka tawo ang naghimo og importansya niini.

Unsa man kaha ang akong itubag sa subo nga panagway sa akong anak samtang misulod siya sa iyang kwarto? Nahibalo ako nga ang akong desisyon makahimo og usa ka sundanan alang sa katuigang moabut.

Mibarug ako sa akong gilingkuran ug giadto si Jase ug ang akong ikaduhang anak nga lalaki, bag-ong na-orden sa pagka-deacon, “Pag-ilis mo. May 10 minutos pa ta aron makaabut sa sesyon sa priesthood sa stake center.” Nagdali ko og pangandam, ug sa akong paggawas, ang duha andam na, ug nanakay mi sa sakyanan.

Wala kaayo nako mahinumdumi ang mga gipamulong, apan akong nahinumduman nga among gibati ang Espiritu. Nindot ang pagbati nga maanaa sa sesyon sa priesthood uban sa akong mga anak. Dihang nakauli na kami, nindot ang gibati ni Jase sa iyang kaugalingon, nga nakapanindot sa akong pagbati. Iyang gitawagan si Krista, ug nanggawas sila aron mag-milk shake.

Sa duha ka dekada nga milabay sukad niadtong adlawa, ang mga tighupot sa priesthood sa among pamilya wala na gayud makapalta bisan usa ka sesyon sa priesthood sa kinatibuk-ang komperensya. Tungod kay ang usa ka matarung nga babaye mibarug sa iyang gituohan, ang among pamilya may oportunidad sa pag-usab, ug padayon kaming naminaw sa mga pulong sa ulahing adlaw nga mga propeta ug mobati sa Espiritu sa sesyon sa priesthood sa kinatibuk-ang komperensya.