Gusto na Kaayo Kong Moundang

Sa wala pa ko mo-graduate sa high school, usa ka maingon og gamay nga milagro ang nahitabo, usa ka hitabo nga miusab sa akong kinabuhi ngadto sa laing direksyon. Bisan sa gilay-on tali sa akong mga binuhatan ug sa mga sumbanan sa ebanghelyo, usa ka Dominggo sa buntag misunod ako sa kusog nga aghat sa pag-adto sa simbahan ug mobayad og ikapulo. Dihang miabut ako sa simbahan, nagpangutana ko alang sa mga tawo nga akong nailhan. Usa sa mga ngalan nga akong gipangutana mao ang ngalan sa akong presidente sa Young Men sa akong pagka-deacon, sa katapusang higayon nga misimba ko. Siya na karon ang nagserbisyo isip bishop sa ward.

Kadto nga maayo nga bishop nagtabang kanako nga mabalik ko sa Simbahan. Akong gikumpisal ang akong mga sala, ug mitabang siya kanako sa paghimo og plano sa kalamboan. Kapin sa pipila ka bulan naghinulsol ako. Na-advance ako sa priesthood. Duna na koy calling. Maayo ang akong nahimo, gani, gitawag ako og misyon, ug nakabaton ako og pipila ka katuigan diin nakontrolar ang akong pagkaadik.

Sa dihang miuli ko gikan sa akong misyon, wala na koy problema sa pornograpiya; dayag lang nga wala na akoy akses niini. Nausab kadto sa ulahing bahin sa mga 1990, dihang ang internet hilabihan ka makaagni. Wala nako tuyoa nga nakakita og pipila ka mga imahe sa pornograpiya, ug miabli ako og sigi sa mga website sa pornograpiya sa misunod nga mga bulan. Ang web site milingla kanako.

Gusto kong magpakitabang sa uban, apan dili ako sigurado kon kang kinsa—o unsaon. Unsaon man nako sa pag-istorya sa akong mga ginikanan mahitungod niini? Unsaon man nako sa pag-angkon sa akong bishop nga bisan og dako na ang akong kalamboan, dili ako makahunong nga maapil niining imoral nga kinaiya? Gusto na kaayo kong moundang, apan naulaw kaayo ko sa akong kahuyang nga isulti ngadto sa uban, mao nga akong gitagoan sa kaugalingon ang akong pagkaadik.

Wala gani ako mosulti sa akong asawa, nga akong gipakaslan niadtong tuig 2000. Gusto nako siyang sultihan mahitungod sa akong problema kon mag-date kami, apan nahadlok ako basin unya og iya akong ipakaubos o, labaw pa dili makigminyo kanako. Mao nga namakak ako. Ug padayon nakong gihimo kini bisan sa among kaminyoon. Akong namatikdan nga nagkaabtik ako nga dili masakpan. Akong gitago ang mga litrato nganha sa computer. Sa dihang nangutana ang akong asawa mahitungod sa nakita nga mga link, mibalibad ko nga ako wala mahibalo sa iyang gipangsulti. Ang pagkaadik ingon niana, nagmugna kini og grabe nga mga bakak. Nahibalo ko nga nagmugna kini og bangil sa among kaminyoon ug naghatag kaniya og grabe nga kasakit, apan dili ko moangkon nga duna koy problema. Unsay importante kaayo kanako dili ang akong kinaiya apan unsay pagtan-aw sa mga tawo kanako.

Ang duha ka nawong sa akong kinabuhi—ug ang misangpot nga pagkawala sa Espiritu—naghimo kanakong wala nay panagang sa grabeng mga sala, lakip na ang kamaluibon. Ang akong asawa adunay kusog nga impresyon nga ako dunay problema ug misulti kanako mahitungod niini. Uban sa dakong pagbasol, akong giangkon ang akong mga nahimo.

Mao kadto ang pinakaubos nga hitabo, ang hitabo nga akong naamgohan nga angayan nakong usbon. Naglingkod sa akong atbang mao ang babaye nga akong gihigugma. Siya nahigugma kanako. Siya akong giluiban. Mihimo dayon ako og determinasyon sa paglihok kon unsay gikinahanglan aron maluwas ang among relasyon ug ang among pamilya.

Akong gisugdan ang regular nga pakigkita sa akong bishop sa paglihok sa proseso sa paghinulsol ug sa Church discipline. Misugyot siya nga motambong ako og mga miting sa programa alang sa pagkaayo sa pagkaadik, nga gitanyag pinaagi sa LDS Family Services. Wala pa gayud ako makadungog niana nga programa. Akong nahibaloan nga ang grupo nagpahigayon og libre, kompidensyal nga mga miting pinasikad sa 12 ka mga ang-ang kabahin sa Alcoholics Anonymous, nga gipahiangay sa usa ka pinasikad sa doktrina nga han-ay ug mga baruganan sa Simbahan.

Moangkon ko nga atol sa unang pipila ka mga miting, nakaingon ko, “dili ko angay dinhi. Sa tinuod wala akoy problema sa pornograpiya. Mahimo ra kong mohunong bisan kanus-a.” Kana, siyempre, dili tinuod.

Uban sa pagdasig sa akong bishop, mipadayon ako sa pagtambong. Ang akong garbo nag-anam og katunaw, ug nagsugod ako sa pagtrabaho sa mga ang-ang sa programa: Kamatinuoron, paglaum, pagsalig sa Dios, kamatuoran, pagkumpisal, kausaban sa kasingkasing, pagpaubos, pagpangita og kapasayloan, pag-uli ug pagpakig-uli, inadlaw nga pagkamay-tulubagon, personal nga pagpadayag, ug serbisyo. Sa unang higayon sulod sa dugayng panahon, nagpuyo ako og usa ka “hapsay” nga kinabuhi, usa ka kinabuhi nga walay pornograpiya. Ang pagkaayo wala pa gayud “matapos,” apan napaila ako ngadto sa usa ka bag-o nga kagawasan. Miabut kini tungod kay sa akong pag-apil sa 12 ka mga pamaagi, akong nasabtan kon unsa ang nagpaluyo sa akong pagkaadik.

Akong nakat-unan nga kadaghanan sa mga tawo nga nakigbatok sa pagkaadik miadto sa pipila ka matang sa “kinaugalingon nga pagtambal” aron masudlan ang mga haw-ang sa ilang kinabuhi. Kasakit, kasub-anan, kaguol, kahadlok, o ubang matang sa pagka dili komportable mohimo sa pag-agni og mga tawo aron sa paggamit niining kinaugalingon nga pagtambal aron mobati sila nga mas arang-arang. Ang ubang mga tawo mogamit og mga girisita nga mga tambal. Ang uban mogamit og ginadili nga mga drugas. Ang uban mogamit og alkohol. Alang kanako, ang pornograpiya nagtanyag og dili molungtad, artipisyal “dali nga katagbawan” nga gituohan nakong maoy akong gikinahanglan.

Ang pagkahibalo kon unsay hinungdan sa akong pagkaadik usa ka maayong butang. Ang paglikay sa mga dapit nga maoy hinungdan sa akong pagkaadik usa usab ka maayong butang. Kini nga buhat nagkinahanglan sa pagkamabinantayon 24 ka oras sa usa ka adlaw, pito ka adlaw sa usa ka semana alang sa nahibilin sa akong kinabuhi. Dili ko mahimong mag-internet “aron lang mag-browse.” Sa pagkatinuod, kon ako rang usa, dili na ko mag-internet. Dili ako makatan-aw sa usa ka ad o pahinumdom ug moabi-abi niini sulod sa akong hunahuna. Wala kami cable TV sa among balay. Kon magsakay ako padulong sa trabaho, akong likayan ang pag-agi sa mga dalan tungod kay nahibalo ko nga adunay mga karatula subay adto nga mga dalan nga magsugyot og dili maayong panghunahuna. Kon magsugod man og kalain ang akong hunahuna, akong hunahunaon ang akong awasa, akong bishop, ug sa pag-ampo alang sa kalig-on.

Ang akong pagkaadik nakaapekto sa hapit tanang bahin sa akong kinabuhi, apan ang pagsunod niini nga mga pahimangno igo kaayo ang bili. Dili nako mahimong ibaliwala kini nga mga panagang tungod kay nasayud ako kon unsay mahimo sa akong pagkaadik ngari kanako ug sa akong mga minahal.

Dili lamang kini kay usa ka paglikay sa dili maayo, bisan pa. Ako usab kinahanglan nga magmakanunayon, mahunahunaon nga naningkamot sa pagbuhat og maayo. Daghan sa dose ka mga pamaagi nakatabang kanako sa paghimo niini pinaagi sa pagdala kanako paduol sa Dios.

Matag adlaw kon ako mobangon, moluhod ako ug magpasalamat sa Langitnong Amahan sa paghatag kanako og oportunidad sa paghinulsol sa akong mga sala ug sa pagpaduol Kaniya pinaagi sa Pag-ula sa Iyang Anak, si Jesukristo. Siya akong gihangyo nga ako masayud sa Iyang kabubut-on aron ako makahimo niini. Siya akong gihangyo sa paggiya kanako sa dalan palayo sa tintasyon. Nag-ampo ako ingon og ako nagasalig sa Langitnong Amahan sa matag minuto kada adlaw—tungod kay gihimo ko kini—ug kana nga pag-ampo akong gitipigan sa akong kasingkasing sa tibuok adlaw. Nag-ampo ako pag-usab matag gabii. Ako usab migahin og panahon matag adlaw sa mga kasulatan aron ma-focus ang akong hunahuna sa maayong mga butang. Kon ako dili mohimo niini nga usa ka kinaiya, wala kanako ang Espiritu sa akong kinabuhi. Ug kon ako lang, dili igo ang akong kalig-on sa pagbatok sa mga tintasyon.

Sulod sa dugayng panahon nagtuo ko nga makabuntog na ako sa akong kinaiya bisan kanus-a nga akong gusto sa kaugalingon nakong kabubut-on. Apan pakyas ako sa hilabihan. Human sa pipila ka higayon nagkaluya ako sa paghimo niini nga ako ra, ilabi na nga “sa akong kaugalingon” wala kini nahimo. Akong naamgohan nga ako dili makahimo kon unsay akong gikinahanglang buhaton nga wala ang tabang sa Ginoo. Ang Ether 12:27 nagtabang kanako sa mas maayo nga panabut. Ang Ginoo miingon kang Moroni, “Ang akong grasya igo alang sa tanan nga mga tawo nga magpaubos sa ilang mga kaugalingon diha sa akong atubangan, kay kon sila magpaubos sa ilang mga kaugalingon diha sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.”

Kausa nga miadto ako Kaniya, padayon sa paghimo sa tanan nga akong mahimo (tan-awa sa 2 Nephi 25:23), akong naamgohan nga makahimo ako og mas maayo ug mamahimong mas labaw pa uban sa Iyang tabang kay sa sukad nga akong gipangandoy pinaagi sa pagsalig sa kaugalingon nakong mahimo (tan-awa sa Alma 7:14).

Ang akong asawa ug ako karon nagserbisyo isip mga tigpahiluna sa mga miting sa programa alang sa pagkaayo sa pagkaadik. Nakakat-on siya—ug nagtabang sa ubang nga makasabut—nga ang Pag-ula dili lamang alang sa mga naningkamot sa pagbuntog sa pagkaadik apan usab alang sa mga naapektohan sa pagkaadik bisan dili maoy ilang kagustuhan. Kon moadto kita sa Manluluwas, ang Iyang grasya mahimong molihok sa tanan natong kinabuhi.

Alang sa mga nakigbatok sa pagkaadik ug sa mga tawo nga ilang gimahal, makapamatuod ako nga adunay paglaum. Kanunay adunay paglaum sa ebanghelyo ni Jesukristo.

Hilabihan ang akong pagpasalamat kang Jesukristo tungod kay Siya gayud ang miluwas kanako gikan sa mga kadena sa sala. Ang pagkaadik susama nga ikaw gikadenahan nga “mao ang higot nga migapos sa mga katawhan, nga sila pagabihagon ngadto sa walay katapusan nga bung-aw sa pagkauyamot ug pagkaalaot” (2 Nephi 1:13). Sa akong pagkaamgo nga nasulod ako sa problema, wala ako masayud kinsa ang akong adtoan. Nasubo kaayo ako tungod kay ako dili makapalingkawas sa akong kaugalingon gikan sa akong kahimtang. Apan ang Ginoo makapalingkawas kanako. Dihang ako midangup Kaniya, anaa Siya sa pagtabang.

Akong gibati ang sama kang Ammon: “ Oo, ako nasayud nga ako walay bili; ingon sa akong kusog ako mahuyang; busa ako dili manghambog sa akong kaugalingon, apan ako manghambog sa akong Dios, kay diha sa iyang kusog ako makahimo sa tanan nga mga butang ” (Alma 26:12). Nasayud ako nga ang Dios makahimo sa pagtabang kanato sa tanang butang, lakip na ang pagbuntog sa mga kadena sa pagkaadik.